इब्रानियो 5 - मंडयाली नंऊँआं नियमबडा याजक रे कठे गुण 1 परमेसरे हर बडा याजक जो इस्राएला रे लोका रे मन्झ ले चुणेया। लोका री वखा ले परमेसरा री सेऊआ करणे रे कठे से नियुक्त कितेया कि, से पापा री माफी रे कठे भेंट होर बलि चढ़ाये। 2 क्यूंकि से आपु भी कई सारी चीजा मन्झ कमजोरिया रे अधीन आ, इधी कठे से नासमझ, होर भूले भटके साउगी नर्मी किन्हें पेस आई सक्हा। 3 होर एक बडा याजक हुंदे हुए तेस जो आपणे पापा रे कठे होर तिहां ईं लोका रे पापा रे कठे बलिया चढ़ाणी चहिए। 4 होर बडा याजक हूंणे रे आदर जो कोई आपणे आपु नी लेई सकदा। कोई भी माह्णुं तेबे तक बडा याजक नी बणी सकदा जेबे तक हारूना जो पैहला बडा याजक था, जेस साहीं परमेसरा तेजो नियुक्त नी करदा। हमेसा रे कठे महायाजक 5 तिहां ईं मसीहे भी बडा याजक बणने रे आदरा जो आपणे आप नी लितेया, पर परमेसरे तेस जो ये बोली किन्हें नियुक्त कितेया जो तिन्हें केसी होरी बडे याजका किन्हें नी बोल्या, जो भजन संगीतकारे पवित्र सास्त्रा मन्झ बोल्या, “तू मेरा मह्ठा आ, आज हांऊँ तुजो आपणे मह्ठे रे रूपा मन्झ जाहिर करहा।” 6 दूजी जगहा मन्झ परमेसरे दबारा तेस किन्हें बोल्या, “जिहां मलिकिसिदक एक याजक रा काम करहा था तिहां ही तुध सदा रे कठे याजक बणी रेहणा।” 7 जेबे यीसू एस संसारा मन्झ जिउंदा था, परमेसर जो तेस जो मौता ते बचाई सक्हा था, उची अवाजा किन्हें जोरा-जोरा किन्हें रोई-रोई किन्हें तिन्हें तेस ले प्रार्थना होर अर्ज कितिरी थी होर बड़े आदर होर आपणे आपा जो परमेसरा जो सौंपणे री वजहा ले परमेसरे तेस जो जबाब दितेया। 8 यीसू मसीह परमेसरा रा मह्ठा हूणें पर भी, तिन्हें दुःख सहन करी किन्हें हुक्म मनणा सीखी लेया कि परमेसर तेस ले क्या चाहां। 9 होर सिद्ध बणने पर, तेसरे हुक्म मनणे वाले सभ लोका रे कठे से जुग-जुग रे कठे उद्धारा री वजहा बणी गया। 10 होर तेस जो परमेसरा री वखा ले मलिकिसिदका साहीं बडे याजका रा काम करणे री पदवी मिली। विस्वासा ले दूर जाणे रा नतीजा 11 एता रे बारे मन्झ आस्सा वाले बोलणे जो बौह्त सारी गल्ला ई, जिन्हारा समझणा भी कठण आ; क्यूंकि तुस्से परमेसरा रे बचन जाणने रे बारे मन्झ आलसी हुई गईरे। 12 सच्चे एस टैमा तक ता तुस्सा जो गुरु बणी जाणा चहिए था। पर तुस्सा जो ता ऐबे भी एह्ड़े माह्णुं री जरूरत जो तुस्सा जो नंऊँऐं तरीके ले परमेसरा रे उपदेसा री सुर्हू री गल्ला स्खाये। तुस्सा जो हाल्ले बच्चे साहीं दूध ही चहिए, क्यूंकि तुस्से नाजा रा खाणा नी खाई सकदे। 13 क्यूंकि दूध पिणे वाले परमेसरा रे उपदेसा री गल्ला जो नी जाणदे, जो आस्सो सखा कि परमेसरा रे नजरा मन्झ किहाँ धर्मी बणना। क्यूंकि हाल्ले से बच्चा ई आ। 14 पर नाजा रा खाणा विस्वासा मन्झ स्याणेया रे कठे आ, जिन्हें आपणे अनुभवा ले भले बुरे मन्झ फर्क करणा सीखी लईरा। |
This work is licensed under Creative Commons Attribution-ShareAlike 4.0 License.