इब्रानियो 11 - मंडयाली नंऊँआं नियम

विस्वासा रे उदाहरण

¹ ऐबे जो लोक परमेसरा पर विस्वास करहे, तिन्हों इन्हा गल्ला रा पक्का कि परमेसरा तिन्हा जो तिन्हारी आस रखिरी चीजा देणी, होर ये भी कि जो चीजा तिन्हें ऐबे तक नी देखीरी, से सच्चे हाई।

² आस्सा रे बापदादे रा भी एह्ड़ा विस्वास था होर इधी कठे परमेसर तिन्हा ले खुस था।

³ क्यूंकि विस्वास करणे ले ई आस्से जाणी जाहें कि, सारे संसारा री रचना परमेसर रे बचना रे ज्रीए हुई। इधी कठे आस्से जो भी देखे, स्यों चीजा तिन्हा ले नी बणीरी, जिन्हों जे कोई नी देखी सकदा।

⁴ विस्वास करणे रे कारण ई आदमा रा मह्ठा हाबिले आपणे बडे भाई कैना ले बढ़िया बलिदान परमेसरा रे कठे चढ़ाया। होर हाबिला रे एह्ड़ा करणे रे कारण परमेसरे तेसरे बलिदाना रे बारे मन्झ गुआही दिती कि, हाबिल एक धर्मी माह्णुंआं, होर परमेसर हाबिला री भेंटा ले खुस हुआ। हलांकि हाबिल मरी चुकिरा, तेबे बी आस्से परमेसरा पर विस्वास करणे रे बारे मन्झ तेस ले सिख्हा ऐं।

⁵ विस्वासा री वजहा ले ई हनोक नांऊँआं रा माह्णुं जिउंदा स्वर्गा वखा जो उठाया गया, इधी कठे से नी मरेया। होर लोका जो तेसरी ल्हास नी मिलिरी, क्यूंकि परमेसरे से स्वर्गा वखा जो चक्की लितिरा था। होर तेसरे स्वर्गा वखा जो चक्की जाणे ले पैहले तेसरे बारे मन्झ ये बोली जां था कि परमेसर तेस ले खुस आ।

⁶ होर विस्वासा रे बगैर परमेसरा जो खुस करणा नामुमकिन आ, क्यूंकि परमेसरा वाले आऊणें वाले जो पक्का विस्वास हूंणां चहिए कि परमेसर आ, होर से तिन्हो तिन्हारा इनाम देहां।

⁷ विस्वास करणे री वजहा ले ई नूहा नांऊँआं रा माह्णुं जो जेबे तेजो बाढ़ रे बारे मन्झ चेतावनी दिती गई जो तिन्हें कधी नी देखीरी थी। ता परमेसरा रा हुक्म मनदे हुए तिन्हें आपणे परिवारा रे बचाऊआ रे कठे जहाज बणाया, होर नूहा रे विस्वासा रे साम्हणें, जिन्हें लोके विस्वास नी कितेया था स्यों सब दोसी ठैहरे होर पाणी मन्झ डूबी किन्हें मरी गये। क्यूंकि नूहे परमेसरा पर विस्वास कितेया इधी कठे से परमेसरा री नजरा मन्झ धर्मी बणेया।

⁸ विस्वास करणे री वजहा ले ई अब्राहमा जो परमेसरे एक एह्ड़ी जगहा जाणे रे कठे सादेया जो जगहा बादा मन्झ तेस जो विरासता मन्झ परमेसर देणे वाल़ा था। होर से ये नी जाणदा था कि हांऊँ केथी जाया करहा, फेरी भी परमेसरा रा हुक्म मन्नी किन्हें से तेस देसा जो चली गया।

⁹ परमेसरा रे वादा कितिरे देसा मन्झ अब्राहम परदेसी हुई किन्हें तम्बू मन्झ रैहया, तेसरे साउगी तेसरा मह्ठा इसहाक होर तेसरा पोत्रू याकूबा तम्बू मन्झ रहे, जिन्हें परमेसरे ले येही वादा पाईरा था।

¹⁰ क्यूंकि से तेस पक्की निंऊआं वाले सैहरा (स्वर्ग) मन्झ रैहणे रा इंतजार करेया करहा था, जेसरा रचणे वाल़ा होर बनाणे वाल़ा परमेसर आ।

¹¹ विस्वास करणे ले ई अब्राहमा री लाड़ी सारा खपरी हूणें पर भी गर्भ धारण कितेया, क्यूंकि तेस जो पक्का था कि परमेसरे जो वादा कितिरा से तेस पूरा करणा।

¹² होर एस वजहा ले जेबे तेस्सा रा लाड़ा अब्राहम इतना खपरा हुई गईरा था कि से मरणे वाल़ा ही था, फेरी भी तिन्हें आसमाना रे तारे होर समुद्रा रे बाढे रे रेते रे कणा साहीं, तेसरा बेहिसाब बंस जम्मेया।

¹³ ये सारे लोक जिन्हें परमेसरा पर विस्वास कितिरा था तेसरे वादा कितिरे चीजा जो पाए बगैर मरी गये। स्यों तिन्हा चीजा जो दुरा ले देखी किन्हें खुस हुए, होर स्यों एस गल्ला जो भी समझी गईरे थे कि धरती पर आस्से परदेसी होर अजनबी ऐं।

¹⁴ स्यों लोक जो एह्ड़ा बोल्हा ऐं कि आस्से परदेसी होर अजनबी ऐं, स्यों एस गल्ला जो सच्चे बोले कि, स्यों तेस देसा जो पाणे री खोजा मन्झ ऐं, जो तिन्हारा आपणा हो।

¹⁵ होर जेस देसा ले स्यों निकली किन्हें आईरे थे, अगर तेता जो याद करदे ता स्यों वापस चली जांदे।

¹⁶ पर स्यों एक खरे स्वर्गा रे देसा रे चाहणे वाले ऐं, इधी कठे परमेसर तिन्हारा परमेसर कैहलाए जाणे मन्झ तिन्हा ले नी सरमान्दा, इधी कठे तिन्हें तिन्हारे कठे एक सैहर त्यार करी लया।

^17-19 विस्वास करणे ले ई अब्राहमे जेबे परमेसरे तेसरी परीक्सा किती ता से आपणे मह्ठे इसहाका री बलि चढ़ाणे रे कठे त्यार हुई गया। परमेसरे तेस किन्हें ये बोलिरा था कि, “इसहाका रे ज्रीए ही तेरा बंस बढ़णा।” हालांकि परमेसरे अब्राहमा ले वादा कितिरा था फेरी भी से आपणे एकलौते मह्ठे जो बलिदान करणे रे कठे त्यार हुई गया जेसरे ज्रीए परमेसरा रा वादा पूरा हूंणा था। अब्राहमे मनी लेईरा था कि अगर इसहाक मरी भी जांघ्हा तेबे भी परमेसरा से जिउंदा करणा, होर एक तरफ सोचदे ता अब्राहमा जो तेसरा मह्ठा इसहाक मरणे बाद दबारा वापस मिल्या।

²⁰ विस्वास करणे ले ई इसहाके आपणे दुहीं मह्ठे याकूबा होर एसावा जो, आऊणें वाली जिन्दगी रे कठे जो वादा कितिरा था तेता रे बारे मन्झ आसरीवाद दितेया।

²¹ विस्वास करणे ले ई याकूबे मरदे टैम युसुफा रे दोनो मह्ठे जो एक-एक करी किन्हें आसरीवाद दितेया, होर तिन्हें आपणे सोठू रे ऊपरी सिरे पर झुकी किन्हें मदद लई किन्हें खड़ेया होर परमेसरा री अराधना किती।

²² विस्वास करणे ले ही युसुफे नांऊँआं रा माह्णुं जेबे से मरणे वाल़ा ही था तिन्हें बड़े भरोसे किन्हें एस गल्ला जो बोल्या कि इस्राएल देसा रे लोका मिस्र देसा जो छाडी किन्हें कनान देसा जो चली जाणा। होर तिन्हें ये हुक्म दितेया कि स्यों तेसरी हड्डीया जो आपु साउगी कनान देसा जो लई जाए।

²³ जेबे मिस्र देसा रे राजे ये हुक्म दितेया कि इस्राएल देसा रे सारे जम्दे मह्ठेया जो मारी देआ, तेबे विस्वास करणे ले ई मूसा रे माऊ-बापूए से, पैदा हूंणे रे बाद तीन म्हीने तक ल्कोई रख्या, क्यूंकि तिन्हें देख्या कि, बच्चा खास आ, होर तिन्हो राजे रे हुक्मा जो टालणे रा डर नी था।

²⁴ मिस्र देसा रे राजे (फिरौन) री मह्ठीऐ मूसा जो पाल्या, होर जेबे मूसा जुआन हुआ ता विस्वास करणे ले ही तिन्हें राजे री मह्ठी रा मह्ठा बोलणे ले इनकार कितेया।

²⁵ इधी कठे तिन्हें पापा रा सुख भोगणे ले परमेसरे लोका रे साउगी दुःख भोगणा होर भी खरा समझ्या।

²⁶ तिन्हें मसीह रे कठे बेज्जत हूंणां, मिस्र देसा रे धन भण्डारा ले बढ़ी किन्हें समझ्या, क्यूंकि से आपणे इनाम पाणे रा इंतजार करी करहा था, जो परमेसरा तेस जो देणे वाल़ा था।

²⁷ विस्वास करणे री वजहा ले ई, राजे रे गुस्से ले नी डरदे हुए, मुसे मिस्र देस छाडी दितेया, क्यूंकि से समझी गईरा था कि मानो तिन्हें नी सूझणे वाले परमेसरा जो देखी लेया।

²⁸ विस्वास करणे ले ई मुसे इस्राएल देसा रे लोका जो हुक्म दितेया कि स्यों दुराजे पर छेलु रा खून छिड़की किन्हें फसहा रा साजा बणाऊआ, ताकि पैहली संताना जो नास करणे वाल़ा स्वर्गदूत इस्राएल देसा री पैहली संताना जो छुही तक ना सके।

²⁹ विस्वास करणे ले इस्राएल देसा रे लोक लाल समुद्रा ले एह्ड़े पार हुई गये, जिहां से कोई सुक्की धरती हो; पर जेबे मिस्र देसा रे लोके एह्ड़ा करणा चाहेया, ता स्यों डूबी किन्हें मरी गये क्यूंकि समुद्रा रा पाणी दबारा कठा हुई गया।

³⁰ विस्वास करणे ले ई इस्राएल देसा रे लोक परमेसरा रा हुकम मन्नी किन्हें यरीहो सैहरा री दीवारा रे चारो वखा जो स्यों सात ध्याड़े तक चक्कर लगान्दे रहे, ता से कान्ध ढल्ही गई। (जिहां परमेसरे तिन्हा किन्हें बोलिरा था)

³¹ विस्वास करणे ले ई राहाब वेस्या हुक्म नी मनणे वाल़ेया साउगी नास नी हुई; इधी कठे कि तेस्से इस्राएल देसा रे जासूस लोका जो आपणे घरा मन्झ रखेया, जो लुख्ही किन्हें जासूसी करणे रे कठे यरीहो सैहरा मन्झ आईरे थे।

³² ऐबे मुंजो कुछ होर बोलणे री जरूरत नी, क्यूंकि ऐबे मेरे वाले टैम नी रैंहयां कि हांऊँ होरी लोका रे विस्वासा रे बारे मन्झ भी तुस्सा जो दसू, जिहां कि गिद्योन, सिमसोन होर यिफतहा जो इस्राएल देसा रे न्यायी थे; होर राजा दाऊदा रे, होर बाराक होर समूएल जो नबी थे, होर बाकि सारे नबिया रे विस्वासा रे बारे मन्झ।

³³ इन्हें विस्वास करणे ले ई राज्य जीते, धर्मा रे काम किते, वादा कितिरी चीजा पाई, होर सेर तिन्हो खाई नी सकेया,

³⁴ आग तिन्हो फुखी नी सकी, तलवार री धार तिन्हो मारी नी सकी, जेबे एक बारी कमजोर हुए ता दबारा स्यों मजबूत बणे, लड़ाई मन्झ वीर निकले, होर तिन्हें आपणी दुसमना री सेना जो मारी दितेया।

³⁵ कुछ जनानिये आपणे मरिरे लोका जो दबारा जीऊन्दे पाए कितने ता मार खांदे-खांदे मरी गये। होर आपणा विस्वास नी छाडेया कि तिन्हो जेल्हा ले छुटकारा मिली जाओ, ताकि तिन्हो मरिरे मन्झा ले जी उठणे रे बाद खरी जिन्दगी मिले।

³⁶ कुछ लोका रा मजाक डूआया होर तिन्हा पर कोड़े मारे होर कुछ लोका जो बान्ही किन्हें जेल्हा मन्झ पाई दितेया।

³⁷ कुछ लोका पर पत्थरवाह कितेया गया। स्यों आरे किन्हें चीरी दिते, होर तलवारा किन्हें मौता रे घाटा तुआरी दिते। स्यों गरीब थे, तिन्हो दुःख दितेया होर तिन्हा साउगी बुरा व्यवहार कितेया। स्यों भेडा-बकरिया री खाला ढक्खी किन्हें ओरे परे भटकदे रहे।

³⁸ होर जंगला, होर प्हाड़ा, होर गुफा मन्झ, होर जमीना री दरारा मन्झ भटक्दे फिरे। संसार इन्हा विस्वासी लोका रे लायक नी था।

³⁹ होर विस्वासा रे ज्रीए ई इन्हा सभी रे बारे मन्झ परमेसरे खरी गुआही दिति, तेबे भी तिन्हा जो स्यों चीजा नी मिली जिन्हारे देणे रा वादा परमेसरे कितिरा था।

⁴⁰ क्यूंकि परमेसरे आस्सो कुछ खरी चीजा देणे रे कठे एक योजना बणाईरी ताकि आस्सा साउगी ही स्यों सिद्ध किते जाए आस्सा रे पैहले नी।