इफिसियो 4 - मंडयाली नंऊँआं नियम

मसीह रे सरीरा मन्झ एकता

¹ इधी कठे हांऊँ, जो प्रभु यीसू री सेऊआ करणे री वजहा ले जेल्हा मन्झ कैद आ, तुस्सा ले अर्ज करहा कि, जेस बुलाहटा ले परमेसरे तुस्से आपणे लोक हूंणे रे कठे सादीरे, तेता रे मताबक आपणी जिन्दगी जीया।

² सारी दीनता होर नम्रता साउगी, होर सबर रखी किन्हें प्यारा किन्हें एक दूजे जो सही लो।

³ एह्ड़ा करणे रे कठे पूरी कोसिस करहा, ताकि तुस्से एक दूजे किन्हें हमेसा सांति किन्हें जी सको, क्यूंकि तुस्से पवित्र आत्मा रे ज्रीए एक कितिरे।

⁴ आस्से सभ विस्वासी लोक एक ई सरीरा रे अंग ऐं, होर आस्सा सभी मन्झ एक ई पवित्र आत्मा वास करहा। ठीक तिहां ई जिहां तुस्सा जो से ही आस दितिरी थी, जेबे तुस्से परमेसरा रे लोक हूंणे रे कठे सादीरे थे।

⁵ आस्सा सभीरा एक ई प्रभु आ, होर एक ई आ जेस पर आस्से विस्वास करहे होर से यीसू मसीह ही आ, होर आस्से सभीए एक ई बपतिस्मा लितिरा।

⁶ होर एक ई परमेसर आ जो सभी लोका रा बापू आ, जो आस्सा सभी गास राज करहा, होर आस्सा सभी रे ज्रीए काम करहा, होर आस्सा सभी मन्झ वास करहा।

आत्मिक बरदान

⁷ पर मसीहे आस्सा सभी जो अनुग्रह रे नापा रे मताबक तेसरे कामा जो करणे रे कठे खास बरदान दितिरे।

⁸ होर जिहां पवित्र सास्त्र मन्झ मसीह रे दितिरे बरदाना रे बारे मन्झ लिखिरा कि, “जेबे से सभी ले गास चढ़ेया, होर बौह्त सारे कैदिया जो आपणे साउगी बांधी किन्हें लेई गया, होर तिन्हें आपणे लोका जो दान दिते।”

⁹ जेबे पवित्र सास्त्रा मन्झ एह्ड़ा लिख्या कि, “गास चढ़ेया” ता एता रा क्या मतलब आ? सिर्फ ये कि से धरती री सभी ले हेठली जगहा मन्झ भी उतरेया था।

¹⁰ होर जो हेठली जगहा मन्झ उतरेया था, से मसीह ई आ, जो आसमाना रे भी गास गया था। मसीहे एह्ड़ा इधी कठे कितेया ताकि से आपणी उपस्थिति ले पूरी धरती जो भरपूर करी सके।

¹¹ मसीहे ही ये बरदान कलीसिया रे लोका जो दितिरे; तिन्हें कुछ लोका जो चुणी लितिरा कि स्यों चुणिरे चेले बणे, होर कुछ लोका जो इधी कठे कि स्यों नबी बणे। तिन्हें कुछ लोका जो इधी कठे चुणिरा कि स्यों खुसी री खबरा रा प्रचार करहे, होर कुछ लोक कलीसिया री रखवाली करणे रे कठे, होर कुछ लोका जो स्खाणे रे कठे चुणिरा।

¹² परमेसरे ये बरदान इधी कठे दितिरे, ताकि परमेसरा रे लोक तेसरी सेऊआ करणे रे लायक बणे, होर कलीसिया री बढ़ौतरी रे कठे काम करी सके, जो मसीह रा सरीर आ।

¹³ ये सारी गल्ला इंहां करी किन्हें हुंदी रैहणी, जेबे तक कि आस्से आपणे विस्वास, होर परमेसरा रे मह्ठे रे बारे मन्झ आस्सा वाले जो ज्ञान आ, तेता रे ज्रीए आस्से सभ एक नी हुई जाए। तेबे आस्सा मसीह साहीं एक सिद्ध माह्णुं, होर पूरी तरहा ले तेस साहीं बणी जाणा।

¹⁴ इधी कठे ऐबे ले लेई किन्हें आस्से बच्चे साहीं नी बणे, आस्सा तेस किस्ती साहीं नी हूंणा, जेस जो तेज बागर डूआई किन्हें लेई जाहीं, या ल्हरें ओरे-परे घुमाई देईं। यानि ऐबे ले ठगी होर चालू माह्णुं आस्सा जो झूठी गल्ला मन्झ नी फसाई सकदे।

¹⁵ एता रे बजाय प्यार भरे तरीके किन्हें सच्चाई जो बोला। आस्से सभ हर गल्ला मन्झ सिद्ध बणे, ताकि आस्से मसीह साहीं बणी जाये, जो कलीसिया रा सिर आ।

¹⁶ आस्से सभ जो मसीह पर विस्वास रखे तेसरे सरीरा रे अंग ऐं। जिहां एक माह्णुं रा सरीर तेसरे हर एक जोड़ होर अंगा किन्हें जुड़ीरा हुआ, होर जेबे सरीरा रे हर एक अंग जुड़ी किन्हें ठीक काम करहा, तेबे सरीर बढ़दा होर मजबूत हुंदा जाहाँ। इंहां करी किन्हें जेबे आस्से मसीह रे दितिरे खास बरदाना किन्हें काम करहे, ता आस्से मजबूत होर सिद्ध बणदे जाए, होर एक दूजे किन्हें ज्यादा प्यार करणा।

मसीह मन्झ नौंईं जिन्दगी

¹⁷ इधी कठे जो हक मुंजो प्रभुए दितिरा, तेस हका किन्हें हांऊँ बोल्हा कि, परमेसरा पर विस्वास नी करणे वाले लोका साहीं आपणी जिन्दगी मत जीया, जिन्हारी सोच बेकार ई।

¹⁸ स्यों बिलकुल भी नी समझ्दे लगीरे। स्यों परमेसरा ले मिलणे वाली जिन्दगी ले दूर ऐं, क्यूंकि स्यों ढीठ बणी गईरे, होर परमेसरा रे बारे मन्झ अनजाण बणी गईरे।

¹⁹ स्यों लुचपना मन्झ लगी गईरे, होर सभ किस्मा रे गंदे काम करी करहे, क्यूंकि जो बुरे काम स्यों करहे, तेता जो करणे मन्झ ऐबे तिन्हो कोई सर्म नी आउंदी।

²⁰ पर मसीह रे उपदेसा ले तुस्से एह्ड़ा करणा ता नी सिखिरा था।

²¹ मुंजो कोई सक नी आ कि जेबे तुस्से मसीह यीसू रे बारे मन्झ सुणिरा था, होर तुस्से आपणे स्खाणे वाले ले तेसरे सच्चे उपदेस सिखिरे थे।

²² तुस्सा रे स्खाणे वाले तुस्सा जो पुराणे जिन्दगी जीणे रे तरीके जो छाडणे रे कठे सखाईरा था, जेथी तुस्सा री बुरी इच्छे तुस्सा जो धोखा देई किन्हें तुस्सा री जिन्दगीया जो भ्रष्ट करी दितिरा था।

²³ एता रे बजाय पवित्र आत्मा जो तुस्सा रे मना होर स्वभावा जो नंऊँआं करणे देआ।

²⁴ होर तिन्हें तुस्से एक नंऊँऐं माह्णुं बणाईरे, होर से नंऊँआं माह्णुं परमेसरा साहीं हूंणे रे कठे बणाई गईरा यानि पवित्र होर धर्मी बणने रे कठे।

पवित्र आत्मा जो दुखी नी करणा

²⁵ इधी कठे झूठ बोलणा छाडी किन्हें, हर एक आपणे विस्वासी भाई किन्हें सच्च बोले, क्यूंकि आस्से सभ एक ई सरीरा रे अंग ऐं।

²⁶ “जेबे तुस्से गुस्सा करो, ध्यान रखा केतकी तुस्सा ले पाप नी हुई जाओ,” सूरज ढल्ने तक तुस्सा रा गुस्सा खत्म हुई जाए।

²⁷ होर एह्ड़ा करी किन्हें सैताना जो मौका मत देआ कि से तुस्सा री परखणी करहे।

²⁸ जो चोरी करहा, से दबारा चोरी नी करहे; पर आपणे हाथा ले ईमानदारी किन्हें मैहनत करहे, ताकि गरीब लोका री मदद करणे रे कठे भी तेस वाले कुछ हो।

²⁹ कोई गंदी गल तुस्सा रे मुंहा ले नी निकले, पर लोका जो विस्वासा मन्झ बढ़ने रे कठे जो ज्रूरत हो, से ही गल करहा, ताकि सुणने वाल़ेया जो तुस्सा री गल्ला ले हिम्मत मिली सके।

³⁰ होर परमेसरा री पवित्र आत्मा जो आपणे कामा ले दुःखी मत करा, क्यूंकि पवित्र आत्मा से छाप ई जो एस गल्ला जो जाहिर करही कि एक ध्याड़े परमेसरा तुस्सा जो जरुर छुटकारा देणा।

³¹ एक दूजे किन्हें कड़वाहट होर रोस मत रखा, होर एक दूजे पर गुस्सा करी किन्हें झगड़ा मत करा, एक दूजे रे बारे मन्झ बुरी गल्ला करी किन्हें बदनाम मत करा, होर सभ किस्मा रे बैर-भाव ले तुस्से दूर रैहया।

³² एता रे बजाय एक दूजे पर दया होर करुणा करणे वाले बणा। क्यूंकि परमेसरे मसीह साउगी एक हूंणे री वजहा ले तुस्सा रे पाप माफ किते, इधी कठे तुस्से भी एक दूजे जो माफ करा।