2 कुरिन्थियो 5 - मंडयाली नंऊँआं नियमआस्सा रा स्वर्गीय घर 1 क्यूंकि आस्से जाणहां ऐं कि, एस संसारा मन्झ आस्सा रा सरीर एक डेरे साहीं आ, जेस मन्झ आस्से रहे। होर जेबे ये डेरा ढई जाणा यानि आस्सा मरी जाणा, ता आस्सा जो परमेसरा री तरफा ले स्वर्गा मन्झ एक एह्ड़ा डेरा मिलणा, जो माह्णुंआं रे हाथा रा बणाईरा नी पर जुग-जुग रे कठे हूंणां। 2 एस सरीरा मन्झ रैहन्दे हुए ता आस्से रोहां धोहां ऐं, होर बड़ी इच्छा रख्हा ऐं; कि आस्सा आपणे स्वर्गीय सरीर पैन्ह्णा। 3 होर जेबे आस्सो तेस स्वर्गीय सरीरा जो पाई लैन्घे, तेबे आस्से तेस सरीरा बगैर नी पाए जाणे। 4 होर आस्से ऐस सरीर रूपी डेरे मन्झ रैहन्दे हुये बोझा हेठ दभी किन्हें रोहें-पिट्हा ऐं; क्यूंकि आस्से इन्हा सांसारिक सरीरा जो छाडणा नी चाहन्दे, पर आस्से ये चाहें कि परमेसर आस्सो स्वर्गीय सरीर देई दे, ताकि ये मरणे वाले सरीर नी मरणे वाले सरीरा मन्झ बदली जाए। 5 से परमेसरा आ, जिन्हें आस्से एस नंऊँऐं सरीरा जो पाणे रे कठे त्यार कितिरा। तिन्हें आस्सो पवित्र आत्मा ये पक्का करणे रे कठे दितिरी कि तेस सच्चे ही आस्सो नंऊँआं सरीर देणा। 6 इधी कठे आस्से हमेसा हिम्मत रख्हा ऐं होर ये जाणहां ऐं; कि जेबे तक आस्से सरीरा मन्झ रैंहयां ऐं, तेबे तक आस्से परमेसरा साउगी स्वर्गा मन्झ नी रैहन्दे। 7 क्यूंकि आस्से प्रभु यीसू रे रूप जो देखी किन्हें नी, पर तेस पर विस्वास रखणे री वजहा ले जीएं। 8 इधी कठे आस्से हिम्मत रख्हा ऐं, होर मरणे रे बाद एस सरीरा जो छाडी किन्हें प्रभु साउगी रैंह्णां होर भी खरा समझ्हा ऐं। मसीह री न्यायगद्दी 9 ऐस वजहा ले आस्सा रे मना री इच्छा येई कि, चाहे आस्से स्वर्गा मन्झ परमेसरा साउगी रहे, चाहे धरती मन्झ तेस ले दूर रहे, पर आस्से तेस जो खरे लगदे रहे। 10 क्यूंकि ये जरूरी आ कि, मसीह आस्सा सभिरा न्याय करहे, ताकि हर एक माह्णुं आपणे-आपणे भले बुरे कामा रा इनाम मिले, जो तिन्हें आपणे सरीरा रे ज्रीए कितिरे हो। परमेसरा किन्हें मेल मिलाप री सेऊआ 11 इधी कठे प्रभु रा डर मनी किन्हें आस्से लोका ले अर्ज करहा ऐं कि स्यों सच्चाई पर विस्वास करहे, होर परमेसरा जाणहां कि सच्चे आस्से कुणहें। होर मेरी उम्मीद येई कि, सच्चमुच तुस्से भी आपणी अन्तरात्मा मन्झ आस्सो जाणी लो। 12 आस्से फेरी भी आपणी बड़ाई तुस्सा रे साम्हणें नी करदे बल्की आस्से आपणे बारे मन्झ तुस्सा जो गर्व करणे रा मौका देहां ऐं, ताकि तुस्से तिन्हा लोका जो जवाब देई सको, जो मना पर नी, बल्की बाहरी कामा पर बडयाई करहा ऐं। 13 अगर कोई बोले कि आस्से होसा मन्झ नी ऐं, ता से परमेसरा रे कठे ऐं; होर अगर कोई बोले आस्से स्याणें ऐं, ता से तुस्सा रे कठे ऐं। 14 क्यूंकि मसीह रा प्यार आस्सा जो मजबूर करहा, इधी कठे आस्से पूरा विस्वास करहे कि जेबे मसीह सभी लोका रे कठे मरेया ता आस्से ये भी विस्वास करहे कि आस्से भी आपणी पुराणी जिन्दगी रे कठे मरी चुकिरे। 15 होर मसीह इधी कठे सभी रे कठे मरी गया, ताकि जो लोक जिउंदे ऐं, स्यों अगे जो आपणे कठे नी जीये बल्की तेसरे कठे जीये, जो तिन्हारे कठे क्रूसा प्रयाल्हे मरेया होर दबारा जिउंदा हुआ। मसीह मन्झ नौंईं सृस्टी 16 इधी कठे ऐबे ले आस्से केसी जो भी माह्णुंआं री नजरा ले नी देखणा, होर अगर आस्से मसीह जो भी माह्णुंआं री नजरा ले देखे थे, पर ऐबे ले आस्सा से एह्ड़ा नी देखणा; क्यूंकि ऐबे आस्से तेस जो जाणी गईरे। 17 इधी कठे अगर कोई मसीह पर विस्वास करहा, ता से नौंईं सृस्टी ई। पुराणी गल्ला बीती गई; होर स्यों सभ गल्ला नौंईं हुई गईरी। 18 होर सब गल्ला परमेसरा री तरफा ले ई, जिन्हें मसीह रे ज्रीए आस्सा रे साउगी मेल मिलाप कितेया। होर आस्सा जो, लोका किन्हें परमेसर साउगी मेल मिलापा कुराणे री सेऊआ सौंपी दिती। 19 होर एस नौखे मेल मिलापा री खबर जो आस्सो सौंपीरी से येई कि परमेसरे मसीह रे ज्रीए संसारा रे लोका रा मेल मिलाप आपणे साउगी करी लया। परमेसरे लोका रे पापा रा दोस तिन्हा पर नी ल्गाया होर स्यों माफ करी दिते। 20 इधी कठे आस्से मसीह रे राजदूत ऐं। मानो परमेसर लोका ले आस्सा रे ज्रीए अर्ज करहा कि स्यों तेस मेल मिलापा री खबरा जो अपनाई ले: आस्से मसीह री वखा ले अर्ज करहा ऐं कि, परमेसरा साउगी मेल मिलाप करी लऊआ। 21 मसीह जो पापा ले अनजाण था, तेस जो ही परमेसरे आस्सा रे कठे पापी बणाया, ताकि आस्से परमेसरा री नजरा मन्झ धर्मी माह्णुं बणी जाये, क्यूंकि मसीहे आस्सा रे पापा री सजा जो आपणे गास लेई लितिरा। |
This work is licensed under Creative Commons Attribution-ShareAlike 4.0 License.