यहून्ना 16 - मंडयाली नंऊँआं नियम

¹ “ये गल्ला मैं तुस्सा किन्हें इधी कठे बोली ताकि तुस्से विस्वास न खोई दो।

² तिन्हा तुस्से यहूदी सभा मन्झा ले काढी देणे। बल्कि एह्ड़ा टैम आहूँआं कि, जो कोई तुस्सा जो मारघा तेस ये समझणा कि से परमेसरा री सेऊआ करेया करहा।

³ होर स्यों तिन्हा कामा जो इधी कठे करणे कि स्यों ना ता बापू जाणदे होर ना हांऊँ।

⁴ पर ये गल्ला मैं इधी कठे तुस्सा किन्हें बोली कि, जेबे से टैम आऊंणा ता तुस्सा जो याद रहे कि मैं तुस्सा जो तिन्हारे बारे मन्झ पैहले दसी दितिरा था। सुर्हू मन्झ ये गल्ला मैं इधी कठे नी बोली क्यूंकि मैं तुस्सा साउगी था।”

पवित्र आत्मा रे काम

⁵ “ऐबे हांऊँ आपणे भेजणे वाल़े परमेसरा वाले जाहाँ पर ऐबे तुस्सा मन्झा ले कोई मेरे ले नी पुछदा कि, हांऊँ केथी जाहाँ?

⁶ पर मैं जो ये गल्ला तुस्सा किन्हें बोली, इधी कठे तुस्सा रा मन दुःखा किन्हें भरी गईरा।

⁷ तेबे बी हांऊँ तुस्सा किन्हें सच्च बोल्हा कि, मेरा जाणा तुस्सा रे कठे खरा आ। क्यूंकि अगर हांऊँ तुस्सा ले दूर नी जाऊँ, ता तेस पवित्र आत्मा जो तुस्सा रा मददगारा तुस्सा वाले नी आऊंणा, पर अगर हांऊँ जांघ्हा, ता मां से तुस्सा वाले भेजी देणा।

⁸ होर से मददगार पवित्र आत्मा आई किन्हें संसारा रे लोका जो पाप, धार्मिकता होर न्याया रे बारे मन्झ सच्चाई दसणी।

⁹ होर पवित्र आत्मा तिन्हा जो पापा रे बारे मन्झ भी सच्चाई दसणी, क्यूंकि स्यों मेरे पर विस्वास नी करदे।

¹⁰ होर धार्मिकता रे बारे मन्झ भी दसणा, इधी कठे कि हांऊँ बापू वाले जाहाँ, होर तुस्सा हांऊँ दबारा नी देखणा।

¹¹ होर पवित्र आत्मा तिन्हा जो न्याया रे बारे मन्झ भी दसणा, इधी कठे कि संसारा रा मुखिया सैतान रा भी न्याय हुई चुकिरा।”

¹² “मुंजो तुस्सा किन्हें होर भी बौह्त सारी गल्ला करणी, पर हल्ली तुस्से तिन्हा गल्ला जो समझ नी सक्दे।

¹³ पर तेस पवित्र आत्मा जो आस्सा जो सच्चाई पर लेई जांहीं जेबे आऊंणा, ता तेस तुस्सा जो परमेसरा री सारी सच्चाईया दसणी। क्यूंकि से आपणे आपा ले कुछ नी बोलदा, पर जो गल्ला से परमेसरा ले सुणना, तेस तेह्ड़ा ई बोलणा, होर इधी कठे हूंणे वाली गल्ला तुस्सा जो दसणी।

¹⁴ तेस मेरी महिमा करणी, क्यूंकि तेस जो मेरे वखा ले जो मिलिरा, से ही तुस्सा जो दसणी।

¹⁵ जो कुछ बापू रा आ, से सब मेरा आ। इधी कठे हांऊँ बोल्या कि, पवित्र आत्मा मेरी वखा ले जेह्ड़ी गल्ला मिलिरी से ही तुस्सा जो दसणी।”

दुःख सुखा मन्झ बधली जाणा

¹⁶ “थोह्ड़े ही टैम रे बाद तुस्सा हांऊँ नी देखणा, होर थोह्ड़े ही टैम रे बाद दबारा तुस्सा हांऊँ देखणा।”

¹⁷ तेबे यीसू रे चेले मन्झ ले कुछ चेले बोल्या, “ये क्या आ, जो से आस्सा किन्हें बोल्हा कि, ‘थोह्ड़े ही टैम रे बाद तुस्सा हांऊँ नी देखणा, होर फेरी थोह्ड़े ही टैम रे बाद दबारा तुस्सा हांऊँ देखणा, होर ये भी कि हांऊँ बापू वाले जाहाँ?’”

¹⁸ तेबे तिन्हें बोल्या, “एता रा क्या मतलब आ कि थोह्ड़े ही टैम रे बाद? आस्से नी जाणदे कि, से क्या बोल्हा।”

¹⁹ यीसूए ये जाणी किन्हें कि, स्यों मेरे ले मेरी गल्ला रा मतलब पूछणा चाहें, तिन्हें तिन्हा किन्हें बोल्या, “क्या तुस्से आपु मन्झ मेरी एस गल्ला रे बारे मन्झ गल करेया करहा ऐं कि, थोह्ड़ी देरा मन्झ तुस्सा हांऊँ नी देखणा, होर फेरी थोह्ड़ी देरा मन्झ तुस्सा हांऊँ देखणा।

²⁰ हांऊँ तुस्सा किन्हें सच्च -सच्च बोल्हा कि, मेरे मरणे रे बाद तुस्सा रोणा होर कर्लाणा, पर संसारा रे लोका खुसीया मनाणीं। तुस्सा जो दुःख हूंणां, पर जेबे मां जिउंदे हुई जाणा ता तुस्सा रा दुःख खुसीया मन्झ बदली जाणा।

²¹ जेबे ज्नाने बच्चे जो जमणे रा टैम आहूँआं ता तेस्सा जो पीड़ा हुंहाँ ईं, क्यूंकि तेस्सा री दु: खा री घड़ी आई गईरी, पर जेबे से बच्चे जो जन्म देई चुक्हा ई ता से एस खुसी किन्हें कि तेस्से एक माह्णुं जो संसारा मन्झ जन्म दितेया से फेरी तेस पीड़ा जो दबारा याद नी करदी।

²² इंहां करी किन्हें तुस्सा जो भी ऐबे दुःख हुंहाँ, पर मां तुस्सा किन्हें फेरी दबारा मिलणा होर तुस्सा रे मना मन्झ खुसी हूणीं; होर तुस्सा री खुसी तुस्सा ले केसी नी छुड़ाणी।

²³ तेस टैम जेबे तुस्सा हांऊँ दबारा देखणा तेबे तुस्सा मेरे ले कुछ नी मान्गणा। हांऊँ तुस्सा किन्हें सच्च -सच्च बोल्हा, क्यूंकि तुस्से मेरे चेले ऐं, जो कुछ तुस्से बापू ले कुछ मान्घगे, ता तेस तुस्सा जो देणा।

²⁴ ऐबे तक तुस्से मेरे चेले हूंणे री वजहा ले मेरे बापू ले कुछ नी मान्गेया; मान्घगे ता तुस्सा जो मिलणा ताकि तुस्सा री खुसी भरपूर हुई जाए।”

संसारा पर जीत

²⁵ “मैं यूं गल्ला तुस्सा किन्हें काह्णियां मन्झ बोलिरी, पर एह्ड़ा टैम आहूँआं कि, मां तुस्सा किन्हें काह्णियां मन्झ होर नी बोलणा, पर साफ-साफ तुस्सा जो बापू रे बारे मन्झ दसणा।

²⁶ तेस टैम तुस्सा मेरा चेले हूंणे री वजहा ले तुस्सा आपु ही बापू ले मांगणा। होर हांऊँ तुस्सा किन्हें ये नी बोल्दा कि, मुंजो ही तुस्सा रे कठे बापू ले प्रार्थना करणी पोणी।

²⁷ क्यूंकि बापू परमेसर आप्हुए तुस्सा किन्हें प्यार रख्हा, इधी कठे कि तुस्से मेरे किन्हें प्यार करहा ऐं, होर ये भी विस्वास कितेया कि हांऊँ बापू री तरफा ले आईरा।

²⁸ हांऊँ बापू री तरफा ले संसारा मन्झ आईरा, होर दबारा संसारा जो छाडी किन्हें बापू वाले जाहाँ।”

²⁹ तेबे यीसू रे चेले बोल्या, “ऐबे तू साफ-साफ बोल्या करहा, होर कोई काह्णियां मन्झ नी लगीरा बोल्दा।

³⁰ ऐबे आस्से जाणी गये कि तू सब कुछ जाणहां, होर तुजो कोई मतलब नी आ कि, कोई तेरे ले पूछे। एता ले आस्से विस्वास करहा ऐं कि तू परमेसरा री तरफा ले आईरा।”

³¹ ये सुणी किन्हें यीसूए तिन्हा किन्हें बोल्या, “क्या तुस्से ऐबे विस्वास करहा ऐं?”

³² “देखा, से घड़ी आहूँआं ईं बल्कि आई पुजीरी कि तुस्सा सभीया ओरे परे हुई किन्हें आपणे-आपणे घरा होर गांऊँआं मन्झ चली जाणा, होर हांऊँ कल्हा छाडी देणा। तेबे बी हांऊँ कल्हा नी आ, बापू मेरे साउगी आ।

³³ मैं ये गल्ला तुस्सा किन्हें इधी कठे बोली, ताकि तुस्सा जो मेरे मन्झ सांति मिलो; संसारा मन्झ तुस्सा जो कलेस हुंहाँ, पर हिम्मत करहा! मैं संसार जीती लईरा।”