गलातियो 1 - मंडयाली नंऊँआं नियम

नमस्कार

^1-2 हांऊँ पौलुस, एस्सा चिठ्ठी जो लिख्या करहा। होर हांऊँ चुणिरा चेला आ। मुंजो कुछ लोके या केसी माह्णुंऐ चुणिरा चेला हूंणे रे कठे नियुक्त नी कितेया। पर यीसू मसीह रे ज्रीए होर बापू परमेसरा रे ज्रीए हांऊँ चुणिरा चेला बणेया। परमेसरे यीसू जो मरिरे मन्झ ले जिउंदा कितेया। हांऊँ एस्सा चिठ्ठी जो गलातिया ईलाके री कलीसिया रे विस्वासी भाई बैहणा जो लिख्या करहा। होर जो विस्वासी भाई बैहण ऐबे मेरे साउगी एथी ऐं, स्यों तुस्सा जो नमस्कार बोल्हा ऐं।

³ हांऊँ ये प्रार्थना करहा कि आस्सा रा बापू परमेसर होर प्रभु यीसू मसीह तुस्सा जो अनुग्रह होर सांति देंदा रहे।

⁴ आस्सा रे परमेसर होर बापू री इच्छा रे मताबक, मसीह यीसूए आस्सा रे पापा रे कठे आपणे आपा जो बलिदान करी दितेया, ताकि से आस्सा जो संसारा मन्झ ऐबे बुरे काम करणे वाली सामर्था ले बचाई सके।

⁵ हांऊँ प्रार्थना करहा कि लोक परमेसरा री महिमा जुग-जुग करदे रहे। आमीन।

कोई दूजी खुसी री खबर नी

⁶ मुंजो हरानी एस गल्ला री कि जिन्हें परमेसरे तुस्से आपणे लोक हूंणे रे कठे मसीह रे अनुग्रह रे ज्रीए सादे, तुस्से इतनी जल्दी तेस परमेसरा ले दूर हुई गये, होर “कोई दूजे उपदेसा” जो मनदे लगे जेस जो कुछ लोक खुसी री खबर बोल्हे।

⁷ पर कोई दूजा उपदेस ता हाया नी, पर सिर्फ मसीह री सच्ची खुसी री खबर ई। पर कुछ लोक एह्ड़े ऐं, जो मसीह री खुसी री खबरा रे मतलबा जो बदलना चाहें, होर तिन्हें तुस्सा जो धोखा दितिरा।

⁸ पर अगर आस्से या स्वर्गा ले कोई भी स्वर्गदूत आई किन्हें तुस्सा जो सच्ची मसीह री खुसी री खबरा जो आस्से तुस्से सुणाई री, तेता रे बदले मन्झ तुस्सा जो कोई दूजा उपदेस सुणाए, ता परमेसरा तेस जो सजा दे।

⁹ जेह्ड़ा आस्से पैहले बोली चुकिरे, तेह्ड़ा ई ऐबे हांऊँ दबारा बोल्हा कि तुस्से तेस सच्ची मसीह री खुसी री खबर जो आस्से तुस्सा जो सुणाई री थी, तेता रे अलावा अगर कोई दूजा उपदेस सुणगे, ता परमेसर तुस्सा जो सजा दे।

¹⁰ ऐबे हांऊँ सिर्फ परमेसरा री राजी चाहां, होर कोई दूजे लोका री नी, होर हांऊँ केसी माह्णुंआं जो खुस करणे री कोसिस नी करदा लगिरा। अगर हांऊँ एह्ड़ा ही करदा, ता हांऊँ मसीह रा सेऊआदार नी हुन्दा।

पौलुस किहाँ चुणिरा चेला बणेया

¹¹ हे भाईयो होर बैहणो, हांऊँ चाहां कि तुस्से ये जाणी लो कि जो खुसी री खबर मैं तुस्सा जो सुणाया था से माह्णुंआं रा बणाईरा नी आ।

¹² क्यूंकि मैं ये गल्ला आपणे बापदादेया ले नी सीखी, होर नहीं मुंजो केसी धर्मा रे स्खाणे वाले स्खाईरी, पर यीसू मसीहे युयां गल्ला मुंजो समझाई।

¹³ तुस्से जाणहां ऐं कि हांऊँ यहूदी धर्मा री बिधिया रे मताबक जिन्दगी जीया था, हांऊँ परमेसरा री कलीसिया रे लोका जो बौह्त स्ताहां था, होर मसीह पर विस्वास करणे वाल़ेया जो नास करणे री कोसिस करहा था।

¹⁴ आस्सा रे बापदादेया रे उपदेसा जो सिखणे होर मनणे मन्झ हांऊँ आपणे उम्रा रे कई यहूदी लोका ले ज्यादा तेज था।

^15-16 पर परमेसरे आपणे मह्ठे जो मेरे पर जाहिर करणे रा फैसला लितेया, ताकि हांऊँ यीसू मसीह रे बारे मन्झ अन्यजाति लोका रे बीचा खुसी री खबरा रा प्रचार करूं। परमेसरे ही मेरे जमणे रे पैहले हांऊँ चुणी लितेया, होर आपणे अनुग्रह री वजहा ले तिन्हें हांऊँ आपणी तेसरी सेऊआ करणे रे कठे सादेया। यीसू मसीहे जेबे आपणे आपा जो मेरे पर जाहिर कितेया, तेता ले बाद हांऊँ केसी माह्णुं वाले सलाह लेणे रे कठे नी गया।

¹⁷ होर ना हांऊँ यरुस्लेम सैहरा मन्झ तिन्हा लोका वाले गया जो मेरे चुणिरे चेले बणने रे पैहले ले ही चुणिरे चेले थे, पर हांऊँ झटपट अरब देसा जो चली गया, होर फेरी तेथी ले दबारा दमिस्क सैहरा जो वापस आया।

¹⁸ फेरी तीन साला ले बाद हांऊँ पतरस किन्हें मिलणे रे कठे यरुस्लेम सैहरा जो चली गया, होर तेस वाले हांऊँ पन्द्रा ध्याड़े तक रैंहयां।

¹⁹ पर हांऊँ तेथी चुणिरे चेलेया मन्झा ले सिर्फ प्रभु रे भाई याकूबा किन्हें ही मिलेया।

²⁰ परमेसर मेरा गुआह आ कि, जो गल्ला हांऊँ तुस्सा जो लिख्या करहा, तेता मन्झ कोई भी झूठ नी आ।

²¹ यरुस्लेम सैहरा मन्झ चुणिरे चेलेया किन्हें मिलणे रे बाद हांऊँ सीरिया ईलाके होर किलकिया ईलाके मन्झ गया।

²² पर यहूदिया ईलाके री कलीसिया रे मसीही विस्वासी लोके हांऊँ कधी नी देखिरा था।

²³ पर स्यों लोक मेरे बारे मन्झ ये सुणदे रहे थे कि, “जो पैहले आस्सा जो स्ताहां था, ऐबे से ही यीसू मसीह री खुसी री खबरा रा प्रचार करी करहा, जेस जो से पैहले नास करणे री कोसिस करहा था।”

²⁴ इधी कठे कि जो परमेसरे मेरे कठे कितेया, तेता रे कठे स्यों परमेसरा री बड़ाई करदे रहे।