चुणिरे चेले रे काम 14 - मंडयाली नंऊँआं नियम

इकुनियुम सैहरा मन्झ पौलुस होर बरनबास

¹ इकुनियुम सैहरा मन्झ एह्ड़ा हुएया कि स्यों यहूदी लोका री यहूदी सभा मन्झ साउगी-साउगी गये, होर एह्ड़ी गल्ला किती कि, यहूदी लोके होर यूनान देसा रे लोके दुंहीं मन्झा ले बौहुतिए विस्वास कितेया।

² पर विस्वास नी करणे वाले यहूदी लोक सके थे, अन्यजाति रे मन भड़काये होर विस्वासिया रे बरखलाफ तिन्हारे मना मन्झ कड़वाहट पैदा करी दिती।

³ होर पौलुस होर बरनबास तेथी बौह्त ध्याड़े तक रुके होर प्रभु रे बारे मन्झ बगैर डरे प्रचार करदे रैहे; होर प्रभु तिन्हारे ज्रीए किते गये नौखे चिन्ह रे ज्रीए से आपणे अनुग्रह रे संदेसा जो साबित करदा रेहा।

⁴ पर इकुनियुम सैहरा रे लोका मन्झ फूट पई गई थी, एता ले कितने ता यहूदी लोका वखा जो, होर कितने चुणिरे चेले वखा जो हुई गये।

⁵ जेबे अन्यजाति लोका होर यहूदी लोक आपणे मुखिये साउगी मिली किन्हें तिन्हा साउगी बुरा व्यवहार करणे होर तिन्हा पर पत्थरवाह करणे री चाल चली।

⁶ ता पौलुस होर बरनबासा जो एस गल्ला रा पता चली गया होर स्यों लुकाउनिया ईलाके रे लुस्त्रा सैहरा होर दिरबे सैहर होर ओरले परले रे सैहरा मन्झ चली गये।

⁷ तेथी भी स्यों खुसी री खबरा रा प्रचार करदे रैहे।

लुस्त्रा होर दिरबे सैहरा मन्झ

⁸ लुस्त्रा सैहरा मन्झ एक आदमी बैठिरा था; जेसरा पैर कमजोर था, से जन्मा ले ई लंगड़ा था, होर कधी नी चल्लिरा था।

⁹ से पौलुसा जो गल्ला करदे सुणेया करहा था होर पौलुस तेस वखा जो एक टेक ल्गाई किन्हें देख्या कि एस जो ठीक हुई जाणे रा विस्वास आ।

¹⁰ होर जोरा-जोरा किन्हें बोल्या, “आपणे पैरा रे भारे सीधा खड़ा हुई जा।” तेबे से उछली किन्हें चलदा फिरदा लग्या।

¹¹ लोके पौलुसा रा ये काम देखी किन्हें लुकाउनिया भासा मन्झ चिंगी किन्हें बोल्या, “देऊ माह्णुं रे रूपा मन्झ आस्सा वाले आई गईरे।”

¹² होर तिन्हें बरनबासा जो यूनान देसा रे देऊ ज्यूसा रा नाऊँ दितेया, होर पौलुसा जो हिरमेस रा नाऊँ दितेया, क्यूंकि ये गल्ला करणे मन्झ मुख्या था।

¹³ होर यूनान देसा रे देऊ ज्यूसा रा मन्दर जो सैहरा रे साम्हणें था, तेथी रे पुजारिये बली रे कठे जानवर होर फुला रे हार फटका पर ल्याई किन्हें लोका साउगी बलि करणा चाहां था।

¹⁴ चुणिरे चेले बरनबास होर पौलुस जेबे सुणेया, ता आपणे कपड़े फाड़ी दिते, होर भीड़ा वखा चिलांदे-चिलांदे भगे।

¹⁵ होर बोल्दे लगे, “हे लोको तुस्से क्या करेया करहा ऐं? आस्से भी ता तुस्सा साहीं दुःख सुख भोगी माह्णुंऐ, होर तुस्सा जो खुसी री खबर सुणाहें कि, तुस्से इन्हा बेकार चीजा ले लग हुई किन्हें जिउंदे परमेसरा री तरफ फिरा, जिन्हें स्वर्ग होर धरती होर समुद्र होर जो कुछ तिन्हा मन्झ आ बणाया।

¹⁶ तिन्हें पिछले टैमा मन्झ सभ जातिया जो आपणे-आपणे पैंडे मन्झ चलने दितेया।

¹⁷ तेबे भी परमेसर आपणे भले कामा रे ज्रीए आपणे बारे मन्झ गुआही देंदा रह्या, होर आसमाना ले बरखा होर फलदाई मौसम देई किन्हें, येई तुस्सा जो खाणा देहां होर तुस्सा रे मना जो खुसी किन्हें भरी देहां।”

¹⁸ ये बोली किन्हें भी तिन्हें लोका जो बड़ी मुस्किला किन्हें रोकेया कि तिन्हारे कठे बलि नी चढ़ाये।

¹⁹ पर कितने यहूदी लोके होर पिसिदिया जिल्ले रे अन्ताकिया होर इकुनियुम सैहरा ले आई किन्हें लोका जो आपणे वखा जो करी लया, होर पौलुसा जो पत्थरवाह कितेया, होर मरीरा समझी किन्हें तेस जो सैहरा ले बाहर घसीटी किन्हें लई गये।

²⁰ पर जेबे चेले तेसरे चारो तरफ आई किन्हें खड़ी गये, ता से उठी किन्हें सैहरा मन्झ गया होर दूजे ध्याड़े बरनबासा साउगी दिरबे सैहरा जो चली गया।

सीरिया रे अन्ताकिया सैहरा मन्झ वापस आऊंणा

²¹ होर पौलुस होर बरनबास तेस सैहरा रे लोका जो खुसी री खबर सुणाई किन्हें, होर बौह्त सारे लोक चेले बणे। स्यों दबारा लुस्त्रा सैहरा मन्झ आये, होर तेथी ले इकुनियुम सैहरा जो गये, फेरी तेथी ले पिसिदिया जिल्ले रे अन्ताकिया सैहरा जो वापस आई गये।

²² होर हर गांऊँआं रे चेले रे मना जो मजबूत करदे रैहे होर ये उपदेस देंदे रैहे कि, “आस्सा जो बडे दुःख सही किन्हें परमेसरा रे राजा मन्झ दाखल करणा पऊणा।”

²³ होर तिन्हें हर एक कलीसिया मन्झ तिन्हारे कठे कलीसिया रे अगुवे नियुक्त किते, होर ब्रता साउगी प्रार्थना करी किन्हें, तिन्हा जो प्रभु रे हवाले सौम्पेया जेस पर जे तिन्हें विस्वास कितेया था।

²⁴ होर पिसिदिया जिल्ले ले हुंदे हुए स्यों पंफुलिया जिल्ले मन्झ पौहुंचे;

²⁵ होर पिरगा सैहरा मन्झ बचन सुणाई किन्हें पंफुलिया रे अतालिया बंदरगाह मन्झ आये।

²⁶ तेथी ले स्यों जहाजा पर सुआर हुई किन्हें सीरिया देसा रे अन्ताकिया सैहरा जो वापस गये, ये सेई जगहा ई जेथी जे पौलूस होर बरनबासा जो परमेसरा रे अनुग्रह मन्झ नियुक्त कितेया गईरा था। ताकि स्यों दूजी जगहा मन्झ जाई किन्हें प्रचारा रा काम करहे होर जेह्ड़ा तिन्हें ऐबे पुरा करी किन्हें वापस आईरे थे।

²⁷ होर अन्ताकिया सैहरा मन्झ पुज्ही किन्हें, तिन्हें कलीसिया कठी किती होर दसेया कि, परमेसरे आस्सा साउगी केह्ड़े बडे-बडे काम किते! होर अन्यजाति लोका जो प्रभु यीसू पर विस्वास करणे रे कठे मदद किती।

²⁸ होर पौलुस होर बरनबास चेले साउगी बौह्त ध्याड़े तक रैहे।