लूका 11 - मंडयाली नंऊँआं नियम

चेलेया जो प्रार्थना करणा सिखाणा

¹ फेरी यीसू एक जगहा प्रार्थना करेया करहा था: होर जेबे से प्रार्थना करी चुक्केया, ता तेसरे चेले मन्झा ले एकिये तेस किन्हें बोल्या, “हे प्रभु, जिहां यहून्ना बपतिस्मा देणे वाल़े आपणे चेले जो प्रार्थना करणा स्खाई तिहां ईं आस्सा जो भी तुस्से स्खाई दे।”

² यीसू तिन्हा किन्हें बोल्या, “जेबे तुस्से प्रार्थना करो, ता एह्ड़ा बोलणा; ‘हे आस्सा रे बापू, तुस्सा रा नांऊँ पवित्र मन्या जाए, तुस्सा रा राज्य आये।

³ आस्सा री हर ध्याड़े री रोटी आस्सा जो देआ कर।

⁴ होर आस्सा रे पाप माफ करी दे, क्यूंकि आस्से भी आपणे हर एक गुन्हेगारा जो माफ करहा ऐं, होर आस्सा जो परखणी मन्झ नी पऊणे दे। पर आस्सा जो तेस दुस्ट सैताना ले बचा।’”

प्रार्थना रे बारे मन्झ यीसू रा उपदेस

⁵ यीसूए तिन्हा किन्हें बोल्या, “मनी लेया कि तुस्सा मन्झ एक आधी राती आपणे केसी दोस्ता वाले जाई किन्हें बोले कि, हे दोस्त; मुंजो तीन रोटिया उधार देई दे,

⁶ क्यूंकि मेरा एक दोस्त सफर करी किन्हें मेरे वाले पुजीरा, होर तेसरे अगे रखणे रे कठे मेरे वाले कुछ नी हाया।

⁷ होर से अंदरा ले जवाब दे कि, मुंजो दुःख नी दे, ऐबे ता दुराजा बंद आ, होर मेरे बच्चे मेरे साउगी बिस्तरे मन्झ ऐं, इधी कठे हांऊँ उठी किन्हें तुजो कुछ देई नी सक्दा।

⁸ हांऊँ जेहड़ा बोली करा तेता जो समझे हालांकि से माह्णुं तेसरा दोस्त हूंणे पर भी तेस जो उठी किन्हें कुछ नी देणा चाहन्दा, तेबे बी तेस दोस्त रे बौह्त मांगदे रैहणे री वजहा ले तेस तेस्जो कुछ चहिए उठी किन्हें देणां।

⁹ होर हांऊँ तुस्सा किन्हें बोल्हा, मान्घगे, ता तुस्सा जो दितेया जाणा; टोल्घे ता तुस्सा जो मिलणा खटखटान्घे ता तुस्सा रे कठे खोलेया जाणा।

¹⁰ क्यूंकि जो कोई मांघ्हा, तेस जो मिल्हा; होर जो तोप्हा ऐं, से पाहां; होर जो खटखटाहां, तेसरे कठे खोलेया जाणा।

¹¹ तुस्सा मन्झ एह्ड़ा कुण बापू हूंणां कि, जेबे तेसरा मह्ठा तेस ले रोटी मांगे, ता से तेस जो पात्थर दे, या मछि मांगे ता मछि रे बदले तेस जो कीड़ा दे?

¹² या आंडे मांगघे ता तेस जो बिछु दे?

¹³ अगर तुस्से, बुरे हुई किन्हें आपणे बच्चेया जो खरी चीजा देणा जाणहां ऐं, ता तुस्सा रे स्वर्गीय बापू आपणे मांगणे वाल़े जो पवित्र आत्मा कि नी देणी।”

यीसू होर सैतान दुस्टात्मा रा मुखिया

¹⁴ फेरी एक ध्याड़े यीसूए एक टाटी करणे वाली दुस्टात्मा काढी, होर जेबे से निकली गयी, ता टाटा बोल्दा लग्या; होर लोका जो हरानी हुई।

¹⁵ पर तिन्हा मन्झा ले कई लोके ये बोल्या कि, “सैतान दुस्टात्मा रा मुखिया आ यीसू तेसरे सहारे दुस्टात्मा काढा आ।”

¹⁶ होरिये यीसू री परखणी करणे रे कठे तेस ले आसमाना रा एक चिन्ह मान्गेया, ताकि तिन्हा जो पता लगे कि परमेसरे ई यीसू भेजिरा।

¹⁷ पर यीसूए तिन्हारे मना री गल्ला जाणी किन्हें, तिन्हा किन्हें बोल्या, जेस-जेस राजा मन्झ फूट हुंहाँ ईं, से राज उजड़ी जाहाँ: होर जेस घरा मन्झ फूट हुंहाँ ईं से नास हुई जाहाँ।

¹⁸ होर अगर सैतान आपणे ही बरखलाफ हुई जाए, ता तेसरा राज किहाँ बणी रही सक्हा? क्यूंकि तुस्से मेरे बारे मन्झ ता बोल्हा ऐं कि, हांऊँ सैताना री सहायता किन्हें दुस्टात्मा काढा।

¹⁹ भला अगर हांऊँ सैताना री मददा किन्हें दुस्टात्मा जो काढा, ता तुस्सा रे चेले केसरी मददा किन्हें काढा ऐं? इधी कठे तिन्हा ई तुस्सा रा न्याय करणा।

²⁰ पर अगर हांऊँ परमेसरा री सामर्था किन्हें दुस्टात्मा जो काढा, ता परमेसरा रा राज नेडे आई गईरा।

²¹ जेबे कोई पैहलवान माह्णुं हथियार बान्ही किन्हें आपणे घरा री रखवाली करहा, ता तेसरी जायदाद बची रहीं।

²² पर जेबे तेस ले बढ़ी किन्हें कोई होर पैहलवान हमला करी किन्हें तेस जो जीती लैहां, ता तेसरे स्यों हथियार जिन्हा पर जे तेसरा भरोसा था, तेस ले लूटी लैहें होर लूटी री जायदाद जो स्यों आपु मन्झ बांडी लैहां ऐं।

²³ जो मेरे साउगी कठा नी करदा से खिंडहा।

दुस्टात्मा रा दबारा माह्णुं मन्झा वापस आऊंणा

²⁴ “जेबे दुस्टात्मा माह्णुं मन्झा ले निकली जाहीं, ता से सुक्की जगहा मन्झ अराम टोल्हा ई। होर जेबे अराम नी पांदी, तेबे से आपु किन्हें बोल्हा ई कि, ‘मां तेस माह्णुं मन्झ जेथी ले हांऊँ निकली री थी, तेथी मां वापस चली जाणा।’

²⁵ होर से आई किन्हें तेस माह्णुं री जिन्दगी जो साफ-सुथरी होर सजरी-धजरी कमरे साहीं पाहीं।

²⁶ तेबे से दुस्टात्मा आई किन्हें आपणे ले भी ज्यादा बुरी सात दुस्टात्मा जो आपणे साउगी ल्याहूंआं ईं, होर स्यों तेस मन्झ जाई किन्हें तेथी रैंहयां ईं, होर तेस माह्णुं री पिछली हालत पैहले ले भी होर बुरी हुई जाहीं।”

धन्य कुणहां

²⁷ जेबे यीसू ये गल्ला बोल्या करहा था ता भीड़ा मन्झा ले केसी ज्नाने उची अवाजा किन्हें बोल्या, “धन्य ई से जन्नानी जेस्से तुजो जन्म दितिरा, होर तुजो दूध प्याईरा।”

²⁸ पर तिन्हें जबाब दितेया, “हां; पर धन्य ऐं स्यों, जो परमेसरा रा बचन सुणहां ऐं होर मन्हां ऐं।”

चिन्हा री मांग

²⁹ जेबे बडी भीड़ कठी हुई जाया करहा ई थी ता से बोल्दा लग्या कि, “एस जमाने रे लोक बुरे ऐं; स्यों चिन्ह तोप्हा ऐं; पर जेह्ड़ा योना नबी रे साउगी हुआ एस चिन्हा जो छाडी किन्हें होर कोई चिन्ह तिन्हा जो नी दितेया जाणा।

³⁰ जिहां योना नबी नीनवे रे लोका रे कठे चिन्ह बणेया, तिहां ईं हांऊँ माह्णुं रे मह्ठे भी एस जमाने रे लोका रे कठे एक चिन्ह बणना।

³¹ इस्राएल देसा री दक्षिण दिसा ले सेबा नांऊँआं री राणिया न्याय रे ध्याड़े एस्सा पीढ़ी रे लोका साउगी उठी किन्हें स्यों दोसी ठैहराणे, क्यूंकि से सेबा राणी सुलेमाना राजे रा ज्ञान सुणने रे कठे बड़े दुरा ले आई। होर एथी एक एह्ड़ा आ जो सुलेमान राजे ले भी बडा आ, पर फेरी भी तुस्से पाप करणा नी छाडेया।

³² नीनवे रे लोका न्याय रे ध्याड़े एस जमाने रे लोका किन्हें खड़े हुई किन्हें, स्यों दोसी ठैहराणे; क्यूंकि तिन्हें योना नबी रा प्रचार सुणी किन्हें पाप करणा छाडी दितेया। होर ऐथी से आ जो योना ले बडा आ, फेरी भी तुस्से पाप करणा नी छाडदे।”

सरीरा रा दिऊया

³³ “कोई भी दिऊया भ्खाई किन्हें तेस जो ल्कोई किन्हें या टोकरी रे थाले नी रखदा, एता रे बजाय दिऊये जो दीवटा पर रख्हा ऐं कि घरा रे अंदर आऊणें वाल़े पर प्रयासा हो।

³⁴ तेरे सरीरा री हाखिया दिऊये साहीं ई, इधी कठे जेबे तेरी हाखिया साफ ई, ता तेरा सारा सरीर भी प्रयासे किन्हें भरीरा आ, पर जेबे तेरी हाखिया बुरी ई, ता सारा सरीर भी न्याहरे मन्झ पई जाणा।

³⁵ इधी कठे चतन्न रैंहयां कि, जो प्रयासा तुध मन्झ आ से अंधकारमय नी हुई जाओ।

³⁶ इधी कठे अगर तेरा सारा सरीर प्रयासे किन्हें भरीरा आ, होर तेसरा कोई हिस्सा नह्यारे मन्झ नी आ, ता तेस पूरी तरहा ले एह्ड़ा चमकणा जिहां कोई दिऊया तुस्सा पर आपणी किरणा चमकाया करहा।”

व्यवस्था स्खाणे वाल़े होर फरीसी लोका रे पाखंड

³⁷ जेबे यीसू गल्ला करेया करहा था, ता केसी फरीसी लोके तेस ले अर्ज किती कि, मेरे वाले एथी खाणा खाई ले; होर से अंदर जाई किन्हें खाणा खांदे बैठया।

³⁸ फरीसी लोक ये देखी किन्हें हरान हुआ कि तिन्हें बापदादेया रे रूआजा रे मताबक खाणा खाणे ले पैहले हाथ नी धोये।

³⁹ प्रभुए तेस किन्हें बोल्या, “हे फरीसी लोक, तुस्से तिन्हा भांडेया साहीं जो बाहरा ले साफ होर अंदरा ले गंदे, तुस्से लोका साम्हणें आपणे आपा जो ता धर्मी दस्हा ऐं पर तुस्सा रे मना मन्झ न्य्हारे किन्हें होर दुस्टता किन्हें भरीरा।

⁴⁰ हे नर्क्कले माहणुंओं, जिन्हें जे बाहर्ला हिस्सा बणाया, क्या तिन्हें अन्दरला हिस्सा नी बणाया?

⁴¹ पर हां, अन्दरली चीजा जो दान करी देऊआ, ता देखा, सभ कुछ तुस्सा रे कठे सुद्ध हुई जाणा।”

⁴² “पर हे फरीसी लोको, तुस्सा जो बौह्त सजा मिलणी! तुस्से पदीने होर सुदाब नांऊँआं री जड़ी बूटी रा, होर सभ तरहा रे सागा रा दस्वांस देहां ऐं। पर न्याय होर परमेसरा रा प्यार टाल्ली देहां ऐं, करणा ता एह्ड़ा चहिए था कि तुस्से होर न्याय होर परमेसरा किन्हें प्यार भी करदे रैहन्दे, होर तुस्सा जो दस्वांस ता देंदे रेहणा चहिए पर व्यवस्था री जरूरी गल्ला जो भी नजरअंदाज करी दे।

⁴³ हे फरीसी लोक, तुस्सा जो बौह्त सजा मिलणी! तुस्से यहूदी सभा मन्झ खास-खास जगहा होर बजारा मन्झ नमस्कार चाहें।

⁴⁴ तुस्सा जो बौह्त सजा मिलणी! क्यूंकि तुस्से तिन्हा ल्हुखी री कब्रा साहीं ऐं, जिन्हा पर लोक चल्हा ऐं, पर नी जाणदे।”

⁴⁵ तेबे एकी व्यवस्था स्खाणे वाल़े ये तेस जो जवाब दितेया कि, “हे गुरु, इन्हा गल्ला रे बोलणे ले तू आस्सा री बेज्जती करहा।”

⁴⁶ यीसूए बोल्या, “हे व्यवस्था स्खाणे वाल़ेओ, तुस्सा जो भी सजा मिलणी! तुस्से एह्ड़े बोझा थाले, जिन्हा जो चकणा बौह्त कठण आ, माह्णुंआं पर लाध्हा ऐं पर तुस्से आपु तिन्हा बोझा जो आपणी एक गुठी किन्हें भी नी छुंदे।

⁴⁷ तुस्सा बौह्त सजा मिलणी! तुस्से तिन्हा नबिया री कब्र बणाहें, जिन्हा जो तुस्सा रे बापदादे मारी दितरा था।

⁴⁸ एता कठे तुस्से मेरे गुआह ऐं, होर आपणे बापदादे रे कामा मन्झ सहमती जताएं। क्यूंकि तिन्हें ता स्यों मारी दिते, होर तुस्से तिन्हारी कब्रा बणाहें।

⁴⁹ इधी कठे परमेसरे आपणी बुद्धि रे ज्रीए ये भी बोल्या कि, मां तिन्हा वाले नबी होर चुणिरे चेले भेजणे, होर तिन्हा, तिन्हा मन्झा ले कितने मारी देणे, होर कितने स्ताणे।

⁵⁰ इधी कठे संसारा री सुर्हूआता ले जितने भी नबिया रा खून बहाया गईरा, तेता रा हिसाब कताब, एस जमाने रे लोका ले लया जाणा।

⁵¹ हाबिला रे खूना ले लई किन्हें जकरयाह नबी रे खूना तक जो बेदी होर मन्दरा रे बीचा मन्झ मारी दितिरे, हांऊँ तुस्सा किन्हें सच्च बोल्हा, तेसरा हिसाब कताब एस जमाने रे लोका ले लया जाणा।

⁵² तुस्से जे व्यवस्था स्खाणे वाल़े तुस्सा जो बौह्त सजा मिलणी! तुस्से ज्ञाना री चाबी ता लई ली, तुस्से ना ता आपु ई तेस मन्झ दाखल हुंहाँ ऐं, होर दाखल करणे वाल़े भी रोकी दिते।”

⁵³ जेबे यीसू तेथी ले निकल्या, ता व्यवस्था स्खाणे वाल़े होर फरीसी लोक बौह्त पीछे पई गये होर स्यों बौह्त गल्ला रे बारे मन्झ तेस ले सुआल पुछदे लगे।

⁵⁴ होर स्यों तेस जो फसाणे रे इंतजारा मन्झा लगी रहे ताकि स्यों तेसरे मुंहा री कोई गल पकड़ी सके।