लूका 7 - मंडयाली नंऊँआं नियम

एक सूबेदारा रा विस्वास

¹ जेबे यीसू लोका जो आपणी सारी गल्ला सुणाई चुक्केया, ता से कफरनहूम सैहरा मन्झ आया।

² होर तेथी एक सूबेदार था जेसरा सेऊआदार इतना ब्मार था कि से मरणे ई वाल़ा था, से सेऊआदार तेसरे कठे बौह्त प्यारा था।

³ जेबे तिन्हें यीसू रे बारे मन्झ सुणेया ता कुछ यहूदी लोक होर यहूदी मुखिये तेस वाले ये अर्ज करणे रे कठे तेस वाले भेजे कि, से आई किन्हें तेसरे सेऊआदारा जो ठीक करी दे।

⁴ स्यों यीसू वाले आई किन्हें तेस किन्हें बड़ी मिन्नत करदे लगे, “से एस लायक आ कि, तू तेसरे कठे ये करहे।

⁵ क्यूंकि से आस्सा री जाति किन्हें प्यार रख्हा होर तिन्हें ई आस्सा रे यहूदी सभा जो बणाईरा।”

⁶ होर यीसू तिन्हा साउगी चली गया, होर जेबे से घरा रे नेडे था, ता सुबेदारे तेस वाले कई दोस्ता रे ज्रीए ये खबर भेजी कि, “हे प्रभु दुःख नी उठा, क्यूंकि हांऊँ एस लायक नी आ कि, तू मेरे घरा मन्झ आये।

⁷ एता कठे मैं आपणे आपा जो एस लायक भी नी समझ्दा कि हांऊँ तेरे वाले आऊँ, पर सिर्फ बोली दे ता मेरे सेऊआदारा ठीक हुई जाणा।

⁸ हांऊँ भी केसी रे अधीन रैहणे वाल़ा माह्णुं आ, होर स्पाही मेरे अधीन ऐे, होर जेबे हांऊँ एकी जो बोल्हा, ‘जा,’ ता से चली जाहाँ, होर दूजे जो बोल्हा कि, ‘आऊ,’ ता से आहूँआं; होर आपणे केसी सेऊआदारा जो बोल्हा कि, ‘ये कर,’ होर से तेहड़ा ई करहा।”

⁹ ये सुणी किन्हें यीसू जो हरानी हुई, होर तिन्हें पीछे मुड़ी फेरी किन्हें तेस्सा भीड़ा किन्हें जो तेसरे साउगी चलिरी थी बोल्या, “हांऊँ तुस्सा किन्हें बोल्हा की मुंजो इस्राएल देसा मन्झ कोई एह्ड़ा माह्णुं नी मिल्या जो मेरे पर विस्वास करा।”

¹⁰ होर जो दोस्त सुबेदारे भेजिरे थे, तिन्हें घरा जाई किन्हें तेस सेऊआदारा जो ठीक ठाक देखेया।

विधवा रे मह्ठे जो जिन्दगी देणा

¹¹ थोह्ड़े ध्याड़े ले बाद यीसू नाईन सैहरा जो गया, होर तेसरे चेले, होर बडी भीड़ भी तेस साउगी चली।

¹² जेबे से गांऊँआं रे फाटका वाले पुज्हेया, ता लोके एक मरिरे जो अर्थी पर चक्की किन्हें बाहर लई जाया करहा ऐं थे। से आपणी माऊआ रा कल्हा-कल्हा मह्ठा था, होर से जन्नानी एक विधवा थी, होर गांऊँआं रे बौह्त सारे लोक तेस्सा साउगी थे।

¹³ तेस्सा जो देखी किन्हें प्रभु दया किन्हें भरी गया, होर यीसूए तेस्सा विधवा किन्हें हिम्मत देंदे हुए बोल्या, “मत रो।”

¹⁴ तेबे तिन्हें नेडे जे आई किन्हें अर्थी छुही; होर अर्थी चकणे वाल़े रुकी गये, तेबे तिन्हें बोल्या, “हे जुआन, हांऊँ तुजो बोल्हा, उठी जा!”

¹⁵ तेबे से मुर्दा उठी बैठया, होर बोल्दा लग्या: होर तिन्हें से तेसरी माऊआ जो सौंपी दितेया।

¹⁶ ये देखी किन्हें सभ लोक बौह्त डरी गये, होर स्यों परमेसरा री बड़ाई करी किन्हें बोल्दे लगे कि, “आस्सा रे बीचा मन्झ एक बड़ा नबी आई गईरा। होर परमेसरे आपणे लोका जो मदद करणे रे कठे आई गईरा।”

¹⁷ होर तेसरे बारे मन्झ ये गल सारे यहूदिया ईलाके होर ओरले परले, नेडे रे सारे ईलाके मन्झ फैल्ही गयी।

यहून्ना बपतिस्मा देणे वाल़े रा सुआल

¹⁸ होर यहून्ना बपतिस्मा देणे वाल़े रे चेले आई किन्हें यहून्ना जो इन्हा गल्ला री खबर दिती।

¹⁹ तेबे यहून्ने आपणे दो चेले प्रभु वाले ये सुआल करणे रे कठे भेजे कि, “क्या तू सेई मसीह आ जेस जो भेजणे रा वादा परमेसरे कितिरा था, या आस्से केसी होरी जो नह्यालिए?”

²⁰ यहून्ना रे चेले तेस वाले आई किन्हें बोल्या, “यहून्ना बपतिस्मा देणे वाल़े आस्से तेरे वाले ये पुछणे रे कठे भेजिरे कि, आऊणें वाल़े तुस्से ई ऐं कि, आस्से केसी होरी जो नह्यालिए?”

²¹ तेस ई टैम यीसूए कईया जो बमारिया ले, होर पीड़ा, होर दुस्टात्मा ले छुड़ाया, होर बौह्त सारे काणे लोका री हाखिया जो ठीक कितेया।

²² होर यीसूए यहून्ना रे चेले किन्हें बोल्या, “जो कुछ तुस्से देख्या होर सुणेया, जाई किन्हें यहून्ना बपतिस्मा देणे वाल़े किन्हें बोली देआ कि, काणे देख्हा ऐं, लंगड़े चल्हा फिरहा ऐं, कोढ़ी ठीक किते जाहें, होर टौणें सुणहां ऐं, मरिरे या जो जिउंदा कितेया जाहाँ, होर गरीबा जो खुसी री खबर सुणाई जाहीं।

²³ होर धन्य ऐं स्यों, जो मेरे पर विस्वास करणा नी छाडदे।”

²⁴ जेबे यहून्ना बपतिस्मा देणे वाल़े रे भेजिरे दूत चली गये, ता यीसू यहून्ना रे बारे मन्झ लोका किन्हें बोल्दा लग्या, “तुस्से बियाबान जगहा मन्झ क्या देख्दे गईरे थे? क्या बागरा किन्हें हिल्दे लगिरे सरकंडे जो?

²⁵ ता फेरी तुस्से क्या देख्दे गईरे थे? जिन्हें मैहंगे कपड़े पैहनीरे थे? नी, जो मैहंगे कपड़े पैन्हां ऐं होर सुख विलासा किन्हें रैंहयां ऐं, स्यों राजमहला मन्झ रैंहयां ऐं।

²⁶ ता फेरी तुस्से क्या देख्दे गईरे थे? क्या केसी नबी जो देखणे रे कठे? हां, हांऊँ तुस्सा किन्हें बोल्हा, बल्कि नबी ले भी बडे जो।

²⁷ ये सेई आ, जेसरे बारे मन्झ लिखिरा कि: ‘देखा, हांऊँ आपणे दूता जो तेरे अगे-अगे भेज्हा, जेस तेरे अगे-अगे पैंडा ठीक करणा।’”

²⁸ हांऊँ तुस्सा किन्हें बोल्हा कि, जितने भी लोका रा संसारा मन्झ जन्म हुईरा, तिन्हा मन्झा ले यहून्ना बपतिस्मा देणे वाल़े ले कोई बडा नी हुआ। पर जो परमेसरा रे राजा मन्झ छोटे ले छोटा आ से तेस ले बडा आ।

²⁹ जेबे तिन्हें ये सुणेया कि यीसूए क्या बोल्या, तेबे सभीए एथी तक कि चुंगी लैणे वाल़े भी यहून्ना ले बपतिस्मा लई किन्हें ये मनी लया कि परमेसर धर्मी आ।

³⁰ पर फरीसी लोके होर व्यवस्था स्खाणे वाल़े आपणे बारे मन्झ परमेसरा री इच्छा जो टाल्ली दिती, क्यूंकि तिन्हें यहून्ना ले बपतिस्मा लेणे ले ना करी दिती।

³¹ “एता कठे हांऊँ एस जमाने रे लोका री तुलना केस साउगी करूं कि स्यों केस साहीं ऐं?

³² स्यों तिन्हा बच्चेया साहीं ऐं जो बजारा मन्झ बैठिरे एक दूजे किन्हें चिंगी-चिंगी किन्हें बोल्हा ऐं कि, ‘आस्से तुस्सा रे कठे बंसरी बजाई, होर तुस्से नी नाचे, आस्से रोये, पर तुस्से नी रोये!’

³³ क्यूंकि तुस्से यहून्ना बपतिस्मा देणे वाल़े रे कठे सिकायत करहे कि तिन्हें आपणा टैम रोटी खाणे होर अंगूरा रा रस पीणे मन्झ नी लगाया; फेरी भी तुस्से बोल्हा ऐं कि, तेस मन्झ दुस्टात्मा ई।

³⁴ हांऊँ माह्णुं रा मह्ठा आया होर आम लोका साहीं खांहां पिहां, होर तुस्से बोल्हा ऐं कि, ‘पेटू होर पियक्कड़ माह्णुंआं, चुंगी लैणे वाल़ेया रा होर पापिया रा दोस्त।’

³⁵ पर माह्णुं रे काम एस गल्ला रा फैसला करहे कि बुद्धिमान कुणहां।”

फरीसी लोका रे घरा मन्झ एक पापण ज्नाने जो माफी मिलणा

³⁶ फेरी केसी एक फरीसी लोके यीसू किन्हें अर्ज किती कि, मेरे साउगी खाणा खाऊआ। इधी कठे से तेस फरीसी रे घरा मन्झ जाई किन्हें खाणा खांदे बैठया।

³⁷ तेस सैहरा री एक पापण ज्नाने ये जाणी किन्हें कि यीसू केसी फरीसी रे घरा मन्झ खाणा खांदे बैठीरा, से संगमरमरा रे भांडे मन्झ कीमती इत्र लई आई।

³⁸ होर आई किन्हें यीसू रे पीछे खड़ी हुई गई, होर रोंदे हुए तेसरे पैरा जो आपणी हाखिया रे पाणी किन्हें सग्दी होर आपणे मूंडा रे बाला किन्हें पुन्झ्दी लगी। होर तेस्से तेसरे पैर बार-बार चूमी किन्हें पैरा गास इत्र मल्या।

³⁹ ये देखी किन्हें, से फरीसी जिन्हें जे यीसू सादिरा था, आपणे मना मन्झ सोच्दा लग्या, “अगर ये नबी हुन्दा ता जाणी लैंदा कि, ये जे तेस जो छुहेया करहा ई, से कुणहीं होर केह्ड़ी ज्नाने ई? क्यूंकि से ता पापण ई।”

⁴⁰ तेसरे मना री गल्ला जाणी किन्हें यीसूए बोल्या कि, “हे समौन हांऊँ तेरे किन्हें कुछ बोलणा चाहां।” तिन्हें बोल्या, “हे गुरु बोल।”

⁴¹ यीसूए ये उदाहरण देई किन्हें बोल्या “केसी महाजना रे दो देहणदार थे, एकी पर पांज सौ ध्याड़े री कमाई री कीमता री बराबरी रा कर्ज था, होर दूजे पर पंज्याह ध्याड़े री कमाई री कीमता री बराबरी रा कर्जा था।

⁴² क्यूंकि स्यों कर्जा वापस करणे री हालता मन्झ नी थे इधी कठे महाजने अनुग्रह करी किन्हें दुहीं रे कर्ज माफ करी दिते। इधी कठे तिन्हा मन्झा ले केस देहणदारा तेस किन्हें ज्यादा प्यार रखणा।”

⁴³ समौने जवाब दितेया, “मेरी समझा मन्झ से, जेसरा जे तिन्हें ज्यादा कर्ज माफ कितेया तेस ज्यादा प्यार रखणा।” यीसूए तेस किन्हें बोल्या, “तैं ठीक बोल्या।”

⁴⁴ होर यीसूए तेस्सा ज्नाने री तरफा मुड़ी किन्हें समौना किन्हें बोल्या, “क्या तू देखा कि एस्से ज्नाने क्या कितेया? हांऊँ तेरे घरा मन्झ आया पर आस्सा रे रुआजा रे मताबक तैं मेरे पैरा धोणे रे कठे पाणी नी दितेया। पर एस्से जन्नाने मेरे पैर हाखिया रे आंसू किन्हें सगे, होर आपणे बाला किन्हें पुन्झे।”

⁴⁵ आस्सा रे रुआजा रे मताबक तैं चूमी किन्हें मेरे स्वागत नी कितेया, पर जेबे ले हांऊँ आईरा तेभे ले एस्से जन्नाने मेरे पैर चूमणे नी छाडे।

⁴⁶ तैं मेरा आदर करणे रे कठे मेरे मूंडा पर जैतूना रा तेल नी मल्या; पर एस्से मेरे पैरा पर कीमती खुस्बूदार इत्र मल्या।

⁴⁷ “इधी कठे हांऊँ तुध किन्हें बोल्हा कि, एस्सा रे बौह्त सारे पाप माफ हुई गये, इधी कठे ऐस्से बौह्त प्यार जाहिर कितेया। पर जेसरा थोह्ड़ा माफ हुईरा, तेस थोह्ड़ा ई प्यार जाहिर करणा।”

⁴⁸ होर यीसूए तेस्सा ज्नाने किन्हें बोल्या, “तेरे पाप माफ हुई गये।”

⁴⁹ तेबे जो लोक तेस साउगी खाणा खांदे बैठिरे थे, स्यों आपणे-आपणे मना मन्झ सोच्दे लगे कि, “ये कुणहां आ जो पापा जो माफ करा जेस जो सिर्फ परमेसर माफ करी सका?”

⁵⁰ पर यीसूए ज्नाने किन्हें बोल्या, “परमेसरे तू बचाई लिती, क्यूंकि तैं मेरे पर विस्वास कितेया। सांति किन्हें चली जा।”