चुणिरे चेले रे काम 28 - मंडयाली नंऊँआं नियम

माल्टा नांऊँआं रे टापू पर पौलुसा रा स्वागत

¹ जेबे आस्से सभ जण सही सलामत किनारे पर पूजी गये, तेबे आस्सो पता चल्या कि एस टापू रा नाऊँ माल्टा आ।

² होर तेस टापू मन्झ रैहणे वाले लोके आस्सा री बढ़िया देखभाल किती; क्यूंकि ठंडी रे ध्याड़े थे होर वरखा भी हुएया करहा ई थी, इधी कठे तिन्हें आग भ्खाई किन्हें आस्सा सभीरा स्वागत कितेया।

³ जेबे पौलुसे लकड़ी रा भारा कट्ठा करी किन्हें आगा पर रख्या, ता एक जैहर्ले कीड़ा सेक लगणे री वजहा ले बाहर निकल्या होर पौलुसा रे हाथा किन्हें लिप्टी गया।

⁴ जेबे तेथी रे रैहणे वाले लोके तेस कीड़े जो तेसरे हाथा मन्झ लिप्टी रे देख्या, होर सोचेया कि तिन्हें कीड़े से डसी लईरा, ता स्यों आपु मन्झ बोल्दे लगे, “पक्का ई ये आदमी एक हत्यारा आ, अगर ये समुद्रा ले बची किन्हें सही सलामत निकली गया, पर आस्सा यूनान देसा रे लोका री न्याय-माता तेस जो जिउंदा रैहणा नी दितेया।”

⁵ तेबे पौलुसे कीड़े जो आगा मन्झ सटी दितेया, होर तेस जो कुछ नुक्सान नी हुएया।

⁶ पर स्यों लोक न्हयालया करहा ऐं थे कि, या ता तेसरा सरीर सूजी जाणा या ता अचानक धरती पर पई किन्हें मरी जाणा; पर बौह्त देरा तक न्हयाल्दे रैहे होर ये देखी किन्हें कि तेसरा कुछ नी बिगड़ेया, ता तिन्हें आपणी सोच बदली दिती, होर बोल्दे लगे कि, “ये ता कोई देऊआ।”

⁷ तेस जग्हा रे नेडे ई तेस टापू रे प्रधान अधिकारी पुबलियुसा री जमीन थी, तिन्हें आस्सा जो आपणे घरा लई जाई किन्हें तीन ध्याड़े तक आस्सा रे आदर-खातर कितेया।

⁸ होर पुबलियुसा रा बापू बिस्तरे मन्झ बीमार था, तेस जो बुखार होर दस्त लगिरे थे; पौलुस तेस किन्हें मिलणे रे कठे कमरे मन्झ गया, फेरी तिन्हें तेस पर हाथ रखी किन्हें प्रार्थना किती होर से ठीक हुई गया।

⁹ एस घटना ले बाद टापू रे बाकि सभी मरीज भी तेथी पौलुसा वाले आये होर ठीक हुई गये।

¹⁰ होर तिन्हें आस्सा रा कई तरीके किन्हें आदर-खातर कितेया। जेबे तीन महीने बाद आस्से तेथी ले जांदे लगे ता तिन्हें आस्सा री सारी चीजा जहाजा पर लादी दिती।

माल्टा टापू ले रोम सैहरा वखा जो

¹¹ तीन म्हीने ले बाद आस्से सिकंदरिया सैहरा जो जाणे वाले एक जहाजा पर रवाना हुए। ये जहाज ठंडा री वजहा ले टापू पर रुकिरा था; एस जहाज रे साम्हणें एक जुड़वे देऊआ रा नसाण था, जेस जो यूनानी भासा मन्झ दियुसकूरी बोल्हां ऐं थे।

¹² सुरकुसा सैहरा मन्झ लंगर पाई किन्हें आस्से होर तीन ध्याड़े तक रुकी गये।

¹³ तेथी ले आगे चली किन्हें आस्से रेगियुम सैहरा मन्झ आये; होर एक ध्याड़े ले बाद दक्षिणी बागर चली; फेरी आस्से दूजे ध्याड़े पुतियुली सैहरा मन्झ आये।

¹⁴ तेथी आस्सा जो कुछ विस्वासी मिले, होर तिन्हारे बोलणे ले आस्से तिन्हारे घरा सात ध्याड़े तक रैहे; होर आस्से रोम सैहरा वखा जो पैंडे रे रस्ते जो निकली गये।

¹⁵ होर जेबे रोम सैहरा रे विस्वासी लोके आस्सा रे बारे मन्झ सुणेया, ता अप्पियुसा बजारा रे गांऊँ होर तीन-सराय गांऊँ तक स्यों आस्सा जो रोम सैहरा मन्झ लेई जाणे रे कठे आये। जिन्हा जो देखी किन्हें पौलुस बौह्त प्रोत्साहित हुआ होर परमेसरा रा धन्यावाद कितेया।

¹⁶ जेबे आस्से रोम सैहरा मन्झ पूजे, ता पौलुसा जो एकी स्पाही साउगी जो तेसरी देखभाल करहा था; कल्हे रैहणे रा हुक्म हुआ।

रोम देसा मन्झ पौलुस

¹⁷ तीन ध्याड़े ले बाद पौलुसे खास यहूदी अगुवे री सभा सादी, होर जेबे स्यों कठे हुई गये ता तिन्हा किन्हें बोल्या, “हे भाईयो, मैं आपणे लोका रे या बापदादे रे व्यवहारा रे बरखलाफ कुछ नी कितेया, तेबे बी कैदी हुई किन्हें यरुस्लेम सैहरा ले रोम देसा रे सरकारा रे हाथा सौम्पेया गया।

¹⁸ तिन्हें मेरी जांच पड़ताल करी किन्हें हांऊँ छाडी दितेया, क्यूंकि मौता री सजा रे लायक मेरे मन्झ कोई दोस नी था।

¹⁹ पर जेबे यहूदी अगुवे एसरे व्रोध कितेया, ता महाराजे ले अर्ज किती से मेरा न्याय करहे; पर इधी कठे नी कि हांऊँ आपणे ई लोका पर कोई इल्जाम ल्गाणा चाहां था।

²⁰ इधी कठे मैं तेरे ले ये अर्ज किती कि तू मेरे वाले एथी आई जा ताकि हांऊँ तुस्सा जो ये दसी सकूं, हांऊँ कैदा मन्झ इधी कठे आ कि जो इस्राएल देसा रे लोक परमेसरा ले आस करहा ऐं जो की मसीहा रे कठे ई, हांऊँ तेस उम्मीदा पर विस्वास करहा।”

²¹ यहूदी अगुवे तेस किन्हें बोल्या, “ना आस्से तेरे बारे मन्झ यहूदिया ईलाके रे लोका ले कोई चिठिया पाई, होर ना आस्सा रे भाईया मन्झा ले केसिए आई किन्हें तेरे बारे मन्झ कुछ दसेया, होर ना बुरा बोल्या।

²² पर तेरा विचार क्या आ? सेई आस्से तुध ले सुणना चाहें, क्यूंकि आस्से जाणहां ऐं कि, हर जगहा एस मता रे व्रोधा मन्झ लोक गल्ला करहा ऐं।”

²³ तिन्हें यहूदी लोके जो पौलुसा साउगी थे, तेसरे कठे एक ध्याड़ा नियुक्त कितेया। होर तेस ध्याड़े बौह्त लोक बड़ी संख्या मन्झ आई किन्हें कठे हुए। मूसा री व्यवस्था होर नबिया री कताबा ले यीसू रे बारे मन्झ तिन्हा जो समझाणे रा जतन करदे हुए तिन्हें परमेसरा रे राजा रे बारे मन्झ आपणी गुआही दिती होर समझाया; से भ्यागा ले साह्न्जा तक ये करणे मन्झ ई लगे रहे।

²⁴ तिन्हें जो कुछ बोलिरा था, कुछ लोके विस्वास कितेया, पर कुछ लोके विस्वास नी कितेया।

²⁵ फेरी जेबे स्यों एक दूजे किन्हें सहमत नी हुए, ता पौलुसा री एस एकी गल्ला रे बोलणे ले स्यों चली गये कि, “पवित्र आत्मे यसायाह नबी रे ज्रीए तुस्सा रे बापदादे किन्हें ठीक ई बोलिरा,

²⁶ ‘जाई किन्हें इन्हा लोका किन्हें बोल कि, तिन्हा सुणदे ता रैंह्णां, पर नी समझ्दे, होर तिन्हा देख्दे ता रैंह्णां, पर नी जाणदे।

²⁷ क्यूंकि इन्हा लोका रा मन मोटा, होर तिन्हारे कान भारी हुई गईरे। होर तिन्हें आपणी हाखिया बंद करी दितिरी, एह्ड़ा नी हो कि स्यों कधी हाखिया ले देखे, होर काना ले सुणे, होर मना ले समझे होर वापस आये, होर हांऊँ तिन्हा जो ठीक करूं।’”

²⁸ “इधी कठे तुस्से जाणी लो कि परमेसरा रा ये उद्धार ऐबे अन्यजाति लोका वाले भेजी गईरा, होर तिन्हा ऐं जरुर मनणा।”

²⁹ जेबे तिन्हें ये बोल्या ता यहूदी लोक आपु मन्झ चर्चा करदे लगे होर तेथी ले चली गये।

³⁰ होर से दो साल तक आपणे भाड़े रे घरा मन्झ रैंहयां।

³¹ होर जो तेस वाले आहूँआं ऐं, तिन्हा सभी किन्हें मिलदा रैंहयां, होर बगैर रोके-टोके न्डरे हुई किन्हें परमेसरा रे राजा रा प्रचार करदा होर प्रभु यीसू मसीह री गल्ला सिखांदा रैंहयां।