चुणिरे चेले रे काम 20 - मंडयाली नंऊँआं नियम

मकीदुनिया, यूनान होर त्रोआस ईलाके मन्झ पौलुस

¹ जेबे दंगा थम्ही गया, ता पौलुसे विस्वासिया जो सादी किन्हें प्रोत्साहित कितेया, होर तिन्हा ले विदा हुई किन्हें मकीदुनिया ईलाके वखा जो चली गया।

² होर जेबे पौलुस तेथी पूजेया, ता तिन्हें हर गांऊँआं मन्झ जाई किन्हें विस्वासी प्रोत्साहित किते तेबे से यूनान रे ईलाके मन्झ आया, जेस जो अखाया रे नांऊँआ ले भी जाणा जा।

³ से तेथी तीन म्हीने तक रुकेया होर से जहाजा पर सीरिया ईलाके जो जाणे ही वाल़ा था पर तिन्हें ये जाणी किन्हें कि यहूदी अगुवे तेस जो जहाजा मन्झ ही मारणे री योजना बनाया करहा ऐं; इधी कठे तिन्हें फैसला कितेया कि से मकीदुनिया ईलाके ले हुई किन्हें सीरिया देसा जो जाणा।

⁴ बिरिया सैहरा रा पुर्रुसा रा मह्ठा सोपत्रुस होर थिस्सलुनिके सैहरा मन्झ ले अरिस्तर्खुस होर सिकुन्दुस होर दिरबे सैहरा रा गयुस, होर लुस्त्रा गांऊँआं रा तिमिथियुस, होर आसिया देसा रा तुखिकुस होर त्रुफिमुस आसिया देस तक आस्सा साउगी सफर मन्झ थे।

⁵ पर ये लोक ता आस्सा ले पैहले ई चली गये होर त्रोआस सैहरा मन्झ पूजी किन्हें आस्सा रा इंतजार करेया करहा ऐं थे।

⁶ आस्से दुहें पैंडे ले सफ़र करी किन्हें फिलिप्पी सैहरा मन्झ पूजे। स्जेड़े री रोटी रे साजे ले बाद आस्से फिलिप्पी सैहरा ले जहाजा पर चढ़ी किन्हें चली पये होर पांज ध्याड़े ले बाद त्रोआस सैहरा मन्झ बाकि किन्हें जाई मिले, होर सात ध्याड़े तक तेथी रैहे।

त्रोआस सैहरा मन्झ यूतुखुस जिउंदा हुई जाहाँ

⁷ हफ्ते रे पैहले ध्याड़े जेबे आस्से प्रभु भोजा मन्झ सामिल हूणे रे कठे, कठे हुए, ता पौलुस जो दूजे ध्याड़े जाणे वाल़ा था, ता तिन्हें तिन्हा किन्हें गलबात किती होर आधी रातिया तक गल्ला करदा रैंहयां।

⁸ उपरले कमरे मन्झ जेथी आस्से सभ कठे हुईरे थे, तेथी बौह्त सारे दिऊये भख्ही रे थे।

⁹ तेथी युतुखुस नांऊँआं रा एक जुआन ताकी प्रयाल्हे बैठीरा था; से भारी निन्द्रा मन्झ डुबिरा था। जेबे पौलुस बौह्त देरा तक लगातार बोल्दा रैंहयां, ता से जुआन निन्द्रा रे झुलारे किन्हें त्रीजी मंजला ले थाले पई गया, होर तिन्हें देख्या की से मरी गया।

¹⁰ पर पौलुसे थाले जाई किन्हें होर गले लगी किन्हें बोल्या, “डरा नी, क्यूंकि से हाल्ले भी जिउंदा आ।”

¹¹ होर दबारा गास जाई किन्हें रोटी तोड़ी होर सभिये मिली किन्हें खाधी, होर भ्याग हूंणे तक गल्ला करदा रैंहयां। तेबे पौलुस तिन्हा ले विदा हुई किन्हें चली गया।

¹² होर स्यों तेस जुआन मह्ठे जो जिउंदा घरा लई आये, होर तिन्हा जो बौह्त खुसी हुई।

त्रोआस ले मीलेतुस सैहरा तका रा सफर

¹³ आस्से पैहले जहाजा ले अस्सुसा सैहरा जो चली गये; होर तेथी ले पौलुस जो आपणे साउगी आगे लेई जाणा था। पौलुस तेथी पैदल ही पूजी गईरा था क्यूंकि तिन्हें एह्ड़ी ई योजना बणाईरी थी।

¹⁴ से जेबे पौलूस गांऊँआं अस्सुसा सैहरा मन्झ आस्सा किन्हें मिल्या ता आस्से से जहाजा मन्झ चढ़ाया होर आस्से मितुलेने सैहरा मन्झ आये।

¹⁵ होर तेथी ले जहाजा पर चढ़ी किन्हें आस्से दूजे ध्याड़े खियुसा टापू रे साम्हणें पूजे, होर अगले ध्याड़े सामुस टापू मन्झ आई गये, फेरी एक ध्याड़े ले बाद आस्से मीलेतुस सैहरा मन्झ पुज्हे।

¹⁶ मिलेतुस सैहरा इफिसुस सैहरा रे दक्षिण दिसा वखा जो था, पौलुसे पैहले ले ई सोची लईरा था कि तेस इफिसुसा सैहरा मन्झ नी उतरणा, क्यूंकि से आसिया रे ईलाके मन्झ ज्यादा ध्याड़े नी रैहणा चाहन्दा था, क्यूंकि से चाहां था कि से पिन्तेकुस्ता रे साजे रे टैमा तक यरुस्लेम सैहरा मन्झ पूजी जाए होर से साजे रा ध्याड़ा नेडे था।

इफिसुस सैहरा री कलीसिया रे अगुवे जो उपदेस

¹⁷ होर तिन्हें मीलेतुस सैहरा मन्झ पूजी किन्हें ले इफिसुस सैहरा रे कलीसिया रे अगुवे जो संदेस भेजेया होर सादे।

¹⁸ होर जेबे स्यों तेस वाले आये, ता पौलूसे बोल्या, “तुस्से जाणहां ऐं, जेबे हांऊँ आसिया रे ईलाके मन्झ पुज्हेया, पैहले ई ध्याड़े ले लेई किन्हें आजा तक हांऊँ तुस्सा साउगी किहाँ रैंहयां?

¹⁹ मतलब बड़े दीन हुई किन्हें, होर आंसू बहाई-बहाई किन्हें, होर तिन्हा परीक्सा मन्झ ले जो यहूदी लोका री साजिसा री वजहा ले मेरे पर आई; हांऊँ प्रभु री सेऊआ करदा ई रैंहयां।

²⁰ होर जो-जो गल्ला तुस्सा रे फायदे री ई थी, तिन्हा जो दसणे होर लोका रे साम्हणें होर घरा-घरा जाई किन्हें सिखाणे ले कधी नी झिझ्केया।

²¹ पर यहूदी लोका होर यूनान देसा रे लोका रे साम्हणें खबरदार करदा रैहया कि, पाप करणा छाडी किन्हें परमेसरा री वखा जो आई जाऊआ, होर आस्सा रे प्रभु यीसू मसीह पर विस्वास करहा।”

²² “होर ऐबे हांऊँ पवित्र आत्मा रे दसीरे मताबक यरुस्लेम सैहरा जो जाहाँ, होर नी जाणदा कि, तेथी मुंजो पर क्या-क्या बीतणा?

²³ सिर्फ ये कि पवित्र आत्मा हर सैहरा मन्झ गुआही देई-देई किन्हें मेरे किन्हें बोल्हा कि, हांऊँ बन्धी बनाया जाणा होर बौह्त दुःख सहन करणा पऊणा।

²⁴ पर मेरे कठे, मेरे जाना री कोई कीमत नी ई; मैं ता बस तेस दौड़ा जो होर सेऊआ जो पूरी करणा चाहां; जो मैं परमेसरा री अनुग्रह रे खुसी री खबरा पर गुआही देणे रे कठे प्रभु यीसू ले पाईरी थी।”

²⁵ “होर ऐबे हांऊँ जाणहां कि, तुस्से सभ जिन्हा मन्झा ले मैं परमेसरा रे राजा रा प्रचार कितेया, तुस्सा मेरे किन्हें दबारा कधी नी मिलणा।

²⁶ इधी कठे आज हांऊँ तुस्सा रे साम्हणें घोषणा करहा कि अगर मसीहा पर बगैर विस्वास कितिरे मरी जांघे ता तेता रा जिम्मेदार हांऊँ नी आ।

²⁷ क्यूंकि मैं परमेसरा री सारी इच्छा तुस्सा जो दसी दितिरी होर तेता मन्झ ले कुछ भी नी ल्कोई रा।”

²⁸ “इधी कठे आपणी होर आपणे झुंडा री चौकसी करा; जेस ले पवित्र आत्मे तिन्हा जो कलीसिया रे अगुवे ठैहराईरा: ताकि तुस्से परमेसरा री तेस कलीसिया रा ध्यान रखा, जेस जो तिन्हें आपणे खूना रे बदले खरदी लईरा था।

²⁹ हांऊँ जाणहां कि, मेरे जाणे ले बाद तुस्सा रे बीचा मन्झ खतरनाक भेड़िये साहीं झूठे उपदेस देणे वाले आऊणें, तिन्हा विस्वासी लोका रा बौह्त नुक्सान करणा।

³⁰ तुस्से जे विस्वासी ऐं तुस्सा रे बीचा मन्झा ले भी एह्ड़े-एह्ड़े टेढ़े लोक उठणे, जिन्हा विस्वासिया जो आपणा चेला बनाणे रे कठे चलाकी वाली गल्ला करणी।

³¹ इधी कठे चतन्न रैहया, होर याद करा कि राती ध्याड़ी तीन साल तक मैं तुस्सा जो यीसू मसीह रे सच्चे संदेसा रे उपदेस दिते होर मैं तुस्से आंसू बहाई किन्हें चिताये, ताकि तुस्से प्रभु रे प्रति वफादार बणी रहो।”

³² “होर ऐबे हांऊँ तुस्सा जो; परमेसर, होर तेसरे अनुग्रहा रे बचना जो सौंपी देहां; जो तुस्सा रे विस्वासा री बढ़ौतरी करी सक्हा, होर से तुस्सा जो विरासत देई सक्हा, जो तिन्हें आपणे पवित्र कितरे लोका साउगी देणे रा बादा कितिरा।”

³³ “मैं केसी री चांदी रा सोने या कपड़े रा लालच नी कितेया।

³⁴ तुस्से आपु ऐं जाणहां ऐं कि मेरे इन्हें हाथे मेरी होर मेरे साथिया री ज्रूरत जो पूरा कितेया।

³⁵ मैं तुस्सा जो सभ कुछ करी किन्हें दसेया कि, कड़ी मैहनत करी किन्हें आस्सा जो कमजोरा री मदद किहाँ करणी चहिए होर आस्सा जो प्रभु यीसू रा ये बचन याद रखणा चहिए, जो तिन्हें आपणे आप बोल्या था कि, ‘लेणे ले देणा खरा आ।’”

³⁶ ये बोली किन्हें तिन्हें घुटने टेकी दिते होर तिन्हा सभी साउगी प्रार्थना किती।

³⁷ तेबे स्यों बौह्त रोये होर पौलुसा जो गले लगाई किन्हें चुम्दे लगे।

³⁸ खास करी किन्हें स्यों इधी कठे दुखी थे क्यूंकि पौलुसे तिन्हें जो ये बोल्या था कि, तेस तिन्हा किन्हें दबारा कधी नी मिलणा, फेरी तिन्हें से जहाजा तक पुजाया।