चुणिरे चेले रे काम 22 - मंडयाली नंऊँआं नियम

भीड़ा रे साम्हणें पौलुसा रा प्रचार

¹ पौलुसे बोल्या, “हे भाईयो होर बडे बजुर्गो! मेरे बचाऊआ मन्झ ऐबे हांऊँ कुछ बोलणा चाहां।”

² जेबे तिन्हें तिन्हा किन्हें इब्रानी भासा मन्झ बोल्या, ता स्यों होर ज्यादा सांत हुई गये; फेरी पौलुसे बोल्या,

³ “हांऊँ एक यहूदिया ईलाके रा माह्णुंआं किलकिया ईलाके रे तरसुस सैहरा मन्झ मेरा जन्म हुएया होर हांऊँ एस ई सैहरा मन्झ पली बढ़ी किन्हें बड़ा हुएया, एस सैहरा मन्झ गमलीएला रे पैरा वाले बैठी किन्हें मेरी पढ़ाई लिखाई हुई, होर बापदादे री मूसा री व्यवस्था ठीक तरीके किन्हें सखाई गई, होर परमेसरा रे कठे बौह्त जादा उत्साही था जेह्ड़े तुस्से भी आज उत्साही ऐं।

⁴ होर मैं मर्ध होर ज्नानिया बान्ही किन्हें, होर जेल्हा मन्झ पाई किन्हें, एस ‘प्रभु यीसू रे पैंडे’ जो एथी तक स्ताया कि, तिन्हा जो मरवाई भी दे।

⁵ एस गल्ला रे कठे बडे याजक होर सभ यहूदी मुखिये गुआह ऐं; कि तिन्हा मन्झा ले हांऊँ भाईया रे नांऊँआं पर चिठिया लई किन्हें दमिस्क सैहरा जो जाया करहा था कि, तेथी एस मता जो मन्नणे वाले जो भी हो तिन्हा जो बंदी बणाई किन्हें यरुस्लेम सैहरा मन्झ ल्याऊं ताकि तिन्हा जो सजा दिलवाई सकूं।”

आपणे दिला रे बदलने रा ब्यौरा

⁶ “फेरी जेबे हांऊँ लगभग दोपहरा रे टैमा दमिस्क सैहरा रे नेडे पुजेया, ता एह्ड़ा हुएया कि अचानक एक बड़ा प्रयासा आसमाना ले मेरे चारो तरफ चमक्या।

⁷ होर हांऊँ धरती पर पई गया; होर ये अवाज सुणी कि, ‘हे साऊल, हे साऊल, तू मुंजो किधियो स्ताया करहा?’ मैं जवाब दितेया कि, ‘हे प्रभु, तुस्से कुणहें?’

⁸ तिन्हें मेरे किन्हें बोल्या, ‘हांऊँ नासरता रा यीसू आ, जेस जो तू स्ताहां।’”

⁹ होर जो मेरे साउगी यात्रा करेया करहा ऐं थे तिन्हें चमकदार प्रयासा देख्या, पर जो मेरे किन्हें बोल्या करहा ऐं थे स्यों तेसरी अवाज सुणी पर समझी नी सके।

¹⁰ “तेबे मैं बोल्या, ‘हे प्रभु हांऊँ क्या करूं?’ प्रभुए मेरे किन्हें बोल्या, ‘उठी किन्हें दमिस्क सैहरा मन्झ चली जा, होर जो कुछ तेरे करणे रे कठे नियुक्त कितिरा, से सभ कुछ तुजो तेथी दसी दितेया जाणा।’”

¹¹ “क्यूंकि मुंजो तेस तेज प्रयासे मन्झ कुछ नी सुझ्दा लगीरा था, इधी कठे मेरे साथीये मेरा हाथ पकड़ी किन्हें हांऊँ चलाया होर हांऊँ एस तरहा दमिस्क सैहरा जाई पुज्हेया।

¹² दमिस्क सैहरा मन्झ हनन्याह नांऊँआं रा एक आदमी था, जो मूसा री व्यवस्था रा पालन करणे वाल़ा होर परमेसरा रा डर मनणे वाल़ा माह्णुं था। जो तेथी रे रैहणे वाले सभ यहूदी लोका मन्झ इज्जतदार था।

¹³ से मेरे वाले आया होर मेरे नेडे खड़े हुई किन्हें बोल्या, ‘भाई साऊल, दबारा देख्दा लगी जा,’ होर तेस ई टैम मेरी हाखिया ठीक खुली गई होर मैं से देख्या।”

¹⁴ “तेबे तिन्हें बोल्या, ‘आस्सा रे बापदादा रे परमेसरे तुजो इधी कठे चुणी लईरा कि तू तेसरी इच्छा जो जाणी सके, होर तेस मसीहा जो देखे जेहड़ा धर्मी जण आ, होर तेसरे मुंहा ले निक्लिरी गल्ला सुणे।

¹⁵ क्यूंकि तू तेसरी तरफा ले सभ माह्णुं रे साम्हणें तिन्हा गल्ला रा गुआह हूंणां, जो तैं देख्या होर सुणेया।

¹⁶ ऐबे किधियो देर करेया करहा? उठ, बपतिस्मा ले, होर तेसरा नांऊँ ले, की से तेरे पापा जो माफ करी दे।’”

गैर-यहूदी लोका मन्झ प्रचार

¹⁷ “जेबे हांऊँ दबारा यरुस्लेम सैहरा मन्झ आई किन्हें मन्दरा मन्झ प्रार्थना करेया करहा था, ता मै एक दर्सन देख्या।

¹⁸ होर मैं देख्या कि से मेरे किन्हें बोल्या करहा, ‘झटपट यरुस्लेम सैहरा ले बाहर चली जा क्यूंकि येथी रे लोका मेरे बारे मन्झ तेरी गुआही नी मन्नणी।’”

¹⁹ “मै जबाब दितेया की, ‘हे प्रभु हांऊँ नी जाणदा कि स्यों किधियो मेरे पर विस्वास नी करदे क्यूंकि स्यों आपु जाणहां ऐं कि हांऊँ तुध पर विस्वास करणे वाले जो बंदी बणाई किन्हें होर पिटदे हुए यहूदी सभा मन्झ लेई जा था।

²⁰ होर ता होर जेबे तेरे गुआह स्तिफनुसा रा खून बहाया जाया करहा था, तेबे हांऊँ भी तेथी खड़ीरा था, होर एस गल्ला मन्झ बराबर सैहमत था, होर तेसरी हत्या करणे वाले रे चोगे री रखवाली करेया करहा था।’

²¹ होर प्रभुए मेरे किन्हें बोल्या, ‘चली जा; क्यूंकि मां तू बौह्त सारी जातिया वाले दूर-दूर भेजणा।’”

पौलूस रोम देसा रा वासी

²² स्यों लोक एस गल्ला तक ता चुप रहे पर तेता ले बाद स्यों जोरा-जोरा किन्हें चिंगदे लगे, “एह्ड़े माह्णुंआं जो मारी देआ; एसरा जीउन्दा रैंहणां ठीक नी आ।”

²³ जेबे स्यों चिलांदे होर चोगे सटदे होर आसमाना मन्झ धूल डुआन्दे किन्हें आपणा गुस्सा जाहिर करदे लगिरे थे।

²⁴ ता पलटना रे सूबेदारे बोल्या कि, “एस जो स्पाहीया रे किले मन्झ लई जाऊआ; होर कोड़े मारी किन्हें जांच पड़ताल करहा कि, हांऊँ जाणी सकूं कि लोक केस वजहा ले एसरे व्रोधा मन्झ चिंगेया करहा ऐं।”

²⁵ पर जेबे स्यों तेस जो कोड़े लगाणे रे कठे बान्हेया करहा ऐं थे, तेबे तेथी खड़ीरे सूबेदारा किन्हें पौलुसे बोल्या, “केसी रोम देसा रे लोका जो, जेस मन्झ जे दोस नी हो, कोड़े ल्गाणा क्या तुस्सा रे कठे ठीक आ?”

²⁶ ये सुणी किन्हें सूबेदार पलटना रे मुखिया वाले जाई किन्हें बोल्या, “तू ये क्या करेया करहा; ये ता रोम देसा रे लोक आ।”

²⁷ तेबे पलटना रे मुखिये तेस वाले जाई किन्हें बोल्या, “मुंजो दस, क्या तू रोम देसा आ रा?” तिन्हें जवाब दितेया, “हां, हांऊँ रोम देसा रा लोक आ।”

²⁸ ये सुणी किन्हें पलटना रे मुखिये बोल्या कि, “मुंजो ता रोम देसा नागरिक हूंणे रे कठे बौह्त सारा खर्च करणा पया।” पौलुसे बोल्या, “पर हांऊँ ता जन्मजात रोम देसा रा नागरिक आ।”

²⁹ तेबे स्यों लोक जे तेस ले पूछ ताछ करेया करहा ऐं थे, झटपट पीछे हटी गये; होर से पलटना रा मुखिया भी ये समझी किन्हें बौह्त डरी गया कि से एक रोम देसा रा लोक आ, होर तिन्हें तेस जो बंदी बणाईरा।

माहसभा रे साम्हणें पौलुस

³⁰ क्यूंकि से सूबेदार एस गल्ला रा ठीक-ठीक पता ल्गाणा चाहां था कि, यहूदी अगुवे पौलुसा पर दोस किधियो ल्गाईरा। इधी कठे तिन्हें अगले ध्याड़े तेसरे बंधन खोल्ही दिते, होर मुख्य याजक होर सारी माहसभा जो कठे हूंणे रा हुक्म दितेया, होर पौलुसा जो लई जाई किन्हें तिन्हारे साम्हणें खड़ा करी दितेया।