चुणिरे चेले रे काम 18 - मंडयाली नंऊँआं नियम

कुरुन्थी सैहरा मन्झ पौलुस

¹ एता ले पौलुस एथेंस सैहरा जो छाडी किन्हें कुरिन्थुस सैहरा जो चली गया।

² तेथी से पुन्तुस ईलाके रा रैहणे वाल़ा अक्विला नांऊँआं रे एक यहूदी किन्हें मिल्या; जो आपणी लाड़ी प्रिसकिल्ला साउगी नंऊँआं-नंऊँआं इतालिया देसा (इटली) ले आईरा था, क्यूंकि रोम देसा री सम्राट क्लौदियुसे सभ यहूदी लोका जो रोम देसा ले निकली जाणे रा हुक्म दितिरा था, इधी कठे स्यों कुरुन्थी सैहरा मन्झ रैह्न्दे लगे थे होर पौलुस तिन्हा वाले मिलदा गया।

³ पौलूस होर तिन्हारा काम धंधा एक ई था इधी कठे से तिन्हा साउगी रैंहयां होर काम करदा लग्या होर स्यों तम्बू बनाणे रा काम करहा ऐं थे।

⁴ होर पौलुस हर एक अरामा रे ध्याड़े यहूदी सभा मन्झ बैहस करी किन्हें यहूदी लोका होर यूनान देसा रे लोका जो समझाणें रा जतन करहा था की स्यों यीसू मसीह पर विस्वास करहे।

⁵ जेबे सिलास होर तिमिथियुस मकीदुनिया ईलाके ले आये, ता पौलुसे आपणा काम धंधा बंद करी दितेया होर बचना रे प्रचारा मन्झ लगी रैंहयां था, से यहूदी लोका जो गुआही देई किन्हें साबित करहा था कि यीसू ई मसीह आ।

⁶ पर जेबे यहूदी लोक पौलुसा रा व्रोध होर निंदा करदे लगे, ता पौलुसे आपणे कपड़े झाड़ी किन्हें ये दसेया की परमेसर तिन्हा ले खुस नी आ होर तिन्हा किन्हें बोल्या, “क्यूंकि तुस्से परमेसरा रा बचन टाल्ली दितेया जेसरे कठे अगर परमेसर तुस्सा जो सजा दे ता ये तुस्सा री जिम्मेदारी हूणीं, मेरी नी हूणीं; हांऊँ बेकसूर आ, ऐबे मुंजो कोई सरोकार नी आ, ऐबे मां अन्यजाति लोका वाले जाई किन्हें खुसी री खबर सुनाणी।”

⁷ होर यहूदी सभा ले चली किन्हें से तितुस युस्तुस नांऊँआं रे एक परमेसरा रे अराधना करणे वाल़े अन्यजाति रे घरा मन्झ उपदेस देणे रे कठे आया; जेसरा घर यहूदी सभा वाले ही बणीरा था।

⁸ तेबे यहूदी सभा रे मुखिये क्रिस्पुसे आपणे सारे टब्बरा समेत प्रभु पर विस्वास कितेया; होर बौह्त सारे कुरिन्थुस सैहरा रे लोके सुणी किन्हें विस्वास कितेया होर बपतिस्मा लिया।

⁹ होर प्रभुए राती दर्सना रे ज्रीए पौलुसा किन्हें बोल्या, “डर नी! पर बोल्दा रैह! होर चुपचाप मत हो।

¹⁰ क्यूंकि हांऊँ तेरे साउगी आ; इधी कठे तेरे पर हमला करी किन्हें कोई भी तुजो नुकसान नी पुज्हा ई सक्दा क्यूंकि एस सैहरा मन्झ मेरे एह्ड़े बौह्त लोक ऐं जिन्हा मेरे चेले बणना।”

¹¹ इधी कठे पौलुस तेथी डेढ़ साला तक परमेसरा रे बचना री उपदेस तिन्हा जो देंदा रैंहयां।

¹² जेबे अखाया ईलाके रा हाकम गल्लियो था तेबे ई यहूदी लोके एक जुट हुई किन्हें पौलुसा पर हमला कितेया होर तेस जो पकड़ी किन्हें कच्हरी मन्झ लई गये।

¹³ होर बोल्दे लगे, “ये आदमी लोका जो परमेसरा री अराधना एह्ड़े ढंगा किन्हें करणे रे कठे बैहकाया करहा जो मूसा री व्यवस्था रे बरखलाफ ई।”

¹⁴ पर जेबे पौलुस बोलणे ई वाल़ा था; ता गल्लिये यहूदी लोका किन्हें बोल्या, “हे यहूदी लोको, अगर ये कुछ अन्याय या दुस्टता री गल्ला हुन्दी ता ठीक था कि हांऊँ तुस्सा री सुणदा।

¹⁵ पर अगर ये बैहस सिर्फ सब्दा, होर नांऊँआं, होर तुस्सा री मूसा री व्यवस्था रे बारे मन्झ ई, ता तुस्से ही जाणा; क्यूंकि हांऊँ इन्हा गल्ला रा न्यायी नी बणना चाहन्दा।”

¹⁶ होर गल्लिये तिन्हा जो कच्हरी ले बाहर काढी दितेया।

¹⁷ तेबे कई लोके यहूदी सभा रा मुखिया सोस्थिनेस पकड़या होर से तिन्हें कच्हरी रे साम्हणें मारेया पिटेया; पर गल्लिये एता रे बारे मन्झ कुछ नी कितेया।

अन्ताकिया सैहरा मन्झ वापस आऊंणा

¹⁸ पौलुस बौह्त ध्याड़े तक कुरुन्थी सैहरा मन्झ रैंहयां, तेता ले बाद से विस्वासिया ले विदा हुई किन्हें किंख्रिया सैहरा जो चली गया। होर तेस सैहरा मन्झ आपणे सिर मुंडाया, क्यूंकि तिन्हें मन्नत मांगी री थी। होर तेता बाद से जहाजा ले सीरिया ईलाके जो चली गया होर तेस साउगी प्रिसकिल्ला होर अक्विला थे।

¹⁹ फेरी तिन्हें इफिसुस सैहरा मन्झ पुज्ही किन्हें तिन्हें प्रिसकिल्ला होर अक्विला जो तेथी छाडी दितेया, होर आपु ई यहूदी सभा मन्झ जाई किन्हें यहूदी लोका किन्हें बैहस करदा लग्या।

²⁰ जेबे लोके तेस ले अर्ज किती कि, आस्सा साउगी कुछ होर ध्याड़े तक रही जा, ता तिन्हें नी मन्नेया।

²¹ पर ये बोली किन्हें तिन्हा ले विदा हुएया कि, “अगर परमेसरे चाहंगा ता मां तुस्सा वाले दबारा आऊंणा।” तेबे से इफिसुस सैहरा ले जहाजा पर चढ़ी किन्हें चली गया।

²² होर कैसरिया सैहरा मन्झ उतरी किन्हें यरुस्लेम सैहरा जो चली गया, होर फेरी यरुस्लेम सैहरा री कलीसिया किन्हें मिली किन्हें होर तिन्हो नमस्कार करी किन्हें अन्ताकिया सैहरा जो चली गया।

पौलुसा री त्रीजी प्रचार यात्रा री सुर्हूआत

²³ होर कुछ ध्याड़े अन्ताकिया सैहरा मन्झ बिताणे ले बाद तेथी ले विदा हुई किन्हें गलातिया ईलाके होर फ्रुगिया जिल्ले मन्झ एक जगहा ले दूजी जगहा तक सफर करदे हुए सभी चेले जो मजबूत करदा फिरेया।

इफिसुस सैहरा मन्झ अपुल्लोस नांऊँआं रा एक विद्वान माह्णुं

²⁴ फेरी अपुल्लोस नांऊँआं रा एक यहूदी लोक इफिसुस सैहरा मन्झ आया जेसरा जन्म सिकंदरिया सैहरा मन्झ हुईरा था, जो विद्वान माह्णुं था होर पवित्र सास्त्रा जो भली भांति जाणहां था।

²⁵ तिन्हें “प्रभु यीसू रे पैंडे” री उपदेस पाईरी थी, होर मन ल्गाई किन्हें यीसू रे बारे मन्झ ठीक-ठीक सुणाहां होर स्खाहां था, पर से सिर्फ यहून्ना रे बपतिस्मा रे बारे मन्झ जाणहां था।

²⁶ से यहूदी सभा मन्झ न्डरे हुई किन्हें बोल्दा लग्या, पर प्रिसकिल्ले होर अक्विले तेसरी गल्ला सुणी किन्हें, तेस जो आपणे घरा ल्याई किन्हें होर परमेसरा रा पैंडा तेस जो होर भी साफ-साफ समझाई दितेया।

²⁷ होर जेबे तिन्हें तय कितेया कि पार जाई किन्हें अखाया ईलाके जो जाए ता विस्वासिये तेस जो हिम्मत देई किन्हें चेलेया जो लिख्या कि स्यों तेस किन्हें ठीक तरहा ले मिले, होर तिन्हें तेथी पुज्ही किन्हें तिन्हारी बड़ी मदद किती जिन्हें जे परमेसरा री अनुग्रह ले प्रभु यीसू पर विस्वास कितेया था।

²⁸ अपुल्लोसे यहूदी अगुवे साउगी जनता रे साम्हणें जबरदस्त खुली बैहस किती तिन्हारी गल्ला रा खंडन कितेया जेब्की बाकि लोक सुणेया करहा ऐं थे, अपुल्लोसे पवित्र सास्त्रा रे बचन पढ़ी-पढ़ी किन्हें तिन्हा जो साबित करी दितेया कि यीसू ई मसीह आ।