यहून्ना 15 - मंडयाली नंऊँआं नियम

यीसू सच्ची अंगूरा री बेल

¹ “सच्ची अंगूरा री बेल हांऊँ ईं; होर मेरा बापू माली आ।

² जो पांगे मेरे मन्झ ई, होर नी फलदी, तेता जो से काटी देहां, होर जो डाली फल्हा ई तेता जो से होर छांट्आं ताकि से होर फले।

³ जो उपदेस मैं तुस्सा जो दितिरी तेस वजहा ले तुस्से पैहले ले ही सुध हुई गईरे।

⁴ तुस्से मेरे मन्झ वास करहा, होर मां तुस्सा मन्झ वास करणा। जिहां अगर पांगे अंगूरा री बेला मन्झ जुड़ी किन्हें नी रहे, ता से आपणे आपा ले नी फली सक्दी, तिहां ईं अगर तुस्से भी मेरे मन्झ वास नी करो ता नी फली सक्दे।”

⁵ “हांऊँ अंगूरा री बेल ई, तुस्से पांगे; जो मेरे मन्झ वास करहा, होर हांऊँ तेस मन्झ वास करहा, से बौह्त फल ल्याहूँआं। क्यूंकि मेरे ले लग हुई किन्हें तुस्से कुछ भी नी करी सक्दे।

⁶ अगर कोई मेरे मन्झ वास नी करदा ता हांऊँ तेस जो पांगे साहीं काटी किन्हें सट्टी देहां, होर से सुक्की जाहाँ, होर लोक तिन्हा जो कठी करी किन्हें आगी मन्झ पाई देहां ऐं होर स्यों भखी किन्हें फुख्ही जाहीं।

⁷ अगर तुस्से मेरे मन्झ वास करहा ऐं, होर मेरा बचन तुस्सा मन्झ वास करहा, ता तुस्से जो चाहे मांगा होर से तुस्सा रे कठे हुई जाणा।

⁸ मेरे बापू री महिमा एता ले हुंहाँ ईं कि, तुस्से बौह्त जे फल ल्याऊआ, तेबे ई तुस्से मेरे चेले हूंणे।”

⁹ “जिहां बापूए मेरे किन्हें प्यार रखिरा, तिहां ईं मैं भी तुस्सा किन्हें प्यार रखिरा। मेरे प्यारा मन्झ बणी किन्हें रैंहयां।

¹⁰ अगर तुस्से मेरे हुक्मा जो मनघे, ता तुस्सा मेरे प्यारा मन्झ बणी किन्हें रैंह्णां। जिहां मैं आपणे बापू रा हुक्म मन्या, होर तेसरे प्यारा मन्झ बणी रैंहयां।

¹¹ मैं यूं गल्ला तुस्सा किन्हें इधी कठे बोलिरी कि, मेरी खुसी तुस्सा मन्झ बणी रहे, होर तुस्सा जो भरपूर खुसी मिले।

चेलेया रा एक दूजे किन्हें रिस्ता

¹² ये मेरा हुक्म आ कि, जो मैं तुस्सा किन्हें प्यार रखिरा, तिहां ई तुस्से भी एक दूजे किन्हें प्यार रखा।

¹³ एता ले बडा प्यार केसी रा नी आ कि, कोई आपणे दोस्ता रे कठे आपणी जान दे।

¹⁴ जो कुछ हांऊँ तुस्सा जो हुक्म देहां, अगर तेह्ड़ा ई करघे ता तुस्से मेरे दोस्त ऐं।

¹⁵ ऐबे ले मां तुस्सा जो नौकर नी बोलणा, क्यूंकि नौकर नी जाणदा कि, तेसरा माल्क क्या करहा? पर मैं तुस्सा जो दोस्त बोलिरा, क्यूंकि मैं जो गल्ला आपणे बापू ले सुणी, स्यों सब गल्ला मैं तुस्सा जो दसी दितिरी।

¹⁶ तुस्से हांऊँ नी चुणेया पर मैं तुस्से चुणिरे होर नियुक्त कितिरे ताकि तुस्से जाई किन्हें फल ल्याए; होर तुस्सा रा फल टिकी सके। क्यूंकि तुस्से मेरे चेले होर इधी कठे जो कुछ तुस्से बापू ले मान्घगे, तेस तुस्सा जो देणा।

¹⁷ इन्हा गल्ला रा हुक्म हांऊँ तुस्सा जो इधी कठे देहां कि, तुस्से एक दूजे किन्हें प्यार रखा।”

संसारा रा चेले किन्हें नफरत रखणा

¹⁸ “अगर संसार रे लोक तुस्सा किन्हें बैर रख्हा ऐं, ता तुस्से जाणहां ऐं कि तिन्हें तुस्सा ले पैहले मेरे किन्हें नफरत किती।

¹⁹ अगर तुस्से एस संसारा रे लोका साहीं हुंदे, ता संसारे रे लोक तुस्सा किन्हें प्यार रखदा। क्यूंकि तुस्से संसारा रे नी ऐ, होर मैं तुस्से संसारा रे लोका मन्झा ले चुणी लईरे, इधी कठे संसारा रे लोक तुस्सा किन्हें नफरत करहा।

²⁰ याद करहा जो गल मैं तुस्सा किन्हें बोली थी कि, ‘गुलाम आपणे माल्का ले बडा नी हुन्दा।’ क्यूंकि तिन्हें मुंजो दुःख दितेया, ता तिन्हा तुस्सा जो भी देणा, अगर तिन्हें मेरी गल्ला मन्निरी हुन्दी, ता तिन्हा तुस्सा री गल्ला भी मन्नणी।

²¹ पर लोका तुस्सा साउगी ये सब कुछ करणा क्यूंकि तुस्से मेरे चेले, होर स्यों मेरे भेजणे वाले जो नी जाणदे।

²² अगर हांऊँ नी आऊंदा होर तिन्हा किन्हें गल्ला नी करदा, ता स्यों पापी नी ठैहरदे, पर ऐबे तिन्हा वाले तिन्हारे पापा रे कठे कोई भाना नी आ।

²³ जो मेरे किन्हें नफरत रख्हा, से मेरे बापू किन्हें भी नफरत रख्हा।

²⁴ मैं तिन्हा मन्झ चमत्कार किते, जो होर केसिए नी किते, ता ऐबे स्यों पापी ठैहराये गये। पर ऐबे ता तिन्हें मेरे कितरे काम देखी लये फेरी भी स्यों मेरा बापू होर मेरे किन्हें नफरत करहा ऐं।

²⁵ होर ये इधी कठे हुएया कि, पवित्र सास्त्रा रा बचन पूरा हो। क्यूंकि लिखिरा, ‘तिन्हें मेरे किन्हें बेबजह नफरत किती।’

²⁶ पर जेबे तेस्सा पवित्र आत्मा आऊंणा जो तुस्सा री मददगार ई, होर जो तुस्सा जो सच्चाई पर लेई जांहीं। जेस जो मां तुस्सा रे कठे बापू वाले ले भेजणी, होर तेस मेरे बारे मन्झ गुआही देणी।

²⁷ होर तुस्से भी मेरे गवाह ऐं, क्यूंकि तुस्से सुर्हू ले मेरे साउगी ऐं।”