यहून्ना 14 - मंडयाली नंऊँआं नियम

यीसू रा आपणे चेलेया जो हिम्मत देणा

¹ यीसुए तिन्हा किन्हें बोल्या, “तुस्सा रा मन दु:खी नी हो, तुस्से परमेसरा पर विस्वास रख्हा ऐ, ता मेरे पर भी विस्वास रखा।

² मेरे बापू रे घरा मन्झ रैहणे रे कठे बौह्त जगहा ई। अगर जगहा नी हुन्दी, ता मां तुस्सा किन्हें बोली देणा था। क्यूंकि हांऊँ तुस्सा रे कठे जगहा त्यार करणे रे कठे जाया करहा।

³ होर अगर हांऊँ जाई किन्हें जगहा त्यार करूं, ता दबारा वापस आई किन्हें मां तुस्से आपणे साउगी लई जाणें, ताकि जेथी हांऊँ रहूं तेथी तुस्से भी रहो।

पैंडा, सच्चाई होर जिन्दगी

⁴ होर जेथी हांऊँ जाहाँ तेथी रा पैंडा तुस्से जाणहां ऐं।”

⁵ थोमे तेस किन्हें बोल्या, “हे प्रभु, आस्से नी जाणदे कि तू केथी जाहाँ? ता पैंडा किहाँ जाणी सक्हा ऐं।”

⁶ यीसूए तेस किन्हें बोल्या, “पैंडा होर सच्चाई होर जीवन हांऊँ ईं आं; मेरे बगैर कोई बापू वाले नी पूजी सक्दा।

⁷ अगर तुस्से हांऊँ जाणेया हुन्दा, ता मेरे बापू जो बी जाणदे; होर ऐबे ले तुस्से तेस जो जाणहां ऐं, होर देखी भी लईरा।”

⁸ फिलिप्पुसे यीसू किन्हें बोल्या, “हे प्रभु, आस्सा जो बापू दसी दे। येई आस्सा रे कठे बौह्त आ।”

⁹ यीसूए तेस किन्हें बोल्या, “हे फिलिप्पुस, हांऊँ इतने ध्याड़े ले तुस्सा साउगी आ, होर क्या तू मुंजो नी जाणदा? जिन्हें हांऊँ देखी लया तिन्हें बापू देखी लया। तू किधियो बोल्हा कि, आस्सा जो बापू दसी दे?

¹⁰ क्या तू विस्वास नी करदा कि, हांऊँ बापू मन्झ वास करहा, होर बापू मेरे मन्झ वास करहा। ये गल्ला जो हांऊँ तुस्सा किन्हें बोल्हा, आपणे आपा ले नी बोल्दा, पर बापू जो मेरे मन्झ रैंहयां, से आपणे काम करहा।

¹¹ मेरा विस्वास करा कि हांऊँ बापू मन्झा वास करहा, होर बापू मेरे मन्झ वास करहा; नीं ता तिन्हा चमत्कारा रे कामा री वजहा ले ई मेरा विस्वास करा जो मैं कितिरे।

यीसू रे नांऊँआ ले प्रार्थना

¹² हांऊँ तुस्सा किन्हें सच्च -सच्च बोल्हा, जो मेरे पर विस्वास रख्हा, ये काम जो हांऊँ करहा, तेस बी करणे, बल्कि एता ले बी बडे-बडे काम करणे, क्यूंकि हांऊँ बापू वाले जाया करहा।

¹³ होर जो कुछ तुस्से मेरे नांऊँआं ले मान्घगे, तेह्ड़ा ई मां करणा ताकि मह्ठे रे ज्रीए बापू री बड़ाई हो।

¹⁴ अगर तुस्से मेरे नांऊँआं ले कुछ भी मान्घगे ता मां से करणा।”

पवित्र आत्मा जो भेजणे रा वादा

¹⁵ “अगर तुस्से मेरे किन्हें प्यार रख्हा ऐं, ता तुस्सा मेरे हुक्म मनणें।

¹⁶ होर मां बापू ले प्रार्थना करणी कि, से तुस्सा जो दूजा मददगार दे, ताकि से हमेसा तुस्सा साउगी रहे।

¹⁷ से पवित्र आत्मा ई जो आस्सा जो सच्चाई पर लई जांहीं। जेस जो संसारा रे लोक ग्रैहण नी करी सक्दे, क्यूंकि लोके ना ता से देखीरी, होर ना तेस जो जाणहां। पर तुस्से तेस जो जाणहां ऐं, क्यूंकि से तुस्सा साउगी रैंहयां, होर तेस तुस्सा मन्झ हूंणां।

¹⁸ मां तुस्से अनाथ नी छाडणे, मां तुस्सा वाले वापस आऊंणा।

¹⁹ होर थोह्ड़े ही टैम रे बाद संसारा हांऊँ नी देखणा, पर तुस्सा हांऊँ देखणा, क्यूंकि हांऊँ जिउंदा हुई जाणा, होर तुस्सा भी जिउंदे रैंह्णां

²⁰ तेस ध्याड़े जेस ध्याड़े मां मरिरे मन्झ ले जिउंदे हुई जाणा तुस्सा जाणना कि हांऊँ आपणे बापू मन्झ वास करहा, होर ये भी कि तुस्से मेरे मन्झ वास करहा, होर हांऊँ तुस्सा मन्झ वास करहा।

²¹ जेस मेरे हुक्मा जो जाणहां ऐं, होर से तिन्हा जो मन्हां ऐं, सेई मेरे किन्हें प्यार रख्हा। होर जो मेरे किन्हें प्यार रख्हा, तेस किन्हें मेरे बापू प्यार रखणा, होर मां तेस किन्हें प्यार रखणा, होर आपणे आपा जो तेस पर जाहिर करणा।”

²² यहुदे (जो यहूदा इस्करयोति नी था) यीसू किन्हें बोल्या, “हे प्रभु, एह्ड़ा क्या कि तू आपणे आपा जो आस्सा पर ता जाहिर करेया करहा, पर संसारा रे लोका पर जाहिर नी करदा?”

²³ यीसूए तेस जो जवाब दितेया, “अगर कोई मेरे किन्हें प्यार रखघा, ता तेस मेरे बचन मनणें। होर मेरे बापू तेस किन्हें प्यार रखणा, होर आस्सा तेस वाले आऊंणा, होर तेस साउगी रैंह्णां।

²⁴ जो मेरे किन्हें प्यार नी रखदा, से मेरे बचना जो नी मन्नदा, होर जो बचन तुस्से सुणहां ऐं, से मेरे नी पर बापू रे ई, जिन्हें हांऊँ भेजिरा।”

²⁵ “ये गल्ला मैं तुस्सा किन्हें रैहन्दे हुए तुस्सा जो दसी दिती।

²⁶ पर मेरे बापू मेरे हका ले पवित्र आत्मा भेजणी, जो तुस्सा री मददगारा ई। तेस तुस्सा जो सभ गल्ला दसणी, होर जो कुछ मैं तुस्सा किन्हें बोलिरा तेस तुस्सा जो याद कराणा।”

यीसू री सांति रा दान

²⁷ “हांऊँ तुस्सा जो सांति देहां, हांऊँ आपणी सांति तुस्सा जो देहां। ये से सांति नी जेह्ड़ी संसार देहां, तेह्ड़ा हांऊँ नी देंदा: तुस्सा रा मन ना दुआस होर ना डरे।

²⁸ तुस्से मुंजो ये बोलदे हुए सुणेया, ‘हांऊँ जाहाँ, होर तुस्सा वाले दबारा वापस आहूँआं।’ अगर तुस्से मेरे किन्हें प्यार रखदे, ता एस गल्ला ले खुस हुंदे कि, हांऊँ बापू वाले वापस जाहाँ, क्यूंकि बापू मेरे ले बडा आ।

²⁹ होर मैं तुस्सा किन्हें ये सारी गल्ला हूंणे ले पैहले ई दसी दिती, ताकि जेबे तेह्ड़ा हुई जान्घा, ता तुस्सा मेरे पर विस्वास करणा।

³⁰ ऐबे मेरे वाले ज्यादा टैम नी आ कि हांऊँ तुस्सा किन्हें होर गल्ला करु। क्यूंकि एस संसारा रा मुखिया सैतान आहूँआं, होर मेरे पर तेसरा कोई हक नी आ।

³¹ पर ये इधी कठे हुंहाँ कि संसार रे लोक जाणी सके कि हांऊँ बापू किन्हें प्यार करहा, होर जिहां बापूए मुंजो हुक्म दितिरा, मैं तेह्ड़ा ई करहा। उठा, एथी ले चला।”