गलातियो 4 - मंडयाली नंऊँआं नियम

मसीह मन्झ परमेसरा रे अजाद मह्ठे

¹ हांऊँ तुस्सा जो ये गल उदाहरणा देईं किन्हें समझाणा चाहां, एक अमीर आदमी रा एक मह्ठा। जेबे तक से एक बच्चा, एक गुलामा साहीं आ, क्यूंकि छोटा बच्चा हूंणे री वजहा ले हाल्ले तेस्सा जायदादा पर हक नी आ, पर बडे हूंणे पर तेस जो से सारी जायदाद मिलणी जो तेसरे बापू री।

² पर बापू रे तय कितिरे टैमा रे खत्म हूंणे तक बच्चा देखरेख होर संभाल्ने वाले री निगरानी मन्झ रैहया।

³ एह्ड़ा आस्सा साउगी भी आ, जेबे आस्से भी तेस छोटे मह्ठे साहीं बच्चे थे, ता आस्से भी गुलामा साहीं एस संसारा री कुछ बिधिया जो मन्हें थे।

⁴ जेबे परमेसरा रा तय कितिरा टैम पूरा हुआ, ता तिन्हें आपणा मह्ठा एस संसारा मन्झ भेज्या, होर एक ज्नाने ले से जम्मेया, तिन्हें यहूदी लोका मन्झ जन्म लितेया होर मूसा री व्यवस्था जो मन्हा था।

⁵ ताकि आस्सा लोका जो अजाद करी सको, जिन्हारी देखरेख मूसा री व्यवस्था री निगरानी मन्झ हुई करही थी, होर आस्से परमेसरा री आपणे बच्चे बणी सको।

⁶ जेब्की आस्से जो परमेसरा रे बच्चे ऐं, इधी कठे परमेसरे आपणे मह्ठे री आत्मा जो आस्सा रे दिला मन्झ भेजिरा, से ही आत्मा जो परमेसरा जो “हे बापू, हे बापू” बोली किन्हें पुकारी।

⁷ इधी कठे तू ऐबे व्यवस्था या संसारा री बिधिया रा गुलाम नी आ, पर परमेसरा रा बच्चा आ; होर जेब्की तू परमेसरा रा बच्चा आ, ता परमेसरे जो कुछ देणे रा वादा आपणे बच्चे किन्हें कितिरा, तेस तुजो भी देणा।

कलीसिया रे कठे पौलुसा री फिकर

⁸ पैहले तुस्से लोक जेबे परमेसरा जो नी जाणदे थे, ता तुस्से तेस टैम तिन्हारे गुलाम थे, जो असली मन्झ परमेसर हाए नी ऐं।

⁹ पर ऐबे तुस्से परमेसरा जो पछयाणी लया, बल्की मुंजो ये बोलणा चहिए कि परमेसरे ऐबे तुस्से आपणे बच्चे बणाई किन्हें अपनाई लितिरा, ता तुस्से तिन्हा कमजोर होर बेकार संसारा री बिधिया री वखा जो किधियो फिरया करहा ऐं? क्या तुस्से दबारा तिन्हा गल्ला रे गुलाम बणने री इच्छा रखे?

¹⁰ मैं सुणीरा कि तुस्से गैर-यहूदी विस्वासी लोक मूसा री व्यवस्था रे हुकमा रे मताबक खास ध्याड़ेया जो, म्हीनेया जो, मौसमा जो होर साला जो मन्हा ऐं ये सोची किन्हें कि ये गल्ला परमेसरा जो खुस करी।

¹¹ तुस्सा रे एह्ड़े काम करणे ले मुंजो डर लगहा कि, केते एह्ड़ा नी हो कि जो सेऊआ मैं बड़ी मैहनता किन्हें तुस्सा रे बीचा मन्झ किती, से बेकार हुई जाए।

¹² हे भाईयो होर बैहणो, तुस्सा साहीं बणने रे कठे मैं यहूदी व्यवस्था जो मन्ना छाडी दितेया, जिन्हों हांऊँ पैहले मन्हा था। होर इधी कठे हांऊँ तुस्सा किन्हें अर्ज करहा कि, तुस्से भी मेरे साहीं बणा, होर तिन्हा यहूदी व्यवस्था जो नी मन्हा। तुस्से कधी भी मेरा बुरा नी कितेया।

¹³ तुस्से याद हूंणा कि, मैं पैहली बार आपणे सरीरा री कमजोरी री वजहा ले तुस्सा वाले आईरा था, होर तेबे मैं तुस्सा जो खुसी री खबर सुणाई री थी।

¹⁴ हालांकि जो मेरी कमजोरी थी से तुस्सा रे कठे दुःखा री वजहा थी, फेरी भी तुस्से मेरे किन्हें नफरत नी किती, होर ना ही मेरे ले आपणा मुंह मोड़ेया; पर परमेसरा रे स्वर्गदूता साहीं बल्की यीसू मसीह साहीं मुंजो अपनाहां होर मेरी सेऊआ किती।

¹⁵ तुस्से तेस वक्त बड़े खुस थे! ता ऐबे तुस्सा री खुसी रा क्या हुआ? होर मुंजो पक्का पता कि अगर हुई सक्दा ता तुस्सा आपणा सब कुछ मुंजो देई देंदे, एथी तक कि तुस्से आपणी हाखिया काढी किन्हें भी मुंजो देई देंदे।

¹⁶ पर ऐबे एह्ड़ा लगा कि हांऊँ तुस्सा रा दुसमण बणी गईरा, क्यूंकि हांऊँ तुस्सा किन्हें सच्च जे बोल्या करहा।

¹⁷ झूठे उपदेस स्खाणे वाले तुस्सा जो आपणे साउगी मिलाणे री बड़ी इच्छा रखे, पर ये तुस्सा री भलाई रे कठे नी आ। तिन्हारी इच्छा येई कि स्यों तुस्सा जो मेरे ले लग करहे, ताकि तुस्से सिर्फ तिन्हारी सुणदे रहो।

¹⁸ ये ता खरी गल ई कोई हमेसा केसी री भलाई करणे री इच्छा रखदा हो, ना सिर्फ तेस टैम, जेब्की हांऊँ तुस्सा साउगी हूँआ।

¹⁹ हे मेरे लाडले बच्चेयो, जिहां बच्चा जणने रे टैमा जनाने जो पीड़ा हुईं, तिहां ही हांऊँ तुस्सा रे कठे एक बारी होर पीड़ा सहन करी करहा। जेबे तक तुस्से पूरी तरहा मसीहा साहीं नी बणी जाओ, तेबे तक मां से पीड़ा सहन करदे रेहणा।

²⁰ हांऊँ ये चाहां कि एस टैम हांऊँ तुस्सा वाले हुंदा ता मां तुस्सा किन्हें बड़े सांति किन्हें गल्ला करदा, क्यूंकि मुंजो समझ नी आई करदा कि हांऊँ तुस्सा किन्हें क्या बोलू।

सारा होर हाजिरा रा उदाहरण

²¹ तुस्से जो मूसा री व्यवस्था रे अधीन हूंणां चाहें, क्या तुस्से सच्चे समझे कि व्यवस्था तुस्सा किन्हें क्या बोली?

²² पवित्र सास्त्रा मन्झ लिखिरा कि, अब्राहमा रे दो मह्ठे थे। तेसरा एक मह्ठा हाजिरा ले जम्मेया जो एक गुलाम थी। होर दूजा मह्ठा सारा ले जम्मेया जो गुलाम नी थी।

²³ अब्राहमा रा पैहला मह्ठा यानि हाजिरा ले जो एक गुलाम थी तेस्सा ले जम्मेया, से माह्णुं री सोच-बिचारा ले ही हुआ। पर अब्राहमा रा दूजा मह्ठा जो सारा ले जम्मेया, जो गुलाम नी थी, से परमेसरा रे वादे जो पूरा करणे रे कठे हुईरा था।

²⁴ ये दो ज्नाने परमेसरा री दो वाचा री उदाहरण ई। सीनै प्हाड़ा पर जेबे परमेसरे व्यवस्था देंदे टैमा इस्राएल लोका किन्हें वाचा बान्ही थी से हाजिरा साहीं ई। से जिन्हा बच्चे जो जम्मी थी स्यों गुलाम बणी जाहें थे, जिहां व्यवस्था भी लोका जो गुलाम साहीं बणाई।

²⁵ हाजिरा सीनै प्हाड़ा जो दस्हा ई जो अरब देसा मन्झ आ। से आजके यरुस्लेम सैहरा साहीं जेथी रे लोक मूसा री व्यवस्था रे गुलाम ऐं।

²⁶ पर स्वर्गीय यरुस्लेम अब्राहमा री लाड़ी सारा साहीं आ, होर तेस्सा रे बच्चे गुलाम मन्झ नी ऐं, होर आस्सा विस्वास करणे वाले लोका रे कठे ये यरुस्लेम माऊआ साहीं आ।

²⁷ क्यूंकि जिहां पवित्र सास्त्रा मन्झ यसायाह नबिये लिखिरा, “हे बांझ जन्नाने, जेस्से कधी भी बच्चे जो जन्म नी दितेया तू नन्द कर, तू जो बच्चे जणने री पीड़ा नी जाणदी खुसी रे मारे नाच-गा, क्यूंकि छाडी गईरे बच्चे सुहागणा रे बच्चे ले बौह्त ज्यादा ई।”

²⁸ हे भाईयो होर बैहणो, आस्से अब्राहमा रे मह्ठे इसहाका साहीं ऐं जो वादे रे मताबक जम्मिरा था, आस्से भी परमेसरा रे वादे रे मताबक तेसरे बच्चे बणी गईरे।

²⁹ पर तेस टैम माह्णुं रे सोच-विचार ले जम्मिरा मह्ठा यानि इसमाएल, परमेसरा रे वादे रे मताबक जम्मीरे मह्ठे यानि इसहाका जो स्ताहां था। इंहां ही ऐबे आस्सो भी स्यों लोक स्ताहें, जो परमेसरा री नजरा मन्झ धर्मी बणने रे कठे मूसा री व्यवस्था जो मन्हें।

³⁰ पर एस गल्ला रे बारे मन्झ पवित्र सास्त्र मन्झ क्या लिखिरा? “गुलाम जन्नाने हाजिरा होर तेस्सा रे मह्ठे जो बाहर काढी देआ, क्यूंकि गुलाम जन्नानी रा मह्ठा, बापू री जायदाद रा वारस नी बणी सकदा, क्यूंकि तेसरी जायदादा रा वारिस से मह्ठा, जो बापू री लाड़ी सारा ले जम्मीरा यानि जो गुलाम नी थी।”

³¹ इधी कठे हे भाईयो होर बैहणो, इन्हा सारी गल्ला रा निचोड़ ये आ: कि आस्से गुलाम जन्नानी हाजिरा रे बच्चे नी, जिन्हों व्यवस्था जो मनणे री जरूरत ई। आस्से सारा रे बच्चे ऐं जो गुलाम नी थी, होर आपणे विस्वासा री वजहा ले परमेसर आस्सा जो अपनाहां।