चुणिरे चेले रे काम 27 - मंडयाली नंऊँआं नियम

पौलुसा री रोम सैहरा वखा जो यात्रा: क्रेते टापू तक

¹ जेबे फेस्तुसा हाकमे ये गल पक्की किती कि, आस्से जहाजा पर इतालिया देसा रे रोम सैहरा मन्झ जाए, ता तिन्हें पौलुस होर दूजे कैदिया जो भी यूलियुस नांऊँआं रे औगुस्तुसा सम्राट री पलटना रे एकी सूबेदारा रे हाथा मन्झ सौंपी दितेया।

² होर अद्रमुत्तियुमा बंदरगाह सैहरा रे एकी जहाजा पर जो आसिया रे ईलाके रे बाढे री जगहा ले हुई किन्हें जाणे वाल़ा था, तेस पर चढ़ी किन्हें आस्से समुद्री सफर सुर्हू कितेया; होर अरिस्तर्खुस नांऊँआं रा एक आदमी जो मकीदुनिया ईलाके रा थिस्सलुनिके सैहरा रा रैहणे वाल़ा आस्सा साउगी था।

³ दूजे ध्याड़े आस्से सैदा रे सैहरा मन्झ पूजे होर यूलियुसे अनुग्रह करी किन्हें पौलुसा जो तेसरे दोस्ता वाले जाणे दितेया कि से तेसरी जरूरी चीज़ा लेई आये।

⁴ तेथी ले आस्से दबारा सफर सुर्हू करी किन्हें साईप्रस टापू री किनारे मन्झ हुई किन्हें चले, क्यूंकि बागर आस्सा रे विरुद्ध चल्या करहा ई थी।

⁵ फेरी आस्से किलकिया ईलाके होर पंफुलिया जिल्ले रे बाढे ले सागर जो पार करदे हुए लुसिया ईलाके मन्झ मूरा सैहरा पूजे।

⁶ तेथी सूबेदारा जो सिकंदरिया सैहरा रा एक जहाज इतालिया देसा मन्झ जांदे हुए मिल्या, होर तिन्हें आस्सा जो तेस जहाजा पर चढ़ाई दितेया।

⁷ होर जेबे आस्से बौह्त ध्याड़े तक मजे-मजे चली किन्हें बड़ी मुस्किला किन्हें कनिदुसा गांऊँआं रे साम्हणें पौहुंचे, ता इधी कठे कि बागर आस्सा जो अगे नी जाणे देआ करहा ई थी; सलमोने रे साम्हणें ले हुई किन्हें क्रेते टापू रे बाढे-बाढे हुई किन्हें चले।

⁸ होर क्रेते टापू रे बाढे-बाढे बौह्त मुस्कल्आ किन्हें जहाज अगे बढ़ेया, होर सुभ-खुंडेबारी नांऊँआं रे बन्दरगाह मन्झ पूजे, जेथी ले लस्या सैहर नेडे था।

पौलुसा री सलाह जो नी मनणा

⁹ जेबे बौह्त ध्याड़े बीती गये, होर जहाजा जो अगे बढ़ाणा भी खतरे रा काम था; क्यूंकि प्रायस्चिता रे ध्याड़े रे साजा खत्म हुई गईरा था, होर ऐबे एह्ड़ा मौसम सुर्हू हुंदा लगिरा था जेबे सागर रुखा होर तूफानी बणी जा था, इधी कठे पौलुसे खबरदार करदे हुए तिन्हा किन्हें बोल्या,

¹⁰ “हे भाईयो, आस्सा जो लग्हा कि आस्सा रा ये समुद्री सफर नुकसानदायक हूंणां, ना सिर्फ समाना री होर जहाजा री बल्कि आस्सा रे प्राणा रा भी नुक्सान हूंणे वाल़ा आ।”

¹¹ पर पौलुसे जो बोल्या था, तेता पर ध्यान देणे रे बजाय तिन्हें सुबेदारे माझी होर जहाजा रे माल्का री गल्ला रा विस्वास कितेया।

¹² होर ये सुभ खुंडेबारी बंदरगाहा मन्झ ठंडी रे ध्याड़े काटणे रे कठे मुस्किल थे, इधी कठे तिन्हें सभीए विचार कितेया कि, तेथी ले आगे बढ़ी किन्हें जहाजा ले हुई किन्हें किहाँ नी किहाँ फिनिक्स बन्दरगाह मन्झ पूजी किन्हें सर्दी काटे; ये ता फिनिक्स क्रेते टापू रे बाढे रा एक एह्ड़ा बंदरगाह आ, जेसरा दुराजा दक्षिण-पस्चिम होर उतर-पस्चिम दुंहीं रे साम्हणें आ।

समुद्रा मन्झ तूफान

¹³ जेबे दक्षिणी बागर मजे-मजे चलदी लगी ता तिन्हें सोचेया कि तिन्हा फिनिक्स बन्दरगाह मन्झ पूजी जाणा जेह्ड़ा तिन्हें पैहले सोचिरा था। इधी कठे तिन्हें खुंडे चकेया होर क्रेते टापू रे बाढे-बाढे जहाज लई किन्हें जांदे लगे।

¹⁴ पर थोह्ड़ी देरा मन्झ तेथी ले एक बडी आंधी उठी, जेस जो “यूरकुलीन” मतलब उतर-पूर्वी आंधी बोल्हा ऐं।

¹⁵ जेबे जहाज तूफाना मन्झ फसी गया होर तूफान रा साम्हणां नी करी सकेया ता इधी कठे आस्से तेस जहाजा जो बागर रे रुखा रे मताबक जाणे दितेया, होर आस्से भी तेस जहाजा साउगी बैह्न्दे हुए चली गये।

¹⁶ तेबे कौदा नांऊँआं रे एक छोटे टापू री बाढे मन्झ बैह्न्दे-बैह्न्दे आस्से बौह्त मुस्किला किन्हें जहाजा री बचाव करणे वाली किस्ती जो आस्से पकड़ी सके।

¹⁷ फेरी बचाव करणे वाली किस्तिया जो उठाणे ले बाद जहाजा मन्झ काम करणे वाले, जहाजा जो थाले ले लेई किन्हें उपरा तक रस्सी किन्हें बान्ही दितेया, होर सुरतिस खाड़ी री रेता पर फसणे रे डरा ले, खुंडे जो थोड़ा थाले तुआरी किन्हें, जहाजा जो बागरा रे रुखा रे मताबक छाडी दिता।

¹⁸ दूजे ध्याड़े जेबे आस्से तूफाना री वजहा ले धक्के लगदे लगे, ता स्यों जहाजा रा समान सटदे लगे।

¹⁹ होर त्रीजे ध्याड़े तिन्हें आपणे हाथा ले जहाजा रे भारी समान सटी दितेया।

²⁰ फेरी बौह्त ध्याड़े तक जेबे सूरज होर तारे नी सुज्हे होर बड़ी आंधी चल्या करहा ई थी, होर आस्सा जो बचणे री आस नी रही।

²¹ जेबे स्यों बगैर खाणे कई ध्याड़े काटी चुके, ता पौलुस तिन्हारे बीचा मन्झ खड़ा हुई किन्हें बोल्दा लग्या, “हे लोको, अगर तुस्से मेरी सलाह मनी हुन्दी होर क्रेते टापू ले रवाना नी हुंदे ता ठीक था, तेबे ना ता ये विपत्ति आऊणीं थी होर ना नुक्सान हूंणां था।

²² पर हांऊँ ऐबे भी तुस्सा किन्हें अर्ज करहा कि आपणी हिम्मत बणाई रखा, क्यूंकि तुस्सा मन्झा ले केसी रे प्राणा री हानि नी हूणीं, पर एस जहाजा नास हुई जाणा।

²³ क्यूंकि परमेसर जेसरा हांऊँ आ, होर जेसरी सेऊआ हांऊँ करहा, तेसरे स्वर्गदूते राती मेरे वाले आई किन्हें बोल्या

²⁴ ‘हे पौलुस, मत डर; तुजो महाराजे रे साम्हणें खड़े हूंणां जरूरी आ। होर परमेसरा आपणे अनुग्रहा ले सभ लोक बचाई लेणे जो तेरे साउगी सफर करेया करहा ऐं।’

²⁵ इधी कठे, हे भाईयो, हिम्मत रखा; क्यूंकि हांऊँ परमेसरा रा विस्वास करहा कि, जेह्ड़ा मेरे किन्हें बोलिरा, तेह्ड़ा ई हूंणां।

²⁶ पर केसी टापू पर आस्सा रा जहाज जरुर लगी जाणा।”

जहाजा रा टूटणा

²⁷ फेरी जेबे चौदहवीं रात हुई, होर आस्से अद्रिया सागरा मन्झ भटकेया करहा ऐं थे, ता आधी राती रे लगभग जहाजा रे काम करणे वाले जो लग्या कि आस्से केसी देसा रे नेडे ऐं।

²⁸ तिन्हें सागरा री गैहराई नापी ता पता चल्या कि तेथी सैंती मीटर गैहराई थी, थोह्ड़ी देरा बाद तिन्हें पाणी री गैहराई नापी होर पता चल्या कि हली भी गैहराई सताई मीटर रही गईरी।

²⁹ तेबे एस डरा ले कि जहाज केते पत्थरीली चटाना मन्झ नी फसी जाए, तिन्हें जहाजा रे पिछले हिस्से रे चार खुंडे गडे, होर प्रार्थना करदे लगे कि किहाँ नी किहाँ भ्याग हुई जाए।

³⁰ होर जेबे जहाजा पर काम करणे वाले जहाजा ले उतरी किन्हें भगणा चाहें थे, होर जहाज रे साम्हणें री वखा जो खुंडे पाणे रे भाने ले, स्यों बचाव करणे वाली किस्ती जो समुद्रा मन्झ तुआरी चुकिरे थे।

³¹ तेबे पौलुसे सूबेदारा होर स्पाहीया किन्हें बोल्या, “अगर ये जहाजा रे काम करणे वाले जहाजा पर नी रैहे ता तुस्सा भी नी बचणा।”

³² तेबे स्पाहिये रस्सी काटी किन्हें बचाव करणे वाली किस्तिया ड्याई दिती।

³³ भ्याग हूंणे ले थोह्ड़े पैहले पौलुसे सभी ले अर्ज किती कि, “स्यों खाणा खाई ले, क्यूंकि आज चौदा ध्याड़े हुई चुकिरे होर तुस्से लगातार चिंता री वजहा ले भूखे रैंहयां करहा ऐं, होर कुछ नी खाध्या।”

³⁴ “इधी कठे हांऊँ तुस्सा जो समझाया करहा; कि कुछ खाई लऊआ, जेस ले तुस्से बची सको; क्यूंकि तुस्सा रा कोई नुक्सान नी हूंणां।”

³⁵ होर ये बोली किन्हें तिन्हें रोटी लई होर सभी रे साम्हणें परमेसरा रा धन्यावाद कितेया; होर तोड़ी किन्हें खांदा लग्या।

³⁶ तेबे स्यों सभ भी हिम्मत करी किन्हें खाणा खांदे लगे।

³⁷ होर जहाजा पर आस्सा सभी जो मिलाई किन्हें दो सौ छेह्त्र लोक थे।

³⁸ जेबे स्यों खाणा खाई किन्हें रजी गये, ता कणका जो समुद्रा मन्झ सटी किन्हें जहाजा जो फाहूका करदे लगे।

³⁹ जेबे भ्याग हुई, ता स्यों तेस देसा जो नी पैह्चाणी सके, तिन्हा जो से जगहा एक खाड़ी देखी जेसरा किनारा चौरस था, होर तिन्हें ये फैसला कितेया कि, अगर हुई सके, ता एस जहाजा जो एस किनारे पर ई खड़ा करी दे।

⁴⁰ तेबे तिन्हें खुंडे जो खोल्ही किन्हें समुद्रा मन्झ छाडी दितेया, होर तेस ई टैम पाला री रस्सिया ढीली करी दिती, होर फेरी जहाजा रे अगले पाल चढ़ाई किन्हें किनारे बखा जो चली पये।

⁴¹ पर दो पाणी री धारा रे बीचा मन्झ पई किन्हें जहाज रेता मन्झ जाई फस्सेया होर तेसरा अगला हिस्सा एह्ड़ा धस्या होर टिकी गया; जेबे कि पिछला हिस्सा लैहरा री मारा किन्हें टूटदा लग्या।

⁴² तेबे स्पाहिये सलाह किती कि, कैदिया जो मारी दे; एह्ड़ा नी हो कि कोई भी कैदी तैरी किन्हें बची जाए।

⁴³ पर सूबेदार पौलुसा जो बचाणा चाहां था, इधी कठे तिन्हें तिन्हा जो बोल्या कि जो तैरी सक्हा ऐं, स्यों पैहले छलांग ल्गाई किन्हें बाढे पर निकली जाए।

⁴⁴ होर बाकि लोक तख्ते, होर जहाजा री दूजी चीजा या टुकड़े रे सहारे निकली जाए। इंहां सभ जण सही सलामत किनारे पर पूजी गये।