इब्रानियो 13 - मंडयाली नंऊँआं नियम

मसीह जिन्दगी जीणे री बिधिया

¹ एक दूजे जो आपणा भाई होर बैहण समझी किन्हें प्यार करहा।

² अजनबीया रा भी आदर-खातर करहा, क्यूंकि एह्ड़ा करदे हुए कई लोके अनजाणे मन्झ स्वर्गदूता रा आदर-खातर कितेया।

³ मसीह री खुसी री खबरा री वजहा ले जो लोक कैदा मन्झ तिन्हो याद रखा कि जिहां जे तिन्हा साउगी तुस्से भी कैद हो, होर जिन्हा लोका जो सताई गईरा हो, तिन्हा जो याद रखा कि तिन्हारा पीड़ा तुस्सा रे सरीरा मन्झ मैहसूस हुई करहा हो।

⁴ आपणे ब्याह रा आदर करहा, होर लाड़ा लाड़ी एक दूजे रे प्रति वफादार रहे। क्यूंकि परमेसरा व्यभिचारिया, होर नजायज रिस्ते रखणे रा न्याय करणा।

⁵ आपणे आपा जो पैसे रे लालचा रे कठे दूर रखा, होर जो तुस्सा वाले आ, तेता मन्झ संतुस्ट रहुआ; क्यूंकि परमेसरे आपु बोलिरा कि, “मां तू कधी भी नी छाडणा, होर ना मां तू कधी भी त्यागणा।”

⁶ इधी कठे आस्से बेधड़क हुई किन्हें बोल्हा ऐं, “प्रभु मेरा मददगार आ, मां नी डरणा, माह्णुं मेरा क्या ब्गाड़ी सक्हा।”

⁷ जो तुस्सा रे कलीसिया रे अगुवे थे, होर जिन्हा जो तुस्से परमेसरा रा बचन सुणाया, तिन्हा जो तुस्से याद रखा। होर तिन्हा पर ध्याना देआ कि स्यों केह्ड़ी जिन्दगी जीये थे होर किहाँ मरी गये। होर जिहां स्यों परमेसरा पर विस्वास करहे थे तिहां ही तुस्से भी करहा।

⁸ यीसू मसीह काल होर आज होर जुग-जुग एक जेह्ड़ा आ होर कधी नी बदल्दा।

⁹ क्यूंकि यीसू मसीह कधी नी बदल्दा कोई तुस्सा जो कई किस्मा रे अजीब उपदेसा रे ज्रीए खरे रस्ते ले नी भड़काए, क्यूंकि तुस्सा रे मना रे कठे ये खरा आ कि स्यों अनुग्रहा रे ज्रीए पक्के बणे, ना कि खाणे पीणे री चीजा रे बिधिया रे मनणे ले, क्यूंकि इन्हा गल्ला जो मनणे ले तिन्हारा भी कोई फायदा नी आ, जो इन्हा गल्ला जो मन्हें थे।

¹⁰ जो याजक यहूदी बिधिया रे मताबक परमेसरा रे तम्बू मन्झ सेऊआ करहे, तिन्हो ये हक नी आ कि आस्सा री बेदी मन्झ ले खाए।

¹¹ क्यूंकि पैहली वाचा रे मताबक हर साल बडा याजक बड़ी पवित्रजगहा मन्झ जानवरा रा खून लई किन्हें आहूँआं कि से पाप जो दूर करणे रे कठे कितिरे बलिदाना जो चढ़ाए, पर जानवरा रे सरीरा जो लोका रे तम्बू ले बाहर फुकी दिते जाहें।

¹² इधी कठे यीसूए भी लोका जो आपणे ई खूना रे ज्रीए पवित्र करणे रे कठे यरुस्लेम सैहरा रे बाहर दुःख सही किन्हें मरेया।

¹³ ता आऊआ बलिदान री बिधिया जो छाडी किन्हें यीसू वाले आये होर जिहां तिन्हें लोका रे तम्बू ले बाहर जाई किन्हें बेज्जती जो झेल्या ऐं, तिहां ही आस्से भी तेस बेज्जती जो झेल्हा ऐं।

¹⁴ क्यूंकि एस धरती पर आस्सा वाले हमेसा रे कठे एथी कोई घर नी आ, बल्की आस्से ता तेस घरा रा इंतजार करेया करहा ऐं जो आऊणें वाले आ।

¹⁵ इधी कठे आस्से यीसू रे ज्रीए लगातार आपणे ओठा किन्हें परमेसरा रा गुण गाण करहे, होर येही से बलिदान आ जो आस्से परमेसरा रे कठे चढ़ाये।

¹⁶ पर भलाई होर जरूरत मंद लोका किन्हें आपणी चीजे बाडणा देख्या भुल्दे, क्यूंकि परमेसर एह्ड़े बलिदाना ले खुस हुंहाँ।

प्रार्थना रे कठे बिनती

¹⁷ आपणे अगुवे रा हुक्म मना, होर तिन्हारे अधीन रैहया, क्यूंकि ये तिन्हारी जिम्मेदारी कि स्यों तुस्सा री आत्मा री रखवाली करहे, होर एस कामा रे कठे तुस्सा रे खातर तिन्हो परमेसरा जो लेखा देणा पऊणा। स्यों एस कामा जो खुसी किन्हें करहे, ना कि दुःखी हुई किन्हें, क्यूंकि तिन्हारे एह्ड़ा करणे ले तुस्सा जो कोई फायदा नी आ।

¹⁸ आस्सा रे कठे प्रार्थना करदे रैहया, क्यूंकि आस्सा जो एस गल्ला रा पक्का आ कि, आस्सा री अंतरात्मा सुद्ध ई, होर आस्से सारी गल्ला जो करणे रे ज्रीए परमेसरा जो आदर दें।

¹⁹ होर ये करणे रे कठे हांऊँ तुस्सा जो होर भी सम्झाहां कि, हांऊँ जल्दी तुस्सा वाले दबारा आई सकूं।

आसीस

^20-21 होर ऐबे परमेसर जो तुस्सा जो सांति देआ, होर जिन्हें प्रभु यीसू जो मरिरे मन्झ ले जिउंदा कितेया, से तुस्सा जो तिन्हा सारी चीजा ले तुस्सा जो सिद्ध करहे कि तुस्से तेसरी इच्छा पूरी करी सको। होर से यीसू मसीह री सामर्था ले तुस्सा मन्झ तिन्हा गल्ला जो बढ़ाए जो तेजो खुस करही। यीसू मसीह अनंतकाला रे वाचा रे ज्रीए जो तिन्हें आपणे खूना ले लिखिरी भेडा रा महान पुहाल आ। तेसरी महिमा हमेसा हुन्दी रहे। आमीन।

²² हे भाईयो होर बैहणो, हांऊँ तुस्सा ले बिनती करहा कि, तुस्सा जो हिम्मत देणे रे कठे जो ये गल्ला मैं लिखिरी तिन्हा गल्ला जो बड़े सबरा किन्हें सुणी लऊआ; क्यूंकि मैं तुस्सा जो ये गल्ला थोह्ड़े सब्दा मन्झ लिखिरी।

²³ तुस्से ये जाणी लऊआ कि तिमिथियुस आस्सा रा विस्वासी भाई जेल्हा ले छुटी गया होर अगर से जल्दी एथी मेरे वाले आई गया, ता मां तेस साउगी तुस्सा किन्हें मिलणे रे कठे आई जाणा।

²⁴ आपणे सारे अगुवे होर सारे परमेसरा रे पवित्र लोका जो नमस्कार बोल्हा ऐं। इतालिया देसा रे विस्वासी भाई बैहण भी तुस्सा जो नमस्कार बोल्हा ऐं।

²⁵ परमेसर तुस्सा सभी जो जुग-जुग अनुग्रह देंदा रहे। आमीन।