इफिसियो 3 - मंडयाली नंऊँआं नियम

लकोईरी योजना रा जाहिर हूंणा

¹ क्यूंकि तुस्सा गैर-यहूदी लोका रे कठे परमेसरे ये सभ कुछ कितिरा, हांऊँ पौलुस तुस्सा रे कठे प्रार्थना करहा। होर तुस्सा गैर-यहूदी लोका जो खुसी री खबर सुणाणे री वजहा ले हांऊँ जेल्हा मन्झ आ।

² परमेसरे आपणे बड़े अनुग्रहा ले मुंजो तुस्सा जो खुसी री खबर सुणाणे रा काम दितिरा, तेता रे बारे मन्झ तुस्से जरुर सुणिरा हुन्घा।

³ यानि परमेसरे ही मुंजो आपणी ल्कोईरी योजना जाहिर किती, जेता रे मन्झ मैं पैहले थोड़ा बौह्त लिखी चुकिरा।

⁴ जिहां तुस्से एस्सा चिठ्ठी जो पढ़ी करहे ता तुस्सा जाणी लेणा कि, सच्चे हांऊँ मसीह रे बारे मन्झ कितने खरे किन्हें तेस ल्कोईरी योजना जो समझ्हा।

⁵ पर परमेसरे पिछले जमाने रे लोका जो एस लकोईरी योजना रे बारे मन्झ नी दस्सीरा था, पर ऐबे पवित्र आत्मे एस योजना जो तेसरे पवित्र चुणिरे चेलेया होर नबिया पर जाहिर कितिरा।

⁶ परमेसरा री योजना ये ई: मसीह यीसू साउगी एक हूंणे री वजहा ले गैर-यहूदी लोका भी खुसी री खबरा रे ज्रीए तेस विरासता रे साझीदार हूंणे जो यहूदी लोका रा। स्यों एक ही सरीरा रे अंग ऐं, होर परमेसरा रे कितिरे वादे रे साझी ऐं, जो तिन्हें यहूदी लोका किन्हें कितिरा।

⁷ परमेसरा रे अनुग्रह रे ज्रीए तिन्हें मेरे मन्झ आपणी नौखे सामर्था जो काम करणे दितेया, जेसरी वजहा ले हांऊँ खुसी री खबरा रा प्रचार करणे रे कठे एक सेऊआदार बणेया।

लकोईरी योजना रा मकसद

⁸ हालांकि परमेसरे रे पवित्र लोका मन्झा ले हांऊँ सभी ले छोटा आ। फेरी भी परमेसरे मेरे पर ये अनुग्रह कितेया कि हांऊँ गैर-यहूदी लोका जो ये खुसी री खबर सुणाई सकूं कि, मसीह ले मिलणे वाली आसीसे इतनी बडी कि तिन्हारा आस्से बखान नी करी सकदे।

⁹ होर ये भी कि हांऊँ सभ लोका जो परमेसरा री एस लकोईरी योजना जो समझाई सकूं, जेस योजना जो सभ चीजा जो रचणे वाले सुर्हू ले लकोई किन्हें रखिरा था।

¹⁰ परमेसरा रा मकसद ये था कि ऐबे कलीसिया रे ज्रीए, तेसरे ज्ञाना जो जेसरी कोई सीमा नी, सारी आत्मा पर जाहिर करी दे, जो कधी नी देखिरी जगहा मन्झ हक रखी होर राज करही।

¹¹ परमेसरे एह्ड़ा आपणी अनंत योजना रे मताबक कितेया, जेस योजना जो तिन्हें आस्सा रे प्रभु यीसू मसीह रे ज्रीए पूरा कितेया।

¹² मसीह यीसू साउगी एक हूंणे री वजहा ले, होर तेस पर विस्वास करणे ले, आस्से परमेसरा री उपस्थिति मन्झ बड़ी हिम्मता किन्हें होर भरोसे किन्हें आई सके।

¹³ इधी कठे हांऊँ अर्ज करहा कि जो दुःख हांऊँ तुस्सा रे कठे सहन करी करहा, तेता री वजहा ले हिम्मत नी छाडा, क्यूंकि ये सब कुछ तुस्सा रे भले रे कठे आ।

इफिसिया सैहरा रे विस्वासी लोका रे कठे प्रार्थना

¹⁴ क्यूंकि परमेसरे ये सभ कुछ तुस्सा रे कठे कितिरा, हांऊँ बापू परमेसरा रे साम्हणें घुटने टेक्की किन्हें प्रार्थना करहा।

¹⁵ परमेसर स्वर्ग होर धरती पर, हर एक घराने रा नांऊँ रख्या।

¹⁶ हांऊँ प्रार्थना करहा कि परमेसर आपणी महिमामय आसिसा रे मताबक, आपणी पवित्र आत्मा रे ज्रीए तुस्सा जो सामर्थ दे; ताकि तुस्सा रा अंदरला माह्णुं मजबूत हुई जाये,

¹⁷ जेता ले तुस्से मसीह पर विस्वास करी सको होर मसीह तुस्सा रे दिला मन्झ वास करी सके। हांऊँ प्रार्थना करहा कि परमेसरा रे कठे होर एक दूजे कठे तुस्सा रा प्यार, तुस्सा जो मजबूत बणाई रखे ताकि तुस्से पई नी जाओ।

¹⁸ होर सभ परमेसरा रे पवित्र लोका साउगी तुस्से ये जाणी सको कि, मसीह आस्सा किन्हें कितना प्यार करहा; तुस्से तेसरी प्यारा री चौड़ाई, लम्बाई, होर ऊंचाई, होर गैहराई जो समझी सको।

¹⁹ हांऊँ प्रार्थना करहा कि तुस्से मसीह रे एस प्यारा जो जाणी सको, जो माह्णुंआं री समझा ले परे आ, ताकि तुस्से परमेसरा साहीं सारी गल्ला मन्झ भरपूर हुई जाओ।

²⁰ आस्सा रे मांगणे ले या आस्सा रे सोचणे ले ज्यादा बड़ी गल्ला जो परमेसर करी सक्हा, क्यूंकि तेसरी सामर्थ आस्सा मन्झ काम करही।

²¹ मसीह यीसू साउगी एक हूंणे री वजहा ले, सारे कलीसिया रे लोक परमेसरा री महिमा जुग-जुग करदे रहे। आमीन।