इफिसियो 2 - मंडयाली नंऊँआं नियममौता ले जिन्दगी री तरफ 1 तुस्से पैहले आपणे अपराध होर पापा री वजहा ले मरिरे लोका साहीं थे; परमेसरा ले मिलणे वाली जिदंगी तुस्सा वाले नी थी। 2 तेस टैम तुस्से एस संसारा रे लोका साहीं जिन्दगी जीये थे। होर तुस्से सैताना जो मन्हें थे, जो दुस्ट आत्मा रा अधिकारी हुई किन्हें आसमाना मन्झ राज करहा, जो ऐबे भी परमेसरा रे हुक्मा जो नी मनणे वाले लोका जो काबू मन्झ रखणे री कोसिस करहा। 3 आस्से भी तिन्हा साहीं जिन्दगी जीये थे, आस्से भी आपणे पापा रे स्वभावा री इच्छा पूरी किती। आस्से से सब कुछ कितेया, जो आस्सा री सरीरा री बुरी इच्छा होर मना रे बिचार बोलणे जो करहे थे। सभ लोका साहीं आस्से भी स्वभावा ले बुरे थे, होर परमेसरा री सजा रे हकदार थे। 4 पर परमेसरे जो बौह्त ज्यादा दयावान आ; तिन्हें आपणे तेस बड़े प्यारा रे कारण आस्सा किन्हें प्यार कितेया। 5 जेबे आस्से पापा री वजहा ले मरिरे लोका साहीं थे, ता मानो परमेसरे आस्से मसीह साउगी दबारा जिउंदे किते। परमेसरा रे अनुग्रहा री वजहा ले आस्सा रा उद्धार हुईरा। 6 मसीह यीसू साउगी एक हूंणे री वजहा ले परमेसरे आस्से मरिरे मन्झ ले जिउंदे किते, होर स्वर्गीय स्थाना मन्झ तेस साउगी बैठाया। 7 परमेसरे एह्ड़ा इधी कठे कितेया, ताकि आऊणें वाले टैमा मन्झ से संसारा रे लोका जो दसी सके कि तेसरा अनुग्रह कितना महान आ। आस्से जो मसीह यीसू साउगी एक ऐं, आस्सा रे कठे जो कुछ परमेसरे कितेया, ये अनुग्रह तिन्हें आस्सो दसेया। 8 क्यूंकि विस्वासा रे ज्रीए परमेसरा रे अनुग्रह ले ई तुस्सा रा उद्धार हुईरा, होर तुस्सा रा उद्धार तुस्सा री वजहा ले नी हुआ, पर ये परमेसरा रा दान आ। 9 होर ये तुस्सा रे भले काम करणे री वजहा ले नी हुईरा, होर इधी कठे कोई एह्ड़ी वजहा नी कि तुस्से घमंड करहे। 10 क्यूंकि आस्से परमेसरा रे हाथा री सभी ले बढ़िया रचना ई; होर मसीह यीसू साउगी एक हूंणे री वजहा ले आस्से भले काम करणे रे कठे बणाये गईरे, जिन्हा जो परमेसरे पैहले ले आस्सा रे करणे रे कठे त्यार कितिरा। मसीह मन्झ एक 11 इधी कठे याद करा कि, तुस्से जन्मा ले ही गैर-यहूदी ऐं, होर यहूदी लोका तुस्सा रा मजाक ड़ुआयें कि, तुस्से खतना नी कुरांदे, होर स्यों खतना कुराहें, पर तिन्हें लोके ये खतना सिर्फ सरीरा रा कितिरा, पर दिला रा नी। 12 तुस्से लोक तेस टैम मसीह जो नी जाणदे थे, होर परमेसरा रे चुणिरे लोक यानि इस्राएल देसा रे लोका मन्झ नी गिणी जांदे थे। होर परमेसरा रे लोका साउगी कितिरी वाचा रे भी साझीदार नी थे, होर एस संसारा मन्झ बगैर आस होर बगैर परमेसरा रे जिन्दगी जीये थे। 13 एक टैम था जेबे तुस्से परमेसरा ले दूर थे, पर ऐबे तुस्से यीसू मसीह साउगी एक हूंणे री वजहा ले, मसीह रे बहाईरे खूना रे ज्रीए परमेसर तुस्सा जो आपणे वाले लेई किन्हें आईरा। 14 क्यूंकि मसीहे ई आस्सा रे बीचा मन्झ सांति ल्यान्दी, पैहले मान्नो एक कान्धे यहूदी होर गैर-यहूदी लोका जो लग करी रखिरा था। स्यों एक दूजे किन्हें नफरत करहे थे, पर ऐबे मसीहे से कान्ध ढाली दितिरी, होर दुहीं जो एक करी दितिरा। 15 क्रूसा प्रयाल्हे मसीहा री मौता रे ज्रीए तिन्हें मूसा री व्यवस्था जो तेसरी सारी बिधिया होर नियमा साउगी रद्द करी दितेया, ताकि से आपणे आपा मन्झ यहूदी होर गैर-यहूदी लोका रा मेल मिलाप कुराई किन्हें तिन्हो नऊँयें माह्णुं बणाई दे। 16 होर क्रूसा प्रयाल्हे आपणी मौता रे ज्रीए मसीहे यहूदी होर गैर-यहूदी लोका रे बीचा मन्झ बैर-भाव खत्म करी किन्हें दुहीं जो एक बणाया, होर परमेसरा साउगी मेल-मिलाप कुराया। 17 मसीह आया होर तुस्से गैर-यहूदी लोक जो परमेसरा ले दूर थे होर जो यहूदी लोक तेसरे नेडे थे, दुहीं जो मेल-मिलापा री खुसी री खबर सुणाई। 18 मसीह री वजहा ले होर एक ही पवित्र आत्मा रे ज्रीए आस्से सभ बापू वाले आई सके। मसीह आस्सा रा कुणे रा पात्थर 19 इधी कठे ऐबे तुस्से गैर-यहूदी लोक परदेसी होर मूसाफर नी रहे, पर परमेसरा रे पवित्र लोका साउगी संगी स्वदेसी होर परमेसरा रे परिवारा रे सदस्य हुई गईरे। 20 तुस्से एक घरा साहीं ऐं जेसरी निंऊआं चुणिरे चेले होर नबीये, जेसरे कुणे रा पात्थर यीसू मसीह आपणे आप आ। 21 मसीह एस घरा जो जोड़ी रखा, होर एता जो प्रभु रे कठे एक पवित्र मन्दरा रे रूपा मन्झ बढ़ादां जाहाँ। 22 होर तुस्से गैर-यहूदी विस्वासी लोक भी मसीह यीसू साउगी एक हूंणे री वजहा ले, परमेसरा रे दूजे विस्वासी लोका किन्हें जुड़ी जाएं, ताकि तुस्से पवित्र आत्मा री सामर्था रे ज्रीए परमेसरा रे रैहणे रा घर बणी सको। |
This work is licensed under Creative Commons Attribution-ShareAlike 4.0 License.