2 पतरस 2 - मंडयाली नंऊँआं नियम

झूठे उपदेस स्खाणे वाले होर तिन्हारा न्याय

¹ होर जिहां बौह्त पैहले इस्राएल देसा मन्झ झूठे नबी हुंहाँ करहा ऐं थे, तिहां ईं ऐबे तुस्सा री कलीसिया मन्झ भी झूठे उपदेस देणे वाल़ेया आऊंणा, होर तिन्हा परमेसरा रे बारे मन्झ घातक झूठ बोलणा। एथी तक कि तिन्हा मसीह जो आस्सा रा एक ही माल्क ऐं तेसरा इनकार करणा, जिन्हें जे स्यों पापा ले अजाद किते, होर एस तरहा तिन्हा आपणे गास अचानक बिनास लेई आऊंणा।

² कई लोक जो आपणे आपा जो विस्वासी बोल्हे तिन्हा, तिन्हा लोका साहीं लुचपन करणा, इधी कठे दूजे जो विस्वासी लोक नी ऐं, जिन्दगी जीणे रे सही रस्ते रे बारे मन्झ निंदा करणी।

³ एह्ड़े स्खाणे वाले लोक लालची हूंणे, होर मन घड़न्त कहाणीया बणाई किन्हें पैसा कमाणे रे कठे तुस्सा जो धोखा देणा। परमेसरे बौह्त पैहले ले ही इन्हों सजा देणे रा फैसला कितिरा था। होर ऐबे से करणे रे कठे त्यार आ, तेस सच्चे स्यों नास करी देणे।

⁴ तुस्से जाणांहे कि बौह्त पैहले कुछ स्वर्गदूते परमेसरा रे हुक्मा जो नी मन्नेया था, ता परमेसरे तिन्हो सजा दिति। तिन्हें स्यों दूत नरका मन्झ भेजी दिते, जेथी तिन्हो सांगला किन्हें बान्ही किन्हें नह्यारे मन्झ रखीरा, ताकि से न्याय रे ध्याड़े तक जेबे तक तिन्हो सजा मिले, तेथी पईरे रेहणा।

⁵ तुस्से ये भी जाणहां ऐं कि बौह्त पैहले एह्ड़े लोक थे जो परमेसरा रे डरा बगैर जिन्दगी जीहां ऐं थे, होर परमेसरे तिन्हा लोका रे बुरे कामा जो भी नजरअंदाज नी कितेया। एता रे बजाय परमेसरे तिन्हो सजा दिती होर जल प्रलय कुराई किन्हें पूरी धरती जो भरी दितेया, जेबे तक कि सारे लोक मरी नी गये। पर तिन्हें नूह बचाया जो परमेसरा री नजरा मन्झ धर्मी बणने रा प्रचार करहा था, होर तेस साउगी सात आदमी भी बचाए।

⁶ तुस्से ये भी जाणहां ऐं कि परमेसरे सदोम होर गमोरा होर सैहरा मन्झ रैहणे वाले लोका जो सजा दिती, क्यूंकि तिन्हें बुरे काम कितिरे थे, इधी कठे परमेसरे स्यों पूरी तरहा फुखी किन्हें सुआहा बणाई दिते। एह्ड़ा करी किन्हें दसेया कि जो लोक परमेसरा जो नी मन्नदे तिन्हारा क्या हूंणा।

⁷ पर सदोम सैहरा जो नास करणे ले पैहले तिन्हें लूता जो, जो धर्मी माह्णुं था तेथी रे काढी किन्हें तेसरी जिन्दगी बचाई, लूत बौह्त दुःखी हुएआ हूँगा, क्यूंकि सदोमा सैहरा रे लोके कोई भी व्यवस्था रा पालन नी कितेया होर बेज्जती वाल़ा काम कितेया।

⁸ क्यूंकि लूत धर्मी माह्णुं था पर से रोज बुरे लोका साउगी रैहया था होर तेसरा खरा दिल तिन्हारे बुरे कामा जो देखी-देखी किन्हें, होर सुणीं-सुणीं किन्हें दुःखी हुंहाँ था।

⁹ इन्हा गल्ला ले जो परमेसरे कितिरा आस्से जाणांहे कि परमेसर आपणे लोका जो परखणी ले बचाणा जाणहां, होर न्याय रे ध्याड़े तक बुरे लोका जो सजा देणा भी जाणहां।

¹⁰ परमेसर सभ बुरे लोका जो सजा देणी पर तेस तिन्हो झूठे उपदेस स्खाणे वाले जो पक्का सजा देणी। जो आपणे बुरी होर पापा री अभिलासा रे मताबक जिन्दगी जीये होर परमेसरा रे हका जो आपणे जिन्दगी ले नकारा ऐं। स्यों ढीठ होर घमंडी ऐं, तिन्हो स्वर्गा रे महिमामय प्राणिया रे बारे मन्झ बुरा बोलणे ले डर नी लगदा।

¹¹ तेबे बी स्वर्गदूत जो सक्ति होर सामर्था मन्झ इन्हा झूठे उपदेसा जो स्खाणे वाले ले बडे ऐं, प्रभु रे साम्हणें तिन्हा पर दोस ल्गांदे टैम बुरा भला नी बोलदे।

¹² पर ये स्खाणे वाले बेअक्ल जानवरा साहीं ऐं, क्यूंकि ये जानवर आपणे दिमागा ले कुछ नी सोचदे होर सिर्फ पकड़े होर मारे जाणे रे कठे जम्मिरे; ये लोक जो तिन्हारे मना मन्झ आये तेह्ड़ा ही करहे, होर जिन्हा गल्ला रे बारे मन्झ नी समझ्दे तिन्हारे बारे मन्झ भी बुरा भला बोल्हा ऐं, परमेसरा सच्चे स्यों इंहां ही नास करी देणे, जिहां लोक जानवरा जो मारी दे।

¹³ होर जो बुराई तिन्हें कितिरी तेता रे बदले तिन्हारा ई नास हूंणां। तिन्हा जो ध्याड़े-दप्हैरा सुख विलास करणा खरा लग्हा। स्यों तुस्सा रे बीचा मन्झ एक कलंक होर दाग ऐं, जेबे स्यों तुस्सा साउगी ही संगती मन्झ खाहें पिहां ऐं, तिन्हा जो तुस्सा जो धोखा देणे मन्झ बौह्त खुसी हुईं।

¹⁴ जेस्सा भी जन्नानी स्यों देखे सभी किन्हें व्यभिचारा करणा चाहे, होर स्यों पाप किते बगैर नी रुकी सकदे। होर जो मसीह पर पूरा भरोसा नी रखदे एह्ड़े लोका जो स्यों धोखा देई किन्हें तिन्हा ले पाप कुराहें। होर कधी नी मरणे वाले लालच री वजहा ले परमेसरा तिन्हो सजा देणी।

¹⁵ होर स्यों ठीक काम नी करदे, होर जिहां बौह्त पैहले बओरा रे मह्ठे बिलामे जो बुरे काम कितिरे थे, तिन्हें भी एह्ड़ा करणा सुर्हू करी दितिरा। तेस जो पैसा कमाणे रे कठे लोका ले पाप कुराणा बांका लगहा था।

¹⁶ पर परमेसरे बिलामा जो तेसरे बुरे कामा रे कठे प्रुआचेया। तेसरी गधीए माह्णुं री बोली मन्झ बोली किन्हें से नबी रोकेया की से बुरा काम नी करहे।

¹⁷ ये झूठे उपदेस स्खाणे वाले लोक सुक्किरे पाणी रे छुड़ु साहीं बेकार ऐं, होर एह्ड़े बादल साहीं ऐं जेस जो बरखा ले पैहले ही तूफान डूआई किन्हें लई जाहाँ; होर इधी कठे स्यों एह्ड़े जिन्हा ले कोई फायदा नी आ। परमेसरे तिन्हारे कठे एह्ड़ी जगहा त्यार कितिरी जेथी पूरी तरहा न्याहरा आ।

¹⁸ जेबे स्यों लोको स्खायें, स्यों बेकार होर बडयाई री गल्ला जो बोल्हे। स्यों बोल्हे कि स्यों आपणी सरीरा री इच्छा रे मताबक बेज्जत करणे वाली सारी गल्ला जो करही सक्हा ऐं। होर जिन्हें लोके ऐबे-ऐबे बुरे काम करणा छाडी किन्हें विस्वासी बणिरे, स्यों तिन्हा जो धोखा देई किन्हें वापस पाप करणे रे कठे हिम्मत दे।

¹⁹ स्यों लोका किन्हें वादा करहे कि अगर स्यों तिन्हारे मताबक चलगे ता जो कुछ चाहें से करी सके, क्यूंकि तिन्हारा कोई स्वामी नी आ। पर सच्चाई ता येई कि स्यों आपु भी आपणे पापा रे स्वभावा रे गुलाम ऐं। क्यूंकि जो आदमी जेस ले हारी जाहाँ, से तेसरा गुलाम बणी जाहाँ।

²⁰ होर जेबे लोक यीसू मसीह जो आपणा प्रभु होर उद्धारकर्ता रे रूपा मन्झ अपनाई ले तेबे स्यों एस संसारा री कई किस्मा री बुराई ले बची निकले। पर दबारा ऐबे स्यों तिन्हा बुरे कामा मन्झ फसी गईरे होर स्यों बुरी गल्ला तिन्हो हराई देईं। ता तिन्हारी ऐबे री हालत जेबे की तिन्हें मसीह जो नकारी दितेया, पैहल्की हालता ले बुरी हूणीं जेबे की स्यों विस्वासी नी थे।

²¹ मेरे बोलणे रा मतलब ये आ कि परमेसरा तिन्हा लोका जो ज्यादा सजा देणी जिन्हें मसीह छाडी दितिरा, एता रे बजाय तिन्हा लोका ले जिन्हें से कधी अपनाईरा नी। तिन्हारे कठे येई ठीक था कि तिन्हा जो पता नी लगदा कि किहाँ तिन्हा धार्मिकता री जिन्दगी जीणी। पर ऐबे स्यों जाणांहे कि क्या सही आ, पर तिन्हें परमेसरा रे हुकमा जो टाल्ली दितिरा जो आस्से चुणिरे चेले तिन्हो सखाईरा था।

²² जो कुछ इन्हें झूठे उपदेस स्खाणे वाले कितिरा, तिन्हा पर ये कहावत ठीक बैठ्हा ई कि, “कुत्ता आपणी उल्टी आप्हुए चाट्हा” होर “नहाईरी सुअरनी चिकड़ा मन्झ दबारा वापस चली जाहीं।”