इब्रानियो 6 - मंडयाली नंऊँआं नियम

आत्मिक रूपा ले स्याणा हूंणा

¹ इधी कठे आस्से तिन्हा गल्ला जो बार-बार सिखणा छाडी दे, जो आस्सो मसीह रे बारे मन्झ सुर्हू ले सखाईरी थी, होर ऐबे स्याणे उपदेसा री गल्ला जो सीखा। सुर्हू मन्झ सिखिरी गल्ला जो नीऊँ मत बणाऊआ जिहां कि, पाप करणा छाडणे रे बारे मन्झ, परमेसरा पर विस्वास करणे रे बारे मन्झ,

² बपतिस्मा रे बारे मन्झ, केसी पर हाथ रखी किन्हें आसीस देणे री रस्मा रे बारे मन्झ, मरिरे रा जिउंदे हूंणे रे बारे मन्झ, होर अनंत न्याया रे बारे मन्झ स्खाणे वाले उपदेसा जो।

³ होर अगर परमेसरे मौका दितेया ता, हांऊँ तुस्सा जो स्याणे उपदेसा री गल्ला स्खाणी।

⁴ जिन्हें आपणा विस्वास खोई दितिरा तिन्हारा दबारा आपणे पापा जो छाडी परमेसरा वाले वापस आऊंणा मुस्किल आ। क्यूंकि स्यों एक बारी परमेसरा री ज्योति मन्झ रही चुके, होर स्वर्गा ले दाना जो पाई चुकिरे, होर दूजे लोका साउगी पवित्र आत्मा पाईरी।

⁵ तिन्हें मैहसूस कितिरा था कि परमेसरा रा बचना बांका आ, होर आऊणें वाले टैमा री सामर्थो जो भी मैहसूस कितेया जेबे परमेसरा राज करणा।

⁶ एह्ड़े लोका जो परमेसरा वखा जो वापस आऊणें रा कोई रस्ता नी आ, क्यूंकि स्यों आपु परमेसरा रे मह्ठा जो दबारा क्रूसा प्रयाल्हे चढ़ाहें, जेस ले दूजे लोक मसीह रा मजाक ड़ुआयें।

⁷ स्यों लोक जिन्हें खरी उपदेसा री गल्ला सिखिरी स्यों एस जमीना साहीं ऐं जेस मन्झ बार-बार बरखा पहूंआं ईं। अगर जमीन खरी ता बाह्णे वाले रे कठे फायदे वाली फसल पैदा करहा ई, होर तेस जमीना पर परमेसरा री आसीस रैंहयां ई।

⁸ होर दूजे लोक तेस जमीना साहीं ऐं जो झाकड़ होर जंगली डाल उगाहीं, जो कि बेकार ई। एस जमीना पर परमेसरा रे स्राप रा आऊंणा रा, होर आगी किन्हें सुआह हुई किन्हें खत्म हूंणे रा खतरा।

⁹ पर हे लाडले भाईयो होर बैहणो, चाहे आस्से ये गल्ला बोल्हा ऐं पर आस्सो पूरा विस्वास आ कि ये गल्ला तुस्सा रे कठे नी। आस्सा जो पूरा भरोसा आ कि तुस्से उद्धारा साउगी मिलणे वाली बांकी चीजा जो पाणे रे लायक ऐं।

¹⁰ तुस्से परमेसरा रे खातर तेसरे पवित्र लोका री सेऊआ बड़े प्यारा किन्हें करहे थे होर करदे भी लगिरे, परमेसर एस कामा जो नी भूल्दा। क्यूंकि परमेसर अन्याय करणे वाल़ा नी आ।

^11-12 तुस्से आलसी मत बणा। पर कड़ी मेहनत करणे वाले साहीं तुस्सा जो आखरी ध्याड़े तक सबर होर विस्वासा साउगी इन्हा प्यारा रे कामा जो करदे रहूआ, ताकि परमेसरा रे वादे जो पाणे रे कठे तुस्सा मन्झा मजबूत आस हो।

परमेसरा रे पक्के वादे

¹³ परमेसरे अब्राहमा किन्हें वादा देंदे टैमा आपणे ही नांऊँआ री कसम खाध्ही क्यूंकि तेस ले बडा एह्ड़ा कोई नी था, जेसरा नांऊँ लेई किन्हें से कसम खांदा, होर तिन्हें बोल्या,

¹⁴ “मां सच्चमुच तुजो बौह्त आसीस देणी, होर मां तुजो बौह्त बंस देणे।”

¹⁵ होर एस तरहा अब्राहमे बौह्त टैमा तक सबर रखणे रे बाद तेस वादे जो आपणे जिन्दगी मन्झ पूरा हुंदे देख्या।

¹⁶ लोक बडी चीजा री या बडे लोका रे नांऊँआं री कसम खाएं, होर एता ले साबित हुई जां कि कसम खाणे वाले सच्चे तेस वादे जो पूरा करणा। तेबे कोई भी एता रे बारे मन्झ बैहस नी करी सकदा।

¹⁷ होर जेबे परमेसरे आपणे लोका किन्हें ये गल बिल्कुल साफ़ बोलणा चाही कि से आपणे कितिरे वादे जो कधी नी भूल्दा; होर एस गल्ला जो साबित करणे रे कठे तिन्हें वादे साउगी आपणे नांऊँआं री कसम जोड़ी दिती। एता ले जाहिर हुंहाँ कि तेसरे वादे सच्चे पुरे हूंणे।

¹⁸ ता एथी फेरी दो गल्ला ई एक तेसरी वाचा होर दूजी तेसरी कसम जो कधी नी बधली सक्दी होर जिन्हारे बारे मन्झ परमेसर कधी झूठ नी बोली सकदा। इधी कठे आस्से परमेसरे वाले बचणे रे कठे आईरे होर जो आस तिन्हें आस्सो दितिरी, से पकड़ीरी, होर बौह्त ज्यादा उत्साही ई।

¹⁹ से आस आस्सा जो मजबूत होर पक्का करहा जिहां एक खुंडा किस्ती जो पकड़ी किन्हें मजबूत रखा। होर से आस्सो परदे रे पार करी किन्हें स्वर्गा रे मन्दरा मन्झ परमेसरा री पवित्रजगहा री तरफ लेई जाहाँ।

²⁰ जेथी यीसूए आस्सा री वखा ले आस्सा ले पैहले दाखल कितेया। से मलिकिसिदका साहीं आस्सा रे कठे हमेसा बडा याजक रा काम करहा।