लूका 15 - मंडयाली नंऊँआं नियम

गुआही री भेडा रा उदाहरण

¹ कई चुंगी लैणे वाल़े होर स्यों लोक जिन्हा जो पापी बोल्हा ऐं यीसू वाले आहूँआं ऐं थे ताकि स्यों तेसरी उपदेस सुणे।

² होर फरीसी लोक होर व्यवस्था स्खाणे वाल़े गलांण करी किन्हें बोल्दे लगे कि, “ये ता पापिया साउगी मिल्हा होर तिन्हा साउगी खांहां भी आ।”

³ तेबे यीसूए तिन्हा किन्हें ये उदाहरण बोल्या,

⁴ “अगर तुस्सा मन्झा ले एकी वाले सौ भेडा हो, होर तिन्हा मन्झा ले एक गुआई जाए ता नड़िन्नूऐं भेडा जो बियाबान जगहा मन्झ छाडी किन्हें, तेस्सा गुआई री भेडा जो तेबे तक तोप्हा जेबे तक से मिली नी जाए।

⁵ होर जेबे मिली जाहीं, तेबे से बड़ी खुसी किन्हें तेस्सा भेडा जो खऊये पर चकी किन्हें ल्याहूँआं।

⁶ होर घरा मन्झ आई किन्हें दोस्ता होर पड़ोसीया जो कठे करी किन्हें बोल्हा, ‘मेरे साउगी खुसी मनाऊआ, क्यूंकि मेरी गुआही री भेड मुंजो मिली गईरी।’

⁷ हांऊँ तुस्सा किन्हें बोल्हा कि, एक पापी जिन्हें पाप करणा छाडी दितिरा हो, तेसरे बारे स्वर्गा मन्झ ज्यादा खुसी हूणीं। तिन्हा नड़िन्नूऐं लोका री जगहा, जो आपणे आपा जो धर्मी लोक मन्हां ऐं होर सोच्हा ऐं कि ऐबे तिन्हा जो पापा रे कठे पछताणे री ज्रूरत नी हाई।”

गुआही रे सिक्के रा उदाहरण

⁸ “या फेरी, अगर एक ज्नाने वाले दस सिक्के हो, होर तिन्हा मन्झा ले एक गुआही जाए, ता से दिऊया भ्खाई किन्हें होर घरा जो झाड़ी बुहारी किन्हें तेबे तक तोप्दे रहीं जेबे तक सिक्का मिली नी जाए।

⁹ होर जेबे मिली जाहाँ, ता से आपणी सहेलिया होर पड़ोसीया जो कठे करी किन्हें बोल्हा ई कि, ‘मेरे साउगी खुसी मनाऊआ, क्यूंकि मेरी गुआही रा सिक्का मिली गईरा।’

¹⁰ हांऊँ तुस्सा किन्हें बोल्हा कि ठीक इंहां ई से एक पापी जो पाप करणा छाडी देआ, तेसरे बारे मन्झ परमेसरा रे स्वर्गदूता रे साम्हणें खुसी हुंहाँ ईं।”

गुआही रे मह्ठा रा उदाहरण

¹¹ फेरी यीसूए तिन्हा जो एक होर उदाहरण दितेया, “एक माह्णुं रे दो मह्ठे थे,

¹² तिन्हा मन्झा ले छोटे मह्ठे, बापू किन्हें बोल्या कि, ‘हे बापू जायदादा मन्झा ले जो मेरा हिस्सा आ, से मुंजो ऐबे देई दे।’ होर तिन्हें बापूए तिन्हा दुहीं मह्ठे जो आपणी जायदाद बांडी दिती।

¹³ कुछ ध्याड़े रे बाद जेबे छोटे मह्ठे सभ कुछ कठा करी किन्हें एक दूर देसा जो चली गया होर तेथी तिन्हें बुरे कामा मन्झ आपणी सारी जायदाद खर्च करी दिती।

¹⁴ जेबे से सभ कुछ खर्च करी बैठ्या, ता तेस देसा मन्झ बड़ा भारी अकाल पया, होर ऐबे तेस वाले खाणे रे कठे कुछ नी बचिरा था।

¹⁵ होर से तेस देसा रे रैहणे वाल़े एक आदमी वाले मजदूरी करदा लग्या। तिन्हें से आपणे खेता मन्झ सुअर चरांदे भेजी दितेया।

¹⁶ क्यूंकि से भूखा था होर से चाहां था कि, जो फलिया सुअर खाहें थे कि तेता किन्हें से भी आपणा पेट भरे; पर तेस जो कोई कुछ नी देंदा था।

¹⁷ जेबे तेस जो समझ आई कि तिन्हें क्या कितिरा था, तेबे से बोल्दा लग्या कि, ‘मेरे बापू रे सारे मजदूर ऐे जिन्हा जो पेट भरी किन्हें खाणा मिल्हा, पर हांऊँ एथी भूखा मरेया करहा।

¹⁸ मां ऐबे उठी किन्हें आपणे बापू वाले जाणा होर तेस किन्हें बोलणा कि बापू जी मैं परमेसरा रे बरखलाप होर तेरी नजरा मन्झ पाप कितिरा।

¹⁹ ऐबे हांऊँ एस लायक नी रैंहयां कि तेरा मह्ठा कैहलाऊं, तू मुंजो आपणे एक मजदूरा मन्झा ले एकी साहीं जाणी किन्हें मजदूरी पर रखी ले।’”

²⁰ “तेबे से तेस देसा जो छाडी किन्हें आपणे बापू रे घरा जो चली गया। से हल्ली दूर ई था कि, तेसरे बापूए से देखी लया होर तरसा किन्हें भर्ही गया होर दौड़ी किन्हें तिन्हें से गले ल्गाया, होर बौह्त प्यार कितेया।

²¹ तिन्हें मह्ठे आपणे बापू किन्हें बोल्या, ‘बापू जी, मैं परमेसरा रे बरखलाप होर तेरी नजरा मन्झ पाप कितिरा; होर ऐबे हांऊँ एस लायक नी रैंहयां कि तेरा मह्ठा कैहलाऊं।’

²² पर बापूए आपणे सेऊआदारा किन्हें बोल्या, झटपट खरे ले खरा कपड़े काढी किन्हें तेस जो पन्ह्याऊआ, होर तेसरे हाथा मन्झ गुठी, होर पैरा मन्झ बूट पैहनांऊँ आ।

²³ होर पालिरा पसु ल्याई किन्हें काटा ताकि आस्से खाईए होर खुसी मनाईऐ।

²⁴ क्यूंकि हांऊँ सोच्हा था कि मेरा ये मह्ठा मरी गईरा था, पर से जिउंदा आ: जो गुआही गईरा था, ऐबे से मिली गया; होर स्यों खुसी मणान्दे लगे।”

²⁵ “पर जेबे एह्ड़ा हुन्दा लगीरा था ता तेसरा बडा मह्ठा खेता मन्झ था। होर जेबे से घरा रे नेडे पुज्हेया, ता तिन्हें गाणे बजाणे होर नाचणे री अवाज सुणी।

²⁶ होर तिन्हें एक सेऊआदार सादी किन्हें पूछेया, ‘ये क्या हुएया करहा?’

²⁷ तिन्हें तेस किन्हें बोल्या, ‘तेरा भाई वापस घरा आईरा, होर तेरे बापूए पालिरा पसु कटाईरा, इधी कठे कि से भला चंगा वापस मिली गया।’

²⁸ ये सुणी किन्हें तेसरे बडे मह्ठे जो बौह्त गुस्सा आया, होर घरा अंदर नी गया। इधी कठे तेसरा बापू बाहर आई किन्हें तेस जो घरा अंदर आऊणें रे कठे मणान्दा लग्या।

²⁹ तिन्हें आपणे बापू जो जवाब दितेया कि, ‘देख; हांऊँ इतने साला ले तेरी सेऊआ करेया करहा, होर कधी भी तेरा हुक्म नी टाल्या, तेबे बी तैं मेरे कठे कधी एक बकरिया रा बच्चा नी कटाया कि, हांऊँ आपणे दोस्ता किन्हें खुसी मणान्दा।

³⁰ पर जेबे तेरा ये मह्ठा आया, जिन्हें जे तेरी जायदाद वेस्या मन्झ डूआई दिती, ता तैं तेसरे स्वागता रे कठे पालिरा पसु कटाया।’

³¹ पर तेसरे बापूए बोल्या, ‘बेटा, तू ता हमेसा मेरे साउगी रैंहयां; होर जो कुछ मेरा आ से सभ कुछ तेरा ई आ।

³² पर ऐबे खुसी मनाणी होर मगन हूंणां चहिए क्यूंकि आस्से सोच्हा ऐं थे कि तेरा ये भाई मरी गईरा था, पर से जिउंदा आ। गुआही गईरा था, पर ऐबे मिली गया।’”