2 थिस्सलुनकियो 2 - मंडयाली नंऊँआं नियमदुस्ट आदमी 1 हे भाईयो होर बैहणो, ऐबे आस्से प्रभु यीसू मसीह रे दबारा वापस आऊणें, होर तेस साउगी मिलणे रे बारे मन्झ लिखणा चाहें। 2 तुस्सा रा मन अचानक दुआस नी हुई जाये, होर ये सुणी के देख्या डरदे कि प्रभु आई गईरा। लोक एस गल्ला जो भविस्यवाणी रे ज्रीए या केसी खास संदेसा रे ज्रीए या केसी चिठ्ठी रे ज्रीए, तुस्सा तक पुजांगे होर बोलणा कि ये चिठ्ठी आस्सा री तरफा ले ई। 3 प्रभु रे आऊणें री गल्ला रे बारे मन्झ केसी रे भी धोखे मन्झ देख्या आऊंदे, क्यूंकि यीसू मसीह रे वापस आऊणें रे पैहले एह्ड़ा टैम हूंणा, जेबे बौह्त लोका परमेसरा रे खलाफ विद्रोह करणा। होर से दुस्ट आदमी जाहिर हूंणा, जेस जो परमेसरा सच्चे नरका मन्झ नास करणा। 4 तेस परमेसर होर बाकि सभ चीजा रा विरोध करणा, जिन्हों लोक इस्वर बोली किन्हें तिन्हारी अराधना करहे, होर तेस एस गल्ला रा दावा करणा कि से इन्हा सभी ले खास आ। एथी तक कि दुस्ट आदमी परमेसरा रे मन्दरा मन्झ बैठी किन्हें ये भी दावा करहा कि से आपु ई परमेसर आ। 5 मत भुला कि जेबे हांऊँ तुस्सा साउगी था, तेबे मैं ये गल्ला तुस्सा जो बार-बार दसीरी थी। 6 क्यूंकि हाल्ले तक से दुस्ट आदमी जाहिर नी हुईरा, होर तुस्से जाणहां ऐं कि, केस चीजे से रोकी किन्हें रखिरा। इधी कठे कि तेस परमेसरा रे नियुक्त कितिरे टैमा मन्झ जाहिर हूंणा। 7 तेस दुस्ट आदमी री सामर्थ संसारा मन्झ गुप्त तरीके किन्हें काम करेया करहा ई, पर तेस जो रोकणे वाल़ा एक आ, होर तेस रोकणे वाले से तेबे तक रोकी रखणा, जेबे तक तेस जो टाही नी दे। 8 तेता ले बाद तेस दुस्ट आदमिया जाहिर हूंणां, पर बादा मन्झ जेबे प्रभु यीसू मसीह आऊंणा, ता से तेस आपणे मुंहा री फूका किन्हें मुकाई देणा, होर आपणे आऊणें रे तेजा किन्हें भस्म करी देणा। 9 सैताना आप्हुए तेस दुस्ट आदमी जो आपणी सामर्थ देणी, होर तेस तेसरी सामर्था रे ज्रीए सभी किस्मा रे झूठे काम, चिन्ह, चमत्कार होर नौखे काम करणे, जेता ले लोका सोचणा कि परमेसर ही ये सभ कुछ काम करी करहा। 10 होर अनंत विनासा री वखा जो जाणे वाले जो, हर प्रकारा रे बुरे कामा रे ज्रीए धोखा देणा। क्यूंकि तिन्हें सच्चाई पर विस्वास करणे रे कठे नांह करी दिती, जेसरे ज्रीए परमेसर तिन्हारा उद्धार करी सक्हा था। 11 होर एस वजहा ले परमेसरे सच्चाई ले भटकाणे वाली एक सामर्थ तिन्हा वाले भेजी, ताकि स्यों तेस झूठा पर विस्वास करहे, जो से दुस्ट आदमी तिन्हो दसा। 12 होर जितने लोक सच्चाई पर विस्वास नी करदे, बल्की पाप करणे री इच्छा रखे, परमेसरा तिन्हा सभी जो सजा देणी। मजबूत किन्हें बणी रैहया 13 हे भाईयो होर बैहणो, आस्सो हमेसा तुस्सा रे कठे परमेसरा रा धन्यावाद करणा चहिए, प्रभु तुस्सा किन्हें प्यार करहा। क्यूंकि तिन्हें संसारा जो रचणे ले पैहले ही तुस्से चुणी लितिरे कि पवित्र आत्मा रे कामा रे ज्रीए तुस्सा रा उद्धार करहे; जो तुस्सा जो पवित्र बणा। होर यीसू मसीह रे बारे मन्झ सच्चाई री खबरा पर विस्वास करणे रे ज्रीए भी। 14 परमेसरे तेस खुसी री खबरा रे ज्रीए जो आस्से तुस्सा जो सुणाई री थी, तुस्से सादिरे कि तुस्सा रा उद्धार करी सके; ताकि तुस्से आस्सा रे प्रभु यीसू मसीह री महिमा मन्झ साझी हुई सको। 15 इधी कठे, हे भाईयो होर बैहणो, मजबूत बणी रैहया होर जो उपदेस आस्से तुस्सा जो तेथी रही किन्हें सखाया, होर जो गल्ला आस्से तुस्सा जो चिठ्ठी रे ज्रीए सखाई, तिन्हा उपदेसा पर तुस्से लगातार आपणा विस्वास बणाई रखा। 16 आस्से आपणे प्रभु यीसू मसीह ले होर बापू परमेसरा ले प्रार्थना करहे, जो आस्सा किन्हें प्यार करहा; होर जिन्हें आपणे अनुग्रहा ले आस्सो हमेसा होंसला दितेया, होर मजबूत आस दितीरी। 17 आस्से प्रार्थना करहे कि स्यों तुस्सा रे मना जो हिम्मता किन्हें भरी दे, होर तुस्सा जो मजबूत बणाये कि तुस्से हमेसा खरा बोली सको, होर खरे काम करी सको। |
This work is licensed under Creative Commons Attribution-ShareAlike 4.0 License.