कुलुस्सियो 4 - मंडयाली नंऊँआं नियम

मसीह रा अनुग्रह

¹ हे संसारा रे माल्को, आपणे-आपणे गुलामा साउगी न्याय होर एक बराबर व्यवहार करा, क्यूंकि तुस्से जाणांहे कि स्वर्गा मन्झ तुस्सा रा भी एक माल्क आ।

² लगातार प्रार्थना मन्झ लगे रहो, होर जेबे तुस्से प्रार्थना करहे ता चतन्न रहा, होर हमेसा परमेसरा रा धन्यावाद करदे रैहया।

³ होर एता साउगी-साउगी आस्सा रे कठे भी प्रार्थना करदे रैंहयां कि, परमेसर आस्सा रे कठे बचन सुनाणे रा एह्ड़ा मौका दे कि, आस्से मसीह रे तेस भेदा रा ब्खान करी सके होर एस खबर जो सुनाणे री वजहा ले ऐबे भी हांऊँ जेल्हा मन्झ आ।

⁴ होर ये प्रार्थना करहा कि मसीह रे भेदा री गल्ला जो साफ-साफ प्रचार करी सकूं।

⁵ हर एक मौके रा खरा फायदा लेई किन्हें प्रभु यीसू पर विस्वास ना करणे वाले साउगी बड़ी समझदारी किन्हें व्यवहार करहा।

⁶ तुस्सा रा बोल-चाल हमेसा दया किन्हें हो, ताकि दूजे तुस्सा री गल्ला जो बड़ी इच्छा किन्हें सुणी सके वाल़ा हो। ताकि तुस्सा जो हर एक माह्णुं जो तुस्सा रे विस्वासा री गल्ला पर ठीक ढंगा किन्हें जवाब देणा आई जाए।

आखरी नमस्कार

⁷ तुखिकुस आस्सा रा लाडला विस्वासी भाई आ, जो आस्सा साउगी प्रभु री सेऊआ करणे मन्झ सच्चा आ, तेस मेरे बारे मन्झ तुस्सा सभ गल्ला दसणी।

⁸ हांऊँ एस चिठ्ठी साउगी तुखिकुस तुस्सा वाले भेजी करहा कि, तुस्सा जो पता चली जाए कि आस्सा रा क्या हाल ऐं, ताकि से तुस्सा जो विस्वासा मन्झ मजबूत करी सके।

⁹ होर हांऊँ तेस साउगी सच्चे होर लाडले विस्वासी भाई उनेसिमुस जो भी भेज्दा लगिरा। जो तुस्सा रे गांऊँआं ले आ, तिन्हा तुस्सा जो एथी री सारी गल्ला दसी देणी।

¹⁰ अरिस्तर्खुस जो मेरे साउगी जेल्हा मन्झ कैदी आ, होर यहून्ना मरकुस जो बरनबासा रा रिस्तेदार आ, तिन्हारा तुस्सा जो नमस्कार। होर हांऊँ जाणहां कि मरकुसा रे बारे मन्झ तुस्सा जो पैहले दसी दितिरा कि, जेबे से तुस्सा वाले आये, ता तेस किन्हें ठीक ढंगा रा व्यवहार करेया।

¹¹ होर यीसू जेस जो युस्तुस नांऊँआ ले भी जाणहां ऐं, तेसरा भी तुस्सा जो नमस्कार। यहूदी विस्वासी लोका मन्झा ले सिर्फ ये तीन ई ऐं जो परमेसरा रे राजा रे कठे मेरे साउगी काम करेया करहा ऐं होर इन्हें मुंजो बौह्त तस्सली दितिरी।

¹² इपफ्रासा रा भी तुस्सा जो नमस्कार, से भी तुस्सा रे गांऊँआं ले आ। से मसीह यीसू रा सेऊआदार आ, होर हमेसा तुस्सा रे कठे दिला किन्हें प्रार्थना करहा, ताकि परमेसर तुस्सा जो मजबूत होर सिद्ध बणाए, होर एस गल्ला रा पूरा भरोसा दे कि तुस्से पुरे मना ले परमेसरा री इच्छा पर चले।

¹³ हांऊँ आपु इपफ्रासा रा गुआह आ कि, तिन्हें किहाँ तुस्सा सभी रे कठे होर लौदिकिया होर हियरापोलिसा सैहरा रे रैहणे वाले लोका रे कठे हमेसा कड़ी मैहनत करदा रैंहयां।

¹⁴ आस्सा रा लाडला भाई लूका जो एक बैद आ, होर देमासा रा तुस्सा जो नमस्कार।

¹⁵ लौदिकिया सैहरा रे भाईया होर बैहणा जो होर नुमफास होर तेस्सा री घरा री कलीसिया रे लोका जो नमस्कार।

¹⁶ होर जेबे ये चिठ्ठी तुस्सा रे साम्हणें पढ़ी जाए, ता एस गल्ला रा ख्याल रखणा कि से चिठ्ठी लौदिकिया सैहरा री कलीसिया मन्झ भी पढ़ी जाए, होर लौदिकिया ले जो चिठ्ठी तुस्सा जो मिले, तेता जो तुस्से भी पढ़ी लया।

¹⁷ फेरी अरखिप्पुसा किन्हें बोल्या कि, “जो सेऊआ प्रभु मन्झ तुजो दितिरी, पक्का करी ले कि तुस्से से सेऊआ पूरी करी लिती।”

¹⁸ हांऊँ पौलुस चिठ्ठी रे एस हिस्से जो आपणे हाथा ले लिख्या करहा ताकि हांऊँ तुस्सा जो नमस्कार बोली सकूं, ये याद रखणा कि हांऊँ जेल्हा मन्झ आ। होर प्रार्थना करहा कि परमेसर तुस्सा जो अनुग्रह देंदा रहे। आमीन।