याकूब 5 - मंडयाली नंऊँआं नियमअमीर लोका जो सलाह 1 हे अमीर लोको सुणी लेया; तुस्से आपणे आऊणें वाले दुःखा पर चिंगी -चिंगी किन्हें रोआ। 2 तुस्सा री जायदाद बर्बाद हुई जाणी होर तुस्सा रे कपड़े जो दीमक खाई गई। 3 तुस्सा रे सोने होर चांदी रे रंग उडी गईरे; होर से उडीरा रंग तुस्सा रे बरखलाफ गुआही देणी; होर जिहां आग सभ कुछ भस्म करी देहां ईं, तिहां ईं परमेसरा तुस्सा जो सख्त सजा देणी। तुस्से जे आखरी टैमा मन्झ जायदाद कठी कितिरी जेबे जे परमेसर न्याय करणे वाल़ा आ। 4 देखा, जिन्हें मजदूरे तुस्सा रे डोहर्रिया मन्झ काम कितेया, तुस्से तिन्हारी मजदूरी धोखे किन्हें रोकी रखिरी; सेई मजदूर चिंगी किन्हें पुकारेया करहा, होर खेता मन्झ काम करणे वाले री पुकार सर्वसक्तिमान परमेसरा रे काना तक पूजी गईरी। 5 धरती पर तुस्सा री जिन्दगी बौह्त मजे वाली रही होर बौह्त सुख भोगेया, एह्ड़ा करी किन्हें तुस्से आपणे आपा जो तेस डांगरे साहीं पाली पोसी किन्हें मोटा तगड़ा करी लईरा जेहड़ा नी जाणदा कि से काटी देणा। 6 तुस्से धर्मी लोका जो दोसी बणाई किन्हें मारी दितेया; जेह्ड़ा तुस्सा रा सामना नी करी सकदा। दुःखा मन्झ धीरज सैहणा 7 इधी कठे हे भाईयो होर बैहणो, प्रभु रे आऊणें तक सबर रखा, जिहां किसान भी कीमती फसला रे कठे इंतजार करदा रैंहयां, एता रे कठे से सुर्हूआती बरखा ले लई किन्हें बादा री बरखा तक लगातार सबर रखी किन्हें इंतजार करदा रैंहयां। 8 इंहां ही तुस्से भी सबर रखा, होर आपणे दिला जो मजबूत करा, क्यूंकि प्रभु रा आऊंणा नेडे आ। 9 हे भाईयो होर बैहणो, एक दूजे रे बारे मन्झ सिकायत मत करहा, नी ता परमेसरा तुस्सा रा न्याय करणा, होर न्याय करणे वाल़ा दुराजे वाले आई किन्हें खड़ी गईरा। 10 हे भाईयो होर बैहणो, दुःख उठाणे होर सबर रखणे रे कठे नबिया जो उदाहरण समझा, जिन्हें प्रभु रे नांऊँआं ले गल्ला किती। 11 आस्से सबर रखणे वाल़ेया लोका जो धन्य बोल्हा ऐं; तुस्से अय्यूब नांऊँआं रे माह्णुं रे सबरा रे बारे मन्झ सुणेया, होर ये भी कियां प्रभुए तेस जो तेसरे सबरा रा इनाम दितेया। होर तुस्से जाणांहे की प्रभुए ये इधी कठे कितेया, क्यूंकि प्रभु दयालु होर करुणामय आ। 12 पर हे भाईयो होर बैहणो, सभी ले खरी गल ता येई कि, कसम देख्या खांदे, ना ता स्वर्गा री, ना ता धरती री, ना केसी होरी चीजा री, पर तुस्सा री गल “हां री हां,” होर “ना री ना” हो, ताकि परमेसर तुस्सा जो सजा नी दे। विस्वासा किन्हें कितिरी प्रार्थना री सामर्थ 13 अगर तुस्सा मन्झ कोई दुःखी हो, ता से प्रार्थना करहे; अगर खुस हो, ता से बड़ाई रे गाणे गाए। 14 अगर तुस्सा मन्झ कोई ब्मार हो, ता कलीसिया रे अगुवे जो सादे होर स्यों प्रभु रे नांऊँआं ले तेल मली किन्हें तेसरे कठे प्रार्थना करहे। 15 होर विस्वासा री प्रार्थना किन्हें तेस रोगिया बची जाणा होर प्रभुआ से ठीक करी देणा; होर अगर तिन्हें पाप भी कितिरे हो, ता परमेसरा स्यों माफ करी देणे। 16 इधी कठे तुस्से आपु मन्झ एक दूजे रे साम्हणें आपणे-आपणे पाप मनी लऊआ, होर एक दूजे रे कठे प्रार्थना करा; ताकि तुस्से ठीक हुई जाओ, धर्मी माह्णुंआं री प्रार्थना ले बौह्त कुछ हुई सक्हा। 17 एलिय्याह नबी भी ता आस्सा साहीं दुःख सुख भोगी माह्णुं था; होर तिन्हें मन लगाई किन्हें प्रार्थना किती कि, बरखा नी पये; होर साढे तीन साला तक जमीना पर बरखा नी पये। 18 फेरी तिन्हें प्रार्थना किती, होर आसमाना ले बरखा हुई, होर जमीना मन्झ नाज हुआ। 19 हे भाईयो होर बैहणो, अगर तुस्सा मन्झ कोई सच्चाई रे पैंडे ले भटकी जाए, होर कोई तेस भटकीरे माह्णुं जो वापस लई आये, 20 ता से ये जाणी ले कि जो कोई केसी भटकीरे पापी जो वापस लई आहुंघा, परमेसरा तेस भटकीरे माह्णुं रे कई पाप माफ करी देणे, होर तेस जो हमेसा री मौता ले बचाई लेहां। |
This work is licensed under Creative Commons Attribution-ShareAlike 4.0 License.