2 थिस्सलुनकियो 3 - मंडयाली नंऊँआं नियम

प्रार्थना करणे री विनती

¹ ऐबे हे भाईयो होर बैहणो, आखरी मन्झ आस्से तुस्सा किन्हें ये गल्ला बोलणा चाहें, आस्सा रे कठे प्रार्थना करदे रैहया, ताकि आस्से प्रभु यीसू मसीह रे बारे मन्झ खुसी री खबरा जो बौह्त जल्दी हर जगहा मन्झ फैल्ही सके, जेस ले कि लोक विस्वास करी सके, जिहां कि तुस्से लोके भी विस्वास कितिरा।

² होर ये भी प्रार्थना करहा कि परमेसर आस्सो इन्हा बुरे लोका ले बचाई ले, ताकि स्यों आस्सा रा नुकसान नी करहे क्यूंकि बौह्त लोक एह्ड़े जो खुसी री खबरा पर विस्वास नी करदे।

³ पर प्रभु भरोसे रे लायक आ, तेस तुस्से आत्मिक रूपा ले मजबूत करणे, होर तेस दुस्ट सैताना ले बचाणे।

⁴ होर आस्सा जो प्रभु मन्झ तुस्सा पर भरोसा आ कि, आस्से जो गल्ला करणे जो तुस्सा जो बोलिरी, तुस्से तेह्ड़ा ही करदे लगिरे, होर करदे भी रैंह्णां।

⁵ आस्से प्रार्थना करहे कि प्रभु यीसू मसीह तुस्सा जो ये गल जाहिर करहे कि, परमेसर तुस्सा किन्हें कितना प्यार करहा होर तुस्से से ही सबरा रखा, जो मसीहे भी रखीरा था।

आलस रे बरखलाफ चेतावनी

⁶ हे भाईयो होर बैहणो, जो हक आस्से प्रभु यीसू मसीहे आस्सो दितिरा आस्से तुस्सा जो हुक्म दे; कि हर एक एह्ड़े विस्वासी भाई बैहणा जो लेखे नी पाऊआ, जो नकर्मा आ, होर आस्से जो गल्ला सखाईरी, तेता रे मताबक नी करदा।

⁷ क्यूंकि तुस्से खरे ढंगा किन्हें जाणहां ऐं कि, तुस्सा जो आस्सा साहीं व्यवहार करणा चहिए; क्यूंकि तुस्सा रे बीचा मन्झ रैह्न्दे हुए आस्से आलसी नी थे पर काम करहे थे।

⁸ होर केसी री रोटी मुफ्त नी खाधीरी; पर मैहनत होर दुःख सही किन्हें रात-ध्याड़ काम धन्धा करहा ऐं थे, ताकि आपणी जरूरता रे कठे तुस्सा मन्झा ले केसी पर बोझ नी बणे।

⁹ आस्से बौह्त मेहनत किती, इधी कठे नी कि आस्सा जो तुस्सा ले मदद लेणे रा हक नी आ; पर इधी कठे कि आस्से आपणे आपा जो तुस्सा रे कठे उदाहरण बणाए, ताकि तुस्से नकर्मे नी बणो पर आस्सा साहीं मेहनत करो।

¹⁰ होर जेबे आस्से तुस्सा साउगी रैंहें थे, तेबे भी आस्से तुस्सा जो ये नियम दसिरा था कि, “अगर कोई काम करणा नी चाहन्दा, ता से खाणा भी नी खाए।”

¹¹ क्यूंकि आस्सा जो सुणने मन्झ आया करहा कि, तुस्सा रे बीचा मन्झ बौह्त लोक ऐं जो नकर्मे ऐं; होर कुछ काम नी करदे, पर होरी रे कामा मन्झ टांग अड़ाहें।

¹² एह्ड़े लोका जो आस्से प्रभु यीसू मसीह रे दितिरे हका ले आस्से हुक्म देहां ऐं, होर सम्झाहें; कि चुपचाप बगैर केसी रे कामा मन्झ टांग अड़ाई किन्हें काम धन्धा करी किन्हें आपणी रोटी खाया करहे।

¹³ हे भाईयो होर बैहणो तुस्से हिम्मत नी हारी किन्हें सही काम हमेसा करदे रैहया।

¹⁴ अगर कोई आस्सा री एस्सा चिठ्ठी मन्झ जो बिधिया लिखिरी तिन्हो नी मन्नदे, ता तेस पर नजर रखा; होर तेस जो लेखे नी पाऊआ, ताकि से बेज्जती मैहसूस करहे।

¹⁵ तेबे भी तेस जो दुस्मण नी समझा पर तेस जो आपणा भाई जाणी किन्हें सुधारा।

आखरी नमस्कार

¹⁶ हांऊँ प्रार्थना करहा कि प्रभु जो सांति देआ, से तुस्सा जो हर प्रकारा ले हर टैम सांति देंदा रहे; प्रभु तुस्सा सभी साउगी रहे।

¹⁷ होर ऐबे हांऊँ पौलुस, आपणे ही हाथा किन्हें आखरी मन्झ एस नमस्कारा जो लिख्या करहा। हांऊँ आपणी हर चिठ्ठी रा आखरी हिस्सा एस तरीके किन्हें ही लिख्हा, ताकि सभी जो ये पता लगे कि ये चिठ्ठी मैं ही लिखिरी।

¹⁸ हांऊँ प्रार्थना करहा कि आस्सा रा प्रभु यीसू मसीह तुस्सा सभी जो आपणा अनुग्रह देंदा रहे।