Biblia Todo Logo
Bìoball air-loidhne

- Sanasan -

इब्रानियो 10 - मंडयाली नंऊँआं नियम


जानवरा रे बलिदाना री कमिया

1 मूसा री व्यवस्था ता, सिर्फ आऊणें वाली खरी चीजा री परछाई, आपणे आपा मन्झ यूँ चीजा असली नी ई। व्यवस्था री बिधिया रे मताबक बलिदान बार-बार होर हर साल लगातार चढ़ाए जाहें, पर बलिदाना चढ़ाणे वाल़ा एसरे ज्रीए कधी भी पूरी तरहा ले सुद्ध नी हो पाए।

2 अगर स्यों सुद्ध हुई जांदे ता तिन्हारा बलिदाना रा चढ़ाया जाणा बन्द हुई जाणा था। क्यूंकि बलिदान करी किन्हें अराधना करणे वाले लोका एक ई बारी जुग-जुग रे कठे सुद्ध हुई जाणा था, होर स्यों लोक आपणे आपु जो पापा रे कठे दोसी नी मनदे।

3 एता रे बजाय हर साल स्यों बलिदान करहे ता बलिदान करणे री वजहा ले तिन्हा जो आपणे पाप याद आई जाहें थे।

4 क्यूंकि बकरे होर बोल्ह्द रे खूना ले पाप दूर हुई जाए ये सम्भव नी आ।


मसीह रा बलिदान

5 इधी कठे जेबे मसीह एस दुनिया मन्झ आया ता तिन्हें परमेसरा किन्हें बोल्या था, “तैं बलिदान होर कोई भेंट नी चाही, पर मुंजो एक सरीर बलिदान करणे रे कठे दितेया।

6 तू ना ता वेदी पर पूरी तरहा ले फुखी रे जानवरा ले होर ना पाप जो दूर करणे रे कठे कितिरे बलिदाना ले खुस हुआ।

7 तेबे मसीह बोल्या, ‘हे परमेसर, हांऊँ तेरी इच्छा जो पूरी करणे रे कठे आई गईरा, होर पवित्र सास्त्रा मन्झ मेरे बारे मन्झ ये ही लिखिरा।’”

8 पैहले तिन्हें बोल्हा कि, “तुस्से ना ता कोई बलिदान चाहेया होर ना कोई भेंट चाही, होर ना वेदी पर पूरी तरहा ले फुखी रे जानवरा रा बलिदान चाहां, होर ना पाप जो दूर करणे रे कठे कितिरे बलिदान चाहां, होर ना तिन्हा ले खुस हुआ,” हलांकि ये बलिदान ता मूसा री व्यवस्था रे मताबक चढ़ाए जाहें।

9 फेरी से ये भी बोल्हा, “कि देख, हांऊँ तेरी इच्छा जो पूरी करणे रे कठे आई गईरा,” तेबे परमेसरे पैहली व्यवस्था रे मताबक बलिदान करणे जो रद्द करी दितेया, ताकि से मसीह रे बलिदान जो स्थापित करी सके।

10 परमेसरा री इच्छा ये थी कि यीसू मसीह रे बलिदाना रे ज्रीए जो एक ई बारी जुग-जुग रे कठे हुआ, आस्सो पवित्र करहे।

11 पैहली वाचा रे मताबक हर एक याजक ता बेदी रे साम्हणें खड़े हुई किन्हें हर रोज सेऊआ करहा, होर से बार-बार एक ई किस्मा रे बलिदान चढ़ाहां जो पापा जो कधी दूर नी करी सकदे।

12 पर मसीह जो आस्सा रा बडा याजक आ, तिन्हें परमेसरा रे साम्हणें आपणे आपा जो एक ई बार हमेसा रे कठे पापा रे कठे बलिदान करी दितेया, होर तेबे से परमेसरा रे सीधे पासे जाई बैठया।

13 होर तेस टैमा ले ई मसीह जो ये इंतजार आ कि, परमेसरा तेसरे सभ दुस्मण पूरी तरहा हराई देणे।

14 तिन्हें एक ई बलिदाना रे ज्रीए लोक पवित्र किते, होर फेरी स्यों हमेसा रे कठे सिद्ध बणाई दिते।

15 होर पवित्र आत्मा भी एस गल्ला री गुआही देहां कि, ये गल सच्च ई। क्यूंकि तिन्हें पैहले बोलिरा था कि, प्रभु बोल्हा,

16 “जो नौंईं वाचा मां आऊणें वाले ध्याड़े मन्झ, तिन्हा साउगी बान्हणी, से येई कि मां आपणी व्यवस्था तिन्हो याद कुराणी, होर आपणी व्यवस्था तिन्हारे मना मन्झ पाई देणी।”

17 फेरी से ये भी बोल्हा कि, “मां तिन्हारे पाप होर तिन्हारे अधर्मा रे काम फेरी कधी दबारा याद नी करणे।”

18 फेरी जेबे इन्हा पापा री माफी हुई गई, ता फेरी पापा रे बलिदान करणे री जरूरत नी रही।


हिम्मता किन्हें परमेसरा रे नेडे जाणा

19 इधी कठे हे भाईयो होर बैहणो, ऐबे आस्से यीसू मसीह रे खूना रे ज्रीए बड़ी हिम्मता किन्हें परमेसरा रे नेडे जाई सके, जिहां कि तम्बू रे बड़े पवित्रजगहा मन्झ दाखल हूंणे री ईजाजत मिली गईरी।

20 यीसूए आस्सा रे कठे मरणे रे ज्रीए यानि तेस पर्दे रे ज्रीए जिन्दगी देणे वाल़ा एक नंऊँआं पैंडा खोलेया, जेस ले हुई किन्हें आस्से बड़े पवित्रजगहा मन्झ पूजी सके।

21 होर इधी कठे कि आस्सा रा एह्ड़ा बडा याजक आ, जो परमेसरा रे तम्बू रा अधिकारी आ।

22 ता आऊआ, आस्से खरे मना होर पुरे विस्वासा साउगी, होर एस भरोसे साउगी कि आस्सा रे पाप माफ हुई गये, होर मसीह रे खूना रे छिड़काऊ ले आपणे दिला जो सुद्ध करदे हुए, होर आपणे सरीरा जो सुद्ध पाणी किन्हें धोई किन्हें परमेसरा रे नेडे जाहें।

23 आस्से आपणी आसा रे बारे मन्झ गुआही देणे रे कठे मजबूत होर टिकीरे रहे, क्यूंकि परमेसरे आस्सा किन्हें वादा कितिरा, होर से भरोसे रे लायक आ।

24 आस्से एस गल्ला रा ध्यान रखे कि आस्से एक दूजे किन्हें प्यार करणे रे कठे होर खरे कामा करणे रे कठे एक दूजे जो हिम्मत दे।

25 होर एक दूजे साउगी संगती करणा नी छाडा, जिहां कि कईया जो मण्डली मन्झ नी आऊणें री आदत पई गईरी। एता रे बजाय पर एक दूजे जो होर भी हिम्मत देंदे रैहया, क्यूंकि तुस्से जाणांहे कि प्रभु जल्दी वापस आऊणें वाल़ा।

26 क्यूंकि मसीह री सच्चाई जो जाणने रे बाद अगर आस्से जाणी बुझी किन्हें पाप करहा ऐं, तेबे इन्हा पापा री माफी रे कठे कोई बलिदान बाकि नी आ।

27 हां फेरी ता सिर्फ परमेसरा रा न्याय होर भयानक आगा रा सेक जो परमेसरा रे व्रोधीयो भस्म करी देईं, इन्हा गल्ला रा इंतजार हाल्ले बाकि आ।

28 जो कोई मूसा री व्यवस्था जो नी मनदे थे, तेस पर बगैर दया कितिरे दो या तीन लोका री गुआही पर मारी दितेया जाहाँ।

29 ता सोची लऊआ कि तिन्हा लोका जो कितनी ज्यादा सजा मिलणी, जिन्हें परमेसरा रे मह्ठे जो पैरा थाले रौंदया, होर परमेसरा री वाचा रा खूना जो बेकार समझ्या; जेस खूना रे ज्रीए पाप सुद्ध किते जाहें। होर जिन्हें पवित्र आत्मा री बेज्जती किती, जो आस्सो अनुग्रह देईं।

30 क्यूंकि आस्से तेस परमेसरा जो जाणहां ऐं, जिन्हें बोल्या कि, “बदला लैणा मेरा काम आ, मां ईं बदला लेणा।” तिन्हें ये भी बोल्या कि, “प्रभुआ आपणे लोका रा न्याय करणा।”

31 जिऊन्दे परमेसरा रे हाथा मन्झ पऊणा बडी खतरनाक गल ई।

32 पर तिन्हा ध्याड़े जो याद करा, जेबे तुस्से पैहली बारी मसीह पर विस्वास कितिरा था, होर तेता ले बाद तुस्से बौह्त दुःखा रा साम्हणां कितेया, होर भारी पीड़ा मन्झ मजबूत रहे।

33 कधी-कधी लोके सभिरे साम्हणें तुस्सा री बेज्जती किती, होर तुस्सा किन्हें हाथा-पाई किती, होर तुस्से कधी-कधी दूजेया री मदद किती जो तुस्सा साहीं दुखा मन्झ थे।

34 तुस्से कैदिया रे दुःखा मन्झ दु:खी हुए। होर जेबे होरी लोके तुस्सा रा सारा धन लुटेया, तेबे तुस्से इन्हा गल्ला जो खुसी किन्हें सहेया। क्यूंकि तुस्से जाणांहे थे कि तेता ले भी बांकी चीजा तुस्सा जो मिलणी जो जुग-जुग रे कठे ई।

35 इधी कठे आपणी हिम्मत नी हारा, क्यूंकि हिम्मत नी हारने वाल़ेया जो परमेसर बौह्त बडा इनाम देणा।

36 क्यूंकि तुस्सा जो सबर रखणा जरूरी ई, ताकि तुस्से परमेसरा री इच्छा जो पूरी करी सके। तेबे परमेसरा तुस्सा जो से सब कुछ देणा जेता रा देणे रा वादा तिन्हें तुस्सा किन्हें कितिरा।

37 क्यूंकि जिहां पवित्र सास्त्रा मन्झ मसीह रे बारे लिखिरा कि, “ऐबे थोह्ड़ा ई टैम रही गईरा, जेबे कि आऊणें वाले आई जाणा, होर देर नी करणी।

38 पर मेरे धर्मी लोका मेरे पर विस्वास करणे ले ही जिऊन्दे रैंह्णां, होर अगर स्यों मेरे पर विस्वास करणे ले पीछे हटी जाए, ता हांऊँ तिन्हा ले खुस नी हुंदा।”

39 होर आस्से एह्ड़े नी ऐं जो परमेसरा पर विस्वासा करणे ले पीछे हटी जाहें होर नास हुई जाये, पर परमेसरा पर विस्वास करणे वाले ऐं, जिन्हों से बचाई लेया।

This work is licensed under Creative Commons Attribution-ShareAlike 4.0 License.

Lean sinn:



Sanasan