लूका 17 - मंडयाली नंऊँआं नियम

चतन्न रहणा

¹ एक ध्याड़े यीसूए आपणे चेले किन्हें बोल्या, “हुई सकां कि लोका आपणा विस्वास खोई दे, पर तिन्हा लोका जो बौह्त सजा मिलणी, जेसरी वजहा ले से हूंणा!

² जो कोई इन्हा छोटे मन्झा ले केसी ले पाप कुराहें, तेसरे कठे ये खरा हुन्दा कि, एक बड़ा चक्की रा पाट तेसरे गला मन्झ टांग्या जाए होर तेस जो समुद्रा मन्झ सट्टी दितेया जाए।

³ चतन्न रैहया! कि तुस्से क्या करें, अगर तेरा विस्वासी भाई पाप करहे ता तेस जो समझा, होर अगर से आपणे पापा ले पछताए ता तेस जो माफ करी दे।

⁴ अगर पूरे ध्याड़े से सात बार तेरे बरखलाफ पाप करहे, होर सात बारी तेरे वाले आई किन्हें बोले कि, हांऊँ पछताया करहा ता तेस जो माफ करी देआ।”

विस्वास

⁵ तेबे चुणिरे चेले प्रभु यीसू किन्हें बोल्या, “आस्सा रे विस्वासा जो मजबूत बणा”

⁶ प्रभुए बोल्या कि, “अगर तुस्सा जो राई रे एक दाणे रे बराबर भी विस्वास हुन्दा, ता तुस्से एस तुता रे डाला किन्हें बोल्दे कि जड़ा ले पठ्ही किन्हें समुद्रा मन्झ पई जा, ता तेस तुस्सा री गल मनी लैंदा।”

एक सेऊआदारा रा फर्ज

⁷ तुस्सा मन्झ एह्ड़ा कुण आ, “अगर तुस्सा रा नौकर हल च्लाई किन्हें डोहर्रिया ले आहूँआं, या भेडा री रखवाली करी किन्हें आहूँआं, ता तुस्सा तेस किन्हें बोलणा कि, ‘झटपट आऊ होर खाणा खांदे बैठी जा?’

⁸ नी बल्कि तेस बोलणा कि, मेरा खाणा त्यार कर, होर जेबे तक हांऊँ खाणा खांऊँ तेबे तक मेरी सेऊआ करणे रे कठे तैयार रेह, होर एता ले बाद तू भी खाई पी लैया।

⁹ तुस्सा तेस नौकरा रा धन्यावाद नी करणा, तिन्हा चीजा रे कठे जेता रे बारे तैं तेस किन्हें करणे रे कठे बोलिरा था।

¹⁰ इंहां ईं तुस्से भी, जेबे तुस्से स्यों सभ काम करी बैठघे जिन्हारा हुक्म जे मैं तुस्सा जो दितिरा था, ता एह्ड़ा ही बोल्या कि, ‘आस्से लायक सेऊआदार नी ऐं, आस्से जो कितेया से सिर्फ आस्सा रा फर्ज था।’”

दस कोढ़िया रा ठीक हूंणा

¹¹ यीसू होर तेसरे यरुस्लेम सैहरा जो जांदे वक्त सामरिया ईलाके होर गलील जिल्ले मन्झा ले हुई किन्हें जाया करहा था।

¹² जेबे ही स्यों गांऊँआं मन्झ पूजणे ही वाल़े थे ता तेस जो दस कोढ़ी मिले।

¹³ होर तिन्हें कोढ़ीए दूर खड़ी किन्हें, उची अवाजा मन्झ बोल्या, “हे यीसू, हे माल्का, आस्सा पर दया कर!”

¹⁴ तिन्हें तिन्हा जो देखी किन्हें बोल्या, “यरुस्लेम सैहरा मन्झ जाऊआ होर मन्दरा मन्झ आपणे आपा जो याजका जो दस, ताकि से तुस्सो देखे कि तू कोढ़ा ले ठीक हुई या नी।” होर जांदे-जांदे स्यों ठीक हुई गये।

¹⁵ तेबे तिन्हा मन्झा ले एकिये ये देखी किन्हें कि हांऊँ ठीक हुई गया, जोरा-जोरा किन्हें परमेसरा री बड़ाई करदा हुआ यीसू वाले वापस आया।

¹⁶ होर से मुंहा रे भारे तेसरे पैरा पई किन्हें, तेसरा धन्यावाद करदा लग्या, होर से माह्णुं सामरी ईलाके रा था।

¹⁷ एता पर यीसूए बोल्या, “क्या दसा रे दस माह्णुं ठीक नी हुए ता फेरी स्यों नौ केथी ऐं?

¹⁸ क्या एस गैर-यहूदी जो छाडी किन्हें होर कोई भी वापस नी आया, जो परमेसरा री बड़ाई करदा?”

¹⁹ तेबे यीसूए तेस किन्हें बोल्या, “उठी किन्हें चली जा, क्यूंकि तैं विस्वास कितेया इधी कठे तू ठीक हुआ।”

परमेसरा रे राज्या रा आऊंणा

²⁰ जेबे फरीसी लोके यीसूए ले पूछेया कि, परमेसरा रा राज कधी आऊंणा? ता यीसूए तेस जो जवाब दितेया कि, “परमेसरा रा राज एह्ड़ा नी आ जेस जो तुस्से देखी सके।

²¹ होर लोक ये नी बोली सकदे कि, देखा, परमेसरा रा राज एथी आ, या परमेसरा रा राज तेथी आ। क्यूंकि देखा, परमेसरा रा राज तुस्सा रे बिचा मन्झ आ।”

²² होर यीसूए चेले किन्हें बोल्या, “स्यों ध्याड़े आऊणें, जिन्हा मन्झ तुस्सा हांऊँ माह्णुं रे मह्ठे रे राज्या रा एक ध्याड़ा देखणा चाहणा, पर तुस्सा ये नी देखी पाणा।

²³ लोका तुस्सा किन्हें बोलणा, देखा, ‘मसीहा तेथी आ, या मसीहा एथी आ!’ ये सुणी किन्हें तुस्से चली मत जांदे होर ना तिन्हारे पीछे जाणा।

²⁴ क्यूंकि जिहां बिजली आसमाना रे एक तरफा ले चमकी किन्हें आसमाना रे दूजी तरफा जो चमक्हा ई, होर सभ लोक तेता जो देख्हा ऐं, तिहां ईं मां माह्णुं रे मह्ठे भी दबारा आऊंणा होर सभिया हांऊँ देखणा।

²⁵ पर पैहले जरूरी आ कि, हांऊँ बौह्त दु:ख उठाऊँ, होर एस जमाने रे लोका मेरी बेज्जती करणी।”

²⁶ “जेह्ड़ा नूहा रे ध्याड़े मन्झ हुएया था, तेह्ड़ा ई मां माह्णुं रे मह्ठे रे ध्याड़े मन्झ भी हूंणां।

²⁷ जेस ध्याड़े तक नूह जहाजा पर नी चढ़ेया, तेस ध्याड़े तक लोक खांदे पींदे रहे, होर तिन्हा मन्झ ब्याह हुन्दे रहे; तेबे जल प्रलय हुएया होर तिन्हा सभिरा नास करी दितेया।

²⁸ होर जेह्ड़ा आस्सा रे बापदादे लूता रे टैमा मन्झ हुएया था जेह्ड़ा स्दोमा मन्झ रैंहयां था, होर तेथी लोक खांदे पींदे, लेण देण करदे, डाल लगान्दे होर घर बणान्दे रैहे।

²⁹ पर जेस ध्याड़े लूत सदोम सैहरा ले निकल्या, तेस ध्याड़े आग होर गन्धक स्वर्गा ले बरसी होर सैहरा रे सभ लोका जो नास करी दितेया।

³⁰ हांऊँ माह्णुं रे मह्ठे रे जाहिर हूंणे रे टैमा भी लोका त्यार हुई किन्हें नी रैंह्णां।”

³¹ “तेस ध्याड़े जो घरा री छता पर हो, होर तेसरा समान घरा मन्झ हो, से तेस जो लैणे रे कठे हेठ नी आये, होर तिहां ईं जो लोक डोहर्रिया मन्झ हो, स्यों आपणा समान लेणे रे कठे वापस नी आये।

³² याद रखा कि लूता री लाड़ी किन्हें क्या हुआ।

³³ जो कोई आपणी जान बचाणा चाहां, तेस अनंतकाला री जिन्दगी खोई देणी, पर जो कोई आपणी जान गुआई देह्न्गा, तेस हमेसा री जिन्दगी पाणी।

³⁴ हांऊँ तुस्सा किन्हें बोल्हा, तेस राती एक मांजे प्रयाल्हे दो माह्णुं हूंणे, एक लई लैणा होर दूजा छाडी दितेया जाणा।

³⁵ दो ज्नाने एक साउगी चकी पिसदी लगिरी हूणीं, एक लई जाणी, होर दूजी छाडी दिती जाणी।

³⁶ दो जण डोहर्रिया मन्झ हूंणे एक लई जाणा दूजा छाडी दितेया जाणा।”

³⁷ ये सुणी किन्हें तिन्हें यीसू ले पूछेया, “हे प्रभु ये केथी हूंणां?” यीसूए तिन्हा किन्हें बोल्या, “सभी जो पता लगणा कि ये केथी हूणा, क्यूंकि जेह्ड़ा सभ जाणहां ऐं कि जेथी ईल्लण कठ्ठा हुएं तेथी ल्हास हूणीं।”