इब्रानियो 2 - मंडयाली नंऊँआं नियम

महान उद्धार

¹ इधी कठे, जरूरी आ कि आस्से जो गल्ला सुणीरी तिन्हा पर खास ध्यान दे। केते एह्ड़ा नी हो कि आस्से बैहकी किन्हें तिन्हा गल्ला ले दूर चली जाए।

² क्यूंकि जो व्यवस्था परमेसरे स्वर्गदूता रे ज्रीए बोलिरी थी जेबे से सही साबित हुई, होर जिन्हें एस व्यवस्था रा हुक्म नी मन्नेया होर तेता रे बरखलाफ हुई गये तिन्हा सभी जो परमेसरे सजा दिती।

³ ता आस्सा जो भी सजा मिलणी, अगर आस्से एस महान उद्धारा ले बेफिकर रहे। होर एस उद्धारा रे बारे मन्झ सभी ले पैहले प्रभुए आप्हुए बोलिरा था, होर जिन्हें चेले ये सुणीरा था तिन्हें लोके आस्सो ये साबित करी किन्हें दसेया कि ये सच्च आ।

⁴ होर परमेसरे भी आपणी इच्छा रे मताबक चिन्हा जो, होर चमत्कारा जो, होर कई किस्मा रे चमत्कारा रे काम जो, होर पवित्र आत्मा रे ज्रीए लोका जो दान देणे रे ज्रीए भी ये गल साबित किती।

यीसू रा आस्सा जो आपणे भाई बैहण बनाणा

⁵ परमेसरे तेस आऊणें वाले संसारा जो जेसरे बारे मन्झ आस्से लिखी करहा ऐं, स्वर्गदूता रे अधीन नी कितेया पर आपणे मह्ठे रे अधीन कितेया।

⁶ पर पवित्र सास्त्रा मन्झ केसिए परमेसरा किन्हें बोल्या, “माह्णुं क्या आ कि हे परमेसर तू तेस जो याद करहे? या माह्णुं क्या आ कि तू तेसरा ध्यान रखे?

⁷ तैं तेस जो स्वर्गदूता रे मुकाबले थोड़ा ही कम दर्जा दितेया; तैं तेजो राजे साहीं महिमा होर आदर दितेया, होर तेस जो आपणे हाथा रे कामा पर हक दितेया।

⁸ तैं तेस जो सारी चीजा पर हक दितेया ताकि से तिन्हा सभी पर राज करहे,” इधी कठे सारी चीजा जो माह्णुं रे अधीन करदे हुए परमेसरे एह्ड़ा कुछ भी छाडेया, जो तेसरे अधीन नी कितिरा हो। पर सच्चाई येई कि ऐबे तक आस्से सभी चीज़ा जो माह्णुं रे अधीन नी देखदे।

⁹ पर आस्से यीसू जो देखाएं, जेस जो थोड़े टैमा रे कठे स्वर्गदूता थोड़ा ही कम दर्जा दितिरा था, ताकि परमेसरा रे अनुग्रहा ले से हर एक माह्णुं रे कठे मारी दितेया जाये। क्यूंकि तेस जो दुःख सहन करी किन्हें मरणे री वजहा ले यीसू जो महिमा होर आदरा दितेया।

¹⁰ परमेसरे सारी चीजे रची, होर आपणे कठे ही सारी चीजा जो बणाए रखा। होर इधी कठे परमेसरा जो ये ठीक लग्या कि बौह्त लोका जो आपणी महिमा मन्झ साझीदार करणे रे कठे यीसू मसीह रे दुःख उठाणे ले से सिद्ध हुई जाये। क्यूंकि यीसू ही तिन्हो उद्धारा वखा जो लेई जाहाँ।

¹¹ क्यूंकि से जो लोका जो तिन्हारे पापा ले पवित्र करहा, होर स्यों लोक जिन्हारे पाप पवित्र किते जाहें, तिन्हारा दुहीं रा बापू एक ई आ: एस वजहा ले यीसू तिन्हा जो भाई होर बैहण बोलणे ले नी सर्मान्दा।

¹² होर एसरे बारे मन्झ मसीह परमेसरा किन्हें बोला, “मां आपणे लोका जो दसणा कि तैं मेरे कठे कितने खरे काम कितिरे, होर तिन्हा सभी लोका रे बीचा मन्झ मां तेरी बड़ाई करणी।”

¹³ से दबारा बोल्हा कि, “मां परमेसरा पर भरोसा रखणा।” होर से दबारा बोल्हा कि, “हांऊँ तिन्हा लोका साउगी आ जिन्हा जो परमेसरे मुंजो दितिरे।”

¹⁴ क्यूंकि परमेसरा रे बच्चे माह्णुं ही ऐं यानि जो मांस होर खूना रे बणी रे, होर मह्ठा आपु भी तिन्हा साहीं लहू होर मांस बणी गया यानि माह्णुं बणी गया, होर आपणी मौता रे ज्रीए मौता पर हक रखणे वाले सैताना जो हराई दितेया।

¹⁵ होर एस तरहा तिन्हें माह्णुंआं रा उद्धार कितेया, जो सारी जिन्दगी मौता रे डरा मन्झ गुलामा साहीं जीये थे।

¹⁶ क्यूंकि प्रभु यीसू ता स्वर्गदूता जो नी बल्की अब्राहमे रे बंसा री मदद करहा।

¹⁷ एस वजहा ले तेसरे कठे जरूरी था कि, सभ गल्ला मन्झ हुबहू बाकि माह्णुंआं साहीं बणी जाये, होर एस तरीके ले से परमेसरा रा सच्चा होर दयालु बडा याजक बणे। होर जो बलिदान से तिन्हा कठे करहा तेसरे ज्रीए लोका रे तिन्हारे पापा ले माफी मिली सके।

¹⁸ क्यूंकि यीसू री परखणी हुई होर तिन्हें दुःख भी सहन कितेया, इधी कठे से परखणी मन्झ पईरे लोका री मदद करी सक्हा।