इब्रानियो 8 - मंडयाली नंऊँआं नियमयीसू आस्सा रा माहयाजक 1 ऐबे जो गल्ला आस्से बोल्या करहा ऐं, तिन्हा मन्झा ले सभी ले बडी गल्ल येई कि, आस्सा वाले एह्ड़ा ही बडा याजक आ, जो स्वर्गा मन्झ तेस म्हान परमेसरा री राजगद्दी री सीधी वखा जो बैठी गया। 2 होर आस्सा रा बडा याजक सच्चे तम्बू रे बड़े पवित्रजगहा मन्झ सेऊआ करहा जेह्ड़ा स्वर्गा मन्झ आ, जो परमेसरे बणाईरा ना कि केसी माह्णुं ऐ, बल्की प्रभुए खड़ा कितरा। 3 क्यूंकि हर एक बडा याजक जो इधी कठे नियुक्त कितेया जाहाँ ताकि से पापा री माफी रे कठे, भेंट होर बलिदान चढ़ाए। इधी कठे एस बडे याजका यीसू रे कठे भी ये जरूरी था कि, तेस वाले भी कुछ चढ़ाणे रे कठे हो। 4 होर अगर मसीह संसारा मन्झ हुन्दा ता से कधी याजक नी हुन्दा, क्यूंकि संसारा मन्झ मूसा री व्यवस्था रे मताबक दान चढ़ाणे रे कठे पैहले ले ही याजक लोक हाए। 5 जो काम ये याजक लोक करहे स्यों स्वर्गा री चीजा रे प्रतिरूप होर परछाई ऐं, पर हुबहू तेहड़ा नी जेहड़ा स्वर्गा मन्झ आ। क्यूंकि जेबे मूसा तम्बू बणान्दे जांदा लगिरा था, तेस ई टैम परमेसरे तेजो चेतावनी दिति कि, “तू हर चीज ठीक तिहां ई बणाया जो तुजो प्हाड़ा पर दस्सीरा था।” 6 पर जो याजका री सेऊआ रा काम आस्सा रे बडे याजक यीसू जो मिल्या, से होरी याजका री सेऊआ ले बढ़ी किन्हें आ। क्यूंकि से होर भी खरी वाचा रा बिचौलिया, जो पुराणी वाचा ले भी खरी ई होर खरी चीजा री वाचा पर आधारित ई। नौंईं वाचा 7 क्यूंकि अगर पैहली वाचा मन्झ कमिया नी थी, ता दूजी वाचा रे कठे कोई जरूरत नी थी। 8 पर परमेसरे लोका पर दोस ल्गाई किन्हें बोल्या, “देखा स्यों ध्याड़े आया करहा ऐं, कि मां इस्राएल देसा रे लोका साउगी, होर यहूदा रे गोत्रा रे लोका साउगी, नौंईं वाचा बान्हणी। 9 ये वाचा तेस वाचा साहीं नी हूणी, जो मैं तिन्हारे बापदादेया साउगी तेस टैम बान्ही थी, जेबे मैं मिस्र देसा ले स्यों काढी किन्हें ल्यांदे, क्यूंकि स्यों मेरी बान्हिरी वाचा पर टिकी नी रहे, होर मैं तिन्हा ले मुंह फेरी लितेया, प्रभु एह्ड़ा ई बोल्हा। 10 फेरी प्रभु बोल्हा, क्यूंकि येई से वाचा ई, जो वाचा मां आऊणें वाले ध्याड़े ले बाद इस्राएला रे घराने साउगी बान्हणी; से येई कि कि मां आपणी व्यवस्था तिन्हो याद कुराणी, होर तिन्हा स्यों गल्ला आपणे दिला मन्झ रखणी, होर मां तिन्हारा परमेसरा बणना, होर तिन्हा मेरे लोक हूंणा। 11 फेरी कधी भी कोई भी इस्राएल रे लोका आपणे देस वाल़ेया जो, होर आपणे रिस्तेदारा जो ये नी सिखाणा, कि तुस्से प्रभु जो मन्ना, क्यूंकि छोटे लोका ले बड़े लोका तक सभिया मन्नी लेणा कि हांऊँ तिन्हारा परमेसर आ। 12 क्यूंकि मां तिन्हारे पाप माफ करी देणे, होर मां तिन्हारे पाप दबारा याद नी करणे।” 13 प्रभु एस वाचा जो नौंईं वाचा मन्ना होर पैहली वाली वाचा जो पुराणी ठैहरा। होर जो चीज पुराणी हुई जाहीं से फीकी पई जाहीं होर तिन्हा नी रैहणा। |
This work is licensed under Creative Commons Attribution-ShareAlike 4.0 License.