2 कुरिन्थियो 3 - मंडयाली नंऊँआं नियम

मसीही लोक एक जिउंदी चिठ्ठी

¹ हांऊँ आपणे बारे मन्झ इन्हा गल्ला जो लिखी किन्हें आपणी बढ़ाई नी करणा चाहन्दा। या आस्सा जो बाकि लोका साहीं सिफारिसा री चिठ्ठीया तुस्सा वाले ल्याऊणी या तुस्सा ले लेणे री भी ज्रूरत नी।

² पर तुस्से आपु चिठ्ठीया ई जो आस्सा री सिफारिस करी, जो आस्सा रे दिला पर लिखी गईरी। ताकि तुस्सा रे बीचा आस्सा रे भले कामा जो सब माह्णुं पछयाणी सके होर पढ़हा सके।

³ ये ता सुझ्दी गल ई कि, तुस्से तेस चिठ्ठीया साहीं ऐं जो मसीह वखा ले ई, होर आस्सा री सेऊआदारा ई रा इनाम आ। जो स्याही किन्हें पात्थरा री पटिया पर नी, बल्की जिन्दे परमेसरा री आत्मा रे ज्रीए दिला री मांस रूपी पटिया पर लिखीरी।

पौलूस री लायक हूंणा

⁴ आस्से एह्ड़ा इधी कठे लिख्हा ऐं कि आस्से मसीह रे ज्रीए परमेसरा पर भरोसा ऐं।

⁵ ये नी कि, आस्से आपणे आप ऐस लायक ऐं कि, आपणी तरफा ले केसी गल्ला रा विचार करी सक्हा ऐं; पर परमेसरा आस्सो आपणी योग्यता देआ।

⁶ जिन्हें आस्से नौंईं वाचा रे सेऊआदार हूणें रे लायक भी किते, मूसा री लिखिरी व्यवस्था रे सेऊआदार नी बल्की आत्मा रे सेऊआदार ऐं; क्यूंकि लिखिरी व्यवस्था मारहा ई, पर पवित्र आत्मा अनंत जिन्दगी देहां ई।

नौंईं वाचा रा तेजोमय

^7-8 पात्थरा री पटिया पर लिखिरी मूसा री व्यवस्था जेबे इस्राएल देसा रे लोको दितिरी थी, तेबे परमेसरा री महिमा जाहिर हुई थी। इस्राएल देसा रे लोक मूसा रे मुंहा वखा जो ज्यादा देरा तक नी देखी पाए हालांकि तेसरे चेहरे रा तेज ज्यादा देर तक नी रैहया। अगर मौत वखा जो लेई जाणी वाली मूसा री व्यवस्था पर आधारित सेऊआ इतनी ज्यादा तेजोमय थी, तेबे नौंईं वाचा पर आधारित सेऊआ होर भी ज्यादा तेजोमय हूणीं।

⁹ लोका जो दोसी बनाणे वाली मूसा री व्यवस्था जेबे तेजोमय हुई, ता नौंईं वाचा जो लोका जो परमेसरा री नजरा मन्झ धर्मी माह्णुं बणाई, से होर भी तेजोमय हूणीं।

¹⁰ मूसा री व्यवस्था जो तेजा किन्हें भरी हुईरी थी, ऐबे तेस नौंईं वाचा री तेजा रे साम्हणें जो तेस ले भी ज्यादा बढ़ी किन्हें तेजस्वी ई, बगैर तेजा री हुई गईरी।

¹¹ व्यवस्था तेस तेजा साउगी दितिरी जो घटदी जाहीं थी, पर नौंईं वाचा रा तेज होर भी ज्यादा बढ़ी किन्हें आ क्यूंकि तेस्सा कधी भी नी घटणा।

¹² इधी कठे एह्ड़ी आस रखी किन्हें आस्से बड़ी हिम्मता साउगी बोल्हा ऐं,

¹³ होर आस्से मूसा साहीं नीं, जिन्हें आपणे मुंहा पर परदा पाइरा था ताकि इस्राएल देसा रे लोक तेस तेजा जो नी देखी सको जो घटदे हुये मजे-मजे खत्म हुंदा लगिरा था।

¹⁴ पर स्यों नर्क्कले हुई गईरे थे, क्यूंकि आज तक पुराणे नियम पढ़ने रे टैमा तिन्हारे दिला पर सेई परदा पइरा रैंहयां; पर से परदा मसीह मन्झ विस्वास करणे ले उठी जाहाँ।

¹⁵ होर आज तक जेबे केबे मूसा री व्यवस्था पढ़ी जाहीं, ता तिन्हारे दिला पर परदा पइरा रैंहयां ताकि स्यों व्यवस्था री गल्ला जो पूरी तरहा नी समझी सके।

¹⁶ बल्की जेबे केबे तिन्हा प्रभु यीसू पर विस्वास करघे, तेबे से परदा उठी जाणा।

¹⁷ प्रभु ता आत्मा आ: होर जेथी केथी प्रभु रा आत्मा आ तेथी व्यवस्था री गल्ला ले अजादी ई।

¹⁸ क्यूंकि आस्से सभ सीसे साहीं उघाड़े चेहरे साउगी प्रभु री महिमा जो जाहिर करहे। ये महिमा प्रभु री वखा ले ई जो पवित्र आत्मा रे रूपा मन्झ आस्सा वाले ई, होर आस्से तेस ई तेजस्वी रूपा मन्झ थोड़ा-थोड़ा करी किन्हें बदल्दे जाहें।