लूका 19 - मंडयाली नंऊँआं नियम

चुंगी लैणे वाल़ा जक्कई

¹ यीसू यरीहो सैहरा मन्झा ले हुई किन्हें जाया करहा था।

² तेथी जक्कई नांऊँआं रा एक माह्णुं था जो चुंगी लैणे वाल़े रा मुखिया था। होर से अमीर आदमी था।

³ से यीसू जो देखणा चांहां था कि से कुणहां? पर भीड़ा री वजहा ले से तेस जो देखी नी सकेया, क्यूंकि से बौणा था।

⁴ तेबे तेस जो देखणे रे कठे जक्कई आगे दौड़ी किन्हें एक अंजीरा रे डाला प्रयाह्ले चढ़ी गया, क्यूंकि यीसू तेस पैंडे ले हुई किन्हें जाया करहा था।

⁵ जेबे यीसू तेस अंजीरा रे डाला वाले पुज्हेया, ता तिन्हें गास देखी किन्हें तेस जो बोल्या, “हे जक्कई झटपट उतरी जा, क्यूंकि आज मेरा तेरे घरा मन्झ रैंह्णां जरूरी आ।”

⁶ से झटपट डाला ले थाले उतरेया होर आपणे घरा यीसू जो लई गया, होर खुसी किन्हें तेसरा स्वागत कितेया।

⁷ ये देखी किन्हें सभ लोक बड़बड़ान्दे लगे, “से ता एक पापी माह्णुं रे घरा चली गया।”

⁸ खाणा खांदी बारी जक्कई ऐे खड़ी किन्हें प्रभु किन्हें बोल्या, “हे प्रभु यीसू, देख हांऊँ आपणी आधी जायदाद गरीबा जो देई देहां, होर अगर मैं केसी रा कर भी बईमानी करी किन्हें लई लईरा हो, ता तेस जो मां चार गुणा वापस करी देणा।”

⁹ तेबे यीसूए तेस किन्हें बोल्या, “आज एस घरा रे लोका मन्झ उद्धार आईरा, इधी कठे कि ये भी अब्राहमा रा एक मह्ठा।

¹⁰ क्यूंकि जो लोक परमेसरा ले दूर हुई गईरे तिन्हा जो तोपणे होर तिन्हारा उद्धार करणे रे कठे हांऊँ माह्णुं रा मह्ठा आईरा।”

दस मोहरा रा उदाहरण

¹¹ जेबे स्यों लोक ये गल्ला सुणदे लगिरे थे, ता यीसूए एक होर उदाहरण बोल्या। यीसू यरुस्लेम सैहरा रे नेडे था, इधी कठे लोके सम्झेया कि परमेसरा रा राज ऐबे आऊणें वाल़ा आ।

¹² एता कठे तिन्हें बोल्या, “एक अमीर आदमी दूर देसा जो चली गया ताकि से राजे रा पद पाई किन्हें वापस आये।

¹³ होर तिन्हें आपणे नौकरा मन्झ ले दस सादे होर तिन्हा जो दस मोहरा दिती। (एक मोहर सो ध्याड़े री कमाई रे बराबर) होर तिन्हा किन्हें बोल्या, ‘मेरे वापस आऊणें तक लेण देण करी किन्हें तेता जो बढ़ाई देआ।’

¹⁴ पर तेसरे गांऊँआं मन्झ रैहणे वाल़े तेस किन्हें बैर रख्हा ऐं थे, होर तेसरे पीछे दूता रे ज्रीए सादा भेज्या, आस्से नी चाहंदे कि, ये आस्सा रा राजा बणे।

¹⁵ जेबे से राजे रा पद पाई किन्हें वापस आई गया, ता एह्ड़ा हुएया कि तिन्हें आपणे नौकरा जो जिन्हा जो तिन्हें पैसे देई दितिरे थे, स्यों आपणे वाले सादे ताकि ये जाणी सके कि लेण देण करी किन्हें क्या-क्या कमाया।

¹⁶ तेबे पैहले नौकरे आई किन्हें बोल्या कि, ‘हे मेरे माल्क, तुस्से मुंजो एक मोहर दितिरी थी, मैं एता ले दस मोहरा होर कमाई।’”

¹⁷ माल्के तेस नौकरा किन्हें बोल्या, “साबास, ‘खरे सेऊआदार, तू धन्य आ, तू बौह्त थोह्ड़े मन्झ भरोसे रे लायक निकल्या, ऐबे मां तुजो दस गांऊँआं री जिम्मेदारिया देणी।’

¹⁸ दूजे नौकरे आई किन्हें बोल्या, ‘हे माल्क, मैं तुस्सा री दितिरी मोहरा किन्हें पांज मोहरा होर कमाई।’

¹⁹ माल्के तेस किन्हें बोल्या कि, मां तुजो भी पांज गांऊँआं री जिम्मेदारिया देणी।

²⁰ त्रीजे आई किन्हें बोल्या, ‘हे माल्क, तेरी मोहर ऐे ई, जो मैं तौलिए मन्झ बान्ही रखिरी।

²¹ क्यूंकि हांऊँ तेरे ले डरी गईरा था, इधी कठे कि तू एक कठोर आदमी आ, जो तैं नी रखिरा तेस जो तू चकी लैहां, होर जो तैं नी बाहीरा, तेस जो काटी देहां।’”

²² “माल्के तेस किन्हें बोल्या, ‘हे दुस्ट सेऊआदार, मां तेरे ग्लाणे रे मताबक तेरा न्याय करणा। तू मुंजो जाणहां था कि हांऊँ कठोर आदमी आ। होर जो मैं नी रख्या तेस जो हांऊँ चकी लैहां, होर जो मैं नी बाहिरा, तेस जो काटहा।

²³ ता तैं मेरे पैसे सौहकारा वाले जम्हा कि नी कुराहें, ताकि हांऊँ आई किन्हें ब्याजा समेत लई लैंदा।’

²⁴ होर जो लोक नेडे खड़ीरे थे, माल्के तिन्हा किन्हें बोल्या, ‘से मोहर तेस ले लई लऊआ, होर जेस वाले जे दस मोहरा ई तेस जो देई देआ।’

²⁵ तिन्हें तेस किन्हें बोल्या, ‘हे माल्का, तेस वाले दस मोहरा ई।’

²⁶ हांऊँ तुस्सा किन्हें बोल्हा आ कि, ‘जेस वाले जे हाया तेस जो होर दितेया जाणां। होर जेस वाले जे नी आ तेस ले से भी लई लैणा जो तेस वाले हाया।

²⁷ पर मेरे दुस्मण जो नी चाहंदे कि, हांऊँ तिन्हारा राजा बणुं, तिन्हा जो एथी ल्याई किन्हें मेरे साम्हणें जानी ले मारी देऊआ।’”

यरुस्लेम सैहरा मन्झ यीसू रा दाखल हूंणा

²⁸ ये गल्ला बोली किन्हें यीसू तिन्हारे अगे-अगे यरुस्लेम सैहरा वखा जो चल्दा लग्या।

²⁹ होर जेबे से जैतूना रे प्हाड़ा पर बैतफगे होर बैतनिय्याह गांऊँआं वाले पूजे, ता तिन्हें आपणे चेले मन्झा ले दो ये बोल्या किन्हें भेजे कि,

³⁰ “साम्हणें रे गांऊँआं मन्झ जाई किन्हें तुस्सा जो एक गधी रा बच्चा मिलणा जेस पर जे कधी कोई चढ़ीरा नी हो। से तुस्सा जो बान्हिरा हुआ मिलणा, तेस जो खोल्ही किन्हें ल्याऊआ।

³¹ होर अगर कोई तुस्सा ले पूछे कि, तुस्से एस जो किधियो खोलेया करहा ऐं, ता ये बोली देआ कि, प्रभु जो एसरी ज्रूरत ई।”

³² जो भेजीरे थे, तिन्हें जाई किन्हें जेह्ड़ा यीसूए तिन्हा किन्हें बोलिरा था, तेह्ड़ा ई तिन्हें पाया।

³³ जेबे स्यों गधे रे बच्चे जो खोलेया करहा ऐं थे, ता तेसरे माल्के तिन्हा ले पूछेया, “एस बच्चे जो किधियो खोलेया करहा ऐं?”

³⁴ तिन्हें बोल्या, “प्रभु जो एसरी ज्रूरत ई।”

³⁵ स्यों गधी रे बच्चे जो यीसू वाले लई आये होर तेस पर कपड़े ब्छ्याए होर यीसू तेस पर बैठी गये।

³⁶ जेबे यीसू जाया करहा था, तिन्हें तेसरा स्वागत करणे रे कठे आपणे कपड़े पैंडे मन्झ ब्छ्याये।

³⁷ होर नेडे आऊंदे-आऊंदे जेबे से जैतूना रे प्हाड़ा री ढलाना पर पुज्हेया, ता चेलेया री सारी मण्डली तिन्हा सभी चमत्कार जो तिन्हें देखिरे थे, खुस हुई किन्हें जोरा-जोरा किन्हें परमेसरा री बड़ाई करदे लगी गये।

³⁸ “धन्य आ से राजा, जो प्रभु रे हका ले आहूँआं; स्वर्गा मन्झ सांति होर आसमान मन्झ महिमा हो।”

³⁹ तेबे भीड़ा मन्झा ले कितने फरीसी लोक तेस किन्हें बोल्दे लगे, “हे गुरु आपणे चेले जो झिड़का इन्हें जे एह्ड़ा बोल्या।”

⁴⁰ यीसूए जवाब दितेया, “हांऊँ तुस्सा किन्हें बोल्हा, अगर ये लोक चुप रैहे, ता इन्हा पात्थरा चिंगी किन्हें मेरी महिमा करणी।”

यरुस्लेम सैहरा रे कठे रोणा

⁴¹ जेबे यीसू यरुस्लेम सैहरा रे नेडे पूजी गया ता तिन्हें सैहरा जो देखी किन्हें तेथी रे लोका रे कठे रोंदा लगेया।

⁴² होर बोल्या, “क्या ई खरा हुन्दा कि, तू हां, तू ई, आज इतना ई समझी लैन्दा कि सांति रा मतलब क्या आ! पर ऐबे ये गल्ला तेरी हाखिया ले ल्हुखी गईरी।

⁴³ क्यूंकि स्यों ध्याड़े तुध पर आऊणें कि तेरे दुस्मणा कान्ध बान्ही किन्हें तू घेरी लैणा, होर चहुँ वखा ले तू दबाणा।

⁴⁴ होर दुस्मणा ये सैहर तबाह करी देणा होर एस सैहरा साउगी-साउगी तेरे बाल बच्चे भी नास करी देणे होर जेबे तिन्हा सभ कुछ तबाह करी बैठणा। तेबे तेथी ये पात्थरा किन्हें बणिरा सैहर नी बचणा। होर ये सभ कुछ इधी कठे हूंणां क्यूंकि तैं से टैम नी पछ्याणया जेबे परमेसर तुजो बचान्दा आईरा था।”

मन्दरा मन्झा ले व्पारी काढे जाणे

⁴⁵ तेबे यीसूए यरुस्लेम मन्दरा मन्झ जाई किन्हें व्य्पारिये बाहर काढे।

⁴⁶ होर यीसूए तिन्हा किन्हें बोल्या, “पवित्र सास्त्रा मन्झ लिखिरा कि, ‘मेरा मन्दर प्रार्थना रा घर हूंणां,’ पर तुस्से ये डाकुआ रा आडा बणाई दितिरा।”

⁴⁷ होर हर रोज यीसूए मन्दरा मन्झ तिन्हा जो उपदेस दितेया: होर मुख्य याजक होर व्यवस्था स्खाणे वाल़े होर मुख्य लोक तेस जो मारणे री ताका मन्झ रैहन्दे लगी रैहे।

⁴⁸ पर कोई उपाय नी काढी सके; कि ये केस तरीके किन्हें करिए क्यूंकि सभ लोक तेसरी बड़ी चाऊआ किन्हें सुणहां ऐं थे।