लूका 4 - मंडयाली नंऊँआं नियम

यीसू री परखणी

¹ फेरी यीसू पवित्र आत्मा ले भरी किन्हें, यरदन दराऊआ ले वापस चली गया; होर चाली ध्याड़े तक आत्मा री अगुवाई किन्हें बियाबान जगहा मन्झ फिरदा रैहया।

² होर सैतान तेसरी परखणी करदा रैहया। तिन्हा ध्याड़े मन्झ तिन्हें कुछ नी खाध्या होर जेबे स्यों ध्याड़े पुरे हुई गये, ता तेस जो भूख लगी।

³ सैताने तेस वाले आई किन्हें बोल्या, “अगर तू परमेसरा रा मह्ठा आ, ता एतो साबित करणे रे कठे इन्हा पात्थरा जो रोटी बणने रा हुक्म दे ताकि तू खाई सके।”

⁴ यीसूए तेस जो जवाब दितेया कि, “ये लिखिरा कि: ‘माह्णुं सिर्फ रोटी ले ई जिउंदा नी रैंह्णां।’”

⁵ तेबे सैतान तेस जो लई गया होर तेस जो एक पला मन्झ संसारा रे सारे राज दस्से।

⁶ होर सैताने यीसू किन्हें बोल्या, “मां ये सब हक, होर इन्हारी सान तुजो देई देणी, क्यूंकि ये सभ कुछ मुंजो देई दितिरा, होर जेस जो हांऊँ चाहूँ तेस जो ये सभ कुछ देई सक्हा।

⁷ इधी कठे अगर तू मेरी अराधना करघा, ता ये सब कुछ तेरा हुई जाणा।”

⁸ यीसूए तेस जो जवाब दितेया कि, ये लिखिरा कि, “तू प्रभु आपणे परमेसरा री अराधना कर, होर सिर्फ तेसरी सेऊआ कर।”

⁹ तेबे सैताने यीसू जो यरुस्लेम सैहरा मन्झ लई जाई किन्हें मन्दरा री चोटी पर खड़ा करी दितेया, होर तिन्हें यीसू किन्हें बोल्या, “अगर तू परमेसरा रा मह्ठा आ, ता एतो साबित करणे रे कठे आपणे आपा जो एथी ले हेठा जो सट्टी दे होर तुजो चोट नी लगणी,

¹⁰ क्यूंकि, परमेसरे पवित्र सास्त्र मन्झ ये लिखिरा कि: ‘तेस तेरे बारे मन्झ आपणे स्वर्गदूता जो हुक्म देणा कि, से तुजो बचाई ले,

¹¹ होर तेस तुस्से हाथो-हाथ चकी लैणे; केते एह्ड़ा नी हो कि तेरे पैरा जो पात्थरा किन्हें चोट लगे।’”

¹² यीसूए तेस जो जवाब दितेया, “पवित्र सास्त्र मन्झ ये भी लिखिरा आ कि, ‘तू प्रभु आपणे परमेसरा री परखणी मत कर।’”

¹³ जेबे सैतान परखणी करी बैठेया, ता थोह्ड़ी देरा रे कठे तेस वाले ले चली गया।

यीसू री सेऊआ री सुर्हूआत

¹⁴ फेरी यीसू आत्मा री सामर्था ले भर्ही किन्हें गलील जिल्ले जो वापस चली गया, होर तेसरी गल्ला ओरले परले सारे ईलाके मन्झ फैल्ही गयी।

¹⁵ होर यीसू तिन्हारी यहूदी सभा मन्झ उपदेस देंदा रैहया, होर सभ तेसरी बड़ाई करहा ऐं थे।

नासरत गांऊँआं मन्झ यीसू री बेज्जती

¹⁶ होर यीसू नासरत गांऊँआं मन्झ वापस आया; जेथी जे तेसरा पालण पोसण हुईरा था; होर से आपणे रीति रूआजा रे मताबक अरामा रे ध्याड़े यहूदी सभा मन्झ जाई किन्हें पवित्र सास्त्र पढ़ने रे कठे खड़ेया।

¹⁷ यसायाहा नबी री कताब तेस जो दिती, होर तिन्हें कताब खोल्ही किन्हें, से जगहा काढी जेथी जे ये लिखिरा था कि:

¹⁸ “प्रभु रा आत्मा मेरे गास आ, इधी कठे कि तिन्हें मुंजो गरीबा जो खुसी री खबर सुणाणे रे कठे मेरा अभिसेक कितिरा, ताकि हांऊँ कैदिया जो छुटकारे रा, होर काणेया जो नजर पाणे री खुसी री खबर प्रचार करूं। होर जो दभिरे ऐं तिन्हा जो छुड़ाऊँ।

¹⁹ होर प्रभु रे अनुग्रह रे टैमा रा प्रचार करूं।”

²⁰ तेबे यीसूए कताब बंद करी किन्हें सेऊआदारा रे हाथा मन्झ देई दिती, होर बैठी गया; होर यहूदी सभा रे सभी लोका री हाखिया तेस पर लगिरी थी।

²¹ तेबे से तिन्हा किन्हें बोल्दा लग्या कि, “आज ई पवित्र सास्त्रा रे ये लेख तुस्सा रे साम्हणें पूरा हुई गया।”

²² होर सभिए तेसरी तारीफ किती, होर जो भी अनुग्रह री गल्ला से बोल्हा था तिन्हा जो सुणी किन्हें स्यों सभ लोक हरान थे, होर स्यों बोल्दे लगे कि, “ये किहाँ हुई सका, ये ता युसुफा रा मह्ठा आ।”

²³ यीसू तिन्हा किन्हें बोल्या, “तुस्सा मेरे किन्हें ये कहावत जरूर बोलणी, ‘कि हे बैदा, आपणे आपा जो ठीक कर! जो कुछ आस्से सुणेया कि जेह्ड़ा तैं कफरनहूम सैहरा मन्झ कितेया तेता जो एथी आपणे ईलाके मन्झ भी कर।’”

²⁴ होर तिन्हें बोल्या, “हांऊँ तुस्सा किन्हें सच्च बोल्हा, कोई नबी आपणे गांऊँ मन्झ इज्जत नी पांदा।

²⁵ सुणा, होर हांऊँ तुस्सा किन्हें सच्च -सच्च बोल्हा कि, एलिय्याह नबी रे टैमा मन्झ जेबे साढ़े त्राय साला तक बरखा नी हुई, एथी तक कि सारे इस्राएल देसा मन्झ बौह्त बडा अकाल पया, तेथी इस्राएल देसा मन्झ बौह्त सारी विधवा थी।

²⁶ पर एलिय्याह नबी जो, सैदा सैहरा रे सारफत गांऊँ मन्झ रैहणे वाली गैर-यहूदी विधवा जो छाडी किन्हें केसी होरी विधवा वाले नी भेज्या।

²⁷ होर एलिसा नबी रे टैमा इस्राएल देसा मन्झ बौह्त कोढ़ी थे, पर गैर-यहूदी नामान जो सीरिया देसा रा था तेस जो छाडी किन्हें केसी होरी कोढ़ी जो सुद्ध नी कितेया गया।”

²⁸ ये गल्ला सुणदे ही जितने लोक यहूदी सभा मन्झ थे, सभ गुस्से किन्हें भर्ही गये।

²⁹ होर तिन्हें उठी किन्हें तेस जो गांऊँआं ले बाहर काढी दितेया, होर जेस प्हाड़ा पर से गांऊँ बस्सी रा था, तेता री चोटी पर तेस जो लई गये, ताकि स्यों तेस जो मारणे रे कठे तेथी ले हेठा जो सट्टी दे।

³⁰ पर से तिन्हारे बीचा मन्झा ले बची निकली किन्हें दूजी जगहा जो चली गया।

दुस्टात्मा ले दुखी माह्णुं रा ठीक हूंणा

³¹ फेरी यीसू गलील जिल्ले रे कफरनहूम सैहरा मन्झ गया, होर से अरामा रे ध्याड़े तिन्हा लोका जो उपदेस देंदा लगेया।

³² स्यों तेसरे उपदेसा ले बौह्त हरान हुई गये क्यूंकि से हका साउगी उपदेस देहां था।

³³ यहूदी सभा मन्झ एक माह्णुं था, जेस मन्झ जे दुस्टात्मा थी।

³⁴ तिन्हें चिंगी किन्हें बोल्या, “हे नासरता रे यीसू, तू आस्सा जो परेसान कि लगिरा करदा? क्या तू आस्सा जो नास करणे रे कठे आईरा? हांऊँ तुजो जाणहां तू कुणहां? तू परमेसरा री तरफा ले आईरा पवित्र मसीह आ!”

³⁵ यीसूए तेस जो प्रुआची किन्हें बोल्या, “चुप बैठ, होर तेस मन्झा ले निकली जा!” तेबे दुस्टात्मा तेस जो बीचा मन्झ पटकी किन्हें बगैर नुकसान किते तेस मन्झा ले निकली गई।

³⁶ एस गला पर सभ लोक हरान हुई गये, होर स्यों आपु मन्झ गल्ला करी किन्हें बोल्दे लगे, “ये केह्ड़ा बचन आ? कि से हका होर सामर्था साउगी दुस्टात्मा जो हुक्म देहां, होर स्यों निकली जाहीं।”

³⁷ होर तेसरा नांऊँ जल्दी ई गलील ईलाके रे हर जगहा फैल्ही गया।

पतरसा री सास होर दूजे लोका रा ठीक हूंणा

³⁸ यीसू यहूदी सभा मन्झा ले उठी किन्हें समौना रे घरा जो गया होर समौना री सास तेज बुखारा किन्हें तड़फया करहा ई थी, होर तिन्हें तेस्सा रे कठे यीसू किन्हें अर्ज किती।

³⁹ यीसूए तेस्सा रे नेडे खड़ी किन्हें बुखारा पर झिड़केया होर तेस्सा रा बुखार उतरी गया, होर से झटपट उठी किन्हें तेसरी सेऊआ करदी लगी।

⁴⁰ होर जेबे सूरज डूब्बेआ करहा था, होर अरामा रा ध्याड़ा खत्म हुआ, तेथी बौह्त लोक जो कई तरहा री ब्मारिया मन्झ पईरे थे, लोके स्यों सभ यीसू वाले ल्यांदे, होर तिन्हें एक-एकी जो हाथा किन्हें छुही किन्हें ठीक किते।

⁴¹ होर दुस्टात्मा बड़ी भारी चिंगदी लगी होर ये बोल्दी लगी कि, “तू परमेसरा रा मह्ठा आ,” होर स्यों कईया मन्झा ले निकली गयी, पर से तिन्हा जो झिड़क्हा था होर तिन्हा जो बोलणे नी देंदा था, क्यूंकि स्यों जाणहां ऐं थे कि से मसीह आ।

गलील जिल्ले मन्झ प्रचार

⁴² जेबे ध्याड़ा हुई गया ता यीसू बियाबान जगहा जो चली गया, होर भीड़ा री भीड़ तेस जो तोपी किन्हें तेस वाले आई होर तेस जो रोक्दी लगी कि, आस्सा वाले ले मत जा।

⁴³ पर यीसूए तिन्हा किन्हें बोल्या, “मुंजो होर भी गांऊँआं मन्झ जाई किन्हें परमेसरा रा खुसी री खबर सुनाणा जरूरी आ, क्यूंकि हांऊँ एता रे कठे भेजिरा।”

⁴⁴ होर यीसू गलील जिल्ले रे यहूदी सभा मन्झ प्रचार करदा रैहया।