यहून्ना 3 - मंडयाली नंऊँआं नियम

यीसू होर निकुदेमुस

¹ फरीसी लोका मन्झा ले नीकुदेमुस नांऊँआं रा एक माह्णुं था, जो यहूदी लोका रा प्रधान था।

² तिन्हें राती यीसू वाले आई किन्हें यीसू किन्हें बोल्या, “हे गुरु, आस्से जाणहां ऐं कि, परमेसरे तुजो आस्सा जो स्खाणे रे कठे भेजीरा; परमेसर अगर तेरे साउगी नी हो, ता तू इन्हा चिन्हा जो जेह्ड़े तू दसा नी दसी सक्दा था।”

³ यीसूए तेस जो जवाब दितेया कि, “हांऊँ तुस्सा किन्हें सच्च-सच्च बोल्हा, अगर कोई नंऊँऐं सिरे ले नी जम्मे ता से परमेसरा रा राज नी देखी सक्दा।”

⁴ नीकुदेमुसे तेस जो बोल्या, “माह्णुं जेबे बुड्ढा हुई जाहाँ, ता से माऊआ रे गर्भा मन्झ जाई किन्हें दबारा जन्म नी ले सकदा।”

⁵ यीसूए तेस जो जवाब दितेया कि, “हांऊँ तुस्सा किन्हें सच्च -सच्च बोल्हा कि, जेबे तक कोई माह्णुं पाणी होर आत्मा किन्हें नी जम्मे ता से परमेसरा रे राजा मन्झ दाखल नी करी सक्दा।

⁶ क्यूंकि माह्णुं रा सरीरा मन्झ जम्मणा एक सरीरा रा जन्म आ; जेबे कि आत्मा रा जम्मणा एक नंऊँआं जन्म आ।

⁷ हरान नी हो कि, हांऊँ तुजो बोल्हा; कि तुजो नंऊँऐं सिरे ले जमणा जरूरी आ।

⁸ हउवा जेथी चांही तेथी चल्हा ई, होर तू तेता री अवाज सुणहां, पर नी जाणदा कि, से केथी ले आहूँआं ईं होर केथी जो जांही? जो कोई पवित्र आत्मा ले जम्मिरा से एह्ड़ा ई आ।”

⁹ नीकुदेमुसे यीसू जो जवाब दितेया कि, “ये गल्ला किहाँ हुई सक्हा ई?”

¹⁰ ये सुणी किन्हें यीसूए जबाब दितेया, “तू इस्राएल देसा रा गुरु हुई किन्हें भी इन्हा गल्ला जो नी समझ्दा?

¹¹ हांऊँ तुस्सा किन्हें सच्च -सच्च बोल्हा कि आस्से जो जाणहां ऐं, से बोल्हा ऐं, होर जो आस्से देख्या तेता री गुआही देहां ऐं, होर तुस्से आस्सा री गल्ला पर विस्वास नी करदे।

¹² जेबे मैं तुस्सा जो धरतीया मन्झ हूंणे वाली गल्ला दसी, ता तुस्से विस्वास नी कितेया, होर जेबे हांऊँ तुस्सा किन्हें स्वर्गा मन्झ हूंणे री गल्ला करूं, ता फेरी तुस्सा किहाँ विस्वास करणा?

¹³ हांऊँ माह्णुं रा मह्ठा ई सिर्फ स्वर्गा जो गया होर सिर्फ हांऊँ ई आ जेह्ड़ा स्वर्गा ले धरती पर आया।

¹⁴ बौह्त पैहले जेबे इस्राएली लोके जंगला मन्झ परमेसरा रा व्रोध कितेया, तेबे मूसे कांसे रे बणिरे जैहर्ला कीड़ा खम्बे प्र्याहले चढ़ाया। होर जिहां ईं लोके से कीड़ा देख्या स्यों बची गये, तिंहां ईं जरूरी आ कि हांऊँ माह्णुं रा मह्ठा मा भी ऊंचे पर चढ़णा।

¹⁵ ताकि जो कोई मेरे पर विस्वास करहे से तेस मन्झ अनंत जिन्दगी पाए।

¹⁶ क्यूंकि परमेसरे संसारा रे लोका किन्हें एह्ड़ा प्यार कितेया कि तिन्हें आपणा एकलौता मह्ठा देई दितेया, ताकि जो कोई तेस पर विस्वास करहे से नास नी हो पर अनंत जिन्दगी पाए।

¹⁷ क्यूंकि परमेसरे आपणा मह्ठा संसारा मन्झ इधी कठे नी भेज्या कि, से संसारा रे लोका जो सजा रा हुक्म दे पर तिन्हें से इधी कठे भेज्या कि संसारा रे लोक तेसरे ज्रीए उद्धार पाई सके।

¹⁸ जो परमेसरे रे मह्ठे पर विस्वास करहा, तेस पर सजा रा हुक्म नी हुन्दा, पर जो तेस पर विस्वास नी करदा, से दोसी बणी गया, इधी कठे कि तिन्हें परमेसरा रे एकलौते मह्ठे रे नांऊँआं पर विस्वास नी कितेया।

¹⁹ होर सजा रे हुक्मा री वजहा येई कि प्रयासा संसारा मन्झ आईरा, होर माह्णुंऐ नह्यारे जो प्रयासे ले ज्यादा खरा मन्या क्यूंकि तिन्हारे काम बुरे थे।

²⁰ क्यूंकि जो कोई बुराई करहा से प्रयासे किन्हें बैर करहा, होर से प्रयासे रे नेडे नी आऊंदा, एह्ड़ा नी हो कि तेसरे कामा पर इल्जाम लगी जाए।

²¹ पर जो सच्चाई पर चल्हा, से प्रयासे रे नेडे आहूँआं, ताकि तेसरे काम सूझी जाए कि, स्यों परमेसरा री तरफा ले किते गईरे।”

यीसू रे बारे मन्झ यहून्ना बपतिस्मा देणे वाल़े री गुआही

²² एता ले बाद यीसू होर तेसरे चेले यहूदिया ईलाके मन्झ आये; होर से तेथी तिन्हा साउगी रही किन्हें बपतिस्मा देंदा रहें।

²³ होर यहून्ना बपतिस्मा देणे वाल़ा ऐनोन गांऊँआं जेह्ड़ा सामरिया जिल्ले रे सालेमा सैहरा मन्झ बपतिस्मा देंदा लगिरा था, क्यूंकि तेथी बौह्त पाणी था। होर लोक आई किन्हें तेस ले बपतिस्मा लैंदे लगीरे थे,

²⁴ क्यूंकि यहून्ना बपतिस्मा देणे वाल़े तेबे तक जेल्हा अंदर नी पाईरा था।

²⁵ तेथी यहून्ना बपतिस्मा देणे वाल़े रे चेलेया रा केसी यहूदी लोका साउगी यहूदी रूआजा रे मताबक सुद्ध हूंणे रे बारे मन्झ बैहस हुई।

²⁶ होर तिन्हें यहून्ना बपतिस्मा देणे वाल़े रे चेले यहून्ना वाले आई किन्हें तेस किन्हें बोल्या, “हे गुरु, जो आदमी यरदन दराऊआ रे पार तेरे साउगी था, होर जेसरे बारे मन्झ तैं आस्सा जो दसिरा था, से बपतिस्मा देंहां, होर सभ लोक तेस वाले जाया करहा ऐं।”

²⁷ यहून्ना बपतिस्मा देणे वाल़े जवाब दितेया, “जेबे तक माह्णुं जो स्वर्गा ले नी दितेया जाए तेबे तक से कुछ नी पाई सक्दा।

²⁸ तुस्से ता आपु ई मुंजो बोलदे हुए सुणीरा कि, ‘हांऊँ मसीह नी आ, पर तेस मसीह ले पैहले भेजीरा।’

²⁹ नंऊँआं लाड़ा ही नौंईं लाड़ीया किन्हें ब्याह करहा, पर नऊँए लाड़े रा दोस्त बौह्त खुस हुई किन्हें तेसरी सुणहां। से नऊँए लाड़े री अवाज सुणी किन्हें बौह्त खुस हुई जाहाँ, ये ही मेरी खुसी होर ऐबे पूरी हुई गई।

³⁰ जरूरी आ कि से बढ़े होर हांऊँ घटी जाऊं।

³¹ जो स्वर्गा ले आहूँआं, से सभी चीजा ले बड़ा आ, जो धरती ले आहूँआं से धरती रा आ; होर धरतिया री गल्ला करहा: जो स्वर्गा ले आहूँआं, से सभी ले गास आ।

³² जो कुछ तिन्हें देख्या, होर सुणेया, से लोका जो तेसरे बारे दसेया; पर कुछ लोक ई तेसरी गल्ला मन्नी।

³³ पर जिन्हें जे तेसरी गल्ला मनी लई तिन्हें एस गल्ला री छाप लगाई दिती कि परमेसर सच्चा आ।

³⁴ क्यूंकि जो परमेसरे भेज्या, से परमेसरा री गल्ला करहा: क्यूंकि से पवित्र आत्मा नापी-नापी किन्हें नी देंदा।

³⁵ बापू परमेसर मह्ठे किन्हें प्यार रख्हा, होर तिन्हें सभ चीजा रा हक तेसरे हाथा मन्झ देई दितिरी।

³⁶ जो परमेसरा रे मह्ठे पर विस्वास करहा, अनंत जिन्दगी तेसरी ई; पर जो मह्ठे री नी मन्नदा, तेस अनंत जिन्दगी नी देखणी, पर परमेसरा रा गुस्सा तेस पर रैंहयां।”