यहून्ना 6 - मंडयाली नंऊँआं नियम

पांज हजार लोका जो खाणा खुआणा

¹ इन्हा गल्ला ले बाद यीसू गलील समुद्रा मतलब तिब्रियुस झीला रे दूजे बाढे गया।

² होर एक बडी भीड़ तेसरे पीछे हुई गयी क्यूंकि जो चिन्ह से ब्मार पर करहा था स्यों तिन्हा जो देख्हा ऐं थे।

³ तेबे यीसू प्हाड़ा पर चढ़ी किन्हें तेथी आपणे चेले साउगी बैठेया।

⁴ होर यहूदी लोका रा फसहा रा साजा नेडे था।

⁵ तेबे यीसूए एक बौह्त बडी भीड़ आपणे वाले आऊंदे देखी। यीसूए फिलिप्पुसा ले पूछेया कि, “आस्से इन्हारे कठे खाणा केथी ले खरीदिये?”

⁶ पर तिन्हें ये गल तेस जो परखणे रे कठे बोली, क्यूंकि से आपु जाणहां था कि तेस क्या करणा।

⁷ फिलिप्पुसे यीसू जो जवाब दितेया कि, “दो सौ ध्याड़े री कमाई रे बराबर कीमत भी तिन्हारे खाणा खरीदणे रे कठे पूरी नी हूणीं कि, तिन्हा मन्झा ले हर एकी जो थोड़ी-थोड़ी मिली सके।”

⁸ यीसू रे चेले मन्झा ले समौन पतरसा रे भाई अन्द्रियासे यीसू जो बोल्या,

⁹ “एथी एक मह्ठा आ जेस वाले जऊआ री पांज रोटीया होर दो मछिया ई। पर इतने लोका रे कठे यों क्या ई।”

¹⁰ यीसूए बोल्या कि, “लोका जो बठ्याली देआ।” तेस जगहा बौह्त घाह था। स्यों लोक जो पांज हज़ार मर्ध थे, सब लोक घाह गास बैठी गये। (पर तिन्हें ज्नानिया होर बच्चे नी गिणीरे थे)

¹¹ तेबे यीसूए रोटिया लिती होर परमेसरा धन्यावाद करी किन्हें बैठिरे लोका मन्झ बांडी दिती। होर तिंहां ईं मछिया मन्झा ले जितनी स्यों चाहें थे तिन्हा जो बांडी दिती।

¹² जेबे स्यों खाई किन्हें रजी गये ता यीसूए आपणे चेले किन्हें बोल्या कि, “बचीरे रोटिया कठे करहा, ताकि कुछ भी बरबाद नी हो।”

¹³ तेबे तिन्हें बचीरी रोटिया कठी किती होर तिन्हारे बारा छड़ोल्लू भरे। होर जऊआ री पांज रोटिया जो खाणे वाले ले बची गईरे थे स्यों भी कठा किती।

¹⁴ जेबे यीसूए चिन्हा रा काम करी किन्हें दसी दितेया ता स्यों लोक ये देखी किन्हें बोल्दे लगे कि, “से नबी जो संसारा मन्झ आऊणें वाल़ा था, पक्का येई आ।”

¹⁵ यीसूए ये जाणी किन्हें कि स्यों मुंजो राजा बणाणे रे कठे पकड़ना चाहें, होर से तेथी ले निकली किन्हें कल्हा प्हाड़ा पर चली गया।

यीसू रा पाणी पर चलणा

¹⁶ फेरी जेबे सांझ हुई, ता यीसू रे चेले समुद्रा रे बाढे गये।

¹⁷ होर स्यों किस्तिया मन्झ सुआर हुई किन्हें समुद्रा ले हुई किन्हें कफरनहूम सैहरा जो जांदे लगे। तेस टैम न्हयारा हुई गईरा था, होर यीसू हली तक तिन्हा वाले नी आईरा था।

¹⁸ होर आंधी री वजहा ले समुद्रा मन्झ लैहरा उठदी लगी।

¹⁹ जेबे स्यों किस्ती च्लांदे-च्लांदे लगभग पांज छे किलोमीटर दूर निकली गये, तेबे तिन्हें यीसू जो समुद्रा पर चलदे, होर किस्ती रे नेडे आऊंदे देख्या, होर स्यों डरी गये।

²⁰ पर यीसूए तिन्हा किन्हें बोल्या, “हांऊँ यीसू आ; डरा मत।”

²¹ तेबे जाई किन्हें तिन्हें यीसू जो किस्ती मन्झ चढ़णे दितेया: होर जल्दी ही किस्ती तेस जगहा पूजी गयी जेथी जे स्यों जाणां चाहें थे।

लोक यीसू जो तोप्हा ऐं

²² दूजे ध्याड़े जेह्ड़े लोक समुद्रा रे पार रही गईरे थे, ता तिन्हें ये देख्या कि, तेथी सिर्फ एक ई छोटी किस्ती थी, होर यीसू आपणे चेले साउगी तेस किस्ती पर नी चढ़ेया, पर सिर्फ तेसरे चेले ही गईरे थे।

²³ तेबे भी होर छोटी किस्तिया तिबिरियुस सैहरा ले तेस जगहा आई जेथी तिन्हें प्रभु रा धन्यावाद करणे ले बाद रोटी खाध्ही थी।

²⁴ एता कठे जेबे भीड़े देख्या कि, एथी ना यीसू आ, होर ना तेसरे चेले ऐं, स्यों भी छोटी-छोटी किस्तिया मन्झ सुआर हुई किन्हें यीसू जो टोल्दे-टोल्दे कफरनहूम सैहरा जाई पूजे।

यीसू जिन्दगी देणे वाली रोटी

²⁵ होर तिन्हें समुद्रा ले पार यीसू साउगी मिली किन्हें बोल्या, “हे गुरु तू एथी केभे आया?”

²⁶ यीसूए तिन्हा जो जवाब दितेया कि, “हांऊँ तुस्सा किन्हें सच्च -सच्च बोल्हा, तुस्से मुंजो एता कठे नी टोल्दे कि तुस्से चिन्ह देखे, पर एता कठे टोल्हा ऐं कि तुस्से रोटिया खाई किन्हें रजी गये।

²⁷ सड़ने वाल़े खाणे रे कठे मैहनत नी करा, पर तेस खाणे रे कठे मैहनत करा जो अनंत जिन्दगी देहां, जेह्ड़ी हांऊँ माह्णुं रे मह्ठे तुस्सा जो देणी। ये काम करणे रे कठे बापू परमेसरे मेरे पर हका री छाप लगाई दितिरी।”

²⁸ तिन्हें तेस किन्हें बोल्या, “परमेसरा रा काम करणे रे कठे आस्सा जो क्या करणा चहिए?”

²⁹ यीसूए तिन्हा जो जवाब दितेया, “परमेसरा रा काम ये आ कि, तुस्से मेरे पर विस्वास करा जिन्हें जे हांऊँ भेजिरा।”

³⁰ तेबे तिन्हें तेस किन्हें बोल्या, “तेबे तू होर केह्ड़ा जे चिन्ह आस्सा जो दसणे वाले आ ताकि आस्से तेस चिन्हा जो देखी किन्हें तेरे पर विस्वास करिए? एह्ड़ा क्या जो तू आस्सा जो दसणे वाले आ?

³¹ आस्सा रे बापदादे जंगला मन्झ से स्वर्गीय खाणा खाध्या जेस जो मन्ना बोल्हा ऐं, क्यूंकि पवित्र सास्त्रा मन्झ लिखिरा आ कि, तिन्हें तिन्हा जो खाणे रे कठे स्वर्गा ले रोटी दिती।”

³² यीसूए तिन्हा किन्हें बोल्या, “हांऊँ तुस्सा किन्हें सच्च -सच्च बोल्हा कि मूसे तुस्सा जो से रोटी स्वर्गा ले नी दिती, पर मेरा बापू तुस्सा जो स्वर्गा ले सच्ची रोटी देहां।

³³ क्यूंकि से रोटी जो परमेसर देहां, ये से रोटी जेह्ड़ी स्वर्गा ले उतरी किन्हें संसारा रे लोका जो जिन्दगी देहां ईं।”

³⁴ तेबे तिन्हें यीसू किन्हें बोल्या, “हे प्रभु, ये रोटी आस्सा जो हमेसा देआ कर।”

³⁵ यीसूए तिन्हा किन्हें बोल्या, “जिन्दगी देणे वाली रोटी हांऊँ ईं! जेस जे मेरे वाले आऊंणा तेस कधी भी भूखे नी रैंह्णां होर जो माह पर विस्वास करघा, तेस जो कधी सोख नी लगणी।

³⁶ हांऊँ तुस्सा किन्हें पैहले भी बोलिरा था कि, तुस्से हांऊँ देखी भी लईरा, तेबे भी विस्वास नी करदे।

³⁷ जितने भी लोक बापू मुंजो देहां स्यों से मेरे वाले आहूँआं ऐं, होर जो मेरे वाले आहूँआं ऐं, मां पक्का स्यों अपनाणे।

³⁸ क्यूंकि हांऊँ आपणी इच्छा नी, पर आपणे भेजणे वाले बापू री इच्छा पूरी करणे रे कठे स्वर्गा ले आईरा।

³⁹ होर मेरे भेजणे वाले बापू री इच्छा येई कि जितने लोक तुस्से मुंजो दितरे, तिन्हा मन्झा ले हांऊँ केसी जो भी नी गुआऊं पर हांऊँ तिन्हा जो आखरी ध्याड़े दबारा मरिरे मन्झा ले जिउंदे करी देऊँ।

⁴⁰ क्यूंकि मेरे बापू री इच्छा येई कि, जो कोई मह्ठे जो मनी किन्हें तेस पर विस्वास करहे, तेस अनंत जिन्दगी पाणी। होर मां स्यों आखरी ध्याड़े दबारा मरिरे मन्झा ले जिउंदे करी देणे।”

⁴¹ तेबे यहूदी लोक यीसू रे बारे मन्झ गलांण करदे लगे एता कठे कि तिन्हें बोल्या था कि, “जो रोटी स्वर्गा ले उतरी, से हांऊँ ईं।”

⁴² होर तिन्हें बोल्या, “कि ये युसुफा रा मह्ठा यीसू आ, जेसरे माऊ बापू जो आस्से जाणहां ऐं। तेबे से किधियो बोल्हा कि हांऊँ स्वर्गा ले आईरा?”

⁴³ यीसूए तिन्हा जो जवाब दितेया कि, “आपु मन्झ नी गलांण मत करहा।

⁴⁴ कोई भी मेरे वाले नी आई सक्दा, जेबे तक बापू, जिन्हें जे हांऊँ भेजिरा, से तेस जो मेरे वाले नी लई आये। होर मां से आखरी ध्याड़े दबारा मरिरे मन्झा ले जिउंदे करी देणा।

⁴⁵ केसी नबिये पवित्र सास्त्रा मन्झा ये लिखिरा आ कि, स्यों सब परमेसरा री तरफा ले सिखाई रे हुंगे। जेस केसिए बापू ले सुणेया होर सिखेया, से मेरे वाले आहूँआं।

⁴⁶ एसरा मतलब ये नी आ कि केसिए बापू देख्या, पर जो परमेसरा री तरफा ले आ, सिर्फ तिन्हें ई बापू देख्या।

⁴⁷ हांऊँ तुस्सा किन्हें सच्च -सच्च बोल्हा कि, जो कोई विस्वास करहा, अनंत जिन्दगी तेसरी ई।

⁴⁸ हांऊँ जीवन देणे वाली रोटी ई।

⁴⁹ तुस्सा रे बापदादे जंगला मन्झ मन्ना खाध्या होर मरी गये।

⁵⁰ ये से रोटी ई जो स्वर्गा ले उत्रहा ई ताकि माह्णुं तेता मन्झा ले खाई सके होर नी मरे।

⁵¹ जीवन देणे वाली रोटी जो स्वर्गा ले उतरीरी, से हांऊँ आ। अगर कोई एस्सा रोटिया मन्झा ले खाये, ता हमेसा जिउंदा रैंह्णां होर जो रोटी मां संसारा रे लोका रे कठे देणी, से मेरा मास आ।”

⁵² एता पर यहूदी लोके ये बोली किन्हें आपु मन्झ झगड़दे लगे कि, “यीसू किहाँ आपणा मास खाणे जो देई सक्हा?”

⁵³ यीसूए तिन्हा किन्हें बोल्या, “हांऊँ तुस्सा किन्हें सच्च -सच्च बोल्हा जेबे तक तुस्से हांऊँ माह्णुं रे मह्ठे रा मास नी खान्घे, होर मेरा खून नी पिंघे, तेबे तक तुस्सा मन्झ जिन्दगी नी ई।

⁵⁴ जो मेरा मास खांहां होर मेरा खून पींहां, अनंत जिन्दगी तेसरी ई, होर आखरी ध्याड़े से मां दबारा मरिरे मन्झा ले जिउंदे करी देणा।

⁵⁵ क्यूंकि मेरा मास सच्चे खाणे री चीज ई, होर मेरा खून सच्चे पीणे री चीज ई।

⁵⁶ जो मेरा मास खांहां होर मेरा खून पीहां, से मेरे अंदर होर हांऊँ तेस अंदर बणी किन्हें रैंहयां

⁵⁷ जिहां जिउंदे परमेसर बापूए हांऊँ भेजिरा होर हांऊँ बापू री बजहा ले जिउंदा आ तिहां ई तेस भी जो मुंजो खांहगा तेस मेरी बजहा ले जिउंदे रैंह्णां।

⁵⁸ जो रोटी स्वर्गा ले उतरीरी से तेस मनणे साहीं नी कि से बापदादे खाधी, होर मरी गये। पर जेस केसी ये रोटी खाणी तेस हमेसा जिउंदे रैंह्णां।”

⁵⁹ यूं गल्ला तिन्हें कफरनहूम सैहरा रे एक यहूदी सभा मन्झ उपदेसा रे टैमा बोली।

अनंत जिन्दगी रे बचन

⁶⁰ एता कठे तेसरे साउगी चलने वाले मन्झा ले कई लोके ये सुणी किन्हें बोल्या कि, “ये गल्ला समझणे मन्झ बड़ी कठण ई; इन्हा जो कुण सुणी सक्हा?”

⁶¹ यीसूए आपणे मना मन्झ ये जाणी किन्हें कि मेरे चेले आपु मन्झ एस गल्ला री बजहा ले गलांण करदे लगे, तिन्हा ले पूछेया, “क्या ये गल्ला तुस्सा जो मेरे पर विस्वास करणे ले रोक्हा ई?

⁶² होर अगर तुस्से हांऊँ माह्णुं रा मह्ठा स्वर्ग जांदे देखणा, जेथी हांऊँ पैहले था ता क्या हूंणा?

⁶³ परमेसरा री आत्मा ता जिन्दगी देणे वाली ई, माह्णुं री सक्ति कुछ नी करी सकदी। जो गल्ला मैं तुस्सा किन्हें बोलिरी स्यों आत्मा री वखा ले आहूँईं होर जिन्दगी देणे वाली ई।

⁶⁴ पर तुस्सा मन्झा ले कितने एह्ड़े ऐं जो विस्वास नी करदे।” क्यूंकि यीसू ता पैहले ले जाणहां था कि जो विस्वास नी करदे, स्यों कुणहें? होर केस हांऊँ पकड़वाणा।

⁶⁵ होर तिन्हें बोल्या, “इधी कठे मैं तुस्सा किन्हें बोल्या था कि जेबे तक केसी जो बापू नी भेज्दा तेबे तक से मेरे वाले नी आई सकदा।”

पतरसा रा विस्वास

⁶⁶ तेस टैमा ले बाद, तेबे यीसू साउगी चलने वाले कई सारे लोक तेसरे बौह्त बरखलाफ हुई गये होर फेरी स्यों तेस साउगी नी रहे।

⁶⁷ तेबे यीसूए तिन्हा बारा चेलेया किन्हें बोल्या, “क्या तुस्से भी जाणा चाहें?”

⁶⁸ समौन पतरसे तेस जो जवाब दितेया कि, “हे प्रभु आस्से केस वाले जाईये? अनंत जिन्दगी री गल्ला ता तेरे ही वाले ई।

⁶⁹ होर आस्से तेरे पर विस्वास कितेया, होर जाणी गये कि, परमेसरा रा तरफा ले आईरा पवित्र मसीहा आ।”

⁷⁰ यीसूए तिन्हा जो जवाब दितेया, “मैं तुस्से बारा चेले चुणिरे, पर तुस्सा मन्झा ले एक सैतान रे बसा मन्झ आ।”

⁷¹ ये यीसूए समौन इस्करयोति रे मह्ठे यहूदा इस्करयोति रे बारे मन्झ बोल्या, क्यूंकि तिन्हा बारा चेले मन्झा ले एक आ, होर सेई यीसू जो पकड़वाणे वाल़ा था।