मत्ती 10 - मंडयाली नंऊँआं नियम

यीसू रे बारा चुणिरे चेले

¹ तेबे यीसूए आपणे बारा चेले आपु वाले सादे, होर तिन्हा जो दुस्टात्मा काढणे रा हक दितेया, ताकि स्यों दुस्टात्मा जो काढे होर हर किस्मा री ब्मारिया होर कमजोरिया जो ठीक करहे।

² होर यीसू रे बारा चुणिरे चेले रे नांऊँ एह्ड़े ऐं, पैहला समौन, जेस जो पतरस भी बोल्हा ऐं, होर तेसरा भाई अन्द्रियास; जब्दी रा मह्ठा याकूब, होर तेसरा भाई यहून्ना;

³ फिलिप्पुस होर बरतुल्मै थोमा होर चुंगी लैणे वाल़ा मत्ती, हलफईसा रा मह्ठा याकूब होर तद्दै।

⁴ समौन कनानी, जेहड़ा जेलोतेस दला रा था, होर यहूदा इस्करयोति, जिन्हें जे से पकड़वाई भी दितेया।

बारा चेलेया जो सेऊआ रे कठे भेजणा

⁵ जेबे यीसूए आपणे बारा चेले खुसी री खबर सूनाणे रे कठे लग-लग जगहा भेजे, तिन्हें तिन्हा जो ये बिधिया दिती, “एह्ड़ी जगहा देख्या जांदे जेथी गैर-यहूदी लोक रैंहयां ऐं, होर एह्ड़े गांऊँआं मन्झ देख्या जांदे जेथी सामरिया ईलाके रे लोक रैंहयां ऐं।

⁶ बल्कि इस्राएल देसा रे लोका वाले जा क्यूंकि स्यों तिन्हा भेडा साहीं ऐं जो पुहाला ले लग हुई गईरी।

⁷ होर जांदे-जांदे एह्ड़ा प्रचार करा कि स्वर्गा रा राज नेडे आई गईरा।

⁸ रोगिया जो ठीक करा; मरिरे या जो जिउंदा करा, कोढ़िया जो सुद्ध करा, दुस्टात्मा काढा। तुस्सा जो मुफ्त मिलिरा, तुस्से भी मुफ्त देआ।

⁹ आपणे बटुऐ मन्झ सोना, चांदी, होर ताम्बा देख्या रखदे।

¹⁰ पैंडे रे कठे झोला देख्या रखदे, ना दो कुरते, ना बूट ना डंडा, क्यूंकि मजदूरा जो आपणा खाणा मिलणा चहिए।

¹¹ जेस केसी गांऊँआं मन्झ तुस्से जान्घे ता पता करा कि तेथी कुण इज्जतदार माह्णुंआं? ता तेसरे ई घरा मन्झ रहुआ, जेबे तक कि तुस्से तेस गांऊँआं जो छाडी नी देंघे।

¹² होर घरा अंदर जांदे हुए तेस जो आसीस देआ।

¹³ अगर तेस घरा रे लोक परमेसरा री आसीसा पाणे रे लायक हुन्घे ता तुस्सा री आसीसा रे कठे कितिरी प्रार्थना तेस घरा पर बणी रैंहणीं, पर अगर स्यों एस लायक नी हो ता तुस्सा री कितिरी प्रार्थना री वजहा ले तुस्सा जो आसीस मिलणी।

¹⁴ होर जो कोई तुस्सा जो नी मन्हें होर तुस्सा री गल्ला नी सुणें, ता तेस घरा या तेस गांऊँआं ले निकल्दे हुए आपणे पैरा री धूल झाड़ी देआ।

¹⁵ हांऊँ तुस्सा किन्हें सच्च बोल्हा कि, न्याय रे ध्याड़े तेस गांऊँआं रे लोका री हालत सदोम होर गमोरा रे सैहरा री हालत ले ज्यादा खराब हूणीं।”

आऊणें वाल़ा संकट

¹⁶ “हांऊँ तुस्सा जो भेडा साहीं एह्ड़े लोका वाले भेज्या करहा जो भेड़िये साहीं खतरनाक ऐं, इधी कठे कीड़े साहीं बुद्धिमान होर कबूतरा साहीं भोले बणा।

¹⁷ पर तिन्हा लोका ले चतन्न रैहया, क्यूंकि तिन्हा तुस्से कच्हरी मन्झ लई जाणे, होर आपणी यहूदी सभा मन्झ तुस्सा जो कोड़े मारणे।

¹⁸ क्यूंकि तुस्से मेरे चेले हूंणे री वजहा ले मेरी गुआही देणे रे कठे हाकमा होर राजे होर अन्यजाति लोका रे साम्हणें पेस हूंणां पऊणा।

¹⁹ जेबे स्यों तुस्सा जो पकड़वाये ता ये फिकर मत करदे कि, आस्सा क्या होर क्या बोलणा; क्यूंकि जो कुछ तुस्सा जो बोलणा हुन्घा, से परमेसरा तुस्सा जो तेस ई टैम दसी दितेया जाणा।

²⁰ क्यूंकि बोलणे वाल़े तुस्से नी ऐं पर तुस्सा रे बापू री आत्मा तुस्सा मन्झ हुई किन्हें बोल्हा ई।”

²¹ “भाईया-बैहणीया आपणे भाई बैहण, होर कई माऊ-बापू आपणे बाल बच्चे धोखे किन्हें मुकाई देणे, होर बाल बच्चेया भी आपणे माऊ-बापू धोखे किन्हें मुकाई देणे।

²² होर तुस्से मेरे पर विस्वास रख्हा इधी कठे सभी लोका तुस्सा किन्हें बैर करणा; पर जो मरणे रे टैमा तक मेरे पर विस्वास करघा, तेसरा ई उद्धार हूंणां।

²³ जेबे स्यों तुस्सा जो एक गांऊँआं मन्झ स्ताए, ता दूजे गांऊँआं जो भगी जाया। हांऊँ तुस्सा किन्हें सच्च बोल्हा, तुस्सा इस्राएल देसा रे सारे गांऊँआं मन्झ घूमणा पूरा नी करी पाणा कि मां माह्णुं रे मह्ठे आई जाणा।

²⁴ चेला आपणे गुरु ले बडा नी हुन्दा, होर ना गुलाम आपणे माल्का ले।

²⁵ चेले रा गुरु रे, होर गुलामा रे माल्का रे बराबर हूंणां ई बौह्त आ। जेबे इन्हें घरा रे माल्का जो सैतान बोल्या ता तेसरे घरवाल्या जो केस-केस नांऊँआं ले बोलणा?”

केस ले डरणा चहिए?

²⁶ “इधी कठे तिन्हा लोका ले मत डरदे जो तुस्सा रे खिलाफ बुरा करहा ऐं। क्यूंकि हर एक चीज़ जेह्ड़ी ढख्ही री, से खोली दिती जाणी; होर जो कुछ लुख्ही रा, ता सब लोका से जाणी लेणा।

²⁷ जेसरा मतलब ये आ जो हांऊँ तुस्सा किन्हें नह्यारे मन्झ बोल्हा, तुस्से एता जो बिना डरे सभिरे साम्हणें बोली सके; होर जो गल्ला तुस्सा किन्हें चुपके-चुपके बोलिरी, तेता जो घरा री छता प्रयाह्ले ले प्रचार करा।

²⁸ जो सरीरा जो मारहा ऐं, पर आत्मा जो नी मारी सक्दे, तिन्हा ले मत डरदे, पर परमेसरा ले ई डरा; जो आत्मा होर सरीर दुंहीं जो नरका मन्झ नास करी सक्हा।

²⁹ क्या दो छोटी चिड़िया इतनी सस्ती नी की एक पैसे मन्झ बिक्की जाई? फेरी भी जेबे स्यों जमीना पर पई जाई ता तुस्सा रे बापू जो एता रे बारे मन्झ पता लगी जाहाँ।

³⁰ पर तुस्सा रे मूंडा रे सारे बाल भी गिणीरे।

³¹ इधी कठे, डरा नी; तुस्से बौह्त चिड़िया ले बढ़ी किन्हें ऐं।”

यीसू जो मनणा या नी मनणा

³² “इधी कठे जो कोई माह्णुं रे साम्हणें मुंजो मन्नी लैन्घा से मां भी आपणे स्वर्गीय बापू रे साम्हणें मन्नी लैणा।

³³ पर जो कोई माह्णुं रे साम्हणें मुंजो नी मन्नघा, ता मां भी आपणे स्वर्गीय बापू रे साम्हणें से नी मनणा।”

यीसू रे आऊंणा रा नतीजा

³⁴ “ये नी समझा कि हांऊँ धरती रे लोका रे बीचा मन्झ मेल मलाप करान्दा आईरा; हांऊँ मेल मलाप कराणे रे कठे नी! पर लोका जो एक दूजे रे बीचा बरखलाप करणे रे कठे आईरा।

³⁵ हांऊँ ता आईरा कि, माह्णुं जो तेसरे बापूआ ले, होर मह्ठी जो तेस्सा री माऊआ ले, होर न्हुसा जो तेस्सा री सासा ले बरखलाप करी दूं।

³⁶ माह्णुं रे दुस्मण तेसरे आपणे घरा रे ई लोक हूंणे।

³⁷ जो आपणे माऊ-बापू जो मेरे ले ज्यादा प्यारा करहा से मेरे लायक नी आ, होर जो मह्ठे या मह्ठीया जो मेरे ले ज्यादा प्यारा करहा, से मेरा चेला बणने रे लायक नी हाया।

³⁸ होर जो आपणा क्रूस लई किन्हें मेरे पीछे नी चलदा, से मेरा चेला बणने रे लायक नी हाया।

³⁹ जो कोई आपणी जान बचाणा चाहां, तेस अनंतकाला री जिन्दगी खोई देणी, पर जो कोई मेरे वजहा ले आपणी जान गुआई देह्न्गा, तेस हमेसा री जिन्दगी पाणी।”

इनाम

⁴⁰ “जो तुस्सा जो अपनाहां, से मुंजो अपनाहां; होर जो मुंजो अपनाहां, से मेरे भेजणे वाल़े परमेसरा जो अपनाहां।

⁴¹ जो नबिया जो नबी जाणी किन्हें मन्नी लेया, तेस जो नबिया जो मिलणे वाल़ा इनाम मिलणा; होर जो धर्मी जाणी किन्हें धर्मी जो मन्नी लेया, तेस धर्मीयो जो मिलणे वाल़ा इनाम मिलणा।

⁴² जो कोई इन्हा छोटेया मन्झा ले एकी जो मेरा चेला जाणी किन्हें सिर्फ एक ग्लास ठंडा पाणी प्याये, हांऊँ तुस्सा किन्हें सच्च बोल्हा कि, परमेसरा तिन्हा जो पक्का इनाम देणा।”