लूका 3 - मंडयाली नंऊँआं नियम

यहून्ना बपतिस्मा देणे वाल़े रा प्रचार

¹ रोम देसा रा सम्राट तिबिरियुस महाराजे रे राजा रे पन्ध्रुए साला मन्झ पुन्तियुस पिलातुस यहूदिया ईलाके रा हाकम था। तेस टैमा मन्झ हेरोदेस राजा गलील जिल्ले पर राज करहा था। राजा हेरोदेस राजे रा भाई फिलिप्पुस इतूरैया होर त्रखोनितिस जिल्ले पर राज करहा था। होर अबिलेने जिल्ले पर लिसानियास राज करहा था।

² होर तेबे हन्ना होर कैफा बडे याजक थे। तेस टैम परमेसरा रा बचन बियाबान जगहा मन्झ जकरयाह रे मह्ठे यहून्ना बपतिस्मा देणे वाल़े पुज्हेया।

³ होर यहून्ना बपतिस्मा देणे वाल़ा यरदन दराऊआ रे ओरले परले सारे ईलाके मन्झ आई किन्हें पापा री माफी रा प्रचार करदा लग्या कि, “पाप करणा छाडी देआ, होर बपतिस्मा लउआ होर परमेसरा तुस्सा रे पाप माफ करणे।”

⁴ यसायाह नबिये यहून्ना बपतिस्मा देणे वाल़े रे मन्झ बोलिरा था जेबे तिन्हें आपणे कताबा मन्झ लिखिरा कि; “बियाबान जगहा मन्झ हाका पाणे वाल़े री अवाज सुणह्या करहा ई कि, ‘प्रभु रे कठे आपणे मन त्यार करा, तेसरी सड़का सीधी करा।

⁵ हर एक घाटी भर्ही जाणी, हर एक पाहड़ होर टीला बराबर कितेया जाणा, जो टेढ़ा आ से सीधा, होर जो ऊँचा आ से नीचा, जो उबड़ खाबड़ आ से चौरस पैंडा बणी जाणा।

⁶ होर हर लोका परमेसरा रा उद्धार देखणा।’”

⁷ जेबे भीड़ा री भीड़ तेस ले बपतिस्मा लेणे रे कठे आया करहा ई थी, यहून्ने तिन्हें किन्हें बोल्हा था, “तुस्से लोक जैहर्ले कीड़े रे बच्चे साहीं ऐं, तुस्सा जो कुने दसेया कि परमेसरा रे आऊणें वाल़े गुस्से ले भगा।

⁸ इधी कठे एह्ड़ा काम करा कि जेता ले पता लगी सके कि तुस्से पाप करणा छाडी दितेया। होर फेरी आपणे-आपणे मना मन्झ एह्ड़ा मत सोचा कि, आस्सा रा बापू अब्राहम आ; क्यूंकि हांऊँ तुस्सा किन्हें बोल्हा कि, परमेसर इन्हा पात्थरा ले भी तुस्सा रे बदले अब्राहम रे कठे बच्चे पैदा करी सक्हा।

⁹ होर ऐबे ता छहू डाला री जड़ा पर रखी दितिरा, इधी कठे जो-जो डाल खरा फल नी देंदा तेस जो काटी किन्हें आगी मन्झ पाई किन्हें फुकी देहां ऐं।”

¹⁰ होर लोके तेस ले पूछदे रहे, “ता परमेसरा रे गुस्से ले बचणे रे कठे आस्से क्या करिए?”

¹¹ यहून्ना बपतिस्मा देणे वाल़े तिन्हा जो जवाब दितेया कि, “जेस वाले जे दो कुरते हो से तेस जो देई दे, जेस वाले जे नी हाऐ, होर जेस वाले जे खाणा हो, से भी एह्ड़ा ई करहे।”

¹² होर चुंगी लैणे वाल़े भी बपतिस्मा लैणे रे कठे आये, होर तेस ले पूछेया कि, “हे गुरु, आस्से क्या करिए?”

¹³ यीसूए तिन्हा किन्हें बोल्या, “जितना कर कठ्ठा करणे जो बोलिरा, तेता ले ज्यादा कर नी लैणा।”

¹⁴ होर स्पहिए भी तेस ले ये पूछेया, “आस्से क्या करिए?” तिन्हें तिन्हा किन्हें बोल्या, “केसी पर अत्याचार नी करणा, होर ना झूठा दोस ल्गाणा, होर आपणी कमाई पर सन्तुस्ट रैंह्णां।”

¹⁵ जेबे लोके मसीहा रे जल्दी आऊणें री आस ल्गाईरी थी, इधी कठे सभ आपणे-आपणे मना मन्झ यहून्ना बपतिस्मा देणे वाल़े रे बारे मन्झ विचार करेया करहा ऐं थे कि, क्या येई मसीह ता नी ई आ?

¹⁶ ता यहून्ना बपतिस्मा देणे वाल़े तिन्हा सभी जो जवाब दितेया कि, “हांऊँ ता तुस्सा जो पाणी किन्हें बपतिस्मा देहां, पर से जे आऊणें वाल़ा आ, जो मेरे ले सक्तिसाली आ; हांऊँ ता एस लायक भी नी आ कि, तेसरे बूटा रे तस्मे खोल्ही सकूं, तेस तुस्सा जो पवित्र आत्मा होर आगी किन्हें बपतिस्मा देणा।

¹⁷ से आपणा सूप हाथा मन्झ लई किन्हें त्यार आ, होर तेस आपणा खेत या डोर्ही ठीक ढंगा किन्हें साफ करणी, होर आपणी गाही री कणक ता तेस आपणे गोदामा मन्झ कठी करणी, पर भूह तेस आगी मन्झ फूकी देणा; जो आग कधी बूझणे वाली नी ई।”

¹⁸ एता कठे यहून्ना बौह्त सारी खरी उपदेस देई किन्हें लोका जो खुसी री खबर सुणांदा रैंहयां।

¹⁹ पर जेबे यहून्ना बपतिस्मा देणे वाल़े गलील जिल्ले के हेरोदेस राजे जो तेसरे भाई फिलिप्पुसा री लाड़ी हेरोदियासा साउगी बुरे सबंध रखणे रे कठे से प्रुआचेया।

²⁰ इधी कठे हेरोदेस राजे यहून्ना बपतिस्मा देणे वाल़े जो जेल्हा मन्झ पाई किन्हें जितने बुरे काम तिन्हें कितरे थे, तेता मन्झ तिन्हें एक होर जोड़ी लया।

यीसू रा बपतिस्मा होर परखणी

²¹ पर एता ले पैहले कि यहून्ना बपतिस्मा देणे वाल़े जो जेहला मन्झ पाई दितेया जांदा, सब लोका रा बपतिस्मा हुआ, तेबे यीसू रा भी बपतिस्मा हुआ, तेता ले बाद, जेबे यीसू प्रार्थना करेया करहा था, ता आसमान खुल्ही गया।

²² होर पवित्र आत्मा जो कबूतरा रे रूपा मन्झ आपणे गास उतरदे देख्या। होर परमेसरे स्वर्गा ले बोल्या कि, “तू मेरा लाडला मह्ठा आ, हांऊँ तुध किन्हें बौह्त खुस आ।”

यीसू रे बापदादेया रे नांऊँ री सूची

²³ जेबे यीसू आपु खुद उपदेस देंदा लग्या, से लगभग तीह साला रा था होर जेह्ड़ा लोक समझ्हा ऐं थे, यीसू युसुफा रा मह्ठा था। यीसू मसीह रे बापदादेया रे नांऊँ री सूची इंहां ई: यीसू रा बापू युसूफ ऐली रा मह्ठा था।

²⁴ होर ऐली मत्ताता रा, होर मत्तात लेवी रा, होर लेवी मलकी रा, होर मलकी यन्ना रा, होर यन्ना युसुफा रा।

²⁵ होर युसूफ मत्तियाह रा मह्ठा था, होर मत्तियाह आमोसा रा, होर आमोस नहूमा रा, होर नहूम असल्याहा रा, होर असल्याह नोग्हा रा।

²⁶ होर नोग्ह माता रा, होर मात मत्तियाहा रा, होर मत्तियाह सिमी रा, होर सिमी योसेखा रा, होर योसेख योदाहा रा।

²⁷ होर योदाह यूहन्ना रा मह्ठा था, होर यूहन्ना रेसा रा, होर रेसा जरूब्बाबेला रा, होर जरुब्बाबिल सलतियेला रा, होर सलतियेल नेरी रा।

²⁸ होर नेरी मलकी रा, होर मलकी अद्दी रा, होर अद्दी कोसमा रा, होर कोसम एल्मदाम रा, होर एल्मदाम एरा रा।

²⁹ होर एरा येसू रा, होर येसू एलिएजरा रा, होर एलिएजर योरिमा रा, होर योरिम मत्ताता रा, होर मत्तात लेवी रा।

³⁰ होर लेवी समौना रा मह्ठा था, होर समौन यहुदाहा रा, होर यहुदाह यूसुफा रा, होर युसुफ योनाना रा, होर योनान एलयाकीम रा।

³¹ होर इलयाकीम मलेयाहा रा, होर मलेयाह मिन्नांहा रा, होर मिन्नांह मत्तता रा, होर मत्तत नाताना रा, होर नातान राजा दाऊदा रा।

³² होर राजा दाऊदा यिसै रा, होर यिसै ओबेदा रा, होर ओबेद बोअजा रा, होर बोअज सलमोना रा, होर सलमोन नहसोना रा।

³³ होर नहसोन अम्मीनादाबा रा मह्ठा था, होर अम्मीनादाब आदमीना रा होर आदमीन अरनी रा, होर अरनी हिस्रोना रा, होर हिस्रोन फिरिसा रा, होर पेरेस यहूदा रा।

³⁴ होर यहूदा याकूबा रा, होर याकूब इसहाका रा, होर इसहाक अब्राहमा रा, होर अब्राहम तेरहा रा, होर तेरह नाहोरा रा।

³⁵ होर नाहोर सरूगा रा, होर सरूग रेऊआ रा, होर रेऊ पेलेग रा, होर पेलेग एबिरा रा, होर एबिर सिलहा रा।

³⁶ होर सिलहा केनाना रा मह्ठा था, होर केनान अरफक्सदा रा, होर अरफक्सद सेम रा, होर सेम नुहा रा, नूह लामेखा रा।

³⁷ होर लामेख मथुसिल्हा रा, होर मथुसिल्हा हनोका रा, होर हनोक यिरीदा रा, होर यिरीद महललेला रा, होर महललेल केनाना रा।

³⁸ होर केनान एनोसा रा, होर एनोस सेत रा, होर सेत आदमा रा, होर आदम परमेसरा रा मह्ठा था।