इफिसियो 1 - मंडयाली नंऊँआं नियम

नमस्कार

¹ हांऊँ पौलुस, एस्सा चिठ्ठी जो लिखी करहा। होर हांऊँ परमेसरा री इच्छा ले यीसू मसीह रा चुणिरा चेला हूंणे रे कठे चुणिरा। हांऊँ ये चिठ्ठी इफिसुस सैहरा मन्झ रैहणे वाले तुस्से, जो परमेसरा रे पवित्र लोका ऐं, तुस्सा रे कठे लिखी करहा।

² हांऊँ प्रार्थना करहा कि आस्सा रा बापू परमेसर होर प्रभु यीसू मसीह तुस्सा जो अनुग्रह होर सांति देंदा रहे।

मसीह रे ज्रीए आत्मिक आसीसे

³ आस्सा रे प्रभु यीसू मसीह रा बापू, होर परमेसरा री बड़ाई हो। परमेसरे आस्सो स्वर्गा ले हर तरहा री आत्मिक आसीसा दितिरी, क्यूंकि आस्से मसीह साउगी एक ऐं।

⁴ संसारा जो रचणे ले पैहले ई, परमेसरे आस्सा जो आपणे लोक हूंणे रे कठे चुणी लितेया क्यूंकि आस्से मसीह साउगी एक ऐं, ताकि आस्से तेसरी नजरा मन्झ पवित्र होर बेकसूर बणी सके।

⁵ क्यूंकि परमेसर आस्सा किन्हें प्यार करहा, इधी कठे तिन्हें बौह्त पैहले ले ये फैसला करी दितिरा था कि, यीसू मसीहे जो काम कितेया तेसरे ज्रीए तेस आस्से आपणे बच्चे बनाणे। परमेसरे ये आपणी इच्छा ले होर खरे मकसदा साउगी कितेया।

⁶ ताकि आस्से परमेसरा रे नौखे अनुग्रह रे कठे तेसरी बड़ाई करहे, जो तिन्हें आस्सा जो मुफ्ता मन्झ देई दितेया, क्यूंकि आस्से तेसरे मह्ठे साउगी एक ऐं, जेस किन्हें से बौह्त प्यार करहा।

^7-8 यीसू रे मरणे रे ज्रीए परमेसरे आस्सा जो छुटकारा दितेया, यानि आस्सा रे पाप माफ करी दिते। परमेसरे आस्सो बौह्त ज्यादा अनुग्रह दितिरा, जो कितना महान आ। परमेसरे आपणे बौह्त ज्यादा ज्ञान होर समझ रे मताबक

⁹ सेई कितेया, जेसरी तिन्हें योजना बणाईरी थी। तिन्हें आस्सा पर आपणी ल्कोईरी योजना जाहिर किती, जो तिन्हें पैहले ले ही मसीह रे ज्रीए पूरी करणे रा फैसला लितिरा था।

¹⁰ परमेसरा री ये योजना थी कि ठीक टैम आऊणें पर स्वर्गा होर धरती मन्झ जो भी कुछ आ, से सब कुछ मसीह रे हका मन्झ करी दे।

¹¹ मसीह साउगी एक करी किन्हें, परमेसरे आस्सा यहूदी लोका जो भी आपणे लोक हूंणे रे कठे चुणी लितेया, क्यूंकि सुर्हू ले तेसरी ये ही योजना थी। से सब कुछ आपणी इच्छा ले होर खरे मकसदा रे कठे करहा।

¹² परमेसरे एह्ड़ा इधी कठे कितेया ताकि आस्से यहूदी लोक जिन्हें जे सभी ले पैहले मसीह पर आस रखिरी थी, आस्से परमेसरा री महिमा होर बड़ाई करहे।

¹³ होर तुस्सा साउगी भी एह्ड़ा हुईरा। तुस्से सच्ची खबर सुणी जो एस गल्ला री खुसी री खबर ई कि परमेसर किहाँ तुस्सा रा उद्धार करहा। होर जेबे तुस्से यीसू मसीह पर विस्वास कितेया ता परमेसरे तुस्सा जो से पवित्र आत्मा दिती, जेता रा देणे रा वादा तिन्हें आपणे लोका किन्हें कितिरा था। होर ये पवित्र आत्मा एस गल्ला री छाप ई कि तुस्से परमेसरा रे।

¹⁴ पवित्र आत्मा एस गल्ला रा साई कि परमेसरा आस्सा जो विरासत देणी, जेसरा देणे रा वादा तिन्हें आस्सा किन्हें कितिरा। ये तेबे हूंणा जेबे परमेसरे आस्सा जो, जो तेसरे आपणे लोक ऐं, पूरी तरहा ले छुटकारा देंगा। एता री वजहा ले लोका तेसरी महिमा होर बड़ाई करणी।

पौलुसा री प्रार्थना होर धन्यावाद देणा

¹⁵ परमेसरे जो कुछ कितिरा तेता री वजहा ले, जेबे मैं ये सुणेया कि तुस्से मसीह यीसू पर विस्वासा करहे, होर तुस्से सभ परमेसरा रे पवित्र लोका किन्हें प्यार करहे,

¹⁶ ता मैं हमेसा तुस्सा रे कठे परमेसरा रा धन्यावाद करहा, होर आपणी प्रार्थना मन्झ तुस्सा जो याद करदा रैंहयां।

¹⁷ हांऊँ प्रार्थना करहा कि परमेसर, आस्सा रे प्रभु यीसू मसीह रा महिमामय बापू, तुस्सा पर जो आत्मिक ज्ञान होर समझ दे, ताकि तुस्से पूरी तरहा ये जाणी लो परमेसर कुणहां।

¹⁸ हांऊँ ये भी प्रार्थना करहा कि परमेसर तुस्सा रे मना जो खोली दे, ताकि तुस्से इन्हा सच्चाई जो जाणी सको कि परमेसरे तुस्सा जो जेह्ड़ी आसा दितिरी से क्या ई, जेबे तिन्हें तुस्से सादिरे थे; होर से महान होर महिमामय आसीसे क्या ई जो परमेसरे आपणे पवित्र लोका जो देणे रा वादा कितिरा।

¹⁹ हांऊँ चाहां कि तुस्से ये जाणी लो, आस्से जो मसीह पर विस्वास करहे आस्सा लोका रे कठे परमेसरा री सामर्थ महान होर नौखी ई। ये सेई सामर्थ ई,

²⁰ जेसरे ज्रीए परमेसरे मसीह जो मरिरे मन्झा ले भी जिउंदा कितेया, होर स्वर्गा मन्झ आपणी सीधी जगहा वखा जो यानि इज्जत देणे वाली जगहा मन्झ बठाया।

²¹ होर तेथी मसीह सब हक, होर हक, होर सामर्थ, होर प्रभुता रे गास राज करहा। एस लोका मन्झ, होर आऊणें वाले लोका मन्झ, तेसरा नांऊँ सभी ले गास आ।

²² होर परमेसरे सभ कुछ मसीह रे पैरा हेठ करी दितेया, होर हर चीजा रा अगुवा बणाई किन्हें तेस जो कलीसिया रे भलाई रे कठे देई दितेया।

²³ ये कलीसिया मसीह रा सरीर आ, होर मसीह तेस जो परिपूर्ण करहा, जो हर जगहा आपणी उपस्थिति रे ज्रीए हर चीजा जो पूरा करहा ई।