इफिसियो 6 - मंडयाली नंऊँआं नियम

माऊ बापू-बाल बच्चे

^1-3 हे बच्चेयो, पवित्र सास्त्रा मन्झ लिखिरा कि, “आपणे माऊ-बापू री इज्जत करहा, तेबे तेरा भला हूंणा, होर तू धरती पर बौह्त ध्याड़े तक जिउंदा रहे।” ये पैहला हुक्म आ, जेस साउगी प्रभुए एक वादा भी दितिरा। होर प्रभु साउगी एक हूंणे री वजहा ले तुस्सा बच्चे रे ये ठीक आ कि तुस्से आपणे माऊ-बापू रे हुक्मा जो मन्हा।

⁴ होर हे बच्चे वालेयो, आपणे बच्चेया जो जलेरा मत, पर प्रभु ले मिलिरे उपदेस होर बिधिया जो स्खान्दे हुए, तिन्हा जो पाला-पोसा।

माल्का होर गुलाम

⁵ हे गुलामो, जिहां तुस्से खरे मना ले मसीह रा हुक्म डर किन्हें होर बड़ी इज्जत साउगी मन्हां ऐं, तिहां ईं तुस्से आपणे संसार रे माल्का रा भी गल्ला मन्हा।

⁶ होर माह्णुंआं जो खुस करणे वाले साहीं दिखाऊआ करणे रे कठे आपणे माल्का री सेऊआ नी करा। तुस्से मसीह रे गुलाम ऐं, इधी कठे तुस्से आपणे पुरे दिला ले से ही करहा, जो परमेसर तुस्सा ले चाहां।

⁷ खुसी से एक सेऊआदार हुंदे एह्ड़े काम करहा, मानो तुस्से माह्णुं री नी, पर प्रभु री सेऊआ करदे लगीरे।

⁸ क्यूंकि तुस्से जाणहां ऐं कि, जो कोई खरा काम करघा, से चाहे गुलाम हो, या चाहे अजाद हो; प्रभुआ तेस जो तेसरा इनाम देणा।

⁹ होर एस तरहा ले हे माल्को, तुस्से भी धमकिया देणा छाडी किन्हें आपणे गुलामा साउगी तेह्ड़ा ई बर्ताव करा, जेह्ड़ा मैं तिन्हा किन्हें तुस्सा साउगी बर्ताव करणे रे कठे बोलिरा। क्यूंकि तुस्से जाणहां ऐं कि, तिन्हारा होर तुस्सा दुंहीं रा एक ई माल्क आ होर से स्वर्गा मन्झ आ, होर से केसी साउगी भेदभाव नी करदा।

आत्मिक लड़ाई रे कठे हथियार

¹⁰ होर आखरी मन्झ हांऊँ ये लिखणा चाहां कि, प्रभु ले होर तेसरी महान सामर्था ले ताकत पाई किन्हें आत्मिक रूपा ले मजबूत बणा।

^11-13 आस्सा री लड़ाई माह्णुंआं रे बरखलाप नी। पर आस्सा री ये लड़ाई राज करणे वाले किन्हें, अधिकारिया किन्हें, नहयारे रे हाकमा किन्हें, होर हर प्रकारा री बुरी ताकता ले ई जो आसमाना मन्झ रैहीं। इधी कठे परमेसरे जो भी हथियार तुस्सा जो दितिरे, तिन्हो बान्ही लऊआ। ताकि बुरे ध्याड़े आऊणें पर तुस्से आपणे आपा जो सैताना री चाला ले बचाई सको, होर तेस्सा लड़ाई जो पूरा करी किन्हें मजबूत खड़े रही सको।

¹⁴ इधी कठे परमेसरा री सच्चाई जो पटे साहीं आपणी कमर मन्झ बान्ही लेया, होर धार्मिकता रे स्वभावा जो झिलमा साहीं पैन्ही लेया।

¹⁵ सांति रे बारे मन्झ खुसी री खबरा सुनाणे री तुस्सा री त्यारी तुस्सा रे पैरा रे बूटा साहीं हो।

¹⁶ होर इन्हा सभी गल्ला रे अलावा परमेसरा पर विस्वास रखा, जो एक ढाला साहीं तुस्सा जो दुस्ट सैताना रे तरफा ले आऊणें वाले जल्दे हुए तीरा रे नुकसाना ले बचाणे।

¹⁷ होर जिहां एक टोप स्पाही रा सिर बचा, तिहां ही परमेसरा एक टोप साहीं तुस्सा रा उद्धार करहे, होर परमेसरा रे बचना जो लेई लेहां जो पवित्र आत्मा तुस्सा जो देहां, जो एक तलवारा साहीं आ।

¹⁸ होर हर टैम होर हर तरहा आस्सो तिहां प्रार्थना होर अर्ज करणी चहिए जिहां पवित्र आत्मा बोल्या। इधी कठे त्यार रैहया कि, तुस्से सभ परमेसरा रे पवित्र लोका रे कठे हमेसा प्रार्थना करदे रहो।

¹⁹ होर मेरे कठे भी प्रार्थना करदे रैहया कि, परमेसर मुंजो बोलणे रे टैम सही सब्द दे, ताकि हांऊँ बगैर डरे खुसी री खबरा रे बारे मन्झ लुख्ही री योजना जो सुणाई सकूं कि, ये खुसी री खबर सभ लोका रे कठे ई।

²⁰ होर इधी कठे हांऊँ जंजीरा मन्झ जकड़ीरे राजदूत साहीं सेऊआ करदा लगिरा। होर इधी कठे भी प्रार्थना करहा कि जेहड़ा मुंजो बोलणा चहिए, तेह्ड़ा हांऊँ बगैर डरे खुसी री खबरा रा प्रचार कर सकूं।

आखरी नमस्कार

^21-22 हांऊँ चाहां कि तुस्से ये जाणो कि हांऊँ केह्ड़ा होर क्या करदा लगिरा, होर इधी कठे मैं विस्वासी भाई तुखिकुस तुस्सा वाले भेजी करहा। से मेरा लाडला दोस्त आ, होर भरोसे रे लायक प्रभु रा सेऊआदार आ। तेस तुस्सा जो दसणा कि, हांऊँ केह्ड़ा, होर तेस तुस्सा जो हिम्मत देणी।

²³ हांऊँ बापू परमेसर होर आस्सा रे प्रभु यीसू मसीह ले प्रार्थना करहा कि से तुस्सा विस्वासी भाईया जो सांति दे। ताकि तुस्से एक दूजे किन्हें प्यार करी सको, होर मसीह पर विस्वास करदे रहो।

²⁴ हांऊँ प्रार्थना करहा जो आस्सा रे प्रभु यीसू मसीह किन्हें सच्चा प्यार करहा ऐं, परमेसर तिन्हा सभी जो आपणा अनुग्रह दे।