इफिसियो 5 - मंडयाली नंऊँआं नियमप्यारा किन्हें रैहया 1 इधी कठे परमेसरा रे प्यारे बच्चे हूणे रे नाते तुस्से परमेसरा साहीं बणने री कोसिस करा। 2 एक दूजे किन्हें साउगी प्यारा किन्हें जिन्दगी जीया; जेह्ड़ा मसीहे भी तुस्सा किन्हें प्यार कितेया, होर तुस्सा रे पापा जो माफ करणे रे कठे आपणे आपा जो बलिदान करी दितेया। परमेसर एता ले खुस हुआ, क्यूंकि से बलिदान तेसरे कठे मीठी मुस्का साहीं था। 3 होर जेह्ड़ा परमेसरा रे पवित्र लोका रे खरा आ, तुस्सा मन्झ ना ता व्यभिचार, ना केसी किस्मा रे गंदे काम, होर ना पैसे रे लालचा री गल तक हो। 4 तुस्से गंदी गल्ला होर वेवकुफी री गल्ला मत करा, होर ना ही भद्दे मजाक करो। क्यूंकि तुस्सा जो एह्ड़ी गल्ला करणा सोभा नी देंदी, बल्की तुस्से परमेसरा रा धन्यावाद ही करा। 5 क्यूंकि तुस्से ये खरी तरीके किन्हें जाणहां ऐं कि, व्यभिचार करणे वाल़ा, या गन्दा आदमी, या लालची माह्णुं जो मूर्ति पूजणे वाले रे बराबर ऐं, यूँ त्राए मसीह होर परमेसरा रे राजा मन्झ विरासत नी पाई सकदे। 6 कोई तुस्सा जो धोखा देई किन्हें तुस्सा जो भी आपणे साहीं बुरे काम नी कुराये, क्यूंकि इन्हा गल्ला री वजहा ले हुक्म नी मनणे वाले पर परमेसरा रा गुस्सा भड़क्हा। 7 इधी कठे तुस्से तिन्हा साउगी मिली किन्हें ये पापा रे काम मत करा। प्रयासे मन्झ जीणा 8 क्यूंकि तुस्से ता पैहले नहयारे मन्झ थे पर ऐबे जेब्की तुस्से प्रभु साउगी एक बणी गईरे, ता तुस्से ज्योति मन्झ ऐं, होर इधी कठे प्रयासे मन्झ जीणे वाले साहीं आपणी जिन्दगी जीया। 9 क्यूंकि अगर कोई एक माह्णुं प्रयासे मन्झ आ, ता तेस भलाई होर धार्मिकता रे काम करणे, होर आस्से तेस पर भरोसा करी सके। 10 होर ये जाणने री कोसिस करहा कि, प्रभु जो क्या खरा लग्हा। 11 होर तिन्हा साउगी मिली किन्हें नहयारे मन्झ रैहणे वाले लोका साहीं बेकार काम मत करा, बल्की तिन्हारे पापा रे कामा रा भांडा फोड़ दो। 12 क्यूंकि परमेसरा पर विस्वास नी करणे वाले लोक जो स्यों लुख्ही-लुख्ही किन्हें काम करहा ऐं, तिन्हारे बारे मन्झ गल्ला करणा भी सरमा री गल ई। 13 क्यूंकि जेबे प्रयासा केसी चीजा पर चमका, ता से सभ चीजा जाहिर करहा, होर जेबे प्रयासा केसी चीजा जो जाहिर करहा से चीज आपणे आपा मन्झ प्रयासा बणी जाहाँ। 14 एस वजहा ले लोक बोल्हे कि, “हे सोणे वाले जागी जा, होर मरिरे या मन्झा ले उठी जा; ता मसीह तुस्सा जो आपणा प्रयासा देणा।” बुद्धिमाना साहीं जीया 15 इधी कठे ध्याना रखा कि, केह्ड़ी जिन्दगी जीया करहे; पर नर्क्कले साहीं नी पर बुद्धिमाना साहीं जीया। 16 होर भलाई रे कठे समझदारी किन्हें हर मौके रा इस्तेमाल करहा, क्यूंकि ध्याड़े बुरे ऐं। 17 इधी कठे नर्क्कले मत बणा, पर समझदारी किन्हें ये जाणने री कोसिस करा कि, प्रभु क्या चाहां कि तुस्से करो। 18 होर सराब पी किन्हें मुताली मत जाऊआ, क्यूंकि एता ले तुस्सा बेसरमा साहीं लुचपन करणे मन्झ पई जाणा, एता रे बजाय पवित्र आत्मा किन्हें भरी जाऊआ। 19 अगर तुस्से पवित्र आत्मा किन्हें भरी जांघे, ता तुस्सा एह्ड़ा करणा कि जेबे भी तुस्सा कठ्ठा हूंणा, ता परमेसरा रे कठे भजन होर बड़ाई गान गाया करणा। होर दूजे भी गाणे गाया करहा जो पवित्र आत्मा तुस्सा जो देहां। होर आपणे-आपणे मना मन्झ प्रभु रे कठे गाणे गान्दे होर बड़ाई करदे रैहया। 20 होर जो कुछ आस्सा रे प्रभु यीसू मसीहे कितिरा, इधी कठे हमेसा सभ गल्ला रे कठे आस्सा रे बापू परमेसरा रा धन्यावाद करा। 21 होर मसीह री इज्जत करदे हुए, एक दूजे रे अधीन रैहया। लाड़ा होर लाड़ीया जो आदेस 22 हे लाड़ीयो, आपणे-आपणे लाड़े रे अधीन रैहया, जिहां तुस्से प्रभु रे अधीन रैहे। 23 क्यूंकि लाड़ा लाड़ी रा मूंड आ, जेह्ड़ा कि मसीह कलीसिया रा सिर आ; होर मसीह आपणे सरीरा रा यानि कलीसिया रा उद्धार करणे वाल़ा। 24 जिहां कलीसिया मसीह रे अधीन ई, तिहां लाड़ीया भी हर गल्ला मन्झ आपणे-आपणे लाड़े रे अधीन रहे। 25 हे लाड़ेयो, आपणी-आपणी लाड़ी किन्हें प्यार रखा, जेह्ड़ा मसीहे भी कलीसिया किन्हें प्यार करी किन्हें आपणी जान कलीसिया रे कठे देई दिती। 26 ताकि कलीसिया जो बचना रे ज्रीए पाणी किन्हें सुद्ध करी किन्हें पवित्र बणाई सके। 27 होर आपणी कलीसिया जो एक तेजस्वी कलीसिया बणाई किन्हें सभ लोका जो आपणी उपस्थिति मन्झ खड़ी करी सके। तेता मन्झ दाग, झुरिया, या एह्ड़ी कोई भी बुरी चीज नी हो, बल्की से पवित्र होर बेकसूर हो। 28 ठीक एस तरहा लाड़े भी आपणी-आपणी लाड़ीया किन्हें तिहां प्यार करहे जिहां से आपणे आपा ले करहा। जो आपणी लाड़ी किन्हें प्यार रख्हा, से आपु आपणे आपा किन्हें प्यार करहा। 29 क्यूंकि केसिए कधी आपणे सरीरा ले बैर नी रख्या, बल्की तेसरा पालन-पोसण करहा। मसीह भी कलीसिया साउगी एह्ड़ा ही करहा। 30 इधी कठे कि आस्से सभ एक ही सरीरा रे अंग ऐं। 31 जिहां पवित्र सास्त्रा मन्झ लिखिरा कि, “एस वजहा ले माह्णुंआं आपणे माऊ बापू ले लग हुई किन्हें आपणी लाड़ी साउगी रैंह्णां, होर तिन्हा एक ही हूंणां।” 32 एथी आस्सा जो समझणे रे कठे एक बौह्त गहरा उपदेस आ; पर जेथी तक मेरी गल ई, हांऊँ एस गल्ला री तुलना मसीह होर तेसरी कलीसिया किन्हें करहा। 33 पर ये गल तुस्सा जो भी लागू हुईं कि, तुस्सा मन्झा ले हर एक आपणी लाड़ी किन्हें आपणे साहीं प्यार करहा, होर लाड़ी भी आपणे लाड़े री इज्जत करहे। |
This work is licensed under Creative Commons Attribution-ShareAlike 4.0 License.