चुणिरे चेले रे काम 11 - मंडयाली नंऊँआं नियमपतरसा रा यरुस्लेम सैहरा जो वापस जाणा होर आपणे कामा रा ब्यौरा 1 चुणिरे चेले होर विस्वासियो जो यहूदिया ईलाके मन्झ थे सुणेया कि, अन्यजाति लोके भी परमेसरा रा बचन मनी लईरा। 2 होर जेबे पतरस यरुस्लेम सैहरा मन्झ आया, ता यहूदी विस्वासी लोक तेस किन्हें बैहस करदे लगे, 3 कि “तैं अन्यजाति लोका रे घरा जाई किन्हें तिन्हा साउगी खाणा खाध्या।” 4 तेबे पतरसे जेह्ड़ा सुर्हू ले हुआ से बारी-बारी सब दसेया, 5 “हांऊँ याफा सैहरा मन्झ प्रार्थना करेया करहा था, तेबे मै एक दर्सन देख्या कि, एक बडी चादरा साहीं कोई चीज हेठ उतरेया करहा ई, तेता जो चारो कुणे ले पकड़ी किन्हें आसमाना ले धरती पर तुआरेया करहा ऐं, फेरी से चादर उतरी किन्हें मेरे वाले आई। 6 जेबे मैं तेस पर ध्याना किन्हें देख्या ता पालतु जानवर, जंगली जानवर होर धरती पर पेटा रे भारे चलणे फिरणे वाले होर आसमाना रे चिड़ु थे, जिन्हा जो मूसा री व्यवस्था रे मताबक यहूदी लोका रे कठे खाणा ना थी। 7 होर फेरी मैं एक अवाज सुणी कि, ‘हे पतरस उठ होर इन्हा मन्झा ले मारी किन्हें खाई ले।’ 8 पर मैं बोल्या, ‘नीं प्रभु, कधी नी; क्यूंकि मैं कधी कोई अपवित्र या असुद्ध खाणा नी खाध्या।’ 9 एता रे जवाबा मन्झ आसमाना ले दूजी बारी अवाज आई कि, ‘जेस केसी चीजा जो परमेसरे पवित्र बोलिरा, अपवित्र मत बोलणा।’ 10 तीन बारी एह्ड़ा ई हुएया; तेबे से सभ कुछ स्वर्गा वखा जो खिंजी लिती गया।” 11 “तेस ई टैम जेथी हांऊँ रुकिरा था, तेस घरा मन्झ तीन माह्णुं आई पौहुंचे, तिन्हा जो मेरे वाले कैसरिया सैहरा ले कुरनेलियुसे भेजिरा था। 12 पवित्र आत्मे मुंजो तिन्हा साउगी बिना डरे जाणे जो बोल्या; होर ये छेह भाई भी मेरे साउगी गये होर आस्से तेस आदमी रे घरा मन्झ गये। 13 होर तिन्हें बोल्या कि, मैं एक स्वर्गदूता जो आपणे घरा मन्झ खड़ीरे देख्या, जिन्हें मेरे किन्हें बोल्या कि, ‘याफा सैहरा मन्झ आदमी भेजी किन्हें समौन जो जेस जो पतरस भी बोल्हा ऐं, सादी ले। होर जेबे तेस आऊंणा तेबे तेस तुस्सा जो परमेसरा री गल्ला दसणी। 14 होर जेबे तेस तुस्सा किन्हें ये गल्ला करणी, जेसरे ज्रीए परमेसरा तु होर तेरा सारा टब्बर बचाणा।’ 15 जेबे हांऊँ गल्ला करदा लग्या, ता पवित्र आत्मा तिन्हा पर तेस ई तरीके किन्हें दितेया गया, जेस तरीके ले सुर्हू मन्झ पिन्तेकुस्ता रे साजे रे ध्याड़े आस्सा जो दितिरा था। 16 तेबे मुंजो प्रभु रा से बचन याद आया कि, ‘यहून्ना बपतिस्मा देणे वाल़ा ता पाणी किन्हें बपतिस्मा देहां था पर तुस्सा जो पवित्र आत्मा रा बपतिस्मा मिलणा।’ 17 इधी कठे जेबे कि परमेसरे तिन्हा जो भी दान दितेया, जो आस्सा जो प्रभु यीसू मसीह पर विस्वास करणे ले मिल्या था; ता मैं कुणहां जो परमेसरा जो रोकी सक्हा था।” 18 ये सुणी किन्हें, स्यों यहूदी विस्वासी चुप रैहे, होर परमेसरा री बड़ाई करी किन्हें बोल्दे लगे, “ता परमेसरे अन्यजाति लोका जो भी अनंत जिन्दगी पाणे रे कठे पापा जो छाडी किन्हें मसीहा पर विस्वास करणे रा दान दितिरा।” अन्ताकिया री कलीसिया मन्झ साऊल होर बरनबास 19 जो लोक स्तिफनुसा रे मरणे रे बाद यरुस्लेम सैहरा जो छाडी किन्हें तितर-बितर हुई गये थे, होर दूरा-दूरा तक फिनिके ईलाके होर साईप्रस टापू होर अन्ताकिया सैहरा तक जाई पूजीरे थे, ये यहूदी लोका जो छाडी किन्हें केसी होरी जो यीसू री खुसी री खबर नी सुणाहें थे। 20 पर तिन्हा मन्झा ले कुछ विस्वासी साईप्रस टापू होर कुरेनी सैहरा रे थे, जो अन्ताकिया सैहरा मन्झ आई किन्हें यूनानी भासा बोलणे वाल़े जो भी यीसू री खुसी री खबर सुणान्दे लगे। 21 होर प्रभु री सामर्थ तिन्हा पर थी, होर बौह्त अन्यजाति लोक विस्वास करी किन्हें प्रभु वखा जो फिरी गये। 22 तेबे तिन्हारी चर्चा यरुस्लेम सैहरा री कलीसिया रे सुणने मन्झ आई, होर तिन्हें बरनबास अन्ताकिया सैहरा मन्झ भेज्या। 23 से तेथी पूजी किन्हें, होर परमेसरा रे अनुग्रह जो देखी किन्हें खुस हुएया; होर सभी जो उपदेस दितेया कि तन मन ल्गाई किन्हें प्रभु मन्झ बणी रहो। 24 बरनबास एक भला मानस था; होर पवित्र आत्मा किन्हें भरीरा था: होर बौह्त सारे लोक प्रभु वाले ल्याई गये। 25 तेबे बरनबास अन्ताकिया सैहरा जो छाडी किन्हें साऊला जो तोपणे रे कठे तरसुस सैहरा जो चली गया। 26 होर जेबे से साउला किन्हें मिल्या तेबे से अन्ताकिया सैहरा मन्झ ल्यान्देया, होर एह्ड़ा हुएया कि बरनबास होर साउला एक साल तक कलीसिया साउगी मिलदे होर बौह्त लोका जो प्रभु यीसू रा उपदेस देंदे रैहे, होर चेले जो सभी ले पैहले अन्ताकिया सैहरा मन्झ ही मसीहा रे लोक बोल्या गया। 27 तिन्हा ध्याड़े कई विस्वासी जो नबी थे, यरुस्लेम सैहरा ले अन्ताकिया सैहरा मन्झ आये। 28 तिन्हा मन्झा ले अगबुस नांऊँआं रे एकी नबिये खड़े हुई किन्हें पवित्र आत्मा री प्रेरणा ले ये भविस्यवाणी किती कि, कई देसा मन्झ बौह्त भयानक अकाल पऊणे। जेबे रोम देसा रा सम्राट क्लौदियुस राज करेया करहा था तेस टैम ये अकाल पये। 29 तेबे चेले फैसला कितेया कि, हर एक आपणी-आपणी सामर्थ रे मताबक यहूदिया ईलाके मन्झ रैहणे वाले मसीही रे विस्वासियो री सेऊआ रे कठे कुछ भेजणे रा फैसला कितेया। 30 होर तिन्हें एह्ड़ा ई कितेया; होर बरनबास होर साऊला रे हाथ कलीसिया रे अगुवे वाले कुछ ढब्बे भेजी दिते। |
This work is licensed under Creative Commons Attribution-ShareAlike 4.0 License.