चुणिरे चेले रे काम 15 - मंडयाली नंऊँआं नियम

यरुस्लेम सैहरा री सभा

¹ फेरी कुछ यहूदी विस्वासी यहूदिया ईलाके ले आई किन्हें विस्वासिया जो सिखांदे लगे कि, “अगर मूसा री व्यवस्था रे मताबक तुस्सा रा खतना नी हुईरा ता तुस्सा रा उद्धार नी हुई सक्दा।”

² जेबे पौलुस होर बरनबासा रा तिन्हा किन्हें झगड़ा होर बैहस हुई ता ये तय कितेया कि, पौलुस होर बरनबास, होर बाकि चेले एस गल्ला रे बारे मन्झ यरुस्लेम सैहरा जो चुणिरे चेले होर कलीसिया रे अगुवे वाले जाए।

³ इधी कठे कलीसिये तिन्हा जो खर्चा पाणी देई किन्हें कुछ दुरा तक पुज्हा ऐ; होर स्यों फिनिके ईलाके होर सामरिया ईलाके ले हुंदे हुए ये खबर सुणान्दे गये कि किहाँ अन्यजाति लोका खुसी री खबर सुण कर मसीही रे विस्वास बणदे लगिरे। ये खबर सुणी किन्हें विस्वासी लोक बौह्त खुस हुए।

⁴ जेबे यरुस्लेम सैहरा मन्झ पौहुंचे, ता कलीसिया होर चुणिरे चेले होर कलीसिया रे अगुवे तिन्हा किन्हें खुसी साउगी मिले, होर पौलुस होर बरनबासे दसेया कि परमेसरे तिन्हा साउगी केह्ड़े-केह्ड़े काम किते थे।

⁵ पर फरीसी लोका रे मता मन्झा ले जिन्हें विस्वास कितेया था, तिन्हा मन्झा ले लोके उठी किन्हें बोल्या, “कि अन्यजाति लोका रा खतना कुराणे रा होर मूसा री व्यवस्था जो मन्नणे रा हुक्म देणा चहिए।”

⁶ तेबे चुणिरे चेले होर कलीसिया रे अगुवे एस गल्ला रे बारे मन्झ विचार करणे रे कठे, कठे हुए।

⁷ तेबे पतरसे बौह्त बैहसा ले बाद खड़ी किन्हें तिन्हा किन्हें बोल्या, “हे भाईयो, तुस्से जाणहां ऐं कि, कुछ टैमा पैहले परमेसरे ले मुंजो चुणी लया कि, मेरे ज्रीए अन्यजाति लोक खुसी री खबरा रा बचन सुणी किन्हें विस्वास करहे।

⁸ होर मना जो जाणने वाले परमेसरे तिन्हा जो भी आस्सा साहीं पवित्र आत्मा देई किन्हें तिन्हो दसेया की परमेसरे स्यों भी आस्सा साहीं अपनाई लईरे।

⁹ होर विस्वास करणे रे ज्रीए तिन्हारे मन पवित्र करी किन्हें आस्सा मन्झ होर तिन्हा मन्झ कुछ फर्क नी रख्या।

¹⁰ ता ऐबे तुस्से परमेसरा री परीक्सा किधियो करेया करहा ऐं? कि गैर-यहूदी विस्वासिया री क्याड़ी पर एह्ड़ा बोझ रखे, जेस जो आस्सा रे बापदादे नी चकी सके थे होर ना आस्से चकी सक्हा ऐं।

¹¹ एह्ड़ा करणा सही नी आ, पर आस्से विस्वास करहा ऐं कि जिहां स्यों प्रभु यीसू रे अनुग्रह रे ज्रीए उद्धार पाहें; तिहां ई आस्सा भी उद्धार पाणा ना की मूसा री व्यवस्था रा पालन करणे ले।”

¹² तेबे सारी सभा चुपचाप हुई किन्हें बरनबास होर पौलुसा री गल्ला सुणदे लगे कि परमेसरे तिन्हारे ज्रीए अन्यजाति लोका मन्झ केह्ड़े-केह्ड़े चमत्कार होर नौखे काम दसे।

याकूबा रा फैसला

¹³ जेबे स्यों आपणी गल्ला करी बैठे, ता याकूब बोल्दा लग्या कि,

¹⁴ हे भाईयो, मेरी सुणां: समौन पतरसे आस्से समझाये कि, परमेसरे अन्यजाति लोका मन्झा ले कुछ लोका जो आपणे लोक हूणे रे कठे चुणी किन्हें सभी ले पैहले केह्ड़ा प्यार जाहिर कितेया।

¹⁵ अन्यजाति लोका रा विस्वासी बणने री गल नबिया रे ज्रीए बौह्त पैहले ले पवित्र सास्त्रा मन्झ लिखी गईरे बचना किन्हें मेल खांहां ऐं;

¹⁶ “मां एता ले बाद आई किन्हें राजा दाऊदा रा पईरा तम्बू दबारा बनाणा, होर तेसरे खंडहर दबारा बणाणे, होर ये एह्ड़ी गल हूणी जिहां मकान ढलणे ले बाद कोई दबारा मकान बणाहां।

¹⁷ इधी कठे कि बाकि सारे माह्णुं, प्रभु जो तोपे बाकि सभ जातिया रे लोक, जिन्हा जो मैं आपणा लोक बणने रे कठे चुणी लईरे स्यों प्रभु जो तोपे,

¹⁸ येई गल से ही प्रभु बोल्हा जो संसारा री सुर्हूआता ले इन्हा गल्ला रा खबर देंदा आया।”

¹⁹ “इधी कठे मेरा विचार ये आ कि, गैर-यहूदी लोका मन्झा ले जो लोक परमेसरा वाले आहूँआं ऐं, आस्से तिन्हा जो यहूदी व्यवस्था जो मनणे रे कठे बोली किन्हें दुःख नी दे।

²⁰ पर तिन्हा जो एक चिठ्ठी लिखी किन्हें हुक्म दे कि स्यों, लोका रे ज्रीए मूर्तिया जो चढ़ाई रे खाणे जो नी खाये, होर व्यभिचार होर गला घुटी किन्हें मारिरे डांगरे रा मास होर खूना ले परे रैहे।

²¹ याद रखा कि ये हुक्म मूसा री व्यवस्था साहीं आ जेसरा प्रचार पुराणे टैमा ले कई सैहरा मन्झ हुन्दा रैहया। होर हर अरामा रे ध्याड़े यहूदी सभा मन्झ पढ़ी जाहीं थी।”

गैर-यहूदी विस्वासी लोका जो चिठ्ठी

²² तेबे चुणिरे चेले होर कलीसिया रे अगुवे सारी यरुस्लेमा री कलीसिया साउगी मिली किन्हें ये फैसला कितेया कि तिन्हा मन्झा ले ई कुछ लोका जो चुणी किन्हें पौलुस होर बरनबासा साउगी अन्ताकिया सैहरा भेजे। तिन्हें यहूदा जेस जो बरसब्बास बोल्हा ऐं, होर सिलास, जो विस्वासिया रा मुखिया था चुणी लितेया।

²³ स्यों ये चिठ्ठी आपणे साउगी लेई गये जेस मन्झ लिखिरा था कि, अन्ताकिया सैहरा होर सीरिया ईलाके होर किलकिया ईलाके रे रैहणे वाले अन्यजाति विस्वासिया जो, चुणिरे चेले, कलीसिया रे अगुवे होर विस्वासिया रा नमस्कार।

²⁴ आस्से सुणिरा कि, आस्सा मन्झा ले बौह्त जणे तेथी जाई किन्हें, तुस्सा जो आपणी गल्ला ले डराई दितिरा; होर तुस्सा रे मन बदली दितिरे, पर आस्से तिन्हा जो एह्ड़ा करणे रा हुक्म नी दितिरा था।

²⁵ इधी कठे आस्से एक मन हुई किन्हें ठीक सम्झेया कि, आस्से कुछ लोका जो चुणे होर आपणे प्यारे बरनबास होर पौलुसा साउगी तुस्सा वाले भेजे।

²⁶ ये ता एह्ड़े माह्णुंऐ, जिन्हें जे आपणे प्राण आस्सा रे प्रभु यीसू मसीहा रे कठे खतरे मन्झ पाईरे।

²⁷ होर आस्से यहूदा होर सिलासा जो भेज्या करहा ऐं, तिन्हा तुस्सा जो आपणे मुंहा ले ये सभ गल्ला दसणी।

²⁸ “पवित्र आत्मा जो होर आस्सा जो येई ठीक लग्या कि तुस्सा पर इन्हा जरूरी गल्ला रे अलावा होर केसी गल्ला रा भार नी पाया जाए:

²⁹ कि तुस्से लोका रे ज्रीए मूर्तिया जो चढ़ाई रे खाणे जो मत खांदे, होर व्यभिचार होर गला घुटी किन्हें मारिरे डांगरे रा मास होर खूना ले परे रैहया। अगर तुस्से इन्हा ले दूर रैंह्णां ता तुस्सा रा भला हूंणां, सुभकामणां।”

³⁰ फेरी स्यों तेथी ले विदा हुई गये होर अन्ताकिया सैहरा पौहुन्चे, होर तेथी तिन्हें कलीसिया जो कठा करी किन्हें तिन्हा जो से चिठ्ठी देई दिती।

³¹ चिठ्ठी पढ़ी किन्हें तिन्हा जो बड़ी हिम्मत मिली होर तेस उपदेसा री गल्ला ले स्यों बौह्त खुस हुए।

³² होर यहूदा होर सिलास जो आपु भी नबी थे, बौह्त उपदेस दिते होर विस्वासिया जो उपदेस देई किन्हें मजबूत कितेया।

³³ यहूदा होर सिलास तेथी कुछ टैमा तक रहे होर विस्वासिया तिन्हा जो सांति किन्हें तिन्हा वाले भेजी दितेया जिन्हें जे तिन्हा जो भेजिरा था।

³⁴ पर सिलास जो अन्ताकिया सैहरा मन्झ रैंह्णां रा बिचार कितेया।

³⁵ होर पौलुस होर बरनबास भी अन्ताकिया सैहरा मन्झ रही गये; होर बौह्त सारे दूजे लोका किन्हें तिन्हें प्रभु यीसू रे बचना रा उपदेस देंदे हुए लोका मन्झ खुसी री खबर रा प्रचार करदे रहे।

पौलुस होर बरनबासा रे बीचा मन्झ बैहस

³⁶ कुछ ध्याड़े बाद बरनबासे पौलुसा किन्हें बोल्या, “आऊआ, जिन्हा-जिन्हा सैहरा मन्झ आस्से प्रभु रे बचना रा प्रचार कितेया, तेथी आपणे विस्वासिया वाले वापस चली किन्हें ये देख्हा ऐं कि स्यों केह्ड़े ऐं।”

³⁷ तेबे बरनबास चाहां था कि यहून्ना जेस जो जे मरकुस भी बोल्हा ऐं, तेस जो तिन्हें आपणे साउगी नीणे रा विचार कितेया।

³⁸ पर पौलुसे बरनबासा जो दसेया कि मरकुसा जो आपणे साउगी लई जाणा ठीक नी हूंणां, क्यूंकि जेबे स्यों पंफुलिया जिल्ले मन्झ थे ता मरकुसे स्यों तेथी कल्हे छाडी दितिरे थे, होर तिन्हें तिन्हा साउगी काम जारी नी रख्या।

³⁹ फेरी एह्ड़ी बैहस हुई कि पौलूस होर बरनबास एक दूजे ले लग हुई गये। होर बरनबास मरकुसा जो लई किन्हें जहाजा ले साईप्रस टापू जो चली गया।

पौलुसा री सिलासा साउगी दूजी प्रचार यात्रा

⁴⁰ पर पौलुसे सिलास जो चुणी लया, होर विस्वासिये तेस जो परमेसरा री अनुग्रह पर सौंपी किन्हें अन्ताकिया सैहरा ले चली गये।

⁴¹ होर सीरिया ईलाके होर किलकिया ईलाके मन्झ जाई-जाई किन्हें तेथी कलीसिया रे विस्वासिया जो मजबूत करदे रहे।