कुलुस्सियो 3 - मंडयाली नंऊँआं नियमपवित्र जिन्दगी जीणे री बिधिया 1 एह्ड़ा लगा कि जेबे परमेसरे मरिरे मन्झा ले भी जिउंदा कितेया ता तेस तुस्सा जो भी जिउंदे करणे, इधी कठे तिन्हा गल्ला जो पाणे री इच्छा रखा जो परमेसरे तुस्सा रे कठे स्वर्गा मन्झ रखिरी। जेथी मसीह परमेसरा रे सीधी तरफ बैठी किन्हें राज करहा। 2 आपणा मन धरती री चीजा पर नी पर हमेसा स्वर्गा री चीजा पर ल्गाऊआ। 3 ये एह्ड़ा कि जेबे मसीह तुस्सा रे कठे मरेया ता तुस्से, भी तेस साउगी मरी गये, होर ऐबे अगे जो तुस्से मसीह साउगी परमेसरा री मौजूदगी मन्झ आत्मिक जिन्दगी जिहां ऐं, होर दूजे लोक इन्हा गल्ला जो नी देखी सकदे। 4 मसीह री वजहा ले ही तुस्सा जो ये नौंईं जिन्दगी मिलिरी, होर जेबे तेस वापस एस संसारा मन्झ आऊंणा, तेबे तुस्से भी आई किन्हें तेसरी महिमा मन्झ साझी बणी जाणा। 5 इधी कठे आपणे पाप रे स्वभाव ले जुड़ीरे बुरे कामा जो करणा छाडी देआ, जिहां कि व्यभिचार, असुद्धता, बुरी कामना, होर बुरी इच्छा। होर तुस्से केसी भी गल्ला रा लालच नी करहा क्यूंकि ये मूर्ति री पूजा करणे रे बराबर आ। 6 क्यूंकि लोक इन्हा बुरे कामा जो करहे इधी कठे परमेसरा तिन्हो जरुर बड़ी सजा देणी। 7 होर मसीह पर विस्वास करणे ले पैहले तुस्सा रा स्वभाव भी सच्चे तेह्ड़ा ही था। 8 पर ऐबे तुस्से इन्हा सभ गल्ला जो यानि गुस्सा, रोष, बैर-भाव, बदनामी होर गालिया देणा छाडी देऊआ। 9 जेब्की तुस्से आपणे पुराणे पापा रे स्वभाव होर सारे बुरे कामा जो करणा छाडी दितिरा, इधी कठे एक दूजे किन्हें झूठ मत बोल्हा। 10 होर ऐबे तुस्सा जो नंऊँआं स्वभाव मिली गईरा, होर ये नंऊँआं स्वभाव ज्यादा ले ज्यादा तेसरे रचणे वाले रे साहीं बणना, जेस वजहा ले तुस्से तेस जो होर भी ज्यादा समझी सके। 11 होर एस वजहा ले गैर-यहूदी, होर यहूदी लोका मन्झ कोई फर्क नी, तिहां ही खतना वाले होर बगैर खतना वाले मन्झ कोई फर्क नी आ, होर ना बिदेसी होर असभ्य लोका मन्झ फर्क आ, होर ना गुलाम होर अजाद लोका मन्झ कोई फर्क आ। पर मसीह ही सभ कुछ आ, होर आपणे सभ लोका मन्झ वास करहा। मसीही जिन्दगी 12 क्यूंकि परमेसरा तुस्सा किन्हें प्यार करहा, होर तिन्हें तुस्से चुणिरे लितिरे कि, तुस्से तेसरे पवित्र जण बणो, इधी कठे तुस्सा मन्झ करुणा, दया, दीनता, नम्रता होर सबरा स्वभाव हो। 13 होर अगर केसी जो केसी रे कठे सिकायत करणे री कोई वजहा हो, ता एक दूजे री सही लो, होर एक दूजे रे गलतिया जो माफ करा; जिहां प्रभुए तुस्सा रे पाप माफ कितिरे, तिहां ई तुस्से भी एक दूजे जो माफ करा। 14 इन्हा सभी गल्ला ले बढ़ी किन्हें एक दूजे किन्हें प्यार करहा। एह्ड़ा करणे ले तुस्सा एक दूजे किन्हें एकता मन्झ जुड़ी रेहणा। 15 होर मसीह जो सांति देआ से तुस्सा रे दिला मन्झ राज करहे, क्यूंकि तुस्से सभ एक ही सरीर रे अंग ऐं, होर इधी कठे तुस्से सादीरे कि एक दूजे किन्हें मिली जुली किन्हें रहो। होर हमेसा परमेसरा रा धन्यावाद करदे रहूआ। 16 मसीह रा बचन तुस्सा रे दिला मन्झ ज्यादा ले ज्यादा बसी जाये, होर तुस्सा जो ज्ञान दे। एस बचना रे ज्रीए एक दूजे जो सखाऊआ होर चेतावनी देआ। आपणे-आपणे मना मन्झ धन्यावादा साउगी परमेसरा रे कठे भजन होर बड़ाई गान होर आत्मिक गीत गाऊआ। 17 होर जो कुछ तुस्से बोले होर करहे से सभ प्रभु यीसू रे नांऊँआं ले करहा; होर प्रभु यीसू रे ज्रीए बापू परमेसरा रा धन्यावाद करा। मसीही परिवारा रे कठे बिधिया 18 हे लाड़ीयो, तुस्से आपणे-आपणे लाड़े रे अधीन रैहया, क्यूंकि एह्ड़ा करणा ही प्रभु रे लोका जो खरा लघ्हा। 19 हे लाड़ेयो, आपणी-आपणी लाड़ी किन्हें प्यार रखा, होर तिन्हा किन्हें सख्ती ना करा। 20 हे बच्चेयो, आपणे-आपणे माऊ बापू री सभ गल्ला जो मना, क्यूंकि प्रभु एस्सा गल्ला ले खुस हुंहाँ। 21 हे माऊ-बापू, आपणे बाल बच्चेया जो गुस्सा मत दिलाऊआ, एह्ड़ा नी हो कि स्यों दुखी हुई किन्हें आपणी हिम्मत हारी ले। 22 हे गुलामो, माह्णुंआं जो खुस करणे वाल़ेया साहीं सिर्फ दिखावटी रूपा ले नी, बल्की प्रभु रा डर मन्नदे हुए, ईमानदारी किन्हें आपणे संसारा रे माल्का री सभ गल्ला जो मना। 23 होर जो कुछ तुस्से करहा ऐं, पुरे मना ले करहा, ये समझी किन्हें कि माह्णुंआं रे कठे नी, पर प्रभु रे कठे करहा ऐं। 24 क्यूंकि तुस्से जाणहां ऐं कि जो आसीस प्रभुए आपणे सभ लोका रे कठे रखिरी तेस मन्झ ले तुस्सा री जो विरासत ई से तुस्सा जो देणी; क्यूंकि तुस्से प्रभु मसीह री सेऊआ करहा ऐं, जो तुस्सा रा माल्क आ। 25 पर जो बुराई रा काम करदा ही रैहया, परमेसरा तेस जो सजा देणी, होर परमेसर केसी रा भेदभाव नी करदा। |
This work is licensed under Creative Commons Attribution-ShareAlike 4.0 License.