चुणिरे चेले रे काम 19 - मंडयाली नंऊँआं नियम

इफिसुस सैहरा मन्झ पौलुस

¹ होर जेबे अपुल्लोस कुरिन्थुस सैहरा मन्झ था, ता पौलुस प्हाड़िया रे सारे ईलाके ले हुई किन्हें इफिसुस सैहरा मन्झ आया, होर तिन्हारी मुलाकात कुछ चेलेया किन्हें हुई।

² तिन्हा किन्हें बोल्या, “क्या तुस्से विस्वास करदे टैमा पवित्र आत्मा पाई?” तिन्हें तेस किन्हें बोल्या, “आस्से ये नी सुणेया की पवित्र आत्मा संसारा मन्झ आई चुकिरा।”

³ पौलुसे तिन्हा किन्हें बोल्या, ता फेरी तुस्से केस तरीके रा बपतिस्मा लया? तिन्हें बोल्या, “आस्से से बपतिस्मा लितिरा जो यहून्ना बपतिस्मा देणे वाल़े दितिरा।”

⁴ पौलुसे बोल्या, “यहून्ना बपतिस्मा देणे वाल़े ये बोली किन्हें बपतिस्मा दितिरा था की, पाप करणा छाडी देआ होर बपतिस्मा लउआ होर परमेसरा तुस्सा रे पाप माफ करणे। पर तिन्हें इस्राएली लोका किन्हें बोल्या की यीसू पर विस्वास करहा जो मेरे बाद आऊणें वाल़ा आ, से ही मसीहा आ।”

⁵ ये सुणी किन्हें तिन्हें प्रभु यीसू मसीहा रे नांऊँआं मन्झ बपतिस्मा लया।

⁶ होर जेबे पौलुसे तिन्हा पर हाथ रख्या, ता तिन्हा जो पवित्र आत्मा दितेया, होर स्यों अनजाण भासा बोल्दे होर भविस्यवाणी करदे लगे।

⁷ होर स्यों सारे कुल मिलाई किन्हें लगभग बारा आदमी थे।

⁸ होर पौलुस यहूदी सभा मन्झ जाई किन्हें तीन म्हीने तक निडर हुई किन्हें बोल्दा रैंहयां, होर परमेसरा रे राजा रे बारे मन्झ चर्चा करदा होर समझान्दा रैंहयां।

⁹ पर तिन्हा मन्झा ले कुछ लोक बौह्त हठी थे तिन्हें विस्वास करणे ले नांह करी दिती होर लोका रे साम्हणें “प्रभु यीसू रे पैंडे” जो भला बुरा बोल्दे लगे, होर से आपणे चेले जो आपणे साउगी लई किन्हें तिन्हा ले लग हुई गया, होर से तरन्नुसा नांऊँआ रे उपदेस देणे वाले कमरे मन्झ जाईं किन्हें हर रोज चर्चा करदा लग्या।

¹⁰ दो साल तक एह्ड़ा ई हुन्दा रैंहयां; एथी तक कि आसिया रे ईलाके रे रैहणे वाले क्या यहूदी लोक, क्या यूनान देसा रे सभीए प्रभु रा बचन सुणेया।

इफिसुस सैहरा मन्झ चमत्कारा रे काम

¹¹ होर परमेसर पौलुसा रे ज्रीए नौखे चमत्कारा रे काम दस्हा था।

¹² एथी तक कि तेसरे रुमाल होर तौलिया ब्मारा वाले लई जाहें थे होर तिन्हारी ब्मारिया ठीक हुई जाहीं थी, होर दुस्टात्मा तिन्हा मन्झा ले निकली जाहीं थी।

¹³ पर कुछ यहूदी लोक, जो लोका ले दुस्टात्मा काढणे रे कठे ओरे परे घुमदे फिरदे रैहें थे; स्यों एह्ड़ा करदे लगे कि जिन्हा लोका मन्झ दुस्टात्मा समाईरी थी, तिन्हा पर प्रभु यीसू रे नांऊँआं रा इस्तेमाल करी किन्हें होर बोल्दे लगे, “हांऊँ तुस्सा जो तेस यीसू मसीह रे नांऊँआं रा जेसरा प्रचार जे पौलुस करहा, बाहर निकल्ने रा हुक्म देहां।”

¹⁴ एक स्क्किवा नांऊँआं रे यहूदिया ईलाके रे मुख्य याजका रे सात मह्ठे थे जो एह्ड़ा ई करहा ऐं थे।

¹⁵ पर दुस्टात्मे जवाब दितेया कि, “यीसू जो ता हांऊँ जाणहां ई, होर पौलुसा जो भी पछ्याणा ई, पर तुस्से कुणहें?”

¹⁶ होर तिन्हें माह्णुंऐ जेस मन्झ जे दुस्टात्मा थी; तिन्हा पर झपटी किन्हें स्यों काबू करी लये कि, स्यों नांगे होर घायल हुई किन्हें तेस घरा ले भगे।

¹⁷ होर ये गल इफिसुस सैहरा मन्झ यहूदी लोक होर यूनान देसा रे लोक जाणी गये, होर तिन्हा सभी पर डर छाई गया; होर प्रभु यीसू रे नांऊँआं री बड़ाई हुई।

¹⁸ जिन्हें विस्वास कितेया था, तिन्हा मन्झा ले बौहत लोके आई किन्हें आपणे-आपणे बुरे कामा जो सभी रे साम्हणें मनी लया होर जाहिर कितेया।

¹⁹ होर जादू करणे वाल़ेया मन्झा ले बौह्त जणे आपणी सारी कताबा कठी करी किन्हें सभी रे साम्हणें फुखी दिती; होर जेबे तिन्हारी कीमत जोड़ी ता स्यों कताबा पंज्याह हजार चांदी रे सिक्के री कीमता बराबर निकली।

²⁰ एस तरहा प्रभु रा बचन बौह्त सामर्था किन्हें फैह्ल्दा चली गया।

²¹ जेबे ये गल्ला हुई बैठी, ता पवित्र आत्मे पौलुसा रे मना मन्झ ये बिचार पाया कि यरुस्लेम सैहरा जो जांदे हुए मकीदुनिया होर अखाया ईलाके रे विस्वासिया किन्हें मिली ले। होर बोल्या कि, “यरुस्लेम सैहरा मन्झ जाणे रे बाद मुंजो रोम सैहरा मन्झ जाणा भी जरूरी आ।”

²² तिन्हें तिमिथियुस होर इरास्तुस नांऊँआं रे दो सेऊआदारा जो तेसरी सेऊआ करहा ऐं थे, आपणे जाणे ले पैहले मकीदुनिया ईलाके मन्झ भेजी दितेया। होर आपु आसिया रे ईलाके रे इफिसुस सैहरा मन्झ रही गया, जेथी से कुछ ध्याड़े होर रुकणे वाल़ा था।

इफिसुस सैहरा मन्झ दंगा

²³ तेस टैम “प्रभु यीसू रे पैंडे” रे बारे मन्झ बड़ी परेसानी खड़ी हुई।

²⁴ क्यूंकि तेथी दिमेत्रियुस नांऊँआं रा एक सन्यार था जो यूनान देसा री अरतिमिसा माता रे मन्दरा मन्झ चांदी रे मोहरे बणवाई किन्हें कारीगरा जो एस कामा रे बौह्त ढब्बे देयां था।

²⁵ दिमेत्रियुस इन्हा जो, होर एह्ड़ी चीजा रे कारीगरा जो कठे करी किन्हें बोल्या, “हे भाईयो, तुस्से जाणहां ऐं कि, एस कामा मन्झ आस्सा जो कितना पैसा मिल्हा आ।

²⁶ होर तुस्से देख्हा होर सुणहां ऐं कि, सिर्फ इफिसुस सैहरा मन्झ नी, पर सारे आसिया रे ईलाके मन्झ ये बोली किन्हें इन्हें पौलुसे बौह्त लोका जो समझाया होर भरमाई किन्हें बदली भी दिते कि, जो हाथा री कारीगरी ई, स्यों इस्वर नी ऐं।

²⁷ होर ऐबे सिर्फ एस गल्ला रा डर नी आ कि, आस्सा रे काम धंधे री इज्जत चली जाणी; पर ये डर भी आ कि म्हान अरतिमिसा माता रा मन्दर भी बेकार समझ्या जाणा जेस जो आसिया रे ईलाके मन्झ कई लोक होर संसारा रे कई लोक अराधना करहा ऐं।”

²⁸ सारे कारीगर ये सुणी किन्हें गुस्से किन्हें भर्ही गये, होर चिंगी -चिंगी किन्हें बोल्दे लगे, “इफिसुस सैहरा री माता अरतिमिस म्हान ई!”

²⁹ ये सुणी किन्हें सैहरा रे कई लोक तिन्हा किन्हें मिली गये होर सैहरा मन्झ बड़ा दंगा कितेया; होर लोके मकीदुनिया ईलाके ले आईरे गयुस होर अरिस्तर्खुस जो, जो पौलुसा साउगी सफर करेया करहा ऐं थे, पकड़ी लया, होर तिन्हा जो रंगसाला मन्झ लई किन्हें दौड़े।

³⁰ पौलुस भी रंगसाला मन्झ जाई किन्हें लोका किन्हें गल करणा चाहां था, पर विस्वासिये तेस जो जाणे नी दितेया।

³¹ आसिया देसा रे हाकमा मन्झा ले कुछ तेसरे दोस्ते तेस वाले संदेसा भेज्या, होर अर्ज किती कि, रंगसाला मन्झ जाई किन्हें आपणी जानी जो जोखमा मन्झ मत पांदा।

³² तेथी रंगसाला मन्झ कोई कुछ चिंगेया करहा था ता कोई कुछ बोल्दा लगिरा था ता कुछ होर। तेथी गड़बड़ी मचीरी थी, होर बौह्त सारे लोक ता ये जाणदे भी नी थे कि, आस्से केसरे कठे, कठे हुईरे।

³³ तेबे यहूदी लोके सिकंदरा जो भीड़ा मन्झा ले धक्का देई किन्हें अगे कितेया, होर सिकंदरे आपणे हाथा किन्हें इसारा करी-करी किन्हें लोका रे साम्हणें बचाव पक्ष रखणा चाहेया।

³⁴ पर जेबे तिन्हें जाणी लया कि से यहूदी आ होर यहूदी लोक भी मसीह साहीं पूजा नी करदे, ता स्यों सभी रे सभ कोई दो घंटे तक एक ताना मन्झ चिंगदे रहे, “इफिसुस सैहरा री माता अरतिमिस म्हान ई।”

³⁵ तेबे सैहरा रे मंत्री लोका जो सांत करी किन्हें बोल्या, “हे इफिसियो सैहरा रे लोको, ये सब जाणहां ऐं कि, इफिसुस सैहरा रे लोक म्हान अरतिमिसा माता रे मन्दर रे पैहरेदार आ, जेसरी पवित्र मूर्ति आसमान ले पईरी थी।

³⁶ क्यूंकि इन्हा गल्ला ले इनकार नी करी सकदे; इधी कठे तुस्सा जो सांत रैंह्णां चहिए होर बगैर सोच विचारे कुछ नी करणा चहिए।

³⁷ क्यूंकि तुस्से यूँ माह्णुं पकड़ी किन्हें एथी ल्यान्दिरे, जेब्की इन्हें ना ता कोई मन्दर लुटेया होर ना ई आस्सा री माता री निंदा कितिरा।

³⁸ पर तिन्हें एह्ड़ा कुछ नी कितिरा फेरी भी दिमेत्रियुस होर तेसरे साथी कारिगिरा जो इन्हारे बरखलाफ कोई सिकायत ई ता आस्सा वाले कच्हरी भी ई, होर न्यायधीस भी मौजूद ऐं; तेथी जाई किन्हें स्यों एक दूजे पर दोस लगाई सक्हा ऐं।

³⁹ पर अगर तुस्से एता ले ज्यादा जाणना चाहें ता तेता रा फैसला आपणी आम सभा मन्झ कितेया जाणा।

⁴⁰ क्यूंकि आज दंगे री वजहा ले रोम देसा री सरकारा री तरफा ले आस्सा पर दोस लगणे रा डर आ की आस्से तिन्हारे खिलाफ दंगा करेया करहे, क्यूंकि आजा रे दंगे रे कठे आस्सा वाले कोई भी वजहा नी ई, जेस ले आस्से एस जो सही ठैहराई सके।”

⁴¹ होर ये बोली किन्हें तिन्हें भीड़ा जो वापस भेजी दितेया।