चुणिरे चेले रे काम 16 - मंडयाली नंऊँआं नियम

पौलुस होर तिमिथियुसा

¹ फेरी से दिरबे होर लुस्त्रा सैहरा मन्झ भी गये, होर तेथी तिमिथियुस नांऊँआं रा एक चेला था, जो केसी यहूदिया ईलाके री विस्वासणी रा मह्ठा था, पर तेसरा बापू यूनान देसा रा था।

² से लुस्त्रा होर इकुनियुम सैहरा रे भाईया मन्झ इज्जतदार था।

³ पौलुस तिमीथियुसा जो यात्रा पर आपणे साउगी ले जाणा चाहेया था, इधी कठे तिन्हें तेस जो साउगी लई लया होर तिन्हा जगहा पर रैहणे वाले यहूदी लोका री वजहा ले तेसरा खतना कितेया; क्यूंकि स्यों सभी जाणहां ऐं थे कि तेसरा बापू यूनान देसा रा था।

⁴ पौलूस होर तेसरे साथी सैहरा-सैहरा जांदे हुए तिन्हें तेथी रे विस्वासिया जो तिन्हा नियमा रे बारे मन्झ दसेया जो यरुस्लेम सैहरा रे चुणिरे चेले होर कलीसिया रे अगुवे तय कितिरे थे।

⁵ एस तरहा तेथी री कलीसिया विस्वासा मन्झ मजबूत हुन्दी गई होर गिणती मन्झ रोज बधदी गई।

त्रोआस सैहरा मन्झ पौलुसा रा दर्सन

⁶ होर स्यों फ्रुगिया जिल्ले होर गलातिया ईलाके मन्झा ले हुई किन्हें गये, होर पवित्र आत्मे तिन्हा जो आसिया रे ईलाके मन्झ बचन सुणाणे जो नांह किती।

⁷ होर तिन्हें मुसिया ईलाके रे नेडे पुज्ही किन्हें, बितूनिया ईलाके मन्झ जाणा चाहेया; पर यीसू री आत्मे तिन्हा जो जाणे नी दितेया।

⁸ इधी कठे स्यों मुसिया ईलाके ले हुई किन्हें त्रोआस सैहरा रे बंदरगाह पूजे।

⁹ होर पौलुसे राती एक दर्सन देख्या कि मकीदुनिया ईलाके रा रैहणे वाल़ा आदमी खड़ी किन्हें तेस ले अर्ज करी किन्हें बोल्हा कि, “समुद्रा जो पार करी किन्हें मकीदुनिया ईलाके मन्झ आऊ; होर आस्सा री मदद कर।”

¹⁰ एस दर्सना जो देखणे ले बाद आस्से झटपट मकीदुनिया ईलाके मन्झ जाणा चाहेया, ये समझी किन्हें कि, परमेसरे आस्सा जो तेथी रे लोका जो खुसी री खबर सुणाणे रे कठे सादिरा।

फिलिप्पी सैहरा मन्झ लुदिया रा दिल बधलना

¹¹ एस तरहा आस्से त्रोआस सैहरा ले पाणी रे पैंडे जाणे रे कठे आपणा जहाज ले सीधे सुमात्राके टापू जाई पूजे; फेरी अगले ध्याड़े नियापुलिसा सैहरा जो चली गये।

¹² तेथी ले आस्से फिलिप्पी सैहरा पूजे, जो मकीदुनिया ईलाके रा एक खास सैहर होर रोम देसा रे लोका री बस्ती ई; होर आस्से तेस सैहरा मन्झ कुछ होर ध्याड़े तक रैहे।

¹³ फेरी अरामा रे ध्याड़े आस्से सैहरा रे फाटका रे बाहर नदी रे बाढे ये समझी किन्हें गये कि, तेथी यहूदी लोका रा प्रार्थना करणे रे कठे कोई जगहा हूणीं; होर बैठी किन्हें तिन्हा ज्नानिया किन्हें जो कठी हुईरी थी, तिन्हा किन्हें गल्ला करदे लगे।

¹⁴ होर लुदिया नांऊँआं री एक अराधना करणे वाल्ई ज्नाने थी जेस्से पौलुसा री गल्ला सुणी, जो थुआतिरा सैहरा मन्झ रैंहयां ईं थी होर से बैंगणी रंगा रे कपड़े बेचणे वाली थी, परमेसरे तेस्सा रा मन त्यार करी दितेया ताकि से पौलुसा री बोलिरी गल्ला पर ध्यान देई सके।

¹⁵ आपणे पुरे टब्बरा समेत बपतिस्मा लैणे ले बाद तिन्हें आस्सा किन्हें ये बोल्दे हुए अर्ज किती, “अगर तुस्से मुंजो प्रभु री विस्वासी मन्नहां ऐं ता आऊआ होर मेरे घरा रुका,” होर से आस्सा जो मन्नाई किन्हें लई गई।

दुस्टात्मा ले अजादी

¹⁶ जेबे आस्से प्रार्थना करणे री जगहा जाया करहा ऐं थे, ता आस्सा जो एक गुलाम मिली जेस्सा मन्झ एक एह्ड़ी दुस्टात्मा थी, जेस्सा रे सहारे ले से भविस्या री गल्ला दस्हा ई थी; होर एह्ड़ा करी किन्हें आपणे माल्का रे कठे बौह्त सारा पैसा कमाई किन्हें ल्याहूहाँ ई थी।

¹⁷ से पौलुसा रे होर आस्सा रे पीछे आई किन्हें चिंगदी लगी कि, “ये माह्णुं परमप्रधान परमेसरा रा सेऊआदार आ, जो आस्सा पर उद्धार रा पैंडा जाहिर करहा।”

¹⁸ से बौह्त ध्याड़े तक एह्ड़ा ई करदी रही, पर पौलुस दु:खी हुई गया, होर मुड़ी किन्हें तेस दुस्टात्मा किन्हें बोल्या, “हांऊँ तुजो यीसू मसीह रे नांऊँआं ले हुक्म देहां कि, तेस्सा मन्झा ले निकली जा होर से तेस ई टैम निकली गई।”

¹⁹ जेबे तेस्सा रे माल्के देख्या कि, आस्सा री कमाई री आस चली गई, ता तिन्हें पौलुस होर सिलासा जो पकड़ी किन्हें चौका मन्झ प्रधाना वाले खींजी किन्हें लई गये।

²⁰ फेरी स्यों तिन्हा जो न्यायधिसा वाले लई गये होर बोल्या, “ये यहूदी लोक ऐं होर आस्सा रे सैहरा मन्झ गड़बड़ी फैहलाया करहा ऐं।

²¹ होर एह्ड़े रीति रिवाजा री वकालत जिन्हा जो मन्नणा या जिन्हा पर चलणा आस्सा रोम देसा रे लोक कठे ठीक नी आ।”

पौलुस होर सिलास जेल्हा मन्झ

²² तेबे भीड़ा रे लोक पौलुस होर सिलास व्रोधा मन्झ कठे हुये; होर न्यायधिसे तिन्हारे कपड़े फाड़ी किन्हें तुआरी दिते, होर तिन्हा जो डंडे मारणे रा हुक्म दितेया।

²³ होर बौह्त डंडे मारी किन्हें तिन्हा जो जेल्हा मन्झ पाई दितेया; होर दरोगे जो हुक्म दितेया कि, तिन्हारी चौकसी रख्या।

²⁴ तिन्हें एह्ड़ा हुक्म पाई किन्हें तिन्हा जो अंदरले वाले कमरे मन्झ रख्या होर तिन्हें तिन्हारे पैर लकड़ी री बेड़िया किन्हें कस्सी दिते।

पौलुस होर सिलास जेल्हा ले छुटी जाणा

²⁵ लगभग आधी राती पौलुस होर सिलास प्रार्थना करी किन्हें परमेसरा रे भजन गाया करहा ऐं थे, होर कैदी तिन्हारी सुणेया करहा ऐं थे।

²⁶ कि इतने मन्झ अचानक बड़ा हिलण हुएया, एथी तक कि जेल्हा री नींव हिली गई, होर झटपट सभ दुराजे खुल्ही गये; होर सभी रे बंधन खुल्ही गये।

²⁷ होर दरोगा जागी गया, होर जेल्हा रे दुराजे खुल्हे देखी किन्हें तेस जो लगया कि कैदी भगी गये, इधी कठे तिन्हें तलवार काढी किन्हें आपणे आपा जो मारी देणा चाहेया

²⁸ पर पौलुसे जोरा किन्हें बोल्या, “आपणे आपा जो कुछ नुक्सान नी पुज्हा, क्यूंकि आस्से सभ एथी ऐं।”

²⁹ होर से दिउआ लई किन्हें अंदर गया, होर काम्मदा हुई किन्हें पौलुस होर सिलासा रे पैरा पई गया।

दरोगे रा दिल बधलना

³⁰ होर तिन्हा जो बाहर ल्याई किन्हें बोल्या, “हे स्रीमान जी, उद्धार पाणे रे कठे हांऊँ क्या करूं?”

³¹ तिन्हें बोल्या, “प्रभु यीसू मसीह पर विस्वास कर, ता तुध होर तेरे टब्बरा उद्धार पाणा।”

³² होर तिन्हें तेस जो, होर तेसरे सारे घराने रे लोका जो प्रभु रा बचन सुणाया।

³³ होर राती तेस ई टैम तिन्हें तिन्हा जो लई जाई किन्हें तिन्हारे जख्म धोए, होर तिन्हें आपणे सभ लोका समेत झटपट बपतिस्मा लया।

³⁴ होर तिन्हें तिन्हा जो आपणे घरा मन्झ लई जाई किन्हें, तिन्हारे साम्हणें खाणा रख्या होर सारे टब्बरा समेत परमेसरा पर विस्वास करी किन्हें स्यों बौह्त खुस थे।

³⁵ अगले ध्याड़े तेबे न्यायधिसे पैहरादारा जो ये बोली किन्हें भेज्या कि, “तिन्हा माह्णुंआं जो छाडी देआ।”

³⁶ दरोगे ये गल्ला पौलुसा किन्हें बोली दिती कि, “न्यायधिसे तुस्सा जो छाडणे रा हुक्म देई दितिरा, इधी कठे निकली किन्हें सांति किन्हें चली जाऊआ।”

³⁷ पर पौलुसे तिन्हा किन्हें बोल्या कि, “आस्से जो रोम देसा रे लोक ऐं, दोसी ठैहराए बगैर, लोका रे साम्हणें मारेया, होर जेल्हा मन्झ पाया, होर ऐबे चुपके-चुपके स्यों आस्सा जो बाहर भेजी देणा चाहें, पक्का एह्ड़ा नी हूंणां; हूंणां ता ये चहिए कि स्यों आपु आई किन्हें आस्सा जो बाहर काढे।”

³⁸ पैहरेदारे ये गल्ला न्यायधीसा किन्हें बोली दिती, होर स्यों ये सुणी किन्हें कि ये रोम देसा रे लोक ऐं, डरी गये।

³⁹ होर तिन्हें आई किन्हें तिन्हा ले माफी मांगी, होर बाहर लई जाई किन्हें अर्ज किती कि स्यों सैहरा ले चले जाए।

⁴⁰ स्यों जेल्हा ले निकली किन्हें लुदिया रे घरा जो चली गये, होर विस्वासिया किन्हें मिली किन्हें तिन्हा जो सांति दिती, होर तेस सैहरा जो छाडी के चली गये।