लूका 21 - मंडयाली नंऊँआं नियम

गरीब विधवा रा दान

¹ यीसूए आपणी नजर घुमाई होर देख्या कि अमीर आपणा-आपणा दान मन्दरा रे दान पात्रा मन्झ पाया करहा ऐं थे।

² होर यीसूए एक गरीब विधवा भी ताम्बे रे दो छोटे सिक्के पांदे देखी।

³ होर यीसूए आपणे चेले किन्हें बोल्या, हांऊँ तुस्सा किन्हें सच्च -सच्च बोल्हा कि, “एस्से गरीब विधवे इन्हा सभी अमीर लोका ले ज्यादा दान दितेया:

⁴ क्यूंकि तिन्हें सभीए आपणी बौह्त कमाई मन्झा ले दान दितेया पर तेस्से ज्नाने, आपणी कमी घटी मन्झा ले आपणी सारी कमाई देई दिती।”

मन्दरा रे विनासा रे बारे मन्झ भविस्यावाणी

⁵ जेबे तेसरे चेले मन्झा ले कुछ लोक मन्दरा रे बारे मन्झ गल्ला करेया करहा ऐं थे कि, से मन्दर बांके-बांके पात्थरा होर परमेसरा जो चढ़ाईरी चीजा किन्हें बधिया सजाईरा। यीसूए बोलेया,

⁶ “स्यों ध्याड़े आऊणें, जिन्हा मन्झ ये सभ कुछ जो तुस्से देख्हा ऐं, तिन्हा मन्झा ले एता मन्झ एक पात्थर भी नी बचणा: क्यूंकि एक-एक पात्थर ढाली दितेया जाणा होर सभ कुछ नास हुई जाणा।”

यीसू रे दबारा वापस आऊणें रा चिन्ह

⁷ तिन्हें यीसू ले पूछेया कि, “हे गुरु, ये सभ केभे हूणीं? होर जेबे ये गल्ला पूरी हूणीं तेस टैमा रा क्या चिन्ह हूंणां?”

⁸ यीसूए बोल्या, “चतन्न रैहया कि, कोई तुस्सा जो ना भरमाए, क्यूंकि बौह्त लोका मेरे हका मन्झ आऊंणा, होर तिन्हा बोलणा कि, ‘हांऊँ मसीह आ,’ होर ये भी कि टैम आई गईरा, ता तुस्से तिन्हारे पीछे देख्या चली जांदे।

⁹ होर जेबे तुस्से लड़ाईया होर दंगे फसादा री गल्ला सुणघे, ता डरदे देख्या, क्यूंकि इन्हारा पैहले हूंणां जरूरी आ, पर तेस टैम झटपट अंत नी हूंणां।”

¹⁰ तेबे यीसूए तिन्हा किन्हें बोल्या कि, “एक राज्या दूजे राज्या रे बरखलाफ लड़ाई करणी।

¹¹ होर बडे-बडे हिलण हूंणे, होर जगहा-जगहा अकाल होर माहमारिया हूणीं, होर आसमाना मन्झ डराऊणी चीजा हूणीं होर बडे चिन्ह जाहिर हूंणे।

¹² पर इन्हा सभ गल्ला ले पैहले तिन्हा मेरे चेले हूंणे री वजहा ले तुस्से पकड़ने, होर दुःख देणे, होर यहूदी सभा मन्झ सौंपणे, होर जेल्हा मन्झ पाणे, होर राजे होर हाकमा रे साम्हणें लई जाणे।

¹³ पर तुस्सा जो मौका मिली जाणा कि तुस्से मेरे बारे मन्झ गुआही देई सको।

¹⁴ इधी कठे आपणे-आपणे मना जो त्यार रखा कि आस्सा पैहले ले जवाब देणे री फिकर नी करणी।

¹⁵ क्यूंकि मां तुस्सा जो एह्ड़ी बोली होर बुद्धि देणी कि, तुस्सा रे सारे व्रोधिया तुस्सा रे खिलाफ बोलणे होर तुस्सा जो झूठे साबित करणे रे लायक नी रैंह्णां।

¹⁶ होर तुस्सा रे माऊ बापू, होर भाईया बैहणा, होर टब्बरा, होर दोस्ता भी तुस्से पकड़वाणे; एथी तक कि तुस्सा मन्झा ले कितने मुकाई देणे।

¹⁷ होर तुस्से मेरे पर विस्वास रख्हा ऐं इधी कठे सभी लोका तुस्सा किन्हें बैर करणा।

¹⁸ पर तुस्सा रे मूंडा रा एक बाल भी बांका नी हूंणां।

¹⁹ आपणे धीरज रखणे ले ही तुस्से आपणी जान बचाई सक्हा ऐं।”

यरुस्लेम सैहरा रे विनासा री भविस्यवाणी

²⁰ “जेबे तुस्से यरुस्लेम सैहरा जो सेना किन्हें घिर्ही रा देखो, ता जाणी लया कि तेसरा उजड़ी जाणा नेडे आ।

²¹ तेबे जो यहूदिया ईलाके मन्झ हो स्यों प्हाड़ा पर भगी जाए, होर जो यरुस्लेम सैहरा रे अंदर हो स्यों बाहर निकली जाए; होर जो गांऊँआं मन्झ हो स्यों तेस गांऊँआं मन्झ नी जाए।

²² क्यूंकि ये बदला लेणे या सजा पाणे रे एह्ड़े ध्याड़े हूंणे, ताकि जो गल्ला लिखी गईरी स्यों सभ पूरी हुई जाए।

²³ तिन्हा ध्याड़े जो गर्भवती होर दूध प्याणे वाली ज्नानिया हूणीं, तिन्हारे कठे मुंजो बौह्त दुःख हुएआ करहा, क्यूंकि देसा मन्झ बडा क्लेस होर इन्हा लोका पर बड़ी विपत्ति आऊणीं।

²⁴ स्यों तलवारा किन्हें मारी दिते जाणे, होर कई दूजे देसा रे लोका मन्झ बंदी बणाए जाई किन्हें पूजाए जाणे, होर जेबे तक अन्यजाति लोका रा टैम पूरा नी हुई जाए, तेबे तक यरुस्लेम सैहर अन्यजाति लोका रे पैरा हेठ रौंदया जाणा।”

माह्णुं रे मह्ठे दबारा आऊंणा

²⁵ “होर सूरज होर चांद होर तारे मन्झ चिन्ह सुझणे, होर धरती पर, सारी जाति रे लोका जो संकट हूंणां। क्यूंकि तिन्हा समुद्रा री बड़ी भारी अवाज होर लैहरा रा हाल्ला सुणी किन्हें डरी जाणा।

²⁶ एस डरा री वजहा ले होर संसारा पर आऊणें वाली घटना रा इंतजार करदे-करदे लोका रे मन्झ जी नी रैंह्णां, क्यूंकि आसमाना री सक्तिया हिल्लाई जाणी।

²⁷ तेबे तिन्हा हांऊँ माह्णुं रा मह्ठा सामर्थ होर बड़ी महिमा साउगी बादला पर आऊंदे देखणा।

²⁸ जेबे ये गल्ला हुन्दी लगे, ता सीधे हुई किन्हें आपणा मूंड गास चक्या; क्यूंकि तुस्सा रा छुटकारा नेडे आ।”

अंजीरा रे डाला रा उदाहरण

²⁹ यीसूए तिन्हा किन्हें एक उदाहरण बोल्या कि, “अंजीरा रे डाला होर सभ डाला जो देखा।

³⁰ जिहां ई तिन्हारे टीऊऐ फट्हा ऐं, ता तुस्से देखी किन्हें जाणी लैहां ऐं कि, गर्मी रा मौसम नेडे आ।

³¹ इंहां ईं जेबे तुस्से इन्हा गल्ला जो हुंदे देखो, तेबे जाणी लया कि परमेसरा रा राज नेडे आ।

³² हांऊँ तुस्सा किन्हें सच्च बोल्हा कि, जेबे तक ये सभ गल्ला नी हुई जाए, तेबे तक एस्सा पीढ़ी रा अंत नी हूंणां।

³³ आसमान होर धरती टली जाणे, पर जो मैं बोली दितेया, से पूरा हुई किन्हें रैहणा।”

जागदे रैहया

³⁴ “इधी कठे चतन्न रैहया, एह्ड़ा नी हो कि तुस्सा रे मन खुमार होर पी किन्हें मुतालणा, होर एस जिन्दगी री चिंता किन्हें सुस्त हुई जाए, होर से ध्याड़ा तुस्सा पर फंदे साहीं एकदम आई जाए होर जिहां एक जानवर फंदे मन्झ अचानक फसी जाहें।

³⁵ क्यूंकि तेस सारी धरती रे सभ रैहणे वाल़े पर इंहां ईं आई जाणा।

³⁶ इधी कठे त्यार रैहया होर हर टैम प्रार्थना करदे रैहया ताकि तुस्से इन्हा सभी आऊणें वाली घटना ले बचणे, होर हांऊँ माह्णुं रे मह्ठे रे साम्हणें खड़ने रे लायक बणी सको।”

³⁷ होर से ध्याड़िया मन्दरा मन्झ उपदेस देहां था; होर राती बाहर जाई किन्हें जैतूना रे प्हाड़ा पर रैंहयां था।

³⁸ होर भ्यागा तड़के कई लोक उठी किन्हें तेस वाले मन्दरा मन्झ सुणने रे कठे जाया करहा ऐं थे।