2 कुरिन्थियो 7 - मंडयाली नंऊँआं नियम

¹ हे लाडले भाईयो होर बैहणो जेबे कि परमेसरे आस्सा किन्हें ये वादा कितिरा कि आस्से तेसरे लोक हूंणे। ता आऊआ, आस्से आपणे सरीर होर आत्मा री सब गंदगी जो दूर करहे; होर परमेसरा रा सम्मान करदे हुए पूरी तरहा पवित्र जिन्दगी जीणे री भी कोसिस करदे रहुआ।

पौलुसा री खुसी

² तुस्से आस्सा किन्हें पूरा दिला ले प्यारा करहा। आस्से ना ता केसी किन्हें अन्याय कितेया, ना केसी रा कुछ बिगाड़ेया, होर ना केसी किन्हें बईमानी किती।

³ हांऊँ ये तुस्सा पर दोस लगाणे रे कठे नी बोल्दा लगिरा: क्यूंकि हांऊँ पैहले ई बोली चुकिरा कि, हांऊँ तुस्सा किन्हें पुरे दिला किन्हें प्यार करहा होर आस्सा रा तुस्सा रा जीणे-मरणे रा साथ आ।

⁴ हांऊँ तुस्सा किन्हें बड़ी हिम्मत रखी किन्हें बोल्या करहा, मुंजो तुस्सा पर बौह्त गर्व आ। मुंजो बौह्त तस्सली मिलिरी, आपणे सारे दुःखा मन्झ हांऊँ खुसी किन्हें भरपूर रैंहयां।

⁵ क्यूंकि जेबे आस्से त्रोआस सैहरा जो छाडी किन्हें मकीदुनिया ईलाके मन्झ आये, तेबे भी आस्सा जो चैन नी मिल्या, बल्की आस्से चहुँ तरफा ले दुःख पाहें थे; बाहर लड़ाई-झगड़े थे, होर मना अंदर डर था।

⁶ पर परमेसर दुआस लोका जो तस्सली देआ। होर तितुसा जो आस्सा वाले भेजी किन्हें परमेसरे आस्सा जो एह्ड़ी ही तस्सली दितिरी।

⁷ ये सच्च आ कि तितुसा किन्हें मिली किन्हें आस्से खुस हुए। पर एता ले बढ़ी किन्हें आस्से एस गल्ला पर खुस हुए कि तुस्से लोके तेस जो बौह्त हिम्मत दिती। होर तिन्हें मुंजो दसेया कि तुस्से मेरे किन्हें मिलणे री कितनी इच्छा रख्हा ऐ, तुस्से मेरे कठे दुखी ऐं होर मेरे बचाऊआ रे कठे कितनी लगन रखायें। इन्हा गल्ला ले मुंजो होर भी खुसी हुई।

⁸ हांऊँ नी पछताया कि मैं तुस्सा जो ये गंभीर चिठ्ठी लिखी, हालांकि तेता ले तुस्सा जो बौह्त दुःख पुज्हेया। जेबे मैं देखेया कि कुछ टैमा तक तुस्सा जो एस चिठ्ठी री वजहा ले दुःखी हुई गये, तेबे भले ही हांऊँ तेस्सा गल्ला ले पछताया पर ऐबे हांऊँ खुस आ।

⁹ पर इधी कठे नी कि तुस्सा जो दुःख पुज्हेया बल्की इधी कठे कि तुस्से तेस दुःखा री वजहा ले पाप करणा छाडी दितेया। क्यूंकि तुस्सा रा दुखी हूंणा परमेसरा री इच्छा रे मताबक था, ताकि आस्सा री तरफा ले तुस्सा जो केसी गल्ला मन्झ नुक्सान ना पूजे।

¹⁰ क्यूंकि आस्से जो दुःख परमेसरा री इच्छा ले सहे, तेसरी वजहा ले आस्सा पाप करणा छाडा ऐ, होर परमेसरा आस्सा रा उद्धार करणा, होर इधी कठे ये दुखा री गल नी। पर जो दुःख संसारा रे लोका जो तिन्हारे पाप करणे री वजहा ले हुआ, से तिन्हो अनंतकाला री मौता वखा जो लेई जां क्यूंकि स्यों पाप करणा नी छाडदे।

¹¹ एस गला जो सोचा कि परमेसरा री इच्छा ले जो दुःख तुस्से सहेया तेता ले तुस्सा री जिन्दगी मन्झ क्या-क्या बदलाऊ आईरा; एता ले तुस्सा रे अंदर हिम्मत बढ़ी गई, आपणे आपा जो बेकसूर जाहिर करणे री इच्छा, होर अन्याय रे तरफ तुस्सा रा गुस्सा, दुखा रे बीचा चतन्न रहणा, मेरे किन्हें मिलणे री बढ़ी इच्छा, परमेसरा री सेऊआ री तरफ तुस्सा री फिकर, होर गलत माह्णुं जो सजा देणे रे कठे तुस्से त्यार ऐं। इन्हा गल्ला रे ज्रीए तुस्से ये साबित कितेया कि सब गल्ला जो ठीक-ठीक करणे मन्झ तुस्से कोई कमी नी छाडी।

¹² हालांकि मैं ये गंभीर चिठ्ठी न्याय होर अन्याय करणे वाले रे कठे नी लिखिरी, पर इधी कठे लिखी कि तुस्से परमेसरा रे साम्हणें आपु ही देखी लो कि तुस्से आस्सा रे प्रति कितने सच्चे।

¹³ आस्सा जो इन्हा गल्ला ले हिम्मत मिली। आस्सो एस गल्ला ले होर भी खुसी हुई जेबे आस्से तितुस देखेया, होर तिन्हें आस्सो एस गल्ला रा होंसला दितेया कि, ऐबे तेस जो केसी भी गल्ला री फिकर नी, क्यूंकि तिन्हें ये देखेया कि तुस्सा सभीरा मेरे कठे केडा लगाऊ आ।

¹⁴ क्यूंकि अगर मैं तितुसा रे साम्हणें तुस्सा रे बारे मन्झ कुछ गर्व कितेया हो, ता हांऊँ सर्मिन्दा नी हुआ, बल्की जिहां आस्से तुस्सा साउगी सब गल्ला सच्च -सच्च बोली दिती थी, तिहां ईं आस्सा रा गर्व जाहिर करणा तितुसा रे साम्हणें भी सच्च साबित हुआ।

¹⁵ जेबे तितुसा जो याद आहूँआं ईं तुस्से सभ केह्ड़े आज्ञाकारी थे, होर किहाँ तुस्से डर होर आदरा किन्हें तेसरा स्वागत कितेया था; तेबे तेसरा प्यार तुस्सा सभी रे कठे होर भी ज्यादा बढ़ी जाहाँ।

¹⁶ मुंजो एस गल्ला री भी खुसी हुंहाँ ईं कि, ऐबे हांऊँ हर गल्ला मन्झ तुस्सा रा भरोसा करी सक्हा।