इब्रानियो 12 - मंडयाली नंऊँआं नियम

धीरज रखणे रे कठे सादणा

¹ एस वजहा ले जेबे बौह्त लोका री विस्वासा री गुआहिया आस्सो इतने बड़े बादला साहीं घिर्ही गईरे, ता आऊआ, आस्से हर एक रोकणे वाली चीज, होर उलझाणे वाले पाप दूर करी किन्हें, से दौड़ जेस मन्झ जे आस्सा जो दौड़ना आ, सब्र रखी किन्हें दौड़े।

² आस्सो विस्वासा री वखा जो लेई जाणे वाले, होर आस्सा रे विस्वासा जो सिद्ध करणे वाले, यीसू री तरफ देखदे रहे। जिन्हें तेस्सा खुसी रे कठे जो तेस जो बादा मन्झ मिलणे वाली थी, बेज्जती री परवाह नी करी किन्हें क्रूसा प्रयाल्हे मरी गया, होर राजगद्दी पर परमेसरा रे सीधी वखा जो बैठी गया।

परमेसरा रे ज्रीए ताड़ना

³ इधी कठे यीसू रे उदाहरणा पर ध्यान देआ कि, जिन्हें पापिया री वजहा ले जो लोक तेस किन्हें बौह्त नफरत करहे थे कितना कुछ सहन कितेया, ताकि तुस्से दुआस हुई किन्हें हिम्मत नी हारी दो।

⁴ तुस्से पापा रे बरखलाप लड़दे हुए तेस किन्हें एह्ड़ी मुठभेड़ नी किती कि, तुस्सा री मौत हुई गई हो।

⁵ होर तुस्से तेस हिम्मता री गल्ला जो भूली गईरे जो मह्ठे साहीं परमेसरे तुस्सा किन्हें बोलिरी, “हे मेरे मह्ठे, जेबे प्रभु तुस्सा जो दसे कि तैं गलती कितिरी ता तेस सुधारा जो हल्की गल मत समझ, होर जेबे प्रभु तुजो प्रुआचे ता हिम्मत देख्या हारदा।

⁶ क्यूंकि प्रभु, जेस किन्हें प्यार करहा, तेस जो सुधारा भी आ। होर जिन्हों से आपणा मह्ठा मन्नी लैहां, तेस जो सुधारणे रे कठे सजा भी देआ।”

⁷ तुस्से बापू री दीतिरी सजा समझी किन्हें इन्हा दुःखा जो सैहन करी लऊआ, जिहां एक बाप आपणे मह्ठा साउगी बरताव करहा, तिहां ईं परमेसर तुस्सा जो मह्ठा जाणी किन्हें तुस्सा साउगी बरताव करहा। एह्ड़ा कोई मह्ठा नी आ, जेस जो सुधारणे रे कठे बापू सजा नी देंदा हो।

⁸ अगर परमेसर तुस्सा जो नी सुधारा जिहां से आपणे सभी बच्चे जो सुधारा, ता तुस्से परमेसरा रे असली बच्चे नी ऐं।

⁹ फेरी जेब्की आस्सा रे संसारिक बापू भी आस्सा जो सुधारणे रे कठे सजा देआ, फेरी भी आस्से तेसरा आदर करहे। ता ये आस्सा रे कठे होर भी ज्यादा जरूरी आ कि, परमेसर जो आस्सा रा आत्मिक बापू आ तेसरे सुधारा जो आस्से ग्रहण करी ले ताकि आस्से जिन्दगी पाई सके।

¹⁰ आस्सा रे संसारिक बापू ता आपणी सोचा रे मताबक जेह्ड़ा तिन्हो ठीक लगहा था, थोह्ड़े ध्याड़े रे कठे आस्सो सुधारे थे, पर परमेसर ता आस्सा रे फायदे रे कठे आस्सा जो सुधारा, ताकि आस्से भी तेस साहीं पवित्र हुई जाये।

आत्मिक जिन्दगी जीणे री सक्ति नंऊँआं हूंणा

¹¹ जेस टैम स्यों आस्सो सुधारे, तेस टैम से सुधार आस्सो खरा नी लगदा, बल्की से बुरा लगहा, तेबे भी जो सुधारा जो सैहन्दे-सैहन्दे पक्के हुई गईरे, ता बादा मन्झ आस्सो सांति होर धार्मिकता रा इनाम मिल्हा।

¹² आपणे थकिरे हाथा जो ऊपर चका होर आपणे कामदे हुए गोडेया जो मजबूत करहा।

¹³ होर सीधे पैंडे मन्झ चलदे रैहया ताकि लंगड़ा होर कमजोर तुस्सा रे पीछे-पीछे चलदे हुए भटकी नी जाए, पर मजबूत हुई जाए।

¹⁴ सभी साउगी सांति किन्हें रैहणे, होर तेस पवित्र हूंणे रे कठे हर तरहा कोसिस करदे रहो, जेसरे बगैर कोई प्रभु जो कधी भी नी देखी सक्दा।

¹⁵ होर ध्याना रखा कि, एह्ड़ा नी हो कि, कोई परमेसरा रे अनुग्रह ले छुटी जाए, या विस्वास नी करणे री कौउड़ी जड़ तुस्सा रे बीचा मन्झ फुटी निकले क्यूंकि जेबे से बझीरी ता आपणे जैहरा रे ज्रीए बौह्त सारी परेसानी जो बढाई देई।

¹⁶ एह्ड़ा नी हो कि, कोई आदमी व्यभिचारी, या आदमा रे पोत्रू एसावा साहीं अधर्मी हो। क्यूंकि से जेठा था होर तेस वाले पैहले पोत्रू हूंणे रे सारे हक थे, पर तिन्हें आपणे जन्मसिद्ध हक जो हल्का समझी किन्हें एक टैमा रे खाणे रे कठे तिन्हें से आपणे छोटे भाई याकूबा जो बेची दितेया।

¹⁷ तुस्से ता जाणहां ऐं कि, बादा मन्झ जेबे तिन्हें बापू री आसीस पाणी चाही ता से तेजो नी मिली, होर रोई-रोई किन्हें आसिसा जो दबारा मांगणे पर भी तेजो आपणी गलती सुधारणे रा मौका नी मिल्या।

¹⁸ तुस्से लोक सिन्ने प्हाड़ा साहीं असली प्हाड़ा वाले नी आये जेथी आग भ्हखिरी थी होर काली घटा रहीं थी, जेथी न्ह्यारा होर आन्धी थी। होर इस्राएल देसा रे लोक परमेसरा ले व्यवस्था पाणे रे कठे एह्ड़ी जगहा मन्झ गईरे थे।

¹⁹ होर ना तुस्से एह्ड़ी जगहा मन्झ आये जेथी तुस्से तुरही री अवाज सुणी, होर बोलणे वाले री एह्ड़ी भारी अवाजा सुणी जेसरे वजहा ले सुणने वाले एह्ड़ी बिनती किती हो कि, तिन्हा किन्हें होर गल्ला नी करहे।

²⁰ एह्ड़ा तिन्हें इधी कठे बोल्या, क्यूंकि स्यों परमेसरा रे हुक्मा जो सहन नी करी पाए जेबे तिन्हें ये बोल्या कि, “अगर कोई जानवर भी पहाड़ छुहे, ता तेस जो पत्थरवाह करी किन्हें मारी दितेया जाए।”

²¹ होर से दर्सन एह्ड़ा डरावणा था कि, मूसे भी येही बोल्या, “हांऊँ डरा रे मारे थर-थर काम्या करहा।”

²² पर तुस्से सिय्योना रे प्हाड़ा पर आई गईरे जो जिउंदे परमेसरा रा स्वर्गीय यरुस्लेम सैहरा आ, होर तेथी बेहिसाब स्वर्गदूत खुसी रा साजा बणाए।

²³ होर तुस्से परमेसरा रे पैहलौठे संताना री मण्डली मन्झ आई गईरे, जिन्हारे नांऊँ स्वर्गा मन्झ लिखे गईरे। ये धर्मी लोका री आत्मा ई जो हाल्ले स्वर्गा मन्झ ई होर तिन्हो सिद्ध कितिरा, होर तुस्से आपु परमेसरा वाले गईरे जो सभी गल्ला रा न्याय करणे वाल़ा।

²⁴ तुस्से यीसू वाले आई गईरे जो परमेसर होर लोका रे बीचा रा नौंईं वाचा रा बिचौलिया। होर छिड़कावा रे तेस खूना रे नेडे आई गईरे, जो हाबिला रे खुना ले भी बडे वादे करहा।

²⁵ चतन्न रैहया कि, तुस्से परमेसर ले मुंह नी फेरा जो तुस्सा किन्हें गल्ला करहा, क्यूंकि अगर इस्राएल देसा रे लोक सजा ले नी बचे जेबे तिन्हें एस धरती पर रैहन्दे हुए मूसा री गल्ला रे मुंह फेरी लेईरा था, ता सच्चे आस्से भी नी बची सकदे, अगर आस्से तेस परमेसरा ले मुंह फेरगे जो स्वर्गा ले आस्सा किन्हें गल्ला करहा।

²⁶ जेबे परमेसरे सिन्ने प्हाड़ पर खड़ी किन्हें गल्ला किती ता तेसरी अवाजा ले धरती हिलाई गई पर ऐबे तिन्हें ये वादा कितिरा कि, “एक बारी मां फेरी धरती ही नी, बल्की आसमान भी हिलाई देणा।”

²⁷ ये गल कि “एक बारी फेरी” एस्सा गल्ला जो दसा कि रचीरी चीजा हिली जाणा, होर स्यों टाही दिति जाणी ताकि जो चीजा हिलाई नी जाईं सकदी, तिन्हा टिकीरी रेहणा।

²⁸ इधी कठे आस्सा जो राज्य मिलिरा से हिलाया नी जाई सकदा, एस गल्ला कठे आस्से परमेसरा रा धन्यावाद करहे। होर इज्जत होर डर समेत, परमेसरा री एह्ड़ी अराधना करहे, जेस ले से खुस हुंहाँ।

²⁹ क्यूंकि आस्सा रा परमेसर आगी साहीं आ, जो हर चीजा जो भस्म करी देहां।