इब्रानियो 9 - मंडयाली नंऊँआं नियम

संसारा पर बणिरे तम्बू

¹ ऐबे पैहली वाचा मन्झ संसारा पर बणिरे तम्बू जेथी इस्राएल देसा रे लोक अराधना करहे थे, होर तेस्सा अराधना करणे री बिधिया दुहें मौजूद थे।

² होर से तम्बू बणाया गया, जेस मन्झ दो कमरे थे। पैहले कमरे मन्झ दीऊदानी, होर मेज, होर मेजा पर परमेसरा जो चढ़ाईरी रोटिया रखी जाहीं थी; होर तेस जो पवित्रजगहा बोल्या जाहाँ।

³ फेरी तेथी एक परदा था होर परदे रे पीछे दूजा कमरा था, जेस जो बड़ी पवित्रजगहा बोल्या जाहाँ।

⁴ तेस कमरे मन्झ सोने री धुपदानी, होर चारो वखा ले सोने ले मढ़ीरा लकड़ी रा संदूक जेस जो वाचा रा संदूक भी बोली जाहाँ रखिरा था। होर तेस संदूका मन्झ सोने रे भांडे मन्झ मन्ना भ्हरिरा रखिरा था, होर हारूना रा डंडा जेस मन्झ कोमल फूल होर पातरा लगे थे, होर पात्थरा री पटिया जेस पर वाचा लिखी गईरी थी, से रखिरी थी।

⁵ होर संदूका रे प्रयाल्हे फान्खा वाले दो महिमामय प्राणी थे, जिन्हारे फान्ख प्रायस्चित करणे री जगहा पर छाऊँ कितिरी थी। पर एस टैम आस्से इन्हा गल्ला रा ब्खान एक-एक करी किन्हें नी करी सक्दे।

संसारा री सेऊआ री सीमा

⁶ जेबे ये चीजा एस तरीके ले आपणी जगहा मन्झ रखिरी हुई थी, ता याजक हर रोज तेस पैहले कमरे मन्झ जाई किन्हें आपणी सेऊआ रा काम करहा था।

⁷ पर दूजे कमरा यानि बड़ा पवित्रजगहा मन्झ सिर्फ बडा याजक ई जाहाँ था, होर से भी साला मन्झ एक ही बार जाहाँ था। होर से आपणे साउगी खून अंदर लई जाहाँ था, जेस खूना जो से आपणे कठे होर लोका रे अनजाणे मन्झ कितिरे पापा री माफी रे कठे चढ़ाहां था।

⁸ पवित्र आत्मा ये गल साफ दसी कि परमेसरा रा असली बडा पवित्रजगहा जो स्वर्गा मन्झ आ, तेथी तक पूजणे रा रस्ता लोका रे कठे बंद था। क्यूंकि पैहला तम्बू जो संसारा पर बणिरा था हाल्ले भी टिकिरा था।

⁹ होर ये उदाहरण आजके टैमा जो दसा। क्यूंकि याजक जो दान होर बलिदान चढ़ाहें; तेस ले चढ़ावा चढ़ाणे वाले जो एस गल्ला रा भरोसा नी मिलदा कि तेसरे पाप माफ हुई गईरे।

¹⁰ क्यूंकि ये बिधि बस खाणे पीणे री चीजा पर, होर किस्मा-किस्मा री सुद्ध हूंणे री बिधिया पर टिकीरी, होर ये सारी बिधिया बाहरी तरीके ले पूरी करणे वाली ई। ये बिधि तेबे तक रखिरी जेबे तक परमेसर एक नौंईं बिधि जो नई बणान्दा।

स्वर्गा रा तम्बू

¹¹ पर मसीह खरी चीजा रा बडा याजका बणी किन्हें आया जो हाल्ले एथी आ। होर से स्वर्गा रे बडे होर सिद्ध तम्बू मन्झ दाखल करी चुकिरा। ये तम्बू माह्णुं रा बणाईरा नीआ, होर ना ई बणाईरे एस संसारा रा हिस्सा आ।

¹² मसीह जेबे एक ई बार सभी रे कठे पवित्रजगहा मन्झ दाखल हुआ, ता से बकरे होर बछु रा खून लेई किन्हें नी गया कि से बलिदान करी सके। एता रे बजाय से आपणा ई खून लई किन्हें गया, होर तिन्हें आस्सा जो पापा ले अनंत छुटकारा दितेया।

¹³ पुराणी बिधि रे मताबक बोल्ह्द होर बकरे रे खून होर फुकिरे बछु री सुआह लोका पर छिड़के जाणे ले, तिन्हारे सरीरा री असुद्धता दूर हुई जाहीं।

¹⁴ मसीह बेकसूर था, होर तिन्हें आपणे आपा जो अनंत होर आत्मिक बलिदान करी किन्हें परमेसरा रे साम्हणें आस्सा रे पापा रे कठे चढ़ाई दितेया। होर इधी कठे तेसरा खून सिर्फ आस्सा रे सरीरा री असुद्धता जो दूर करणे रे कठे ही नी, पर अंतरात्मा जो सुद्ध करणे रे कठे सामर्थी आ, ताकि आस्से जिउंदे परमेसरा री सेऊआ करहे, होर एह्ड़े पापा रे काम नी करहे, जो मौता री वखा जो लेई जाहें।

¹⁵ इधी कठे मसीह परमेसर होर लोका रे बीचा नौंईं वाचा रा बिचौलिया बणेया। ताकि चुणिरे लोक हमेसा री विरासत पाए, जेस जो देणे रे वादा परमेसरे तिन्हा किन्हें कितिरा था। क्यूंकि पैहली वाचा रे अधीन रैहन्दे हुए लोके जितने पाप कितिरे थे, तिन्हो तेता री सजा ले छुड़ाणे रे कठे यीसुए आपणे प्राण देई दिते।

¹⁶ क्यूंकि वाचा रा बान्हणा बसीहत लिखणे रे साहीं आ, बसीहत लिखणे वाले री मौत साबित हूंणा जरूरी ई।

¹⁷ क्यूंकि एह्ड़ी बसीहत लिखणे वाले रे मरणे रे बाद ही लागू हुंहाँ ईं। जेबे तक बसीहत बान्हणे वाल़ा जिउंदा रैंहयां, तेबे तक बसीहत लागू नी हुन्दी।

¹⁸ इधी कठे पैहली वाचा भी जानवरा रे खून बहाणे रे बाद लागू हुई थी।

¹⁹ क्यूंकि जेबे मूसा सभ लोका जो व्यवस्था रा हर एक हुक्म सुणाई चुकेया कि स्यों तेता जो मन्हें, तेता बाद तिन्हें बकरे रा होर बछु रे खूना जो पाणी किन्हें मिलाया होर लाल ऊन होर जूफा डाल्आ रे पांगे ले व्यवस्था री कताबा पर होर सभ लोका पर छिड़की दितेया।

²⁰ होर बोल्या कि, “ये खून तेस वाचा जो लागू करहा, जो परमेसरे तुस्सा किन्हें बान्हिरी कि तुस्से तेता जो मन्नो।”

²¹ होर एस तरहा तिन्हें तम्बू जेथी स्यों लोक अराधना करहे थे, होर अराधना री सारी चीजा, दुहीं पर खून छिड़क्या।

²² क्यूंकि सच्चे मूसा री व्यवस्था रे मताबक सारी चीजा खूना रे ज्रीए सुद्ध किती जाहीं। होर बगैर जानवरा रे खून बहाए पापा री माफी नी हुन्दी।

मसीह रे बलिदाना रे ज्रीए पापा री माफी

²³ इधी कठे जरूरी आ कि, तम्बू होर तेसरी सारी चीजा जो स्वर्गा री चीजा रा प्रतीक ई, जानवरा रे खूना ले सुद्ध किती जाऐ। पर स्वर्गा री असली चीजा जो सुद्ध करणे रे कठे ता जानवरा रे खूना ले भी खरे बलिदाना री जरूरत थी।

²⁴ क्यूंकि मसीहे तेस माह्णुं रे बणाईरे पवित्रजगहा मन्झ दाखल नी हुआ, जो स्वर्गा मन्झ रखिरी असली चीजा रा सिर्फ एक प्रतीक आ। पर से सीधा स्वर्गा मन्झ ही दाखल हुई गया, होर तेथी ऐबे परमेसरा रे साम्हणें आस्सा रे कठे अर्ज करहा।

²⁵ होर मसीह स्वर्गा मन्झ इधी कठे दाखल नी हुआ कि से लोका रे पापा रे कठे बार-बार आपु जो बलिदान करहे, से तेस बडा याजका साहीं नी आ, जो हर साल दूजे रा खून लई किन्हें पवित्रजगहा मन्झ दाखल हुंहाँ ऐं।

²⁶ होर अगर एह्ड़ा करणा जरूरी था ता संसारा रचणे रे टैमा ले लई किन्हें मसीह जो बार-बार दुःख सहन करी किन्हें मरणा पउन्दा। पर ऐबे जेबे टैमा रे युगा रा अंत हूंणे वाल़ा, से सभिरे कठे एक बारी आया, ताकि आपणे ई बलिदाना रे ज्रीए सभिरे पापा जो माफ करी दे।

²⁷ होर जिहां हर माह्णुंआं रे कठे एक बारी मरणा, होर परमेसरा रे ज्रीए तिन्हारा न्याय हूंणां पक्का आ।

²⁸ तिहां ईं मसीह भी कई लोका रे पाप माफ करणे रे कठे एक ई बारी बलिदान हुआ। पर जेबे तेस दबारा एस धरती पर आऊंणा, ता तेस पाप माफ करणे रे कठे नी, पर तिन्हा लोका जो उद्धारा करणे रे कठे आऊंणा, जो तेस जो न्हायल्दे लगिरे।